Fèle 1:1 - WƆŊ FƐ̀Ì EBÒ SÌÀŊ DAYÀA

¹ E yìwìà miàim Pɔɔ̀ yaà wo Timetè sìwè, aŋ ɓɔ̀ìjɔ̀à Jisɛ̀ Kulaì nyaŋ, nàŋ yaà sìngìè wɔŋ fɛi wɛɛ̀ŋ koɓɛ̀ anyùùŋ nɛɛmaŋ nyàŋ gbiŋ ko Fèlepì, aŋ yè nyaŋ yaà aŋ bà nyiŋ bà wo Jisɛ̀ Kulaì sùà nyaŋ, e kpùlìà aŋ sìèfèìŋ anyuùŋ hààwe nyàŋ yaà anyuùŋ tòmo dàwi nyiŋ nyàŋ.

Fèle 1:1 Kruisverwysings

Jɔ̀ɔŋ 12:26

Sèè nyɛ̀iŋ nààŋ bà gbiŋ nìŋ mɔnɔŋ wèè naŋ tomo weèim, kɛ̀ sɔɔ̀ naŋ dè ke kpèè siaŋ miɛ̀ŋ maŋjɛ̀wɛ. Kpeiŋ sèè mìŋ fà, koɓɛ̀i mìŋ do nàŋ nɔ̀ŋ lɛ, kuuŋ nɔŋ wo ɓɔìjɔ̀à miɔ̀ŋ wò do nàŋ nɔ̀ŋ. Wo Dèda miɔ̀ŋ do nàŋ dɛ̀ɛ̀kɛ̀ wo nyùnɔ̀ɔŋ gbiŋ tomàŋ weèim wɔ̀.”

Nyɛ̀nɛ̀ŋ 1:20

Wo Pììlɛ naŋ ɓɛìŋ woò wààŋ, “Esaɓù kɛ̀ è yaà sìnga niŋ wɔŋ fɛ̀ì maŋ nùŋ Dayàa sùà àŋ nyaaŋ Saààm wɔŋ kɛ̀, ‘Tɔ̀ ke sààŋ Juɗàa joo foo nyiŋ, e kìlà wo nyùùŋ gbiŋ ɓɔ̀ wò nɔ̀ŋ nyiŋ dìì.’ È yaà ɓɛìŋ sìnga niŋ kɛ̀, ‘Tɔ̀ wo nyùùŋ bà dè bɛ̀uŋ ko toomouŋ niìŋ ke gboò wiɛ̀ sùà.’

Nyɛ̀nɛ̀ŋ 20:28

Weètii yɛ̀mɛìŋ nyɛ̀iŋ bi diɛŋ e kpùlìà anyùùŋ nyaŋ kinɛiŋ wo Jìnàŋ Nɛɛmaàŋ naŋ gbìɛ̀ŋ e gaàiŋ nɛ̀ dìì nyaŋ. Nɔ̀iŋ mààŋ anyuùŋ tùnìàŋ aŋ ɓaawaa wèè ke gbòò anyuùŋ hààwè Dayà nyaŋ. Nyiŋ nàŋ yaà aŋ yè nyaŋ wò naŋ jàà e ɓula wèè wuŋ bi e yìwìà maŋ sɛ̀ìŋ wo Jɔ̀àfèlàà wuŋ biɔ̀ sùà.

Nyɛ̀nɛ̀ŋ 9:13

Wo Ananaayà naŋ fasàì wààŋ, “Kanaà, anyuùŋ zimgbe àim wòò e kèè wo felaa wɛɛ̀, e nyaàiŋ dè maŋ keì naanààŋ maŋ kinɛiŋ wò naŋ nyìnìè anyùùŋ nɛɛmauŋ nyàŋ ko Jùlusɛ̀làm lɛ.

Luùm 1:1

E yìwìà miàim Pɔɔ̀ sìwè, wo ɓɔìjɔ̀à wèè wo Jisɛ̀ Kulaì, nàŋ yaà sìngìè wɔŋ fɛi wɛɛ̀ŋ. Wo Dayà naim wa tàeɗùù wèè ka nɔ̀ŋ wo keela, e kìlà wò naim nyààŋ wèè ka wòò Ebò Siaàŋ.

