Mako 1 - Amashiwi Aba Lesa

¹ Ukutaŋga ukwaCeŵo leiweme icakuli ŵaYesu Klistu, Umwana waŵaLesa.

² Koti nifyopele'fyo ifyalembelwe mwibuku lyakwe Yisaya uwakusimika, ati: Ŵona! Ndukutuma iŋkalamba yanji iyakukutanjilila, Eikaansika insila yoŵe;

³ Isiwi lyaulukuŵilicisya mumpaŋga ati: Ansikeni umwakupita ŵaSikulu, Mulukusilunjika insila syaŵo.

⁴ Yoane aliisile nekulukuŵatisya aŵantu mumpaŋga, nekulukusimika ukuŵatisya ukwakwaluluka ukwakufitulucilwo'kuŵifya.

⁵ Lomba ŵaliile kuli ye ŵonse aŵamucalo caŵena-Juda, naŵaŵo ŵonse aŵakuJelusalemi; nekuŵatisiwa kuli ye munika yaJodeni, ili ŵatulisya ifyakuŵifya fyaŵo.

⁶ Uyo-Yoane alukufwala nemasako aŋgamela nemukwandala muluŵunda, nekulukulya insye neŵuci.

⁷ Naye alukusimika ati: Panuma panji palukwisa uncilile neŵo uŵukulu, uyo insiŋga isyaŋkwaŵilo syakwe nsielelwe neŵo ukwinama ukusikakulula.

⁸ Neŵo namuŵatisyeni mumenda, sombi uyo akamuŵatisyeni muMupasi Uswetelele.

⁹ Lomba pansiku isyo paliŵele ati ŵaYesu ŵalifumine kuNasaleti mucalo caGalili, nekuŵatisiwa kuli Yoane muJodeni.

¹⁰ Peŋka ili ŵaiŵucile mumenda, ŵalipulilile ukuŵona kwiulu kwapanduka, neMupasi koti niciŵa ulukuŵaselucila;

¹¹ nesiwi ilyafumine kwiulu ati: Weŵo uli mwana wanji untemenwe; muli weŵo emo ndukusaŋgalala.

¹² Peŋka'po Umupasi walipulilile ukuŵatwala mumpaŋga;

¹³ mopele umo mumpaŋga ŵaliikele insiku amakumi ane, nekulukwesiwa kuli Satana; kaŵili ŵaliikele nefilwani; neŋkalamba nasyo nekulukuŵataŵataŵila.

¹⁴ Peŋka, pakwikatwa Yoane, ŵaYesu ŵaliisile kucalo caGalili, ili ŵatulisya leeŵo leiweme icaŵaLesa,

¹⁵ nekulukulaŵila ati: Impindi ilikumene, neŴufumu bwaŵaLesa bwapalamina: alulukeni, mucetekele leeŵo leiweme.

¹⁶ Peŋka, ili ŵalukusesya kumbali yacisiŵa caGalili, ŵalibwene Simoni naAndaleya umukwaŵo ŵalukwicisya akombe mucisiŵa, pakuti ŵo ŵakwikasye' saŵi.

¹⁷ Lomba ŵaYesu ŵalilaŵile kuli ŵo ati: Mundonde neŵo, eli ŋkamwaluleni ŵakwikasya aŵantu.

¹⁸ Naŵo ŵalipulilile ukutuleka utombe twaŵo, nekuŵalonda.

¹⁹ Peŋka'po, pakulukuya kuntanjile panini ŵalimubwene Jakobo, umwana wakwe Sebedai naYoane umukwaŵo; naŵo kaŵili ŵali mubwato, ŵalukusosola utombe.

²⁰ Naŵo ŵalipulilile ukuŵeta; naŵo ŵalimulekele wisiŵo Sebedai mubwato pamo neŵantu aŵalambulwa, nekulukuŵalonda.

²¹ Peŋka'po ŵaliile nekwinjila namuKapanaumi; lomba pakasuŵa kasabata ŵalipulilile ukwinjila mwisunagoge, nekusambisya.

²² Naŵo aŵantu ŵalikaŋkamene pakuti pakusambisya kwaŵo: pakuti ŵo ŵaliŵasambisye koti ŵaŵukulu, tekoti ŵalembesi, koku.

