Jìiiŋ 1:12 - WƆŊ FƐ̀Ì EBÒ SÌÀŊ DAYÀA

¹² E zɔlɔ̀ yaà anyùùŋ nyaŋ jeeyà tɔ̀ɔ̀nyaàŋ sùà aŋ kɔ̀ɛ̀ e wàà e keì nyìnga dìì aŋ fè sɔ̀à nyaŋ. Sèè àŋ kɔɛ̀ e wàa bi dìì àŋ maaŋ, wo Dayà do nyiŋ nàŋ jàà kùàŋ dìì aŋ yɛ̀mɛ̀ e pààwà ke ɓɔ̀ɗì wɔŋ nyiiŋ gèe gò jùàa wò naŋ wa ɓèmè e ɗààhiì wèè wo fè anyùùŋ nyaŋ mànaùŋ nyaŋ.

Jìiiŋ 1:12 Kruisverwysings

Maafiù 10:22

Anyùùŋ nyaŋ gbiŋ doiŋ nàŋ wùɔ̀ŋ esàɓù e deè mɛ̀. Kɛɛ wo nyùnɔ̀ɔŋ gbiŋ kuwo e keì nyìnga bi e jèèsùà e hàì ko dìaì wɔ̀, wo Dayà douŋ wa nàwèè nàŋ joeyè.

Maafiù 25:34

Kpeiŋ kɛ̀ miàim wo Kanaà kà wòò anyùùŋ nyaŋ wɔŋ kùàŋ jìka miɔ̀ŋ mìàŋ, ‘Hnàaìŋ, nyɛ̀iŋ nyàŋ wo Dèda miɔ̀ŋ naŋ haayà nyaŋ! Hnàaìŋ niŋ ɓemè e Kànà Dayàa naŋ wa nɔ̀ŋ bàne niŋ weèiŋ lɛ paŋgàà e ɗuunyaàŋ naŋ wa nɔ̀ŋ bàne niŋ lɛ̀.

Luù 6:22

“E zɔlɔ̀ e nɔ̀iŋ sèè anyùùŋ aiŋ wùàŋ, aiŋ gbàŋ, aiŋ diɛ̀ŋ, e kìlà aŋ woò nyààŋ nìŋ yaà anyuùŋ nyɛ̀nɛ̀ŋ maŋ keì naanààŋ, esaɓù kɛ̀ nìŋ yaà anyùùŋ màŋjɛ̀wɛ̀ miàim wo Jɔ̀àfèlàà Nyuùŋ Kpùnɔɔ̀ŋ.

Luùm 5:4

Koɓɛ̀ guùŋ kùwa kpaŋ e hààwe wilɛ̀ sùà nyɛnɛŋ wo Dayà wo wi jàà kùàŋ dìì, yèè sèè wò jàà wì kùàŋ dìì, è doiŋ nàŋ kɛ̀ɛ̀nɛ̀ŋ ke jii tùlia.

Luùm 8:28

Wo Dayà tomàŋ wèè e tɛ̀ɛ̀tɛ̀ɛ̀ anyùùŋ nyaŋ mànauŋ nyaŋ. Nyiŋ nàŋ yaà anyùùŋ nyaŋ wo Dayà naŋ nyààŋ wèè aŋ nyɛ̀nɛ̀ŋ e yèɛ wò manaŋ lɛ̀.

1 Kɔliìŋ 2:9

Nààŋ wɔŋ fɛ̀ì Dayàa naŋ woò lɛ, “E nɛ̀ɛŋ wo nyùùŋ gbiŋ kòò yɛ̀mɛ̀ wa ɔ̀ɔ̀ kòò kòmò wa lɛ, e nɛ̀ɛŋ wo nyùùŋ gbiŋ kòò gòngò wa kè jiiò sùà kɛ̀ è ɓɛ̀nɛ̀ŋ kàaiŋ lɛ̀, tiŋ nàŋ yaà e nɛ̀ɛŋ wo Dayà naŋ banebànè wèè anyùùŋ nyaŋ mànaùŋ nyaŋ.”

