1Imfumu 1 - Amashiwi Aba Lesa

¹ Popele Dafidi imfumu walicekwile, walikumene imyaka iyinji; lomba ŵalukumufimba-po neŋguŵo, sombi taaŵele-po nekukaŵa, ii.

² Pakuti pali fyefyo aŵapyunjisi ŵakwe ŵalilaŵile kuli ye ati, Ŋgaŵaŵafwaile ŵaSikulu ŵanji imfumu kamwale uswetele; ŋgaeme pamenso amfumu, ailelese bwino; alale pantiŵi yenu ati ŵaSikulu ŵanji imfumu ŵaŵe nekukaŵa.

³ Fyopele' fyo ŵalifwaile kamwale uweme monse mumitala yacalo caŵaIsilaeli, nekumuŵona Abisyaji umuSyunemi, nekumuleta kumfumu.

⁴ Lomba kamwale uyo uweme pamenso ukwakuti; naye walukwilelesa imfumu nekwipyunjila; sombi imfumu tayamwisiŵile-po.

⁵ Peŋka Adonija, umwana umwalalume wakwe Kajiti, walilisuntwile nekulaŵila ati, Neŵo ŋkaŵa ninemfumu! Naye waliliansicile iŋgolofwana neŵapali ŵakafwalo, neŵalalume amakumi asanu aŵakuŵutuka ukulukumutanjilila.

⁶ Kaŵili ŵawisi taŵamukalipisye neli kamo ukulaŵila ati, Mbanindo ulukucite'fi? Kaŵili ye wali mwalalume waŵulombe, uwalondele Abisalomi pakufyalwa.

⁷ Lomba walialicile naYoabi, umwana wakwe Syeluya, pamo naAbayata umupapatilisi; naŵo, ili ŵalukumulonda Adonija, ŵalukumofwa-ko.

⁸ Sombi Sadoko umupapatilisi, naBenaya, umwana wakwe Jeoyada, naNatani uwakusimika, naSimyai, naLeyi, neŵalalume ŵamakosa ŵakwe Dafidi, ŵo taŵali naAdonija, ŵaŵa.

⁹ Peŋka Adonija waJiipeye imbelele neŋombe nesinonene kwibwe lyansoka, apasiŋkamene napaEnilogeli; lomba aliŵetile aŵakwaŵo ŵonse, aŵana ŵamfumu aŵalalume, neŵalalume ŵaŵaJuda aŵapyunjisi ŵamfumu;

¹⁰ sombi taaŵetile-po Natani uwakusimika, neli niBenaya, neli ŵalalume aŵo aŵamakosa, neli niSolomoni umukwaŵo.

¹¹ Popele apo Natani walilaŵile kuli Batasyeba, ŵanyina Solomoni ati, Tamumfwile-po ati Adonija, umwana wakwe Kajiti, alukwikalika uŵufumu, lomba ŵaSikulu ŵesu Dafidi taŵafiisipo?

¹² Pakuti pali fyefyo lomba, ndukumukombeteleni ati, mwise mufundeni ati mupulusye umweo wenu mweŵene nemweo wamwana wenu Solomoni.

¹³ Kamuya, mwinjile umuli ŵaDafidi imfumu, mulaŵile kuli ŵo ati, MweŵaSikulu ŵanji, mwemfumu, kansi tamwalapile kuli neŵo nemusya wenu ati, Ieinenene Solomoni umwana wenu akekalika uŵufumu panuma panji, akekala peteŵe lyaŵufumu bwanji? Mbasyani lomba alukwikalika Adonija?

¹⁴ Ŵoneni, pakulukucambala apo mweŵo nemfumu, naneŵo kaŵili nakwinjila panuma penu nekulunduŵika amasiwi enu.

¹⁵ Popele apo Batasyeba waliinjile umwali imfumu mucipinda; lomba imfumu kansi yacekulo'kwakuti; kaŵili Abisyaji umuSyunemi walukwipyunjila imfumu.

¹⁶ Peŋka Batasyeba waliineme nekwilambila imfumu. Nayo imfumu ati, Mbamulukufwaye'ndo?

¹⁷ Naye walilaŵile kuli yo ati, MweŵaSikulu, mwalilapile kuli ŵaYawe Lesa wenu, ukundapila neŵo nemusya wenu ati, Ieinenene Solomoni umwana wenu akekalika uwufumu panuma panji, akekala peteŵe lyaŵufumu bwanji.

¹⁸ Lomba ŵukumo ŵoneni Adonija alukwikalika; sombi mweŵo mweŵaSikulu ŵanji, mwemfumu, tamufiisiŵile'fyo.

