1 Yoane 1 - Amashiwi Aba Lesa

¹ Ifyo ifyalipo pakutaŋga, ifi twaumfwile, ili twabwene nakumenso esu, ifi twatambile, ifi apampantile-po amaŵoko esu, ifyakwisiwi lyamweo

² (pakuti umweo walibwenekele, kaŵili twaliubwene, popele tulukucita ŵumboni nekumutulisisyeni umweo uwamuyayaya, uwali kuli ŵaWisifwe, uwafisulwilwe kuli fweŵo);

³ ifyo ifi twabwene nekumfwa, tulukumutulisisyeni namweŵo, ati namweŵo mukaŵe nekwambala nafweŵo: kaŵili ukwambala kwesu kuli naŵaWisifwe neMwana waŵo eŵaYesu Klistu.

⁴ Nakaŵili ifi-fintu tulukumulembeleni ati kukakumane ukusaŋgalala kwesu.

⁵ Kaŵili iceŵo ici twaumfwile kuli ŵo, ici tulukumutulisisyeni, nicici, ati ŵaLesa ekutuŵa, kaŵili muli ŵo tamuli imfinsi neli panini.

⁶ Kani tulaŵile ati tulaambala naŵo, lomba nekulukwenda mumfinsi, tulaŵepa, tatucita-po ŵucine;

⁷ sombi kani tulukwenda mukutuŵa, koti nifyopele'fyo ifi ŵali mukutuŵa ŵo, tulaambala bwinofwense, kaŵiliimilopa yaŵaYesu Klistu umwana waŵo ilatuswesya kukuŵifya konse.

⁸ Kani tulaŵile ati tatukwete-kuŵifya, tulalitumpaika, kaŵili ŵucine taŵuli muli fweŵo.

⁹ Kani tufisulule ukuŵifya kwesu, ŵali ŵakucetekelwa ŵaluŋgeme ati ŵakafitulucile ukuŵifya kwesu, ŵatuswesye kukusendama konse.

¹⁰ Kani tulaŵile ati tatuŵifisye, tulaŵaalula ŵakuŵepa, kaŵili isiwi lyaŵo talili muli fweŵo.