²³ Impindi iyo, mwisunagoge lyaŵo emwali umuntu uwali nemupasi uŵipile; peŋka naye nekuŵilicisya

²⁴ ati: Mbasyani ciŵele pali fweŵo namweŵo, mweŵaYesu ŵakuNasaleti? Kani muliisile mukutonala? Ndimwisini mweŵo, muli Ŵaŵo Aŵaswetelele ŵaŵaLesa!

²⁵ Naŵo ŵaYesu ŵaliukenye, nekulaŵila ati: Celele, fuma-mo muli ye!

²⁶ Peŋka umupasi uŵipile, ili wamupandwile nekwauka nesiwi'likulu, walifumine-mo muli ye.

²⁷ Naŵaŵo ŵonse ŵalikaŋkamene lukoso, fyopele'fyo ŵalukwipusyansyanya ati: Mbeci cindo? Ŵusambisi ubwaŵukumo! Injo'ŵukulu bwakufunda imipasi iŵipile, nayo nekuŵasumina!

²⁸ Peŋka'po impupo syaŵo syalipulilile ukutulika monse monse mucalo caGalili icasiŋgulucile.

²⁹ Lomba, ili ŵafumine mwisunagoge, ŵalipulilile ukwinjila muŋanda yakwe Simoni naAndaleya, pamo naJakobo naYoane.

³⁰ Naŵanyina-fyala Simoni ŵalilele, ŵalukutenda uŵulwele ubwampepo; naŵo ŵalipulilile ukuŵaŵula ŵaYesu ifyakuli ŵo.

³¹ Naŵo ŵalipalamine, nekuŵekata kukuŵoko, nekuŵaŵusya; popele neŵulwele nekuŵaleka; naŵo nekulukuŵataŵataŵila.

³² Lomba iciŋgulo, ili kawile akasuŵa, ŵaliŵaletele kuli ŵo ŵonse aŵo aŵalukutenda, naŵaŵo aŵaiketwe kufiŵanda;

³³ neŵamumusi ŵonse ŵaliŵuŋgene pamo kumulyaŋgo.

³⁴ Peŋka ŵaliŵaŵusisye aŵenji aŵalukutenda amalwele namalwele, nekulukufitamfya-mo ifiŵanda ifinji; kaŵili taŵasumine-po ati ifiŵande'fyo filaŵile, pakuti fyaliŵesiŵile.

³⁵ Peŋka ŋgamailo, lomba tawuŋgapalamina ukuca, ŵa Yesu ŵaliŵucile, nekufuma ukulukuya mumpaŋga, nekulukutembela kopele uko.

³⁶ Lomba Simoni naŵaŵo aŵo ali naŵo ŵaliŵalondelesye.

³⁷ Pakuŵaŵona, ŵalilaŵile kuli ŵo ati: Ŵonse aŵantu ŵalukumufwayeni.

³⁸ Peŋka ŵalilaŵile kuli ŵo ati: Katuyeni kumisi iŵambakene nakukuno, ati ŋkalukutulisya nakoko; pakuti nalifumine pakuti pali fyefyo.

³⁹ Lomba ŵalukwinjila mumasunagoge aŵo monse mucalo caGalili, nekulukusimika, nekulukufitamfya-mo ifiŵanda.

⁴⁰ Peŋka waliisile kuli ŵo uwamanata, nekuŵakombetela ubwifukeme, ukuŵeŵa ati: Kani mulukufwaya, muliisi ukumpossya ifilonda.

⁴¹ Lomba ŵaliumfwile iŋkumbu ŵaYesu, nekutambika ukuŵoko kwaŵo, nekumutintila, nekulaŵila kuli ye ati: Ndukufwaya; fipole!

⁴² Impindi iyo yopele nemanata nekupulilila ukufuma-mo muli ye, naye aliswetele.

⁴³ Lomba ŵalimucenjesye ukwakuti, nekupulilila ukumutuma,

⁴⁴ nekulaŵila kuli ye ati: Umfwa! Tekulaŵila-po akantu kuŵantu ŵonse neli nikuli umo; sombi uye, ulilanjisye kumupapatilisi, ukapeleifyamulambu, pakuti pakuposiwa koŵe, ifyo-fintu, ifi afundile Mose, ifyaŵumboni kuli ŵo.

⁴⁵ Sombi ye alifumine, nekutatika ukucitulisya ukwakuti, nekuciputisya iceŵo monse, fyopele'fyo ŵaYesu taŵaisiŵile-po ukwinjila liŵili mumisi apabwenekele; sombi ŵalukwikala kwisonde kumpaŋga; neŵantu nekulukwisa kuli ŵo aŵafumine monse monse.