2Imfumu 1 - Amashiwi Aba Lesa

¹ Lomba panuma yakufwa kwakwe Eyabi, aŵaMoabi ŵaliŵaalucile aŵaIsilaeli.

² Kaŵili Eyasaya aliwile pakambeluka akakucipinda cakwe icapeulu icali muSamalya, naye nekulwala. Popele alitumine iŋkalamba, nekusiŵula ati, Kamuyeni mukepusye kuli Balasebubi, lesa wakuEcilono, ati kani ŋkalwaluke kuŵulwele uŵu.

³ Sombi iŋkalamba yaŵaYawe yalilaŵile kuli Elaija uwakuTisibi ati, Ima, unine mukukumana neŋkalamba syamfumu yakuSamalya, ukalaŵile kuli syo ati, Kani nipakuti tamuli-po neli niŵaLesa muIsilaeli, ati mulukuya mukwipusya kuli Balasebubi, lesa wakuEcilono?

⁴ Pano lomba ŵaYawe ŵalukulaŵile'fi ati, Tekuti ukaseluke paŵulo uŵo wunininepo, sombi ukafwe'cine. Naye Elaija kaakumbuluka.

⁵ Popele iŋkalamba syalibwelele kumfumu, nayo nekulaŵila kuli syo ati, Mbanindo mwabwelela?

⁶ Nasyo nekulaŵila kuli yo ati, Pafiko'mwalalume ukulukukumana nafweŵo, nekulaŵila kuli fweŵo ati, Kamuyeni, mubwelele kumfumu iyamutumeni, mukalaŵile kuli yo ati, WaYawe ŵalukulaŵile'fi, ati, Kani nipakuti tamuli-po neli niŵaLesa muIsilaeli, ati mulukutuma mukwipusya kuli Balasebubi, lesa wakuEcilono? Pakuti pali fyefyo tekuti mukaseluke paŵulo uŵo mwaninine-po, sombi mukafwe'cine.

⁷ Nayo kailaŵila kuli syo ati, Mbomwalalume wasyani uyo uwaninine mukukumana namweŵo, nekumuŵuleni ayo-masiwi?

⁸ Nasyo kasiyasuka ati, Ye wali mwalalume wamasako; walifwite umusipi waciseŵa muluŵunda. Kumfwa nayo ati, NiElaija uwakuTisibi.

⁹ Popele apo imfumu yalitumine kuli ye icilolo capafita amakumi asanu pamo neŵantu ŵacico amakumi asanu. Naco kacinina kuli ye; lomba kusaŋga, waliikele peulu palupili. Naco kacilaŵila kuli ye ati, Wemuntu waŵaLesa, imfumu yalaŵila ati, Seluka!

¹⁰ Popele Elaija waliasucile nekulaŵila kucilolo capafita amakumi asanu ati, Kani neŵo ninemuntu waŵaLesa, umulilo ŋgauseluke kwiulu, ukusilisye weŵo pamo neŵantu ŵoŵe amakumi asanu. Peŋka'po paliselucile kwi ulu umulilo nekucisilisya pamo neŵantu ŵacico amakumi asanu.

¹¹ Popele liŵili yalitumine kuli ye icilolo cimbi icapafita amakumi asanu pamo neŵantu ŵacico amakumi asanu. Naco kacasuka nekulaŵila kuli ye ati, Wemuntu waŵaLesa, imfumu yalaŵile'fi ati, Aŋgufya ukuseluka!

¹² Popele Elaija waliasucile nekulaŵila kuli ŵo ati, Kani neŵo ninemuntu waŵaLesa, umulilo ŋgauseluke kwiulu, ukusilisye weŵo pamo neŵantu ŵoŵe amakumi asanu. Peŋka'po umulilo waŵaLesa waliselucile kwi ulu nekucisilisya pamo neŵantu ŵacico amakumi asanu.

¹³ Nakaŵili yalitumine icilolo capafita amakumi asanu ifyaŵufitatu pamo neŵantu ŵacico amakumi asanu. Popele icilolo capafita amakumi asanu icaŵufitatu calininine, nekufika, nekufukama napamakufi pamenso akwe Elaija, nekumukombetela, nekulaŵila kuli ye ati, Mweŵantu ŵaŵaLesa, ndukumukombeteleni ati umweo wanji, nemweo waŵaŵa amakumi asanu, aŵantu ŵenu, ŋgauŵe nemakweŵo pamenso enu.

¹⁴ Woneni, kapaseluka kwiulu umulilo, kaufisilisya ifilolo fiŵili ifyakutaŋga ifyapafita amakumi asanu pamo nemaŵumba afifyo aŵantu amakumi asa nu; sombi ŵukumo umweo wanji ŋgauwe nemakweŵo pamenso enu.

¹⁵ Popele iŋkalamba yaŵaYawe yalilaŵile kuli Elaija ati, Koseluka pamo naco; wicitina. Naye kaema, kaaseluka pamo naco nekuya kumfumu.

¹⁶ Popele alilaŵile kuli yo ati, ŴaYawe ŵalukulaŵile'fi ati, Pakuti mwalitumine iŋkalamba mukwipusya kuli Balasebubi, lesa wakuEcilono, kani nipakuti tapali-po neli niŵaLesa muIsilaeli aŵakwipusya ifyesiwi lyaŵo? Pakuti pali fyefyo tekuti mukaseluke paŵulo uŵu mwaninina-po, sombi mukafwa icine.

¹⁷ Fyopele'fyo yalifwile koti lisiwi lyaŵaYawe ilyo alaŵile Elaija. Popele Jeolami walitaticile ukwikalika pamupunda waiyo pamwaka waŵuiŵili wakwe Jeolami, umwana wakwe Jeosafati, imfumu yakuJuda; pakuti yo tayali namwana umwalalume.

¹⁸ Popele ifyakucita fyakwe Eyasaya ifyakusyala-po, ifyo acitile, kansi tafililembelwe mwibuku lyafyeŵo fyamfumu syakuIsilaeli?