Esila 1 - Amashiwi Aba Lesa

¹ Lomba pamwaka wakutaŋga wakwe Kolesi, imfumu yakuPasai, ati isiwi lyaŵaYawe ilyakukanwa kakwe Jelemiya licitwe, ŵaYawe ŵaliŵusisye umupasi wakwe Kolesi imfumu yakuPasai, fyopele'fyo alitulisye monse muŵufumu bwakwe, nekufilemba, ati:

² ŴaKolesi, imfumu yakuPasai, ŵalukulaŵile'fi ati: ŴaYawe Lesa wakwiulu ŵalimpele uŵufumu ŵonse ubwapacalo capansi; lomba ŵalimfundile neŵo ati mbeŵacile iŋanda muJelusalemi, uli muJuda.

³ Aŵantu ŵonse pakati pali mweŵo, uyo uli waŵantu ŵaŵo, ŵaLesa ŵakwe ŋgaŵekale nakwe, naye ŋgaaye aninine kuJelusalemi, uli muJuda, akeŵake iŋanda yaŵaYawe Lesa wakwe Isilaeli (ŵopele eŵaLesa) iyamuJelusalemi.

⁴ Aŵantu ŵonse usyele-po pantu ponse apo alukwikalekala, aŵantu aŵapantu pakwe ŋgaŵamofwe-ko kwisilifa nakwigolide nakumaŵoni nakunama peulu pamulambu uposelwe koti mitima pakuti paŋanda yaŵaLesa iyakuJelusalemi.

⁵ Popele apo impemba syakumaŋanda aŵawisiŵo akuJuda naBenjamini syaliimine, pamo neŵapapatilisi neŵena-Lefai, eŵo ŵonse aŵo ŵaLesa ŵaŵusisye imipasi yaŵo ati ŵaninine mukwiŵaka iŋanda yaŵaYawe iyakuJelusalemi.

⁶ Lomba ŵonse aŵaŵasiŋgulucile ŵalikosesye amaŵoko aŵo kufiŋkoloŋkolo fyesilifa, nakwigolide, nakumaŵoni, nakunama, nakufintu fyamakweŵo apatali, peulu pali fyefyo fyonse ifyaposelwe koti mitima.

⁷ Kaŵili Kolesi imfumu walifumisye ifiŋkoloŋkolo ifyakuŋanda yaŵa Yawe, ifyo Nebukadinesa afumisye muJelusalemi, nekufiŵika muŋanda yaŵalesa ŵakwe.

⁸ Ifyo fyopele Kolesi imfumu yakuPasai ewafifumisye kuminwe yakwe Mitiledati kalama, nekumupendela fyo Syesibasala, icileme icakuJuda.

⁹ Ukupenda kwafifyo nikuku: Imbale syegolide amakumi atatu, nembale syesilifa isausande limo, nefiŵesi amakumi aŵili naasanu naane,

¹⁰ neŋkomeci syegolide amakumi atatu, neŋkomeci syesilifa isyamukoka umbi imyanda ine nekumi limo, nefiŋkoloŋkolo fimbi nafyo isausande limo.

¹¹ Ifiŋkoloŋkolo fyonse ifyegolide nefyesilifa fyalikumene amasausande asanu nemyanda ine. Fyonse' fyo alifininicile Syesibasala, pakufumiwa kuBabiloni aŵaŵukaili ukuŵaninicila kuJ elusalemi.