1 Kɔliìŋ 8:3

Kɛɛ wo nyùnɔ̀ɔŋ manaŋ Dayà wɔ, wo Dayà wòuŋ nyìmàŋ.

1 Kɔliìŋ 9:25

Wo nyuùŋ kà maŋ gɔ̀ɔ̀yɛ zimgbe dììɔ wò tomàŋ wèè wo yɛ̀mɛ̀ ke ɓɔ̀ɗì kana ke yèɛ fè kòlà lɛ. Kɛɛ è nyɛnɛŋ tɛɛ̀ wèè eiŋ yɛ̀mɛ̀ ke ɓɔ̀ɗì kana wèè julɔfɔ.

2Time 2:15

Nyɛnɛ̀ŋ e tɛ̀ɛ̀tɛ̀ɛ̀ɛ gbiŋ mùŋ naŋ ɓɛ̀nɛ̀ŋ nyɛ̀nɛŋ lɛ̀ wèè wo Dayà jààum kùàŋ dìì, mààŋ wo nyuùŋ tòmoɔ̀ e sàngè fè wèè è tòmouŋ nɛ̀ wɔ, wo yèɔ kaà ke mìè gbìàŋ Dayàa e tɔ̀ɔ̀nyaàŋ sùà wɔ̀.

2Time 4:8

Eɓìèmàŋjɛ̀wɛ̀ tɛɛ̀ ke ɓɔ̀ɗì kana kòò kè yaà naàŋ bànè hàa nyiŋ e weèim esaɓù kɛ̀ wo Dayà weèim jàà kùàŋ dìì wèè ka nɔ̀ŋ wo nyùùŋ tɔ̀ɔ̀nyaàŋ, ke yèɛ wo Kanaà, wo nyuùŋ gbàì tɔ̀ɔ̀nyaàŋ, wò doim nàŋ kiɛ̀ŋ ke ɗɔɔ yii diɛŋ yɛ̀, yèè e naàŋ nɔŋ nɔ̀ŋ miàŋ guùŋ, kɛɛ è do naŋ nɔ̀ŋ wèè aŋ yè nyaŋ gbiŋ naŋ kùwò maŋ jii e manaŋ sùà wèè e hnàuŋ nɛ̀ lɛ.

Hiɓu 10:32

Ɓɔ̀ nìŋ nyɛɛnɛ̀ŋ wèè màŋ keì nyìnga màŋ nìŋ naŋ wa kɔ̀ɛ̀ɛ̀ sùà maŋ, e teenga jiɛ̀jiɛ̀ɛ nìŋ naŋ wa yɛ̀mɛ̀ e gbòlòùŋ Dayàa lɛ̀.

Hiɓu 11:17

E hààwe naŋ nyɛ̀nɛ̀ŋ wo Eɓulɔhɛɛ̀ŋ naŋ wa kìɛ̀ŋ wo jɔ̀àfelaauŋ nɔɔ̀ŋ Ààze koɓɛ̀ Dayài wèè nɔ̀ŋ e nɛ̀ŋ saaà, nààŋ wo Dayà naŋ wa gbìɛ̀ŋ wuŋ Eɓulɔhɛɛ̀ŋ e wàa dìì. Wo Eɓulɔhɛɛ̀ŋ nàŋ yaà wo nyùnɔ̀ɔŋ wo Dayà naŋ jɔ̀ɔ̀ e ɗààhiì, yɛi nɔŋ è yaà wò naŋ wa banebànè, wèè wo gììyà wo jɔ̀àfèlàà gunùuŋ nɔɔ̀ŋ saaà.

