Agayi 1 - Amashiwi Aba Lesa

¹ Pamwaka waŵuiŵili uwamfumu Daliu, pamwensi wakukoŵeka-mo, pakasuŵa akakutaŋga kamwensi, lyaliisile isiwi lyaŵaYawe muli Agayi uwakusimika kuli Selubabeli umwana wakwe Syalatieli icilolo capacalo caŵaJuda, nakuli Josyua umwana wakwe Jeosadaci umupapatilisi umukulu, nekulaŵila ati:

² ŴaYawe ŵamaŵumba ŵalukulaŵile'fi ati: Aŵantu aŵa ŵalukulaŵila ati, Impindi taiŋgesa iyakwiŵaka iŋanda yaŵaYawe.

³ Peŋka'po isiwi lyaŵaYawe lyaliisile muli Agayi uwakusimika ati:

⁴ Kansi iyi nimpindi yakwikala mweŵo mweŵene mumaŋanda ali netuŵimbeulu, ili icili yalukoso iyi-ŋanda?

⁵ Pakuti pali fyefyo lomba ŵa Yawe ŵamaŵumba ŵalukulaŵile'fi ati: Kamulaŋguluka bwino insila syenu.

⁶ Mwaliminsaile ifinji, sombi mwateŵula ifice; mulalya, sombi tamwikuta-po; mulanwa, sombi tacisila-po icilaka cenu; mulafwala, sombi tapali-po uwakumfwa-po iciŵe; kaŵili uyo upoka amalambulo alaaŵika lukoso mumukopa utiŵacile.

⁷ ŴaYawe ŵamaŵumba ŵalukulaŵile'fi ati: Kamulaŋguluka bwino insila syenu.

⁸ Kamunina kulupili, mulete ifiti, mwiŵake iŋanda; eli naneŵo ŋkasaŋgalalilamo muli yo, nekulemiwa, efilukulaŵila ŵaYawe.

⁹ Mwalipembelele ifinji, sombi ŵoneni, fyaliŵele fice; kaŵili pakufiletela kwenu nalifyululwile. Lomba ŵaYawe ŵamaŵumba ati: Mbanindo? Nipakuti paŋanda yanji iili lukoso, ili mulukuŵutuka mwense umo umo mukuya kuŋanda syenu.

¹⁰ Pakuti pali fyefyo iulu lilukumukanisyeni icime, necalo nekulukumukanisyeni ifisepo fyacico.

¹¹ Popele ndiciitile icilala mukwisa pacalo, napamapili, napamasaka napamfaina, napamafuta, napali fyefyo fyonse ifi umesya umusili, napaŵantu, napaŋombe, napamilimo yonse iyakuminwe.

¹² Peŋka Selubabeli umwana wakwe Syalatieli, naJosyua umwana wakwe Jeosadaci umupapatilisi umukulu, pamo neŵantu ŵonse aŵasyele-po, ŵalilyumfwile isiwi lyaŵaYawe Lesa waŵo, nemasiwi akwe Agayi uwakusimika, pakuti ŵaYawe Lesa waŵo eŵamutumine; kaŵili aŵantu ŵalukutonda pamenso aŵaYawe.

¹³ Popele apo Agayi, iŋkalamba yaŵaYawe, uwalukulaŵila iceŵo caŵaYawe kuŵantu, walilaŵile ati: Ŵalukulaŵila ŵaYawe ati: Neŵo ndi nenu.

¹⁴ Lomba ŵaYawe ŵaliŵusisye umupasi wakwe Selubabeli umwana wakwe Syalatieli icilolo capacalo caŵaJuda, nemupasi wakwe Josyua umwana wakwe Jeosadaci umupapatilisi umukulu, nemipasi yaŵantu aŵasyele-po ŵonse; naŵo ŵaliisile nekupyuŋga muŋanda yaŵaYawe ŵamaŵumba, Lesa waŵo,

¹⁵ pakasuŵa kamakumi aŵili nasine akamwensi wakukoŵeka-mo, pamwaka waŵuiŵili uwamfumu Daliu.