Luùm 1:7

Weètii mìŋ naŋ sìngè wɔŋ fɛi wɛɛ̀ŋ koɓɛ̀ nyɛ̀iŋ nààŋ nyùùŋ nɛɛmaŋ nyàŋ gbiŋ ko Luùm. Wo Dayà mànàìŋ e kìlà wòiŋ tàeɗùù wèè naŋ nɔ̀ŋ anyùùŋ wuŋ bi. Tɔ̀ wo Dayà Dèda wiɔ̀ yaà wo Kanaà Jisɛ̀ Kulaì kiɛ̀iŋ e tɛ̀ɛ̀tɛ̀ɛ̀ yèè ke jii fàa!

1 Kɔliìŋ 16:10

Sèè wo Timetè hnàŋ wɔŋ faàiŋ nɔɔ̀ŋ, nyɛ̀nɛìŋ niŋ e kpàŋ è kɔɔiŋ niŋ jààuŋ kùàŋ dìì, e fèfoo, wò yaà toomo wèè Kanaà màànààŋ nɔŋ mìŋ yaà toomo lɛ̀.

2 Kɔliìŋ 1:1

E yìwìà miàim Pɔɔ̀ sìwè, wo yèɔ yaà wo keela tàeɗùù wèè Kulaì Jisɛ̀ esàɓù e kèè jìì Dayàa sùà wɔ, yèè e yìwìà wo wùìya wiɔ̀ Timetè sìwè, nàŋ yaà sìngìè koɓɛ̀ ke gbòò anyuùŋ hààwe nyàŋ kè yaà ko Kɔliìŋ yɛ, yèè koɓɛ̀ anyùùŋ nɛɛmaŋ nyàŋ gbiŋ ko Àkaayà.

Gàla 1:10

Mùŋ gongà mààŋ mìŋ yaà kààmè e ɗewe wèè ka kìɛ̀ŋ anyùùŋ maŋ jii fàa? Tɔɔɓaa kpele! E yèɛ wo Dayà naŋ mɔ̀nɔ̀ŋ yèè wò naŋ jàà kùàŋ dìì lɛ tiŋ mìŋ manaŋ! Ɓàà mìŋ yaà kààmè e ɗewe wèè anyùùŋ aim nyìmàŋ? Sèè ka weè nɔ̀ŋ kààmè ɗewe wèè ka yɛi nyɛ̀nɛ̀ŋ, miŋ fè weè ɓɛ̀nɛ̀ŋ nɔ̀ŋ wo ɓɔìjɔ̀à wèè wo Jisɛ̀ Kulaì.

Gàla 3:26

Nyɛiŋ nààŋ gbiŋ nìŋ yaà aŋ jɔ̀à Dayà, esàɓù e hààweɛ̀ niŋ kuwa wo Jisɛ̀ Kulaì sùà lɛ.

Gàla 3:28

E fèemàŋ gòòno bà gbiŋ fè e fèèmàŋ àŋ Juùù ɔ̀ɔ̀ anyùùŋ nyaŋ fè àŋ Juùù nyaŋ, àŋ ɗo ɔ̀ɔ̀ ànyùùŋ nyaŋ fè è ɗo dìì nyaŋ, àŋ felaa ɔ̀ɔ̀ àŋ jɔùŋ, nyɛ̀iŋ nààŋ gbiŋ nìŋ yaà anyùùŋ guùŋ e yìwìà e hààweiŋ nɛ̀ wo Jisɛ̀ Kulaì sùà.

Ɛfesɔ̀ 1:1

E yìwìà miàim Pɔɔ̀ sìwè, wo yèɔ yaà wo keela tàeɗùù wèè Kulaì Jisɛ̀ esàɓù e kèè jìì Dayàa sùà wɔ, nàŋ yaà sìngìè wɔŋ fɛi wɛɛ̀ŋ koɓɛ̀ anyùùŋ nɛɛmaŋ nyàŋ kuwa maŋ jii tùlia maŋ nyiiŋ gèe nyiŋ màŋ sùà àŋ yaà aŋ bà nyiŋ bà Jisɛ̀ Kulaì sùà ko Ɛfesɔ̀ nyaŋ.

Ɛfesɔ̀ 1:15

E wèè esaɓù lɛɛ̀, nààŋ kinɛiŋ mìŋ naŋ kòmò e kèè e hààweiŋ nɛ̀ wo Kanaà Jisɛ̀ Kulaì sùà yaà e ɗeweɛ̀ nìŋ kuwa e mànaŋ wèè anyùùŋ nɛɛmaŋ gbànaŋ nyàŋ gbiŋ lɛ̀,

Ɛfesɔ̀ 6:24

Mìŋ zoolà wèè e tɛ̀ɛ̀tɛ̀ɛ̀ Dayàa e nɔ̀ŋ wèè anyùùŋ nyaŋ kinɛiŋ kuwa e mànaŋ gò jùà e wèè Kana wiɔ̀ Jisɛ̀ Kulaì nyaŋ.

