Ifyakufuma 1 - Amashiwi Aba Lesa

¹ Lomba aya emasina aŵana ŵakwe Isilaeli aŵalalume, aŵainjile mucalo caIjipiti; ŵonse pamo neŵamumaŋanda aŵo ŵaliisile pamo nakwe Yakobi.

² Ŵali niLubeni, naSimyoni, naLefai, naJuda;

³ nalsaka, naSebuluni naBenjamini;

⁴ naDani, naNafitali, naGadi, naAsyali.

⁵ Popele aŵantu aŵafumine muluŵunda lwakwe Yakobi ŵonse ŵalikumene imitima amakumi asanu naaŵili: kaŵili Josefi kale aikele mucalo caIjipiti.

⁶ Peŋka Josefi kaafwa, neŵakwaŵo ŵonse naŵo kaŵafwa pamo necitentekwa ico conse.

⁷ Lomba aŵaIsilaeli ŵalukufyalisya, nekufulo'kwakuti, nekufunuka, nekukoso'kwakuti; namucalo lomba kaŵakumana monse.

⁸ Popele apo paliimine nemfumu yaŵukumo mucalo caIjipiti itayamwisiŵile Josefi.

⁹ Nayo yalilaŵile kuŵantu ŵaiyo ati: Ŵoneni, aŵantu aŵaIsilaeli ŵalitucilile ubwinji nekutucila nemakosa:

¹⁰ twendeni, ŋgatuŵacenjelele, ŵeŋgesa kufula, kaŵili pakuŵuke'ŋkondo imbi, ŵekesa kusaŋkana netupondo twesu, nekulwa nafweŵo, lomba nekwima mukulukufuma mucalo.

¹¹ Pakuti pali fyefyo ŵaliikalicile pali ŵo ŵasikulu aŵamilimo mukuŵapensya kumilimo ikatesye. Naŵo aŵaIsilaeli kaŵamwiŵacila Falo imisi yama tala, Pitomo naLamese.

¹² Sombi pakuŵakatasyo'kwakuti kuŵaIjipiti, kaŵafulo'kwakuti, kaŵakumana ponse. Kaŵili aŵaIjipiti ŵaliŵele nensoni pakuti paŵaIsilaeli.

¹³ Lomba aŵaIjipiti ŵaliŵapanjilisye aŵaIsilaeli ati ŵalukupyunjisya makosa:

¹⁴ naŵo ŵaliŵaleŋgesye imyeo yaŵo ukulula kumilimo ilemene, iyakuli syamende neyancelwa, nakumilimo yonse iyamwiŵala, kumilimo yaŵo yonse, iyo ŵaŵapanjilisye ukupyuŋga nemakosa.

¹⁵ Popele apo imfumu yaŵaIjipiti yalilaŵile kufimbela fyaŵaEbeya, isina lyacico cimbi niSifila, nesina lyacico nacimbi niPuwa:

¹⁶ kailaŵila ati: Mweŵo, pakuŵacitile'milimo yaŵucimbela aŵanakasi aŵaEbeya, pakuŵona ati ŵalukufyala, kani ali mwana umwalalume eli mukamwipaye, sombi kani ali mwana umwanakasi eli akalukwikele nemweo.

¹⁷ Sombi ifimbele'fyo fyalukuŵatonda ŵaLesa; tafyacitile koti nifyefyo ifi yafifundile imfumu yaŵaIjipiti; sombi fyaliŵapulwisye nemweo aŵana aŵalalume.

¹⁸ Popele imfumu yaŵaIjipiti yalifiitile ifimbela, nekulaŵila kuli fyo ati: Mbanindo mucitile'fi, nekuŵapulusya nemweo aŵana aŵalalume?

¹⁹ Kumfwa ifimbela kafilaŵila kuli Falo ati: Nipakuti aŵanakasi aŵaEbeya taŵapalene neŵanakasi aŵaIjipiti; pakuti ŵalisantucile, ŵalafyala lomba taciŋgafika kuli ŵo icimbela.

²⁰ Popele apo ŵaLesa ŵalificitile bwino ifimbela: lomba aŵantu kaŵafula, kaŵaŵa nemakosa ukwakuti.

²¹ Popele lomba, pakuti ifimbela fyaliŵatondele ŵaLesa, epo ŵafileŋgesye ukuŵa neŵamumaŋanda afifyo.

²² Popele Falo walifundile aŵantu ŵakwe ŵonse ati: Aŵana aŵalalume aŵakafyalwa ŵonse mukaŵapose munika, sombi aŵana aŵanakasi ŵonse mukaŵapulusye nemweo.