3 Yoane 1 - Amashiwi Aba Lesa

¹ Nemukulu ndukumulembela Gayo utemiwe, uyu ntemwa muli ŵucine.

² Weutemiwe, mufintu fyonse ndukutembela ati usyuke, ulukwikele neŵumi, koti nifyopele'fyo ifi ulukusyuko'mutima woŵe.

³ Pakuti nalisaŋgalele ukwakuti, ili ŵaisile aŵakwasu, nekusimicila ŵucine ŵoŵe, koti nifyopele'fyo ifi wenda muli ŵucine.

⁴ Ukusaŋgalala nsikwete ukwakucila napali fifi, ati ndukumfwa ati aŵana ŵanji ŵalukwenda muli ŵucine.

⁵ Weutemiwe, ulacite'milimo iyakucetekela muli fyefyo fyonse ifi uŵacitila aŵakwasu, eŵensu kaŵili,

⁶ aŵasimicile uŵutemwe ŵoŵe pamenso ekelesya. Awo kani ukaŵasindicisye ukuŵelelwe ŵaLesa ukacite'fiweme;

⁷ pakuti ŵaliile pakuti peSina, aŵakuŵulo'kupoka neli kantu kuŵenafyalo.

⁸ Pakuti pali fyefyo ukutwelelwa ukuŵapokelela aŵakuŵe'fyo, ati naŵo pamo tukaŵe ŵakuŵofwa-ko ŵucine.

⁹ Nalililembele ikelesya; sombi Dyotilefe, uyo utemwo'kuŵacilo'ŵukulu, taatupokelela-po.

¹⁰ Pakuti pali fyefyo, kani ŋkese, ŋkalaŋguluka imilimo yakwe iyi alukucita, ukulukutulaŵisya nemasiwi aŵipile; sombi taatekenye kuli fyefyo, lomba umwine taapokelela'ŵakwasu, nawawo aŵalukufwaya ukuŵapoka kaŵili alaŵakanya, nekuŵaposa pesonde lyekelesya.

¹¹ Weutemiwe, tekutuntulule'fyo ifiŵipile, sombi utuntulule ifiweme. Uyo ucite'fiweme wakuli ŵaLesa; sombi uyo ucite'fiŵipile taabwene ŵaLesa.

¹² Demetilo alisimicilwe kuŵantu ŵonse nakuli ŵucine ubwine: nafweŵo kaŵili tulukucita ŵumboni; popele uliisi ati ŵumboni bwesu bwacine.

¹³ Nali nefintu ifinji ifyakukulembela, sombi nsilukufwayo'kukulembela kuli inci nakuli peni;

¹⁴ sombi ndukucetekela ati ŋkakuwona bwaŋgu, eli tukaambala pamenso. Uŵutende bwikale noŵe. Aŵaŵyesu ŵalukukusekela. Kamuŵasekela aŵaŵyesu kumasina aŵo.