Joel 2:1 - Bible Ni Thothup

¹ Ngan thoy e yabul u lan yu Zion; ni fare burey nib thothup rok Got. Gimed e girdi’ nu Judah mu t’on gad, ya fare rran rok SOMOL e ke chugur.

Joel 2:1 Kruisverwysings

1 Kronicles 15:28

Ma aram e urngin e girdi’ nu Israel ma ra’uned ko fare Kahol ko M’ag nga talang u Jerusalem ni yad be tolulnag e felfelan’, ma be yan lingan e rappa’, yabul, nge cymbal, nge harp.

Psalms 119:120

Gu be rus ni bocham; ma ke sug nigeg e marus ni bochan e pufthin rom.

Psalms 87:1

SOMOL e toy e binaw rok nga daken fare burey nib thothup;

Exodus 10:14

Rabad nga daken e nam ni ga’ngin, miyad par riy. Aram e asmen’ing ni kan guy nth’abi yo’or, ma dakriy bayay ni ku yira guy ni aram feni yo’or.

Isaiah 13:6

Mu gel’gel’ naged e amith! Ya rran rok SOMOL e ke chugur, rofen ni En ni Gubin ma Rayag Rok e nge girengiy e riya’ i yib.

Isaiah 13:9

Rran rok SOMOL e nge anog — ni yaran e gafgow ko damumuw rok nib gel. Bayi par e fayleng ni dakuriy waton, ma gubin e pi tadenen e yira thang mit.

Isaiah 2:12

Rofen nem e SOMOL ni Gubin ma Rayag Rok e bayi sobut’nag e pi’in ba gel gelngirad, nge gubin e pi’in tolngan’ nge ufanthin.

Isaiah 66:2

I gag e gu sunumiy e fayleng nge lanelang ni ga’ngin! Bfel’ u wun’ug e pi’in nib sobut’an’rad ma kar pi’ed keru’rad ko kireb, ma yad be par ni bay madgug u wun’rad ma yad be fol rog.

Isaiah 66:5

Motoyil ko mang e be yog SOMOL, gimed e pi’in bay madgun romed ma gimed ma fol rok: “Bochan e gimed ba yul’yul’ ngog aramfan ni boch e girdi’ romed e ke dabuymed ni dakriy ban’en ni ba’adag romed. Yad be moning nagmed yad be ga’ar, ‘Mu paged SOMOL nge dag feni ga’ me aywegmed, ya ngug guyed ni kam felfelan’gad.’ Machane yad e bayi m’a’y farad!

Jeremiah 16:10

“Nap’an ni ga ra yog urngin e pin’ey ngorad, ma bay ra fithed gur ko mangfan ni nggu gechig nagrad ni ermirin. Ma kiyad ra fith ko mang e re oloboch nib buch e rorad riy fa mang denen e ka ra rin’ed nib togopluw ngak SOMOL ni Got rorad.

Jeremiah 16:7

Dariy be’ nra’ un ngak be’ nike yim’ be’ nib t’uf rok ko abich fa garbad ni bochan e nge fal’eg lanyan fa’anem. Mus ngak be’ nike yim’ e chitamngin fa chitiningin ma dariy be’ nra dag e magfan’ rok ngak.

Jeremiah 4:5

Mu thoyed e rappa u ga’ngin yang u lan e nam! Mu tolulgad nib ga’ lungmed ma bmatabogol! Moged ngak e girdi’ nu Judah ngu Jerusalem ni ngar milgad ko fapi binaw ni kan yororiy ni fan ko mael.

Jeremiah 5:22

I gag e SOMOL, ere mangfan ni damur rus gad ngog? Mang ni damur t’on gad u p’eowcheg? Gu tay e yan’ ni aram e mathil ko day, ni ba mathil nib muduwgil ni dabi th’ab e day nga barba’. Ra i malach e day, machane dabyag ni nge th’ab nga barba’; ma ra mada’ lingan e n’ew ngalang ma dabyag ni nge pil nga barba.

Ezekiel 12:23

Mog ngorad e n’en ni Gag fare SOMOL ni Th’abi Tolang e gu be yog u murung’agen e binem. Binem e marang’ag e bay gu museg. Ni dab kun sul u daken u lan yu Israel bi’id. Ngamog ngorad ni ara’ rogon: Rran riy e ray, ni pi yi’iy e bayib i m’ug nrib riyul!

Ezekiel 21:12

Fak e girdi’, mu go’go’ u fithik’ e gafgowan’; re gi saydon ney e ri fan ko girdi’ rog nge gubin e tayugang’ nu Israel. Bay ni unegrad ko girdi’ rog ngan li’rad. Mu pirdi’iyed pa’med nga daken ngarngorenmed u fithik’ e mathliyab!

