Neyamiya 1 - Amashiwi Aba Lesa

¹ Aya emasiwi akwe Neyamiya umwana wakwe Yakaliya. Lomba pamwensi waCisalefi, pamwaka wamakumi aŵili, ili nali muSyusyani akatanino,

² paliŵele ati Yanani umbi umukwaŵesu walificile, ye pamo neŵalalume ŵambi aŵakufuma kuJuda. Popele naliŵepwisye ifyakuŵaJuda aŵapulucilepo, aŵasyele-po pali ŵukaili, nefyakuJelusalemi.

³ Naŵo ŵalilaŵile kuli neŵo ati, Aŵo aŵasyele-po pali ŵukaili umo mukalo ŵalukupeŋgo'kwakuti nekulukupufiwa; kaŵili iliŋga lyakuJelusalemi lilitoŵaicile, nefiŵi fyakuko nafyo nekociwa kumulilo.

⁴ Popele, ili naumfwile ayo-masiwi, paliŵele ati naliikele pansi, nekulukulila nekulukuŵombomene insiku simbi; peŋka nalukulifina nekulukutembela pamenso aŵaLesa ŵakwiulu,

⁵ nekulaŵila ati, Ndukumukombeteleni mweŵaYawe, Lesa wakwiulu, mweŵaLesa aŵakulu aŵakutinisya, aŵacita ifyakulayana neŋkumbu kuli ŵaŵo aŵalukuŵatemwa nekulukwalama amafunde aŵo;

⁶ ukutwi kwenu ŋgakukutike pano, nemenso enu nekutapuka, ati mumfwe ukutembela kwamupyunjisi wenu, uko ndukutembela pamenso enu pampindi ino, akasuŵa neŵusiku, pakuti paŵana ŵakwe Isilaeli aŵapyunjisi ŵenu, ili ncifisulula ifyakuŵifya fyaŵana ŵakwe Isilaeli, ifyo twalukumuŵifisyeni; icine neŵo neŵakuŋanda yaŵatata twaŵifya.

⁷ Twamucitileni ifyakuŵeyeko'kwakuti, nekuŵulo' kulama amafunde nefyakufunda nefyakusololola ifyo ifi mwafundile umupyunjisi wenu Mose.

⁸ Ndukumukombeteleni ati mulaŋguluke isiwi ilyo mwamufundile Mose umupyunjisi wenu ati, Kani mukacite ifyakusilulula, ŋkamupalaŋganisyeni pakati paŵenafyalo;

⁹ sombi kani mukabwelele kuli neŵo, ukulukulama amafunde anji nekulukwacita, naŋgaŵa'ti aŵakutamfiwa ŵenu ŵali ukupelele lukoso kwiulu, naŋgaŵe'fyo ŋkaŵaŵuŋganya ukuŵafyumya-ko'ko, nekuŵafisya kuntu uko uku nasalulula ati isina lyanji liikale-ko.

¹⁰ Pano lomba aŵa eŵapyunjisi ŵenu, eŵantu ŵenu, aŵo mwalubwile kumakosa enu akulu nakukuŵoko kwenu ukukosele.

¹¹ MweŵaYawe, ndukumukombeteleni ati ukutwi kwenu kukutike ukutembela kwanji nemupyunjisi wenu, nekutembela kwaŵapyunjisi ŵenu, aŵatemwo'kutonda isina Iyenu; ndukutembela kaŵili kuli mweŵo ati munsyucisye neŵo nemupyunjisi wenu lelo, munsumine ati mbe neŋkumbu pamenso awuyu-muntu. (Lomba neŵo nali wakwipintile'mfumu iŋkomeci.)