Fèle 2:19

Sèè è nɔ̀ŋ wèè esàɓù wo Kanaà Jisɛ̀, mìŋ kuwa ke jii tùlia kɛ̀ wò doim nàŋ gè nyààŋ diɛŋ wèè ka tùàŋ wo Timetè ko nɛ̀ɛ̀iŋ niìŋ e teenga kpuu sùà, wèè kɛ̀ mìŋ naŋ ɓɛ̀nɛ̀ŋ kɛ̀ɛ̀nɛ̀ŋ ke jii nyingè wèè ebò lɛ mìŋ naŋ kòmò lɛ e nyaàiŋ eiŋ dè.

Fèle 2:5

Kɛ̀ɛ̀nɛìŋ è gòngò guùŋ nɛ wo Jisɛ̀ Kulaì kuwa lɛ̀.

Fèle 3:12

Miŋ gò woò mìàŋ kà naàŋ kpɛ̀ɛ̀yɛ̀ nyɛ̀nɛ̀ŋ è yèɛ mìŋ manàŋ kà nyɛ̀nɛ̀ŋ lɛ ɔ̀ɔ̀ wèè ka nɔ̀ŋ wò nyuùŋ zɛ̀nɛŋ. Kòò mìŋ yaà kààmè ɗewe wèè ka ɓùlà e kìlà ka yɛ̀mɛ̀ e jìwààjɛ̀wɛ̀ɛ e nyaàiŋ dè e yèɛ wo Jisɛ̀ Kulaì naŋ ɓùlò nààŋ wò naim hìɛ̀ŋ koɓɛ̀ wuŋ biì lɛ.

Fèle 3:3

Kɛɛ yàwi nàŋ yaà anyuùŋ jàà kpùa kɛnɛ nyàŋ, esaɓù kɛ̀ è zoolàìŋ Dayà e yìwìà e gààŋ Jìnàŋ Nɛɛmaàŋ sùà, yèè è gèìŋ zɔlɔ̀ maŋ nyiiŋ gèe wi màŋ sùà, nààŋ è yààìŋ aŋ bàwibà wo Jisɛ̀ Kulaì sùà. E fèiŋ sìà màŋ jii tùlia wi màŋ kòɓɛ̀ mànɛ̀ŋ maŋ è nyɛ̀nɛ̀ìŋ màŋ kpùnaŋ wi màŋ sùà maŋ.

Fèle 3:8

E fè nɔŋ mànɛ̀ŋ miiŋ. Mìŋ naŋ ɓèmè manɛ̀ŋ maŋ gbiŋ maŋ nɔ̀ŋ manɛ̀ŋ foo wèè esàɓù e yèɛ kuwa e sɛmɛmaŋ gbee lɛ̀, e jiikɛ̀ɛɛ̀ e nyaàiŋ dè wo Kana miɔ̀ŋ Jisɛ̀ Kulaì. Wèè e saɓùuŋ nɛ̀ mìŋ gò manɛ̀ŋ maŋ gbiŋ. Mìŋ naŋ miŋ ɓemè wèè maŋ nɔ̀ŋ maŋ dɛɛ, wèè kɛ̀ mìŋ naŋ ɓɛ̀nɛ̀ŋ kɛ̀ɛ̀nɛ̀ŋ wo Jisɛ̀ Kulaì wo nɔ̀ŋ e sɛmɛmaŋ mɛ̀,

1Tɛsè 1:1

E yìwìà miàim Pɔɔ̀ sìwè, wo Sailɔ̀ yaà wo Timetè nàŋ yaà sìngìè wɔŋ fɛi wɛɛ̀ŋ koɓɛ̀ ke gbòò anyuùŋ hààwe nyàŋ kè yaà ko Tɛsèlonikà yɛ, aŋ yè nyaŋ wo Dayà, wo Dèdaà yèè wo Kanaà Jisɛ̀ Kulaì kanaŋ nyàŋ. Tɔ̀ wo Dayà kiɛ̀iŋ e tɛ̀ɛ̀tɛ̀ɛ̀ yèè ke jii fàa.