Ezekiel 30:3

Ke chugur fare rran, ni fare rran rok SOMOL, nib rran ni ba lumolang ma ke ngolol e riya’ nga daken e pi nam.

Ezekiel 33:3

Nap’an nra guy e to’ogor ni be yib, me thoy e yabul ya nge ginaeng urngin e girdi’ nike yib e to’ogor.

Ezekiel 33:6

Ma fa’anra guy fa’anem ni damit e to’ogor nike yib ma de thoy e yabul, mra yib e to’ogor ngar li’ed fapi tadenen. Ma fare damit e gu ra tay ni ir e kireb rok nike yim’ fa picha’.

Ezekiel 7:10

Yaran e riya’ e ke yib. Ke tagyet e cham. Ma tolngan’ e kemus tolngin.

Ezekiel 7:12

Ke taw nga nap’an. Nike chugur ko fare rran ni bayi m’ayfan e chuway’ nge falchuway’, ni bochan e gechig rok Got e bayi aw nga daken e girdi’ ni ta’reb rogon.

Daniel 6:26

Gu be yog ni ga’ngin e gin gu ma gagiyegnag e nge par gubin e girdi’ riy ni bay madgun fare Got rok Daniel u wun’rad ma ngu’ur liyorgad ngak: “I ir ba Got ni be par nib fos ma bayi gagiyeg ni dariy n’umngin nap’an. Ma gagiyeg rok e dariy e n’en nra rin’ me yag nni kirebnag, ma gelngin e dariy e n’en nra rin’ me mus.

Daniel 9:16

I gur e gab mat’aw, ere dab kum damumuw ngak yu Jerusalem, ya ir e binaw rom, ni fare burey rom nib thothup. Urngin e girdi’ ko pi nam ni yad ba chugur ngay e yad be changar nga but’ ngak yu Jerusalem nge ngak e girdi’ rom ni bochan e denen ni kug rin’ed nge pi kireb ni i ngongliy e pi chitamangimad.

Daniel 9:20

Gu par ni gu be meybil ma gu be puwofay nag e denen rog nge denen rok e girdi’ ko nam rog nu Israel ngak SOMOL ni Got rog ni nge fulweg e Tempel rok nib thothup nga rogon.

Hosea 5:8

Mu thoyed e yabul u Gibeah ni fan ko mael! Mu kum rin’ed u Ramah! Mu tolul niged e mael u Bethaven! Girdi’ rok Benjamin, marod ko mael!

Hosea 8:1

I SOMOL e ga’ar, “Mu thoyed e yabul ni ngan nang ni pi to’ogor e yad be ngolol i yib nga daken e nam rog ni bod e manuw! Girdi’ rog e kar th’abed fare m’ag ni gu ngongliy u thilmad yad be togopluw ko machib rog.

Joel 1:15

Birok SOMOL e rran e ke chugur; fa’anem ni Gubin ma Rayag Rok e bayibnag e riya’. Ba ga’ ba marus ni yira tay e rofen nem!

Joel 2:11

I SOMOL e bayi yog ngak e salthaw rok e tin ngar rin’ed ni bay yib laman ngorad ni bod lingan e dirra’. Ma pi’in yad be fol rok e yad bpire’ ma yad ba gel. Re rran rok SOMOL nem e rib gel feni kireb! Mini’ e ra magay riy ni kabfos?

Joel 2:15

Mu thoyed e yabul u daken e burey ni Zion; mogned ni ngan pag e abich mi gimed pining e mu’ulung!

Joel 2:31

Ma bayi lumor e yal’, ma bayi pig ra’en e pul nge row ni bod e racha’ u m’on ndawori taw e re rran rok SOMOL nem, ni reb e rran ni ba ga’ ma ba gel e gafgow nra fek i yib.

Joel 3:14

Bokum e biyu’ e biyu’ e bay u lan fare Loway ko Pufthin. Ireram e re gin’en ndabki n’uw nap’an me taw fare rran rok SOMOL ngay.

Joel 3:17

“Gimed piyu Israel, e aram e bay mu nanged ni Gag e SOMOL ni Got romed. Gu be par u Zion, u daken e burey rog nib thothup. Jerusalem e bayi par nib binaw nib thothup; ma girdi’ nu bang e dabkiyag ni ngar koled yu Jerusalem bayay.

Amos 3:6

Gur rayag ni yan lingan e yabul ko mael u lan binaw ni dabi rus e girdi’? Gur rayag ni nge aw e riya’ ngab binaw ni gathi SOMOL e pag nge yib?

Amos 5:18

Kar mu gafgow gad e pi’in gimed ba’adag ni nge taw fare rran rok SOMOL! Mang e bfel’ ko re rran nem ngomed? Ya reb e rran nib rumug u pulwonmed, ma gathi tamilang.

