Ifisimpi 1 - Amashiwi Aba Lesa

¹ Ifisimpi fyakwe Solomoni, umwana wakwe Dafidi, imfumu yaŵaIsilaeli;

² Ati fiisiŵisye amano neŵusambisi; Ati fiumfwisye amasiwi akwisiŵisya;

³ Ati fisambisye amano nefyakulunjika, Nekusoŵolola bwino, nekuŵaaŵila ukuluŋgeme.

⁴ Ati fiŵapele aŵakuŵula'mano ukucenjela, Nekumupelo'musaŋkwa amano nekucenjela.

⁵ Ati umuntu wamano akomfwe nekufusya neŵusambisi; Kaŵili ati umuntu wakalaŋgo akakumane nekuŵulisisya bwino.

⁶ Ka ŵili ati fiumfwisye bwino icisimi, nemasiwi akupalanya, Pamo nemasiwi aŵamano nekulaŵila kwaŵo ukukatesye.

⁷ Ukuŵatonda ŵaYawe ekutatika kwamano: Sombi aŵatumpile ŵalapufya amano neŵusambisi.

⁸ Wemwana wanji umfwa uŵusambisi bwaŵawiso; Tekulileke'funde lyaŵanoko:

⁹ Pakuti ifyo fikaŵa muntinya waluse pamutwi woŵe, Nemyaŵalo pamukosi.

¹⁰ Wemwana wanji, kani imbifi sikoŋgole, Tekusisumina.

¹¹ Kani syakulaŵila ati: Isa nafwewo, Ŋgatufisame, tupokomosye imilopa; Tuŵelamine kumfiso, twikate aŵakufumbucilwa lukoso;

¹² Tuŵamine aŵalaŵi koti nikuSyeoli, Eŵaŵuluŵulu koti niŵaŵo aŵalukuselucila mucikanda;

¹³ Tukaŵona fyonse ifyamakweŵo apatali; Tukesusya nemaŋanda esu nefintu ifitapilwe.

¹⁴ Ŋgatuŵuŋgane pamo: Fwense twikale nemukopa umo uwandalama.

¹⁵ Wemwana wanji, wilukwenda nasyo milmiseŵo; Kolukanya nelukasa loŵe ukwenda munsila yasisyo.

¹⁶ Pakuti amakasa asisyo alaŵutucila kufiŵipile, Silendesya mukupokomosye'milopa.

¹⁷ Icine imilimo yalukoso ukuteya akombe Pamenso afyuni fyonse.

¹⁸ Kaŵili isyo silafisama ukupokomosya imilopa yasisyo isine; Silaŵelamina ukulifumya imitima yasisyo isine.

¹⁹ Koti nifyopele'fyo efi siikala insila syaŵantu ŵonse aŵali neŵumama ubwakunoŋka'maŵoni, Opele ayo alafumya imitima yaŵo aŵene.

²⁰ Amano alukuŵilicisya apomfwanicile pesonde pamiseŵo, Nekulaŵilisya apakulu.

²¹ Alukuŵilicisya pamupunda uwakucila, apakuŵuŋganina aŵantu; Mumilyaŋgo yafiŵi, Namumusi alukulaŵila amasiwi ao ati:

²² Impindi yasyani, mweŵatumpile, mukaleko'kutemwa ifyakutumpa, Neŵamupufyo nekuleko'kutemwo' kupufya kwaŵo, Netuŋguluŋgulu nekuleko'kufitilwa nemano?

²³ Alukeni pakumfwa ukucenjesya kwanji: Umfweni, ŋketila umupasi wanji pali mweŵo, Ŋkamumfwisyeni amasiwi anji.

²⁴ Pakuti nalukwita sombi mweŵo mwalukukana; Nalukutambika ukuŵoko kwanji, sombi papo'muntu neli umo uwalukulola-ko.

²⁵ Sombi mwalukupufya lukoso ukufunda kwanji konse, Nekukana ukucenjesya kwanji konse.

²⁶ Naneŵo ŋkalukuseka lukoso ukusyama kwenu, E, ŋkalukutumfya pakwisa umwenso wenu.

²⁷ Pakwisa umwenso wenu koti kutukala, Nekusyama kwenu koti citoŋga; Pakwisa pali mweŵo ifyakukatasya nensoni.

²⁸ Eli ŵakalukundomba neŵo, sombi tesi ŋkawaasuke: Ŵakalukumfwaya-fwaya nemuŋkonsya sombi tesi ŵakambone-po.

²⁹ Pakuti ŵalukufitilwa amano, Taŵasalulwile-po ukuŵatina ŵaYawe.

³⁰ Ŵalukukana ukufunda kwanji konse: Ŵalukupufya ukucenjesya kwanji konse lukoso.

³¹ Pakuti pali fyefyo ŵakalukulya ifisepo ifiikete kunsila yaŵo aŵene, Nekulukwikuta nefyakucenjela fyaŵo aŵene.

³² Pakuti ukwaluka kwaŵaŵo aŵataŵakwete-mano kukaŵepaya; Kaŵili ukusyuka kwaŵatumpile kukaŵonala.

³³ Sombi aŵantu ŵonse ukalukunumfwa neŵo, akalukwikele neŵutende, Nekulukutusya ukwakuŵulo'kutina ifyakuŵifya.