Esiceli 1 - Amashiwi Aba Lesa

¹ Pamwaka wamakumi atatu, pamwensi waŵuine, pakasuŵa kaŵusisanu akamwensi uyo, ili nali pakati pali ŵakaili mumbali yanika yaCebala, paliŵele ati amaulu aliisucile, naneŵo kambona ifyakuŵona ifyakuli ŵaLesa.

² Lomba pakasuŵa kaŵusisanu akamwensi uyo, epamwaka waŵuisanu uwaŵukaili bwamfumu Jeyoyacini,

³ isiwi lyaŵaYawe lyaliisile nekwise'cinenene kuli Esiceli umupapatilisi, umwana wakwe Busi, mucalo caŵaKalidaya mumbali ya nika yaCebala; lomba ukuŵoko kwaŵaYawe kwali apo pali ye.

⁴ Popele nalilolele, lomba kuŵona, nikucipupu icakutukaka icilukufuma kunofu, nekumbi ilikulu ilyali nemulilo ulukulifuŋgacila, nekutuŵa ukwakusiŋgulucila-ko; lomba mukati kamomo mwalukufuma icamusaŋgo wacinaŋana, emukati kamulilo.

⁵ Kaŵili mukati kamono mwalifumine ukupalana kwafilaŵi fine. Lomba amekalilo afiko niaya: fyali nekupalana nemuntu.

⁶ Fyonse icintu cimo cali napamenso pane; fyonse kaŵili icintu cimo cali nemapindo ane.

⁷ Kaŵili amolu afiko aliluŋgeme; namukati kamakasa mwafiko mwali pale ne napansi paluŵondo lwamombe; namo mwalukumwekaka koti musaŋgo waluŵemba ulutubwilwe.

⁸ Kaŵili fyali nemaŵoko amuntu pansi pamapindo afiko pambali syafiko syonane; lomba fyonane fyali napamenso pafiko nemapindo afiko mfi:

⁹ Amapindo afiko aliŵambakene limo limo; tafyaalulucile fyefi, pakulukwenda; fyonse cimo cimo fyalukuya kuntanjile lukoso.

¹⁰ Ifyakupalana kwa pamenso pafiko, fyali napamenso pamuntu; kaŵili fyonane fyali napamenso paŋkalamu kulwine; fyonane kaŵili fyali napamenso paŋombe kucipiko; fyonane kaŵili fyali napamenso paŋoŋga.

¹¹ Lomba pamenso pafiko napamapindo afiko palilekene peulu; sombi amapindo aŵili afiko fyonse cimo cimo aliŵambakene, kaŵili aŵili alifimbile-po pamiŵili yafiko.

¹² Lomba fyonse cimo cimo fyalukuya kuntanjile lukoso; uko ukuŋgaya umupasi, kopelo'ko kakuya fyo; tafyaalulucile fyefi, pakulukwenda.

¹³ Ifyakupalana fyafilaŵi ifyo, amekalilo afiko alipalene nemakalasi alukupyo'mulilo, koti mekalilo amimosyo; walukuya peulu nekuseluka pakati pafilaŵi; lomba umulilo walukusasamuka, namumulilo namo mwalukufuma akampesimpesi.

¹⁴ Kaŵili ifilaŵi fyalukuŵutuka nekubwela koti mekalilo akuŵyata kwakampesimpesi.

¹⁵ Popele, ili nabwene ifyo-filaŵi, kusaŋga nikumukoŋko umo pansi paceni cafilaŵi, umo umo uwakupamenso pafiko pona ne.

¹⁶ Amekalilo amikoŋko nekucitwa kwaiko alipalene nemusaŋgo wabelulo; kaŵili yonane yali nemekalilo amo; lomba amekalilo aiko nekucitwa kwaiko fyali koti mukoŋko mukati kamukoŋko uŵyakwe.

¹⁷ Pakulukwenda, yalukwenda pantu ponane; tayaalulucile yeyi, pakulukwenda.

¹⁸ Ifyamikombelo yaiyo, yalisuntucile, yakutinisya; yonane yali nemikombelo yaiyo ikumene amenso ponse ponse.

¹⁹ Popele pakwenda ifilaŵi, imikoŋko nayo kailukwenda mu ceni cafiko; kaŵili pakusuntulwa ifilaŵi ukufuma pacalo, imikoŋko nayo kaisuntulwa.

²⁰ Uko konse ukuŋgaya umupasi, kopelo'ko kakuya fyo; uko kopele ekuŋgaya umupasi; kaŵili imikoŋko nekusuntulwa muceni cafiko; pakuti umupasi wacilaŵi wali mumikoŋko.

²¹ Pakwenda ifyo nipakwenda nayiyi; pakwimakana ifyo nipakwimakana nayiyi; pakusuntulwa ifyo ukufuma pacalo epakusuntulwa nemikoŋko muceni cafiko; pakuti umupasi wacilaŵi wali mumikoŋko.

²² Kaŵili peulu pamutwi wacilaŵi pali ukupalana kwamuceleŵela, koti musaŋgo waŋgulu yakutinisya, utandabwilwe peulu pamitwi yafiko kwiulu.

²³ Lomba pansi pamuceleŵela pali amapindo afiko aluŋgeme, limo ilisiŋkamene nalimbi; fyonse cimo cimo fyali nao aŵili afimbile-po paluŵali ulu; kaŵili fyonse cimo cimo fyali nao aŵili afimbilepo paluŵali ulo, pamiŵili yafiko.

²⁴ Popele pakulukwenda fyo, naliumfwile icipupa camapindo afiko koti cipupa camenda akulu, koti lisiwi lya Ŵamakosa onse, icipupa caŋgwele koti cipupa ceŵumbe' likulu: pakwimakana fyo fyaliselwisye amapindo afiko.

²⁵ Popele pali isiwi peulu pamuceleŵela uwali peulu pamitwi yafiko; pakwimakana fyo fyaliselwisye amapindo afike,

²⁶ Kaŵili peulu pamuceleŵela, uwali peulu pamitwi yafiko, pali ukupalana neteŵe lyaŵufumu, koti mekalilo ebwe lyasafila: lomba pakupalana neteŵe lyaŵufumu pali ukupalana ukwali koti kuŵoneka kwamuntu pali ko peulu.

²⁷ Popele nalibwene icali koti musaŋgo wacinanana, koti kuŵoneka kwamulilo mukati monse monse, ukutatika kukuŵoneka kwaluŵunda lwakwe nekuya peulu; kaŵili ukutatika kukuŵoneka kwaluŵunda lwakwe nekuya pansi, nalibwene icali koti kuŵoneka kwamulilo; lomba ukusasamuka kwalimusiŋgulucile,

²⁸ Koti kuŵoneka kwaŋkoŋgolo ili mwikumbi pakasuŵa kamfula, fyopele'fyo efyali ukuŵoneka kwakusasamuka ukwasiŋgulucile. Uko ekuŵoneka kwakupalana kwaŵuleme bwaŵaYawe. Peŋka, ili nakubwene, naliwilile pansi napamenso anji; eli niŋgomfwa isiwi lyaŵalaŵile.