Mika 1 - Amashiwi Aba Lesa

¹ Ili lisiwi lyaŵaYawe ilyaisile kuli Mika umuMolasiti, pansiku syakwe Jotami naEyasi naEsikaya, imfumu syakuJuda, ilyo abwene ilyakuSamalya nakuJelusalemi.

² Umfweni mweŵantu mwense; ukutike wecalo capansi, nafyo fyonse ifilimo; ŵaSikulu Yawe ŋgaŵaŵe nimboni yakumusinineni, ŵaSikulu ukufuma kwitempuli lyaŵo iliswetelele.

³ Pakuti, ŵoneni, ŵaYawe ŵalukufuma pantu paŵo; ŵakaseluka nekunyanta-po pantu apasuntucile pacalo.

⁴ Popele amapili akasuŋguluka pansi pali ŵo, nemikolo nayo nekupandulwa, koti cipopo kumulilo, nakoti menda akwitulwilwa mumukolo.

⁵ Fyonse'fyo nipakuti pakusilulula kwakwe Yakobi, napakuti pafyakuŵifya fyaŋanda yakuIsilaeli. Ukusilulula kwakwe Yakobi kundo? Kansi takuli niSamalya? Kaŵili pantu apasuntucile pakuJuda pando? Kansi tapali niJusalemi?

⁶ Pakuti pali fyefyo ŋkaleŋgesya ati Samalya aŵe koti mupili mwiŵala nakoti milala mwiŵala lyamifaina; kaŵili ŋketulwila mumukolo amabwe akuko, nekufisulula ifyapansi fyakuko.

⁷ Kaŵili ifiŵumbwaŵumbwa fyakwe ifyakuŵaswa fikasansalwa fyonse; nemalambulo akwe nao nekociwa onse kumulilo; netuluwi twakwe nato ŋkatonala tonse; pakuti afiwuŋganya kumalambulo amwanakasi umucencemesi; lomba nikumalambulo amwanakasi umucencemesi eko fikabwelela.

⁸ Pakuti pali fyefyo ŋkalila nekukuwa; ŋkalukwenda ili mfulile nekulukulondwa; ŋkalukulila koti niŵamumbwe, nekupama-mo nemisowa koti nimpye.

⁹ Pakuti ifiŵeŋga fyakwe tekuti fikapole; pakuti caisa nakuJuda; cafika nakumusiko wakuŵantu ŵanji, ekuJelusalemi.

¹⁰ Tekucitulisya muGati, neli kulila neli panini. KuBetile-afila nalialaŋgene mwifukutu,

¹¹ Kamupita lukoso ukulukulondwa nensoni, mwenjikale syakuSyafili. Injikale syakuSayanani tasifumine, Ukulila ukwakuBeta-yeseli kukafumya kuli mweŵo injimino yakuko,

¹² Pakuti injikale syakuMaloti silukulikutula ili sipembelela ukuwama; pakuti ukuŵifya kwaseluka kuli ŵaYawe ukufika nakumusiko uwakuJelusalemi.

¹³ Kamukaka ŵakafwalo ŵaluŵilo kuŋgolofwana, mwenjikale syakuLacisi; ye kutatika kwafyakuŵifya kumwana umwanakasi wakuSayoni; pakuti ukusilulula kwakuIsilaeli kwalibwenwe muli mweŵo.

¹⁴ Pakuti pali fyefyo mukapela impese yakulekana kuli Molesyeti-gati. Amananda akuAcisibi akaŵa cakusitumpaika imfumu syakuIsilaeli.

¹⁵ Mwenjikale syakuMalesya, ŋkamuleteleni liŵili uwakumukomekeni; uŵuleme bwakuIsilaeli ŵukafika nakuAdulami.

¹⁶ Mulileŋgesye mapala, muŵeye nemisisi pakuti paŵana ŵakusemba kwenu; kamukusya amapala koti Iyuni; pakuti ŵakafuma kuli mweŵo mukuya muli ŵukaili.