Juda 1 - Amashiwi Aba Lesa

¹ Neŵo neJuda, nemupyunjisi waŵaYesu Klistu, nemukwaŵo Jakobo, ndukuŵalembela aŵo aŵetilwe, aŵatemiwe muli ŵaLesa ŵaWisifwe, aŵalaminwe pakuti pali ŵaYesu Klistu.

² Iŋkumbu siŵe kuli mweŵo, neŵutende neŵutemweŵufule.

³ Mweŵatemiwe, ili nalukukonsyo' kumulembeleni ifyakupuluka kwesu fwense, eli napanjilwe ukumulembeleni amasiwi akumukosyeni ati mukalukulwa nemitima yenu yonse pakuti pakucetekelo' ko ukupelelwe limo kuŵaluŋgeme.

⁴ Pakuti ŵalikalaŵile ukwinjila kumpelo ŵambi aŵantu aŵasimicilwe akale kukusininwa uku, aŵakupufya ŵaLesa, aŵalukwalula uluse lwaŵaLesa ŵesu ŵucencemesi, aŵalukuŵakana ŵaYesu Klistu, Imfumu yesu eŵaSikulu ŵesu ŵamo.

⁵ Lomba ndukufwayoʼkumulaŋgulusyeni, naŋgaŵa ati muliisiŵile limo fyonse, ati ŵaSikulu, ili ŵapulwisye aŵantu ukuŵafumya-mo mucalo caIjipiti, ŵaliŵonawile pantanjile aŵo aŵataŵacetekele.

⁶ Neŋkalamba nasyo isitasyalamine uŵufumu bwasiko isine, sombi syalilekele apakwikala pasiko apelelwe, ŵalisilamine muminyololo yamuyayaya pansi pamfinsi, ukufika nakukusololola kwakasuŵa ako akakulu.

⁷ Fyopele'fyo naSodoma naGomola, nemisi iyasiŋgulucile-ko, ili yaliposele kuŵucencemesi nekulukulonda ifyaŵunama fyabwensu, ilibwenekele kesiŵilo, pakumfwo'mulandu wamulilo wamuyayaya.

⁸ Naŋgaŵe'fyo naŵaŵa-ŵalotesi, koti nifyopele'fyo, ŵalaŵifyo'munefu, nekupufya uŵukulu, nekuficoŵola ifyaŵuleme.

⁹ Sombi Mikayeli iŋkalamba ikulu, pakulukulwa nemusensesi nekulukupicisya ifyamuŵili wakwe Mose, tawali nemutima uwakumusinina ukumucoŵola, sombi walilaŵile ati: ŴaSikulu ŋgaŵakucenjesye!

¹⁰ Sombi aŵa ŵalaficoŵola ifintu fyonse ifi taŵesi, nakaŵili ifyo ifi ŵesi mukwisiŵila kwaŵo, koti ninama isyakuŵula'mano, muli fyefyo emo ŵonalwa.

¹¹ Ŵakasyama! pakuti ŵalukwenda munsila yakwe Kaini, nekupulumuko'luŵilo mukutumpaika kwakwe Balami pakuti pakulambulwa, nekonawilwa mumileŋgululo yakwe Kola.

¹² A ŵa mabwe eŵile mufitenje fyenu ifyakutemwansyanya, aŵalukulya pamo namweŵo, ŵembesi aŵaliembela ukwakuŵulo'mwenso; makumbi akuŵula'menda alukutwalwa kufipupu; miti yalusuŵa iyakuŵule'fisepo, ifwile liŵili, isyulilwe nemisyu;

¹³ emaŋkapa akutinisya amucisiŵa, alukucite'pofu lyansoni syao aene; etuŵaŋgaŵaŋga utulukupitana, uto pakuti pali to ukufita kwamfinsi kulukulaminisiwa insiku pee.

¹⁴ Nakuli ŵo naEnoci naye, uwaŵuŵasanu naŵaŵili ukufuma kuli Adama, ŵalisimicile ati: Ŵoneni, ŵaSikulu ŵaliisile neŵaŵo aŵaswetelele amasausande namasausande,

¹⁵ mukucite'milandu pali ŵo ŵonse, nekuŵasinina ŵonse aŵapufya ŵaLesa ifyamilimo yaŵo yonse iyakupufya ŵaLesa, iyo ŵacitile ukwakupufya ŵaLesa, nefyafintu fyonse ifikatesye ifi ŵaŵalaŵisye aŵakuŵifya aŵapufya ŵaLesa.

¹⁶ Aŵo ŵakuliŋwiŋwisya, ŵakutamaka, aŵalukwenda koti kukumbwa kwaŵo aŵene (netunwa twaŵo tulalaŵila ifyamaŋkuluwinda), aŵacindika aŵantu pakuti pakulambulwa.

¹⁷ Sombi mweŵo, mweŵatemiwe, mulaŋguluke amasiwi alaŵilwe akale kuntanjisi syaŵaSikulu ŵesu Yesu Klistu;

¹⁸ syalimuŵulileni ati: Pampindi yakupela-ko pakalukuli awasekesi, aŵalukwenda koti kukumbwa kwaŵo aŵene ukupufya ŵaLesa.

¹⁹ Aŵa eŵakulekanya, aŵacencemesi, aŵataŵakwete Umupasi.

²⁰ Sombi mwewo, mweŵatemiwe, mulukuliiŵaka pakucetekela kwenu ukuswetelele swete, mulukutembela muMupasi Uswetelele,

²¹ mulukulilama muwutemwe bwaŵaLesa, ili mupembelela iŋkumbu syaŵaSikulu ŵesu Yesu Klistu, ukufika nakumweo uwamuyayaya.

²² Kaŵili ŵambi muwacitile'ŋkumbu aŵo aŵalukukanika;

²³ naŵambi muŵapulusye, nekuŵasompola mumulilo; naŵambi muwacitile'ŋkumbu nekutina, ili mufitilwa necakufwala iciminsilwe nefyamunefu.

²⁴ Popele kuli ŵaŵo aŵesi ukumulameni mwiŋgesa-kulitutula, nekumwikalikeni pamenso aŵuleme bwaŵo, muli ŵakuŵule'milandu mukusemba ukwakuti uŵukulu,

²⁵ kuli ŵaLesa aŵo aŵali weŋka aŵakutupulusya, muli ŵaYesu Klistu ŵaSikulu ŵesu, bwikale uŵuleme neŵufumu neŵukulu nemakosa, lomba tasiŋgatatika impindi, naŵukumo ŵuno, nensiku syonse isyamuyayaya. Ameni.