Marcu 1 - 4 Evangiles en Corse

A predica di Ghjuvanni u Battistu

¹ Principiu di u Vangelu di Ghjesù Cristu Figliolu di Diu.

² Cumu ch'ella hè scritta in lu libru di u prufeta Isaia: Eccu ch'eiu mandu u miò anghjulu dananzu à te per apreti a strada,

³ una voce grida inde u desertu: Aprite a strada di u Signore, dirizzate i so chjassi .

⁴ Cumparse Ghjuvanni inde u desertu, battezendu è predichendu u battezimu di penitenza pè u riscattu di i peccati.

⁵ A Ghjudea sana è u populu di Ghjerusaleme andavanu à truvallu è si facianu battezà da ellu inde u fiume Ghjurdanu, palesendu i so peccati.

⁶ È Ghjuvanni era vestutu di peli di cammellu, strinti à e rene da un currighjolu. Grilli è mele selvaticu eranu u sò cibu.

⁷ È predicava dicendu: «Dopu à mè vene quellu chì hè più putente chè mè. Eiu un so mancu degnu di calammi per discioghjeli e currighjine di e sandule.

⁸ Eiu, v'aghju battezatu cù l'aqua, ma ellu vi battezera cù u Spiritu Santu.»

U battezimu di Ghjesù

⁹ In quelli ghjorni Ghjesù ghjunse da Nazarè di Galilea è fù battezatu da Ghjuvanni inde u Ghjurdanu.

¹⁰ A tempu esciutu da l'acqua vide apresi u celu è u Spiritu, sottu forma d'una culomba, chì li facia a stantara sopra.

¹¹ Da u celu una voce si fece sente: «tu sì u mio figliolu dilettu. In tè mi sò cumpiaciutu.»

Tentazione di Ghjesù

¹² Senz'altru, u Spiritu u mandò inde u desertu,

¹³ duv'ellu stede quaranta ghjorni è quaranta notte messu à u provu da Satana era inturniatu di fere selvatiche, ma l'anghjuli u servianu.

U principiu di a predicazione in Galilea

¹⁴ Dopu chì Ghjuvanni fù incarceratu, Ghjesù andò in Galilea, predichendu u Vangelu

¹⁵ è dicendu: «u tempu hè compiu è s'avvicìna u Regnu di Diu: cunvertite vi è credite à u Vangelu.»

Chjama à i quattru pescadori

¹⁶ È passendu longu à u mare di Galilea, vide à Simone è à Andria u fratellu chì lampavanu e rete in mare: eranu pescadori.

¹⁷ È Ghjesù li disse: «Venite cù mè, è di voi ne feraghju pescadori d'omi.»

¹⁸ È subitu, lascendu e sò rete, u seguitonu.

¹⁹ È andendu appena più luntanu, vide à Ghjacumu, u figliolu di Zebedeu è à Ghjuvanni u fratellu chì eranu dinò elli inde a barca in traccia d'assestà rete.

²⁰ È subitu i chjamò; è elli, lasciatusi u babbu Zebedeu inde a barca cù i so marinari, u seguitonu.

L'omu cù u spiritu impuru

²¹ Poi andonu in Cafarnau; è subitu, u sabbatu, entratu inde a sinagoga, Ghjesù insegnava.

²² Eranu meravigliati da a so duttrina. Ci vole à dì ch'ellu insegnava per via di u putere ch'ellu avia è micca cum' è i Maestri di a Lege

²³ È ci era, inde a sinagoga, un omu sottumessu da un spiritu malignu, chì, à voce rivolta disse:

²⁴ «Di chè t'imbrogli, o Ghjesù Nazarenu? Forse sì venutu per mandacci à u sprufondu? A sò quale tù sì: sì u Santu di Diu.»

²⁵ Rimpruverendulu Ghjesù li disse: «Falla finita è esci da st'omu.»

²⁶ U spiritu malignu, dopu d'avellu straziatu, escì da l'omu briunendu à più pudè.

²⁷ Eranu tutti meravigliati è si dumandavanu unu à l'altru: «Cumu spiegà stu fattu? Chì sarà sta duttrina nova è cusì putente? Ne impone ancu à i spiriti maligni è u stanu à sente.»

²⁸ È a so rinomina si sparse subitu in tutta a Galilea.

Parechji malati migliurati

²⁹ À tempu esciuti da a sinagoga vensenu in casa di Simone è d'Andria, cù Ghjacumu è Ghjuvanni.

³⁰ A socera di Simone era chjinata cù a frebba. À tempu ghjunti, li parlonu d'ella.

³¹ Ghjesù li s'avvicinò, a pigliò pè a manu, l'arrizzò, è ella, sfrebbata, dava capu à tutti.

³² A sera, à tardi, à u ciuttà di u sole, li presentonu tutti i malati è l'indemuniati.

³³ È tutta a cità s'era radunita dananzu à a porta.

³⁴ Ne risanò parechji chì eranu acciaccati da diverse malatie è scunviò parechji demonii, senza lascialli parlà, par via ch'elli u cunniscianu.

Ghjesù và à predicà

³⁵ Sveghjendusi a mane di notte, Ghjesù escì di casa è andò ind'un locu scantatu duv'ellu precava.

³⁶ Ma Simone è quelli chì eranu cun ellu li partinu apressu.

³⁷ Avendulu trovu, li dissenu: «Ti cercanu tutti!»

³⁸ Ellu rispose: «Andemu pè i paesi di u vicinatu è pè e cità ch' o' predicheghji ancu quallà u Vangelu chì sò esciutu per quessa.»

³⁹ È andava per tutta a Galilea, predichendu inde e sinagoghe è scunviendu i demonii.

Ghjesù purificheghja u leprosu

⁴⁰ Vense à truvallu un leprosu chì li si ricumandava, è, inghjinuchjatusi, li disse: «Sì tù voli, mi poi purificà.»

⁴¹ È Ghjesù, presu di cumpassione, stese a manu è, tucchendulu, li disse: «Cusì vogliu, sii tù purificatu.»

⁴² Subitu a lepra cascò è l'omu fù purificatu.

⁴³ È Ghjesù, u rimandò subitu, fenduli rimproveri

⁴⁴ è dicendu: «Fà casu d'ùn dì nulla à nimu; ma vai è fà ti vede à u capisacerdote, è offri, pè a to purificazione ciò ch'ellu hà ordinatù Musè, da testimunìanza per elli.»

⁴⁵ Ma u leprosu, andatusine, cuminciò à cuntà u fattu à voce rivolta, à tal puntu chì Ghjesù ùn pudia più entre à faccia aparta in cità, è stava fora, inde i lochi scantati. Ma ghjunghjianu da tutte e parte per scuntrallu.