Hiɓu 12:5

Kɛɛ nàŋ nyɛɛnɛ̀ŋ wèè maŋ mìè jii nyingè maŋ wo Dayà naiŋ wa kiɛ̀ŋ maŋ, nààŋ nìŋ yaà aŋ jɔ̀à ko nɛ̀ɛ̀uŋ niìŋ. Wò naŋ wa woò wààŋ, “Jɔ̀à miɔ̀ŋ, sèè wo Kanaà woum kìɛ̀ŋ e keì nyìngà wèè woum dè ke dòmaŋ siaŋ diɛŋ, e zɔ̀kpɔ̀ ɓɔ̀ è nɔ̀um yèè ɓɔ̀ mùŋ niingè niŋ fɛ̀ɛ̀.

Hiɓu 6:15

Wo Eɓulɔhɛɛ̀ŋ naŋ wa kùwò ke jiiuŋ nɛɛ̀ŋ, kpeiŋ wò naŋ wa yɛ̀mɛ̀ e nɛ̀ɛŋ wo Dayà naŋ jɔ̀ɔ̀ ɗààhiì kɛ̀ wò douŋ wa nàŋ kiɛ̀ŋ lɛ.

Jìiiŋ 2:5

Nyɛ̀iŋ nààŋ wùìyaim nyàŋ, jàaìŋ maŋ nùŋ dìì! Anyuùŋ pɔ̀ɔ nyàŋ e ɗuunyaŋ lɛɛ̀ nyiŋ wo Dayà naŋ tàeɗùù wèè aŋ nɔ̀ŋ aŋ nyuùŋ bàne nyàŋ e hààweɛ̀ sùà. Yèè àŋ do nàŋ kɛ̀ɛ̀nɛ̀ŋ e kànà Dayàa e yèɛ wò naŋ wa ɓèmè ɗààhiì wèè wo fè aŋ nyùùŋ nyaŋ mànaùŋ nyaŋ.

Jìiiŋ 5:11

Anyùùŋ nyaŋ naŋ kɔ̀ e mɔ̀ɔ̀nɛŋ dìì nyaŋ è nyààìŋ nyiìŋ anyuùŋ kɛ̀ɛ̀nɛ̀ŋ zɔlɔ̀. Nàŋ kòmàŋ ebò e ɗeweɛ̀ wo Jòo naŋ wa kùwò jii lɛ̀, yèè nàŋ nyìmàŋ e ɗeweɛ̀ wo Dayà nauŋ wa kiɛ̀ŋ ko diemeì lɛ. Wo Dayà naŋ dìè ke nyowo yèè e hakɛ̀ jùùya.

1Pììlɛ 3:14

Kɛɛ sèè pɛɛ maŋ kà e keì nyìnga dìì wèè e tɔ̀ɔ̀nyaàŋ, wo Dayà doum nàŋ kpuumò. Wèètii ɓɔ̀ mùŋ dùàŋ nyùùŋ gbiŋ, yèè ke jii mɔɛ̀ŋ ɓɔ̀ kè sɛɛɛ̀ wèè è nɛ̀ɛŋ ànyùùŋ naŋ ɓɛ̀nɛ̀ŋ nyɛ̀nɛŋ lɛ̀.

1Pììlɛ 4:13

Kɛɛ gèeiŋ zɔlɔ̀ kɛ̀ e keì nyìngaà wo Jisɛ̀ naŋ kɔ̀ɛ̀ sùà lɛ, nìŋ yaà e bàiŋbà, wèè niŋ dià zɔlɔ̀ sèè wo Jisɛ̀ Kulaì hnàŋ wa nàwèè wò tɔɔ̀ e jòòwo gbeeuŋ nɛ̀.

1Pììlɛ 4:14

Sèè aiŋ diɛ̀ŋ esaɓù kɛ̀ nìŋ yaà anyùùŋ màŋjɛ̀wɛ̀ Jisɛ̀ Kulaì wo Dayà doiŋ nàŋ kpuumò. Tɛɛ̀ naŋ tɔɔ̀ kɛ̀ wo Jinàŋ kùwìè jòòwo gbeeɔ̀, tèènè mààŋ wò Jìnàŋ Dayàa, wò yààìŋ maŋjɛ̀wɛ.

