Danyeli 1 - Amashiwi Aba Lesa

¹ Pamwaka waŵuitatu uwaŵufumu bwakwe Jeyoyacimu, imfumu yaŵaJuda, lomba Nebukadinesa, imfumu yakuBabiloni, yaliisile kuJelusalemi, nekusiŋguluko'musi.

² Peŋka ŵaYawe ŵalimuposele Jeyoyacimu, imfumu yaŵaJuda, muminwe yakwe, pamo nafimbi ifiŋkoloŋkolo ifyamuŋanda yaŵaLesa; naye nekufipintila kucalo caSina kuŋanda yakwe lesa wakwe: kaŵili nekufiinjisya ifiŋkoloŋkolo namuŋanda yaŵuŵoni bwakwe lesa wakwe.

³ Popele imfumu yalilaŵile kuli Asipenasi, icilolo cantuŋgu syaiyo ati, Winjisye ŵambi aŵaIsilaeli aŵo aŵamumukoka waŵufumu newaŵupemba;

⁴ aŵasaŋkwa aŵataŵali nefyakuŵaŵifya neli cimo, aŵantu ŵaŵulombe, aŵakwisiŵisya amano onse, aŵacenjele mukwisiŵa, aŵakwisiŵa uŵusambisi ubwapatali, naŵaŵo aŵesiŵile ukwimakana muŋanda ikulu iyamfumu; lomba ukalukuŵasambisya ifyaŵusambisi nemulaka waŵaKalidaya.

⁵ Kaŵili imfumu yalifundile ati ŵapoke ifyakulekanya ifyelelwe insiku syonse pafyakulya fyamfumu, napamfaina isi yalukunwa; nekulukuŵalisya bwino imyaka itatu; popele pakusila impindi iyo ŵakesiŵe ukwimakana pamenso amfumu.

⁶ Lomba peŵumba lyaŵaŵo epo ŵali aŵaJuda aŵa, Danyeii naYananaya naMisyaeli naAsaliya.

⁷ Popele icilolo cantuŋgu caliŵapele amasina; calimwilicile Danyeli ati niBelitesyasa, naYananaya ati niSyadilaci, naMisyaeli ati niMesyaci, naAsaliya naye ati niAbedinego.

⁸ Sombi Danyeli walilifundile mumutima wakwe ati, Tesi ndukuliŵifya-po nefyakulya fyamfumu neli nimfaina isi ilukunwa-po; pakuti pali fyefyo walilombele kucilolo cantuŋgu ati mbule ukulukuliŵifya.

⁹ Kaŵili ŵaLesa ŵalimu lanjisye ifyaŵupaŋga neŋkumbu pamenso acilolo cantuŋgu.

¹⁰ Naco icilolo cantuŋgu nekulaŵila kuli Danyeli ati, Ndukuŵatina ŵasikulu ŵanji, imfumu, aŵafundile ifyafyakulya nefyakunwa fyenu; pakuti mbanindo ŵaŋgabwena pamenso enu paŵipile apakucila napa ŵasaŋkwa aŵamyaka yenu? Fyopelefyo muŋgaŋkulika umutwi nemfumu.

¹¹ Kumfwa Danyeli walaŵila kumpemba iyo iyi icilolo cantuŋgu caikalicile peulu pali Danyeli naYananaya naMisyaeli naAsaliya, ati,

¹² Ndukumulombeni ati, Twesyeni fweŵapyunjisi ŵenu insiku ikumi, musumine ati ŵakalukutupela inyaŋgu syakulya nemenda akunwa.

¹³ Popele apo napamenso pesu pakaŵonwe kuli mweŵo, napamenso paŵasaŋkwa aŵo aŵalukulya pafyakulya fyamfumu; lomba koti nifyefyo ifi mukaŵona, efyo mukacite kuli fweŵo fweŵantu ŵenu.

¹⁴ Fyopele'fyo aliŵomfwile ifyafyefyo, nekuŵesya insiku ikumi.

¹⁵ Lomba pakupita insiku ikumi napamenso paŵo palibwenekele apaweme apakucila, naŵo ŵaliinine ukwakucila napaŵasaŋkwa aŵo ŵonse aŵalukulya pafyakulya fyamfumu.

¹⁶ Pakuti pali fyefyo impemba yalifumisye ifyakulya fyaŵo nemfaina isyo ŵaŋganwa, nekuŵapela nenyaŋgu.

¹⁷ Kaŵili aŵasaŋkwa aŵo ŵonane, ŵaLesa ŵaliŵapele ukwisiŵa nemilaŋgwe yaŵusambisi ŵonse nemano onse: naye Danyeli wali nekalaŋgo akakuŵulisisya ukuŵona konse nefiloto fyonse.

¹⁸ Popele, ili syapelele-ko insiku isyo isyansicilwe kumfumu ati ŵaŵenjisye, lomba icilolo cantuŋgu caliŵenjisye pamenso akwe Nebukadinesa.

¹⁹ Nayo imfumu nekwambala naŵo; lomba peŵumba lyaŵo ŵonse tapabwenekele neli umo uwakupalana nakwe Danyeli naYananaya naMisyaeli naAsaliya; pakuti pali fyefyo ŵo ŵalukwimakana pamenso amfumu.

²⁰ Kaŵili mufyeŵo fyonse ifyamano nekalaŋgo, ifyafyefyo imfumu yalukuwepusya, yalibwene ati ŵalukucila impindi ikumi napawabwaŋga neŵalaye ŵonse aŵalukwikala muŵufumu bwakweŵonse.

²¹ Lomba Danyeli nekulukwikala ukufika nakumwaka wakutaŋga uwamfumu Kolesi.