Ma aram me ga’ar Moses ngak fapi girdi’ nu Israel, “Irera’ e binaw nrayag ngomed nike duwgil iip ko pow ni kan girengiy, ni fare binaw ni SOMOL e ke turguy ni ngan pi’ ko fa mereb nge balay e ganong.
Me kol Joshua fare nam ni ga’ngin, ni bod ni yog SOMOL ngak Moses. Me pi’ Joshua fare nam ngak piyu Israel ngar tafned miyad tay e f’oth riy nra reb e ganong ma bang. Ma aram me toffan e girdi’ ko mael.
Ni bod rogon ni yog SOMOL ngak Moses, ni duwgil ko pow nni girengiy nge gagyelnag e yungin ni nge milfan ngak fa mereb nge balay e ganong u ba’ ni ngal e Jordan.