1Tɛsè 2:2

Nàŋ nyìmàŋ e ɗeweɛ̀ àŋ naŋ wi kùwìè le siwè naanààŋ aŋ wi pɔ̀ɔ̀ɓɛ̀ɛ ko Fèlepì pangàà è naŋ hnè nɛ̀ɛ̀iŋ niìŋ ko Tɛsèlonikà. Jòòpɛɛ aŋ joo wi yaào, kɛɛ wo Dayà wiɔ̀ naŋ wi sìè ke di wèè eiŋ dàànè Ebò Siaàŋ e yèɛ yewe ko nɛ̀ɛ̀uŋ niìŋ lɛ.

2Tɛsè 1:1

E yìwìà miàim Pɔɔ̀ sìwè, wo Sailɔ̀ yaà wo Timetè nàŋ yaà sìngìè wɔŋ fɛi wɛɛ̀ŋ koɓɛ̀ ke gbòò anyùùŋ hààwe nyàŋ yaà sààŋ Dayài ko Tɛsèlonikà, aŋ yè nyaŋ wo Dayà wo Dèdaà wiɔ̀ yèè wo Kanaà Jisɛ̀ Kulaì kanaŋ nyàŋ.

2Tɛsè 1:10

sèè wò hnàŋ wa nàwèè e nɛɛmauŋ nɛ̀ sùà ke ɗɔɔ yii diɛŋ wèè wo jàà e jòòwouŋ nɛ̀ kùàŋ dìì e yìwìà anyunùuŋ nyàŋ gbiŋ sìwè, yaà e ɓɛ̀ɛ̀jàauŋ nɛ̀ e yìwìà anyùùŋ nyaŋ nauŋ haawè nyaŋ sìwè. Nyɛ̀iŋ pɛɛ nìŋ do nyiŋ nàŋ nɔ̀ŋ e tɛɛ, esaɓù kɛ̀ nìŋ naŋ hààwè ke miè gbìaàŋ è naiŋ woò yɛ.

1Time 1:2

Mìàŋ nàŋ yaà sìngìè wɔŋ fɛi wɛɛ̀ŋ koɓɛ̀ muàŋ Timetèi, wo jɔ̀àfelaa kɛnɛ miɔ̀ŋ, e hààweɛ̀ sùà. Tɔ̀ wo Dayà wo Dèda wiɔ̀ yaà Kanaà Jisɛ̀ Kulaì wo Kana wiɔ̀, kiɛ̀iŋ e tɛ̀ɛ̀tɛ̀ɛ̀, ke nyowo, yèè ke jii fàa.

1Time 3:8

Aŋ ɓɔìjɔ̀à nyaŋ kpùùmàŋ aŋ sìèfèìŋ anyuùŋ hààwe nyaŋ lɛ, aŋ kɛ̀ɛ̀nɛ̀ŋ ke kpèè siàŋ e kìlà aŋ nɔ̀ŋ anyùùŋ tɔ̀ɔ̀nyaàŋ. Ɓɔ̀ àŋ nɔ̀ŋ ànyuùŋ tìà màŋ tala muaŋ zimgbe, e kìlà ɓɔ̀ àŋ nyɛ̀nɛ̀ŋ e wùànàŋ nɛɛnɛŋ.

Taitɔ̀ 1:1

E yìwìà miàim Pɔɔ̀ sìwè, wo ɓɔ̀ìjɔ̀à Dayàa, yèè wo keela tàeɗùù wèè Jisɛ̀ Kulaì nàŋ yaà sìngìè wɔŋ fɛi wɛɛ̀ŋ. Wo Dayà naim tàeɗùù yèè wò naim tùɔ̀ŋ e wèè ka kpùùmàŋ e hààwè anyùùŋ Dayà nyaŋ wò naŋ tàeɗùù nyaŋ, e kìlà ka nyiŋ kɔ̀à koɓɛ̀ e gòngò tɔ̀ɔ̀nyaàaŋ e Dayà hùmaŋ kii wilɛ̀ sùà,

Taitɔ̀ 1:7

Nààŋ wo sìèfèìŋ anyuùŋ hààwe nyàŋ nàŋ yaà wo ɓɔìjɔ̀à yɛ̀mɛ̀ e kèè e tòmò Dayàa dììo sùà lɛ, ɓɔ̀ wò kuwìè è tɔ̀mɛ. Ɓɔ̀ wò nɔ̀ŋ wò nyuùŋ mànàŋ tɛɛ, ɔ̀ɔ̀ wò nyuùŋ bìà jii, ɔ̀ɔ̀ wò nyuùŋ tìà màŋ mùàŋ tiwìtiwì ɔ̀ɔ̀ wò nyuùŋ dàà gbɔ̀ɔ ɔ̀ɔ̀ wò nyùùŋ wùànàŋ nɛɛnɛŋ keekèè.

