Ifyakutaŋga 1 - Amashiwi Aba Lesa

¹ Pakutaŋga lukoso ŵaLesa ŵalileŋgele iulu necalo capansi.

² Lomba icalo cali lukoso, caliŵele cinaŋgwa; nemfinsi nekwila ponse pamenda atali. Popele Umupasi waŵaLesa walukusesemucila pamenda ayo.

³ Popele apo ŵaLesa ŵalilaŵile ati: Patuŵe! lomba palituŵile.

⁴ Popele ŵaLesa ŵalibwene ukutuŵo'ko ati kuweme; kaŵili ŵaLesa ŵalilekenye ukutuŵa nemfinsi.

⁵ Popele apo ŵaLesa ŵaliilicile ukutuŵa ati niNsiku, nemfinsi nayo ŵaliilicile ati Ŵusiku. Lomba nekwila nekuca ninsiku yakutaŋga.

⁶ Popele apo ŵaLesa ati: Pekale umuceleŵela pakati kamenda, kulekanye amenda paŵili.

⁷ Popele ŵaLesa ŵalileŋgele umuceleŵela nekulekanya amenda apa nsi pamuceleŵela nemenda ayo apeulu pamuceleŵela.

⁸ Nafyo fyaliŵele fyopele'fyo. Popele ŵaLesa ŵaliilicile umuceleŵela ati Lyulu. Lomba nekwila nekuca ninsiku yaŵusiŵili.

⁹ Popele ŵaLesa ŵalilaŵile ati: Amenda onse apansi aloŋganine pantu pamo, pamutunta apomine pakaŵoneke. Popele fyaliŵele'fyo.

¹⁰ Popele ŵaLesa ŵaliilicile pamutunta ati Calo; nekuloŋgana kwamenda nako ŵaliilicile ati Fisiŵa. Naŵo ŵaLesa ŵalibwene ati fiweme.

¹¹ Popele ŵaLesa ati: Mucalo ŋgamumene icani, nensaŋgu isyakwikate'mbuto, nemiti iyakwikate'fisepo, yonse koti mikoka yaiyo, muli fyo emuli imbuto syaiyo, pacalo: nafyo fyaliŵele'fyo.

¹² Icine mucalo mwalimenene icani, nensaŋgu isyakwikate'mbuto, syonse koti mikoka yasisyo, nemiti iyakwikate'fisepo, muli fyo emuli imbuto syaiyo, yonse koti mikoka yaiyo: popele ŵaLesa ŵalibwene ati fyonse fiweme.

¹³ Lomba nekwila nekuca ninsiku yaŵusitatu.

¹⁴ Popele ŵaLesa ati: Pekale inyale mumuceleŵela uwakwiulu, isyakulekanya insiku neŵusiku; ŋgasiikale twisiŵilo, isyakupende'mpindi nensiku nemyaka:

¹⁵ kaŵili ŋgasiikale ninyale mumuceleŵela uwakwiulu mukutuŵa pacalo capansi: nafyo fyaliŵele'fyo.

¹⁶ Popele ŵaLesa ŵalileŋgele inyale isyo siŵili isikulu; inyale icilile uŵukulu ati ikalukwikalike'nsiku, nayeyo-nyale icepele ati ikalukwikaliko' ŵusiku; kaŵili ŵalileŋgele netuŵaŋgaŵaŋga.

¹⁷ Popele ŵaLesa ŵalisiŵicile mumuceleŵela uwakwiulu mukutuŵa pacalo,

¹⁸ namukwikalike'nsiku neŵusiku, namukulekanya ukutuŵa nemfinsi: popele ŵaLesa ŵalibwene ati fiweme.

¹⁹ Lomba nekwila nekuca ninsiku yaŵusine.

²⁰ Popele ŵaLesa ati: Mumenda ŋgamufyalilwe nekufunucila-mo ifileŋgelwe ifienda, ifili nemweo; kaŵili ifyuni ŋgafilukupalala peulu pacalo mumuceleŵela uswetele uwakwiulu.

²¹ Popele ŵaLesa ŵalileŋgele inama isipamfi isikulu isyamucisiŵa, nefileŋgelwe fyonse ifyamweo ifienda, ifyo ifyafyalilwe mumenda nekufunucila-mo, koti mikoka yafifyo, nefyuni fyonse ifyamapindo koti mikoka yafifyo: popele ŵaLesa ŵalibwene ati fiweme.

²² Lomba ŵaLesa ŵalifisyucisye, nekulaŵila ati: Mufyalisye, mufunuke, mukumane mumenda amufisiŵa; nefyuni nafyo ŋgafifunuke mucalo.

²³ Lomba nekwila nekuca ninsiku yaŵusisanu.

²⁴ Popele ŵaLesa ati: Pacalo ŋgapafyalilwe ifileŋgelwe ifyamweo koti mikoka yafifyo, iŋombe, nefiloŋgolo ifikalaŵa pansi, nenama isyapacalo koti mikoka yasisyo: lomba fyaliŵele'fyo.

²⁵ Icine ŵaLesa ŵalileŋgele inama isyapacalo capansi koti mikoka yasisyo, neŋombe koti mikoka yasisyo, nefintu fyonse ifikalaŵa pansi koti mikoka yafifyo: naŵo ŵaLesa ŵalibwene ati fiweme.

²⁶ Popele ŵaLesa ati: Ŋgatuleŋge neŵantu koti cipasyo cesu, koti mekalilo esu: ŋgaŵakaŵe neŵukulu ubwapesaŵi ilyamucisiŵa, nebwapafyuni ifyamwiulu, nebwapaŋombe, nebwapacalo conse, nebwapafiloŋgolo fyonse ifikalaŵa pacalo.

²⁷ Popele ŵaLesa ŵalileŋgele umuntu, uwali necipasyo caŵo; ŵalimuleŋgele umwalalume nemwanakasi.

²⁸ Popele apo ŵaLesa ŵaliŵasyucisye: naŵo ŵaLesa ŵalilaŵile kuli ŵo ati: Mufyalisye, mufunuke, mukakumane mucalo, mucikomeke; mukaŵe neŵukulu ubwapesaŵi ilyamucisiŵa, nebwapafyuni ifyamwiulu, nebwapafintu fyonse ifyamweo ifienda pacalo.

²⁹ Kaŵili ŵaLesa ati: Ŵoneni, namupeleni insaŋgu syonse isiikate'mbuto, isili pacalo conse, nemiti yonse, muli yo emuli ifisepo ifyamiti ifilikate'mbuto; ifyo fikaŵa fyakulya fyenu:

³⁰ kaŵili inama syonse isyapacalo, nefyuni fyonse ifyamwiulu, nefintu fyonse ifikalaŵa pacalo, ifili nemweo, nafipela imbeu syonse isilukumena syakulya: nafyo fyaliŵele'fyo.

³¹ Popele apo ŵaLesa ŵalibwene ifintu fyonse ifyo ifi ŵaleŋgele, lomba ŵoneni, fyaliweme ukwakuti. Lomba nekwila nekuca ninsiku yakukoŵeka-mo.