Filemoni 1 - Amashiwi Aba Lesa

¹ NePaulu, nekaili waŵaKlistu Yesu, naTimote umukwasu, tulukukulembela Filemoni ututemenwe, wemupyunjisi umuŵyesu,

² naAfya iŋkasi yesu, naAlicipo umusilikani umuŵyesu, nekelesya ilili muŋanda yoŵe.

³ Uluse Iwikale nenu neŵutende ubwakufuma kuli ŵaLesa ŵaWisifwe nakuli ŵaSikulu Yesu Klistu.

⁴ Ndatota ŵaLesa ŵanji insiku syonse, ili ŋkulaŋguluka pamatembelo anji,

⁵ pakumfwa ifyaŵutemwe ŵoŵe nekucetekela uko uku uli nako ukwakuli ŵaSikulu Yesu, nakuŵaluŋgeme ŵonse;

⁶ ati ukwambala kwakucetekela koŵe kukaŵe nekusantuka mukwisiŵa ifintu fyonse ifiweme ifili muli weŵo, ifyakuli ŵaKlistu Yesu.

⁷ Pakuti naliŵele nekusemba nekusaŋgalasiwa ukwinji muŵutemwe ŵoŵe, pakuti imitima yaŵaluŋgeme yalikatulucile pakuti pali weŵo, wemukwasu.

⁸ Pakuti pali fyefyo, naŋgawa ati ndi nelupata lonse muli ŵaKlistu ulwakukuŵule'fyo ifyelelwe ukucita.

⁹ Naŋgawe' fyo pakuti paŵutemwe ndukukukombetela tanje cine, pakuti ninePaulu umucekulu, ŵukumo kaŵili ndi kaili waŵaKlistu Yesu.

¹⁰ Ndukukukombetela pakuti pamwana wanji, Onesimo, unafyele muli ŵukaili bwanji,

¹¹ uwali walukoso kuli weŵo akale; sombi ŵukumo alielelwe weŵo naneŵo,

¹² unabwesesya kuli weŵo umwine, ekweŵa mutima wanji nemwine.

¹³ Icine nalukufwaya ati ekale naneŵo, ati pakuti pali weŵo ŋgaampyunjile muli ŵukaili bwaCeŵo Iciweme;

¹⁴ sombi apakuŵulo'kusumina koŵe nsifwaile-po ukucita neli kantu; ati ukuwama koŵe tekwikala koti kwakupanjilwa, sombi ati kukekale koti mutima woŵe.

¹⁵ Pakuti cipale alilekanisiwe naweŵo impindi imbi pakuti pali fifi, ati ukalukuli nakwe impindi yonse iyamuyayaya;

¹⁶ tekoti nikalume ŵukumo, sombi koti muntu ucilile napali kalume, mukwasu utemenwe ukwakuti kuli neŵo, sombi tanje cine kuli weŵo, namumunefu namuli ŵaSikulu.

¹⁷ Kani lomba ulukuŋgewa ati muŵyoŵe, ukamupokelele koti nineŵo nemwine.

¹⁸ Sombi kani alikuŵifisye icintu, kani ali nemwapu, ukeŵe ati mulandu wanji.

¹⁹ NePaulu ndukufilemba kuminwe yanji nemwine, ŋkaufuta: (apa niŋgewa ati naweŵo ati uli nemwapu kuli neŵo uwabwine ŵoŵe kaŵili.)

²⁰ Icine, wemukwasu, ŋgaŋkusembele muli ŵaSikulu; ukakatulusye umutima wanji muli ŵaKlistu.

²¹ Pakucetekela mukumfwisya koŵe, ndukukulembela; pakuti ndiisi ati ukacita ifyakucila napali fyefyo ifi ndukulaŵila.

²² Sombi kaŵili ulukunansicila neŵo umwakwikala; pakuti ndukucetekela ati ŋkapelwe kuli mweŵo, pakuti pakutembela kwenu.

²³ Epafila, kaili umuŵyanji uwamuli ŵaKlistu Yesu, alukukusekela,

²⁴ naMako naAlisitako naDema naLuku, aŵaŵyanji aŵamumilimo, fyopele'fyo.

²⁵ Uluse lwaŵaSikulu ŵesu Yesu Klistu Iwikale nemupasi wenu. Ameni.