Felemɔ̀ŋ - PHM 1:1

E yìwìà miàim Pɔɔ̀ sìwè, wo yèɔ yaà wa ko sààŋ nyìwì esàɓù e hààwe mɛ̀ wo Jisɛ̀ Kulaì sùà wɔ, yàwi Timetè wo nyuùŋ tòmo dàwi miɔ̀ŋ e hààweɛ̀ sùà nàŋ yaà sìngìè wɔŋ fɛi wɛɛ̀ŋ. Felemɔ̀ŋ, wùìya wiɔ̀ yèè wo nyuùŋ tòmo dàwi wiɔ̀, e yaà sìngìè wɔŋ fɛi wɛɛ̀ŋ ko nɛ̀ɛ̀ŋ muìŋ,

Hiɓu 13:23

Mìŋ manaŋ naŋ nyìmàŋ kɛ̀, àŋ gè wo wùìya wiɔ̀ Timetè ko sààŋ nyìwìi. Sèè wò hnàŋ kià e teengaà diɛŋ, yà wuuŋ tìyèe do nàŋ hnè sèè mìŋ nɔ̀ŋ hinie wèè kaiŋ jaamè.

Jìiiŋ 1:1

E yìwìà miàŋ Jìiiŋ sìwè, nàŋ yaà sìngìè wɔŋ fɛi wɛɛ̀ŋ. Mìŋ yaà wo ɓɔ̀ìjɔ̀à Dayàa yèè wo ɓɔ̀ìjɔ̀à Kanaà Jisɛ̀ Kulaìɔ. Mìŋ yaà sìngìè wɔŋ fɛi wɛɛ̀ŋ koɓɛ̀ anyùùŋ Dayà nyaŋ gbiŋ naŋ ɓààyè e ɗuunyaŋ lɛɛ̀ sùà nyaŋ. Mìŋ zuumàŋ nyɛ̀iŋ nààŋ gbiŋ.

1Pììlɛ 2:25

Nìŋ yaà wa mààŋ aŋ ɓaawaa ɓà ke dòmaŋ aŋ yè nyaŋ naŋ go nyàŋ, kɛɛ wo Dayà wòiŋ ɓɛìŋ kɛlɛ̀ɛ̀ wèè naŋ nɔ̀ŋ wo nyuùŋ yɛ̀mɛ̀ aŋ ɓaawaa diɛɔ̀ŋ maŋjɛ̀wɛ yèè wo nyuùŋ yɛ̀mɛ̀ maŋ nyiiŋ diɛiŋ nɔɔ̀ŋ.

2Pììlɛ 1:1

E yìwìà miàim Saamɔ̀ŋ Pììlɛ sìwè, nàŋ yaà sìngìè wɔŋ fɛi wɛɛ̀ŋ. Mìŋ yaà wo ɓɔìjɔ̀à yèè wo yèɔ yaà keela tàeɗùù wèè Jisɛ̀ Kulaì. Mìŋ yaà sìngìè koɓɛ̀ anyùùŋ nyaŋ aŋ yè nyaŋ esàɓù e tɔ̀ɔ̀nyààŋ Dayàa sùà yaà wo Nyuùŋ Jòèyeɔ̀ Jisɛ̀ Kulaì, àŋ naŋ nyiŋ fè e hààwè jii nyiŋ nɛ̀ mààŋ e je wilɛ̀ nyaŋ.

Juù 1:1

E yìwìà miàim Juù sìwè, nàŋ yaà sìngìè wɔŋ fɛi wɛɛ̀ŋ. Mìŋ yaà wo ɗo wèè Jisɛ̀ Kulaì, yèè yàwi Jìiiŋ è yaà aŋ wùìya Jisɛ̀ Kulaì sùà. Mìŋ yaà sìngìè koɓɛ̀ anyùùŋ nyaŋ gbiŋ wo Dayà, wo Dèdaà naŋ tàeɗùù yèè wò manaŋ nyàŋ, yèè àŋ yaà e gààŋ Jisɛ̀ Kulaìɛ dìì nyaŋ.