1Pììlɛ 5:10

Sèè nìŋ kɔɛ̀ maŋ keì nyìnga mɛɛ̀ŋ sùà wèè e teenga kpuu sùà, wo Dayàa kuwa maŋ tɛ̀ɛ̀tɛ̀ɛ̀ maŋ gbiŋ wɔ̀, wo yèɔ naiŋ nyààŋ wèè wo goonòiŋ e jòòwò nyiiŋ gèe gò jùà ke gbòò Jisɛ̀ Kulaì sùà wɔ, wuŋ bi doiŋ nàŋ nyɛ̀nɛ̀ŋ sengei yèè woiŋ fè e kɔɔ nyingè, woiŋ sìà e gààŋ woiŋ jàà ko tɔɔtu tùlìà jii.

1Pììlɛ 5:4

Kpeiŋ sèè wo kànà anyuùŋ yɛ̀mɛ̀ aŋ ɓaawaa diɛɔ̀ŋ tèènè mààŋ wò Jisɛ̀ Kulaì wò hnàŋ, nìŋ do nàŋ yɛ̀mɛ̀ ke ɓɔ̀ɗì e jòòwo ke yèɛ e zɛ̀nɛŋ nyiŋ nɛ̀ fè go lɛ̀.

1Jɔ̀ɔŋ 4:19

È mànàìŋ aŋ dàwi wi nyàŋ esaɓù kɛ̀ wo Dayà, jiɛ̀ naŋ wi mɔ̀nɔ̀ŋ.

Maŋ kèì nyɛɛnɛŋ 2:10

E jùù ɓɔ̀ è nyɛ̀nɛ̀iŋ wèè è nimilàa nìŋ yaà hinie naŋ kà dìì lɛ. Wo Dɛwìɔ doiŋ nàŋ kɔ̀ɔ̀ e wàa dìì e kìlà wo nyɛ̀nɛ̀ŋ aŋ gbìàŋ nyɛ̀iŋ nààŋ bà nyiŋ ko sààŋ nyìwì. E keì nyìngaiŋ nɛ̀ doo nàŋ nɔ̀ŋ wèè maŋ ɗɔ̀ɔ̀ zììyà. Jèeìŋ e hààwe sùà ko nɛ̀ɛ̀ŋ miìŋ, sèè pɛɛ è gelà wèè naŋ fà, mìŋ doiŋ nàŋ kìɛ̀ŋ wɔŋ nyiiŋ gèe màànààŋ nɔŋ àŋ kiɛ̀ŋ wo nyùùŋ ke ɓɔ̀ɗì kana wèè ke nɔ̀ŋ e jìwààjɛ̀wɛ̀ wèè e nɛ̀ɛŋ wò naŋ ɓùlò lɛ.”

Maŋ kèì nyɛɛnɛŋ 3:19

Mìŋ gbuuyà e kìlà mìŋ nimilà anyùùŋ nyaŋ gbiŋ mìŋ manaŋ nyàŋ. Weètii, nɔ̀ŋ wo nyùùŋ tɔ̀ɔ̀nyaàŋ, e kìlà muŋ fè maŋ tùwo naanààum màŋ jɛwɛ.

Maŋ kèì nyɛɛnɛŋ 3:21

Anyùùŋ nyaŋ do nàŋ ɓùlò nyaŋ, mìŋ do nyiŋ nàŋ kìɛ̀ŋ e tɔ̀ɔ̀nyaàŋ wèè aim jɛ̀ì kɔɔ ke kpùà kana miɛ̀ŋ diɛŋ, màànààŋ nɔŋ mìŋ naŋ wa ɓùlò yèè mìŋ naŋ jɛ̀ì wo Dèda miɔ̀ŋ kɔɔ ke kpùà kanauŋ nɛɛ̀ŋ diɛŋ lɛ̀.”