Osiya 1 - Amashiwi Aba Lesa

¹ Ndi isiwi lyaŵaYawe ilyaficile kuli Osiya, umwana wakwe Beyeli, pansiku syikawe Usaya, naJotami, naEyasi, naEsikaya, imfumu syakuJuda, napansiku syakwe Jeloboami, umwana wakwe Joasi, imfumu yakuIsilaeli.

² Ili ŵalaŵile ŵaYawe kuli Osiya pakutaŋga, ŵaYawe ŵalilaŵile kuli Osiya ati: Koya, ulipokele umukasi waŵucencemesi neŵana ŵaŵucencemesi; pakuti icalo cilukucito'ŵucencemesi uŵukulu, ukulukufuma kuli ŵaYawe.

³ Fyopele'fyo aliile nekumupoka Gomeli, umwana umwanakasi wakwe Dibilayimi; naye nekwimita nekumufyalila umwana umwalalume.

⁴ Popele ŵaYawe ŵalilaŵile kuli ye ati: Mwilike isina lyakwe ati niJesileyeli; pakuti pakupita impindi inini, eli ŋkafutila imilopa yakuJesileyeli paŋanda yakwe Jiyu, nekupesya uŵufumu bwaŋanda yakuIsilaeli.

⁵ Popele pakasuŵa ako pakaŵa ati ŋkatoŵa uŵuta bwakuIsilaeli mumukolo wakuJesileyeli.

⁶ Popele apo umwanakasi waliimitile liŵili nekufyala umwana umwanakasi. Peŋka ŵaYawe ŵalilaŵile kuli Osiya ati: Mwilike isina lyakwe ati niLo-lukama; pakuti ukufuma-po pano nsikalukuli neŋkumbu paŋanda yakuIsilaeli, ati mbafitulucile nekantu.

⁷ Sombi ŋkaŵa neŋkumbu paŋanda yakuJuda, nekuŵapulusya nemakosa aŵaYawe Lesa waŵo; tekuti mbapulusye kuŵuta neli nikumpoko neli nikukulwa neli nikuli ŵakafwalo neli nikuŵapali ŵakafwalo.

⁸ Lomba, ili wamusumwine Lo-lukama, umwanakasi waliimitile nekufyala umwana umwalalume.

⁹ Popele ŵaYawe ati, Mwilike isina lyakwe ati niLoami; pakuti mweŵo tamuli ŵantu ŵanjii kaŵili neŵo nsikalukuli niŵaLesa ŵenu.

¹⁰ Naŋgaŵa nifyefyo ubwinji bwaŵana ŵakwe Isilaeli ŵukalukuli koti museŋga wakucisiŵa, uŵutabwisi ukwesiwa neli kupendwa; popele apo-pantu apo fyalaŵilwe ati, Mweŵo tamuli ŵantu ŵanji, pakaŵa ati fikalaŵilwa kuli ŵo ati, Mweŵo muli ŵana ŵaŵaLesa ŵamweo.

¹¹ Popele aŵana ŵakwe Juda neŵana ŵakwe Isilaeli ŵakaŵuŋganisiwa pamo, naŵo ŵakaliikalicila imfumu imo, nekunina ukulukufuma mucalo; pakuti akasuŵa kakuJesileyeli kakalukuli kakulu.