¹⁹ Kaŵili aipaya iŋombe nesinonene nembelele mpaŋgana mpaŋgana, nekuŵeta aŵana aŵalalume ŵonse ŵamfumu, pamo naAbayata umupapatilisi, naYoabi icilolo ceŵumba; sombi taamwitile-po Solomoni umupyunjisi wenu, tau.

²⁰ Lomba mweŵo, mweŵaSikulu ŵanji, mwemfumu, amenso aŵaIsilaeli ŵonse ali pali mweŵo, ati muŋgawawula uyo ukekala peteŵe lyaŵaSikulu ŵanji imfumu panuma paŵo.

²¹ Kani ifyo tefyo, pakaŵa ati, pakulala naŵawisiŵo ŵaSikulu ŵanji imfumu, fweŵilo nemwana wanji Solomoni ŵakatweŵa ati nimbifi.

²² Popele ŵoneni, ili acambala nemfumu, Natani uwakusimika nekwinjila.

²³ Naŵo nekwiŵula imfumu ati, Woneni, nikuli Natani uwakusimika. Peŋka pakwinjila ye pamenso amfumu, waliinamisye pamenso amfumu nemenso akwe pansi.

²⁴ Popele Natani ati, MweŵaSikulu ŵanji, mwemfumu, kani mwalaŵila ati, NiAdonija eukekalika uŵufumu panuma panji, eukekala peteŵe lyanji?

²⁵ Pakuti kano-kasuŵa aseluka, nekwipaya iŋombe nesinonene nembelele mpaŋgana mpaŋgana, nekwita aŵana aŵalalume ŵamfumu ŵonse nefilolo fyeŵumba naAbayata umupapatilisi; lomba ŵoneni ŵalukulya nekulukunwa pamenso akwe, nekulukulaŵila ati, ŴaLesa ŋgawapulusye imfumu Adonija!

²⁶ Sombi neŵo nemuntu wenu, naSadoko umupapatilisi, naBenaya umwana wakwe jeoyada, nemupyunjisi wenu Solomoni, taatwitile-po, woyu.

²⁷ Ici-cintu kansi cilicitilwe kuli ŵaSikulu ŵanji, imfumu; lomba tamwatulanjisye fweŵapyunjisi ŵenu uyo uŋgekala peteŵe lyaŵaSikulu ŵanji imfumu panuma paŵo?

²⁸ Peŋka'po Dafidi waliasucile ati, Njitileni-ko Batasyeba. Naye waliinjile umwali imfumu, nekwima pamenso amfumu.

²⁹ Nayo imfumu nekulapa ati, Koti nifyefyo ifi ŵali nemweo ŵaYawe aŵalubwile umutima wanji kukasyamo konse,

³⁰ icinenene ifyo namulapileni kuli ŵaYawe, Lesa wakwe Isilaeli, ati, Ieinenene Solomoni umwana wenu akekaliko'ŵufumu panuma panji, nekwikala peteŵe lyanji pamupunda wanji; icine nakucita fyopele'fyo kanokasuŵa.

³¹ Popele apo Batasyeba waliinamisye nemenso pansi, nekwilambila imfumu, nekulaŵila ati, ŴaSikulu ŵanji, imfumu Dafidi, ŋgaŵekalilile nemweo insiku pee!

³² Peŋka imfumu Dafidi ati, Njitileni-ko Sadoko umupapatilisi naNatani uwakusimika naBenaya umwana wakwe Jeoyada! Naŵo ŵaliisile pamenso amfumu.

³³ Popele imfumu yalilaŵile kuli ŵo ati, Muye neŵapyunjisi ŵaŵasikulu ŵenu, muŵensye Solomoni umwana wanji pemyuli lyanji ilyanakasi, mumuselusisye kuNjiyoni;

³⁴ lomba Sadoko umupapatilisi naNatani uwakusimika ŋgawamusufye apo ati nimfumu yaŵaIsilaeli; popele kamulisya ulupeŋga, mulaŵile ati, WaLesa ŋgaŵapulusye imfumu Solomoni!

³⁵ Popele apo mukanine ukumulonda, naye akafike ekale peteŵe lyanji; pakuti niye eukaŵa nimfumu pamupunda wanji; namwikalika ati aŵe cileme icapaIsilaeli napaJuda.

³⁶ Popele Benaya umwana wakwe Jeoyada waliyasucile imfumu ati, Ameni! ŴaYawe, Lesa waŵaSikulu ŵanji, ŋgawalawile'fyo fyopele.