Amos 8:2

Me ga’ar SOMOL, “Amos, mang e ga be guy?” Mug ga’ar, “Ba dug i wom’ngin e gek’iy.” Me ga’ar SOMOL ngog, “Ke anog e tomur ni nge mus e girdi’ rog ni Israel. Dab kug thiliyeg lanin’ug bayay ni nge dab kug gechig nagrad.

Obadiah 1:15

“Ke chugur ko rofen ni Gag SOMOL e nggu pufthinnag e pi nam. Edom, n’en ni kam rin’ e bay ni rin’ ngom. Ngonglem e bayi sul ngom.

Zefaniah 1:14

Fare rran ni bayi par SOMOL nga tagil’ e pufthin e be chugur nrib pey! Rofen nem e ri gafgow, ya mus ko pi salthaw ni th’abi fulu’ ma yad ra tolul u fithik’ e myor ni kemath e liyeb ngorad!

Zefaniah 1:16

re rran nem e ra sug nga lingan e yabul ko mael nge laman e pi salthaw ni be tolul ko ngiyal’ ni yad be cham ko fapi binaw nge tafen e damit ni kan yororiy nrib tolang.

Zefaniah 1:7

Kari chugur fare rran ni bay par SOMOL nga tagil’ e pufthin; ere mu th’abed gulungmed u p’eowchen. I SOMOL e ke fal’eg rogon ni nge maligach ko girdi’ rok ma ke pining e pi to’ogor ni ngar giliw niged yu Judah.

Zefaniah 3:11

Gimed e girdi’ rog, re ngiyal’ i n’em e bayi dab kum tamra’gad ni um togopluwgad ngog. Bay gu chuweg e pi’in yad ba tolngan’ nge pi’in yab ba fenuwan’, ma gimed e dakriy e ngiyal’ ni gimed ra togopluw ngog u daken fare burey rog nib thothup.

Zekariah 14:1

Fare rran ni bayi par SOMOL nga tagil’ e pufthin e ke chugur. Ma aram e bay ni fek u fithik’ e yargal urngin e tin fen piyu Jerusalem, pi chugom nem ni kan fek u fithik’ e yargal e yira f’oth u p’eowchemed.

Zekariah 8:3

Bay gu sul nga Jerusalem, ni fare binaw rog nib thothup, nggu par u rom. Re binaw nem e go’ bay nnang ni aram fare binaw nib yul’yul’, nge fare burey rok SOMOL ni Gubin ma Rayag Rok ni bay u nog ni fare burey nib thothup.

Malaki 4:1

I SOMOL ni Gubin ma Rayag Rok e be ga’ar, “Nap’an ni bayi taw ko fare rran ma bayi mo’oruf e pi’in tolngan’ nge girdi’ ni kireb e leam rorad ni bod e pan nike mlik’. Rofen nem e yad ra mo’oruf ni dariy bochyang rorad nra magay.

Numbers 10:2

“Mu ngongliy l’agruw i yabul ko silber ni kan amanag ni ngu’un pong girdi’ ngay ni nge mokun nga ta’bang nge ngiyal’ ni ngad piliged e pi Tent rodad nga but’ ni aram e ngad n’iged gil’dad.

Numbers 10:3

Nap’an ni yira thoy fa gali yabul ni kan k’iyag lingan, ma aram e nge mu’ulung e girdi’ ngar cholongobiyed gur u langan e mab ko fare Tent u p’eowcheg.

1 Korinth 14:8

Ma fa’anra dabi thoy e en nma thoy e yabul nrogon ni nge thoy, me mini’ e ra fal’eg rogon ni fan ko mael?

Filippi 2:12

Ere pi tafager rog, um moyed ni gubin ngiyal’ ni gimed be fol rog ko ngiyal’ ni ug moy romed, me ere chiney nda kug moy romed e ri ba ga’ fan ni ngam folgad rog. Um ngongolgad ni bay madgun Got u wun’med mu um t’on gad ko marus nge mada’ ko ngiyal’ ni kam marod ngak Got,

1 Thessalonika 5:2

Ya gimed ma ri gimed manang ni chirofen ni ir e re Rran rok Somol nem e bay taw ni bod be’ nib moro’ro’ ni yib nneap’.

James 5:8

Ere ku er rogomed nthingar mpired ni gimed ba gumaen’! Mpired nib muduwgilan’med ko n’en ke lagan’med ngay, ya chirofen ni nge sul Somol riy e ke chugur.

1 Peter 4:7

Ke chugur nga tungun urngin ban’en. Thingar um pired ni gimed be filmunguyan’med ma gimed be tiyan’med, nge yag ni um meybilgad.

Revelation 6:17

Ya fare rran ni ba ga’ ni ir e ngar damumuwgow riy e ke taw, me mini’ e rayag ni nge fos riy.