Jakobo 1 - Amashiwi Aba Lesa

¹ NeJakobo, nemupyunjisi waŵaLesa newaŵaSikulu Yesu Klistu, ndukusekela imikoka yaŵantu iyo ikumi naiŵili ipalaŋgene: Mitonde.

² Mweŵakwasu, pakuponena mufyakwesya ifinji, kamweŵe'fyo ati kusaŋgalala konse;

³ pakuti pakwisiŵa ati ukwesya kwakucetokela kwenu kulaleŋgo'kuteke'mitima.

⁴ Popele umutimanteka ŋgawikale nemilimo yauko iwaminine, ati namweŵo mukalukuli ŵawaminine, ŵaŵuluŵulu, ŵakuŵula neli kantu.

⁵ Sombi kani pali mweŵo umbi taakwete-mano, ŋgaalombe kuli ŵaLesa, aŵaŵapela lukoso ŵonse, aŵataŵapatapo; popele akapelwa kuli ye.

⁶ Sombi ŋgaalombe nekucetekela uwakuŵulo'kukanika neli panini; pakuti uyo ukanika ali koti liŋkapa ilyapacisiŵa ilitwitwe kucipupu ililukupaŵaka.

⁷ Pakuti uyo-muntu elaŋguluka ati ŋkapoka akantu kuli ŵaSikulu:

⁸ muntu wamitima iŵili, uwakukaŋkasima munsila syakwe syonse.

⁹ Sombi umukwasu ucepele ŋgaalitote pakusuntulwa kwakwe;

¹⁰ nemusambasi ŋgaalitote pakucefiwa kwakwe: pakuti koti liluŵa ilyakucani akapitilila.

¹¹ Pakuti akasuŵa kalema nekuŵaŵula, nekumye'cani; popele iluŵa ilyakoko lilapona, neŵulombe bwamekalilo alilyo naŵo ŵulafwa; fyopele'fyo nemilsambasi akalela panyendo syakwe.

¹² Alisyucile uyo-muntu upinte'fyakwesya; pakuti, pakusumininwa, akapoko'muntinya wamweo, uyu ŵalaile ŵaSikulu ukuŵapela aŵo aŵaŵatemwa.

¹³ Aŵantu ŵonse neli umo ŵeŋgalaŵila, pakwesiwa, ati, Ndukwesiwa kuli ŵaLcsa: pakuti ŵaLesa taŵesiwa kukuŵifya, kaŵili aŵene taŵaŵesya aŵantu neli umo;

¹⁴ sombi aŵantu ŵonse ŵalesiwa pakutwalwa kukukumbwa kwaŵo aŵene nekoŋgolwa.

¹⁵ Popele apo ukukumbwa, pakwimita, kulafyalo'kuŵifya: nekuŵifya nako, pakukula, kulafyale' mfwa.

¹⁶ Tekutumpaikwa, mweŵakwasu mwentemenwe!

¹⁷ Impese syonse isiweme nefyaluse fyonse ifiwaminine filatulila kwiulu, nekuseluka ukufuma kuli ŵa Wisifwe aŵakutuŵa, aŵataŵalipo nekwaluka, neli cinsiŋgwa icakucitwa pakusyoloka.

¹⁸ Koti kufwaya kwaŵo ŵalitufyele kwisiwi lyaŵucine; ati tukalukuli koti fyamutulu ifyapafintu fyaŵo itileŋgelwe.

¹⁹ Ifyo mulifiisi, mweŵakwasu mwentemenwe. Sombi aŵantu ŵonse ŋgaŵekale ŵakwaŋgufyo'kumfwa, ŵakukokolo'kulaŵila, ŵakukokolo'kufitwa;

²⁰ pakuti ukufitwa kwaŵantunsi takucito'kuluŋgama kwaŵaLesa.

²¹ Pakuti pali fyefyo fumyeni uŵusali ŵonse nekuŵifya ukufulile, mupoke nekutekanya isiwi ilyakuŵyala mumutima, iliisi ukupulusye'mitima yenu.

²² Sombi muŵe ŵakucita isiwi, teŵakumfwa lukoso, aŵalukulitumpaika, koku.

²³ Pakuti kani umuntu wakumfwe'siwi lukoso, uwakuŵulo'kucita, ali koti muntu ulukulitamba pamenso akwe acifyalilo mucilolelo;

²⁴ pakuti alukulitamba, popele nekukumbuluka, nekupulilila ukuluŵa-ko amekalilo akwe.

²⁵ Sombi uyo uceŵa mwifunde iliwaminine, ilyabwana-bwaŵene, nekulukwikele'fyo utaali wakumfwa uwakuluŵa-ko, koku, sombi wakucite'milimo, uyo eukasyucila mukucita kwakwe.

²⁶ Pali mweŵo kani umuntu alukulieŵa ati nineŵakupupe'cine, kani taalukukanyo'lumini lwakwe, sombi alukutumpaika umutima wakwe, ukupupa kwa muntu uyo kwalukoso.

²⁷ Ukupupa ukuswetele ukwakuŵule'fiŵipile pamenso aŵaLesa ŵa Wisifwe nikuku: ukuya-kuŵona aŵana-ŵansiwa naŵamukamfwilwe pakukululuka kwaŵo, nekulilama wakuwule'fiko ifyamucalo capansi.