³⁷ Koti nifyefyo ifi ŵali ŵaYawe naŵaSikulu ŵanji imfumu, fyopele'fyo ŋgawekale nakwe Solomoni, ŵaalule iteŵe lyakwe ati Jicile uŵukulu napeteŵe lyaŵaSikulu ŵanji imfumu Dafidi.

³⁸ Fyopele'fyo Sadoko umupapatilisi, naNatani uwakusimika, naBenaya umwana wakwe Jeoyada, pamo neŵaCeleti neŵaPeleti, ŵaliselucile nekumwensya Solomoni pemyuli ilyanakasi ilyakwe Dafidi imfumu, nekumufisya kuNjiyoni.

³⁹ Popele Sadoko umupapatilisi walifumisye mwisema iseŋgo lyamafuta, nekumusufya Solomoni. Naŵo kaŵalisya ulupeŋga: naŵo aŵantu ŵonse nekulaŵila ati, ŴaLesa ŋgawapulusye imfumu Solomoni!

⁴⁰ Lomba aŵantu ŵonse ŵaliimine ukulukumulonda, naŵo aŵantu nekulukulisya nemiloli, nekusaŋgalala nekusembo'kukulu; fyopele'fyo necalo nekupanduka kucipupa caiko.

⁴¹ Peŋka Adonija neŵensu ŵonse aŵo ali naŵo ŵalicumfwile pakusila ŵo ukulya. Lomba Yoabi, pakumfwa ye ukulila kwalupeŋga, walilaŵile ati, Mbakundo ici-cipupa camu si ulukuwele' ŋgwele?

⁴² Kansi, ili acilaŵila, lomba nekwisa Jonafani, umwana wakwe Abayata umupapatilisi; naye Adonija ati, Injila, pakuti weŵo muntu uelelwe, ulukulete'fyeŵo ifiweme.

⁴³ Naye jonafani nekumwasuka Adonija ati, Icine ŵaSikulu ŵesu, imfumu Dafidi, ŵamwikalika Solomoni ati nimfumu;

⁴⁴ kaŵili imfumu yatuma pamo nakwe, Sadoko umupapatilisi, naNatani uwakusimika, naBenaya umwana wakwe Jeoyada, pamo neŵaCeleti neŵaPeleti; kaŵili ŵamwensya pemyuli ilyanakasi ilyamfumu;

⁴⁵ nakaŵili Sadoko umupapatilisi naNatani uwakusimika ŵamusufya ati nimfumu muNjiyoni; lomba ŵanina ukufumo'ko ili ŵasemba, fyopeleʼfyo nemusi nekwitaŵakana lukoso. Ico ecipupa ici mwaumfwa.

⁴⁶ Kaŵili Solomoni aliikele peteŵe lyaŵufumu.

⁴⁷ Nakaŵili aŵapyunjisi ŵamfumu ŵali ŵaisa mukuŵasyucisya ŵaSikulu imfumu Dafidi, nekulaŵila ati, ŴaLesa ŵenu ŋgaŵaalule isina lyakwe Solomoni ati licile uŵukulu napesina lyenu, nekucite'teŵe lyakwe ati licile uŵukulu napeteŵe lyenu; lomba nemfumu nekwinamisya napaŵulo.

⁴⁸ Kaŵili imfumu yalaŵile'fi ati, Ŵalicindeme ŵaYawe, Lesa wakwe Isilaeli, aŵapela uwakwikala peteŵe lyanji kano-kasuŵa, nemenso anji nekufiŵona.

⁴⁹ Popele aŵensu ŵakwe Adonija ŵonse ŵaliŵele nekususwa, nekwima nekoŋgoloka ŵonse kwaŵo kwaŵo.

⁵⁰ Naye Adonija nekususwa pakuti pali Solomoni; naye nekwima, nekuya nekwikata kumaseŋgo akuconto.

⁵¹ Peŋka ŵalimuŵulile Solomoni ati, Ŵoneni, Adonija alukutina imfumu Solomoni; pakuti kusaŋga aliikete kumaseŋgo akuconto, nekulaŵila ati, Imfumu Solomoni ŋgaindapile kano-kasuŵa ati tekuti mwipaye umuntu wanji kumpoko.

⁵² Lomba Solomoni ati, Kani ye alibwenesye ati muntu uelelwe, tekuti kupone pansi neli musisi wakwe; sombi kani ifyakuŵifya fiŵonwe muli ye akafwa.

⁵³ Fyopele'fyo imfumu Solomoni yalitumine aŵantu, naŵo ŵalimuselwisye kuconto. Peŋka aliisile nekwilambila imfumu Solomoni; naye Solomoni nekulaŵila kuli ye ati, Koya kunanda yoŵe.