2 Yoane 1 - Amashiwi Aba Lesa

¹ Nemukulu ndukwilembela iŋgalamwe isalulwilwe kuli ŵaLesa neŵana ŵaiyo, aŵo ntemenwe muli ŵucine; teneŵo neŋka koku, sombi naŵaŵo ŵonse aŵesiŵile ŵucine;

² pakuti pali ŵucine ubwikala muli fweŵo; kaŵili ŵukalukuli nafweŵo insiku syonse isyamuyayaya.

³ Uluse neŋkumbu neŵutende ŵukalukuli nafweŵo, ubwakufuma kuli ŵaLesa ŵaWisifwe, nakuli ŵaYesu Klistu Umwana waŵo ŵaWisifwe, muli ŵucine namuŵutemwe.

⁴ Ndukusaŋgalalo'kwakuti pakuti ndibwene aŵana ŵoŵe ŵambi ŵalukwenda muli ŵucine, koti nifyopele'fyo ifi twafundilwe kuli ŵa Wisifwe.

⁵ Popele ŵukumo, ŋgalamwe, ndukumukombeteleni, tekoti kweŵa ati ndukumulembeleni ifunde lyaŵukumo, sombi lyeŋke'lyo ili twali nalyo napakutaŋga, ati: Ŋgatulukutemwansyanya.

⁶ Kaŵili uŵutemwe niŵuŵu ati tulukwenda koti mafunde aŵo. Ifunde nilili, ati umo umu mwaumfwile napakutaŋga, mopele umo kamulukwenda.

⁷ Pakuti aŵakutumpaika aŵenji ŵalipalaŋganine mucalo capansi, eŵaŵo aŵataŵasuminina ati ŵaYesu Klistu eŵesa mumunefu. Uwakuwe'fyo wakutumpaika nimukana-ŵaKlistu.

⁸ Mulicete, mwiŋgesa-kulufye'fyo ifi mwacitile, sombi ŋgamupoke ukulambulwa ukwakukumana.

⁹ Aŵantu ŵonse uyo utanjila-ko, utekala muŵusambisi bwaŵaKlistu, taakwete ŵaLesa; uyo uwikala muŵusambisi, uyo wopele euli naŵa Wisifwe neMwana waŵo kaŵili.

¹⁰ Kani umbi ese kuli mweŵo, uwakuŵulo'kuleto'wusambisi uwu, tekumupokelela muŋanda neli kumusekela, tau!

¹¹ Pakuti uyo uwakumusekela, euwaŵana nakwe ukucita kwakwe ukuŵipile.

¹² Ndi nefintu ifinji ifyakumulembeleni, sombi nsifwaile-po kwipepala nakuli inci; sombi ndukucetekelo'kwisa kuli mweŵo, nekulawila pamenso, ati ukusaŋgalala kwenu kukakumane.

¹³ Aŵana ŵamukwanu usalulwilwe kuli ŵaLesa ŵalukumusekeleni.