Maŋ kèì nyɛɛnɛŋ 1:1

Wɔŋ fɛi wɛɛ̀ŋ nàŋ yaà maŋ keì maŋ yaà wa ko nyɛɛnɛŋ maŋ yè maŋ wo Jisɛ̀ Kulaì naŋ wa gɔ̀àì sùà maŋ. Wo Dayà nauŋ wa tɔ̀ɔ̀ maŋ kèì ko nyɛɛnɛŋ mɛɛ̀ŋ wèè wo woò anyuùŋ hààweuŋ nyàŋ kɛ̀ kiìŋ nàŋ do nàŋ kaaìŋ e teenga kpuu sùà. Kpeiŋ wo Jisɛ̀ Kulaì naŋ kìɛ̀ŋ ke miè gbìaàŋ koɓɛ̀ wo màikàuŋ nɔɔ̀ŋ wèè wo koà nyiŋ koɓɛ̀ wo ɓɔìjɔ̀àuŋ nɔɔ̀ŋ Jɔ̀ɔŋ.

Maŋ kèì nyɛɛnɛŋ 1:20

Kɛɛ̀ nàŋ yaà e fàsàì ke gbùnù maŋ ɗù nɔɔnɔŋ le tìyèe màŋ mùŋ naŋ yɛmɛ̀ mìŋ kuwa kùàŋ jìka màŋ, yaà maŋ gòoò laumpò kùù nɔɔnɔŋ le tìyèe màŋ. Maŋ ɗù nɔɔnɔŋ le tìyèe màŋ nàŋ yaà aŋ màìkà nɔɔnɔŋ le tìyèe nyàŋ wèè maŋ gbòò anyùùŋ hààwè ɗì nɔɔnɔŋ le tìyèe nyàŋ, yèè maŋ kuù sɛ̀ɛ̀ maŋ làùmpò nɔɔnɔŋ le tìyèe màŋ nàŋ yaà maŋ gbòò anyùùŋ hààwè ɗì nɔɔnɔŋ le tìyèe nyàŋ.”

Maŋ kèì nyɛɛnɛŋ 19:10

Mìŋ naŋ dè maŋ gɛ̀ɛ̀nìim màŋ ko dììnaŋ wèè kauŋ zoolò, kɛɛ wò naim woò wààŋ, “Kpele, ɓɔ̀ mùŋ nyɛ̀nɛ̀ŋ niŋ! Mìŋ yaà wo ɓɔìjɔ̀à mààŋ muàŋ bi yèè anyuùŋ hààwe gbànaŋ nyàŋ, aŋ yè nyaŋ gbiŋ naŋ haawè yèè àŋ naŋ kìɛ̀ŋ mìè seì e nyaàiŋ dè e tɔ̀ɔ̀nyaàŋ wo Jisɛ̀ naŋ gɔ̀àì sùà lɛ. Zòòloò wo Dayà wuŋ guùŋ!” E tɔ̀ɔ̀nyaàŋ wo Jisɛ̀ naŋ gɔ̀àì sùà lɛ naŋ yaà e yèɛ sie aŋ wɛ̀ijì nyaŋ ke di wo jinàaŋ sùà.

Maŋ kèì nyɛɛnɛŋ 2:12

Wò naŋ ɓɛìŋ woò wààŋ, “Tɛɛ̀ mùŋ kuwa maŋ sìngà koɓɛ̀ wo màikàa wèè ke gbòò anyuùŋ hààwe nyàŋ ko Pɛgamùŋ. “Ke miè gbìaàŋ yɛɛ̀ e yìwìà wo yèɔ kuwa maŋ kòyà ɗùà maŋ nyààŋ tìyèe màŋ wɔ.

Maŋ kèì nyɛɛnɛŋ 2:8

Wò naŋ ɓɛìŋ woò wààŋ, “Tɛɛ̀ mùŋ kuwa maŋ sìngà koɓɛ̀ wo màikàa wèè ke gbòò anyuùŋ hààwe nyàŋ ko Sìmanà. “Ke miè gbìaàŋ yɛɛ̀ e yìwìà wo yèɔ yaà wo jiɛ̀jiɛ̀ɔ yaà wo dìàmaàŋ wɔ, wo yèɔ naŋ fɔ̀ yèè wò naŋ ɓɛìŋ kɛ̀ɛ̀ wɔŋ nyiiŋ gèeɔ̀ sùà wɔ.

Maŋ kèì nyɛɛnɛŋ 22:9

Kɛɛ wò naim woò wààŋ, “Kpele, ɓɔ̀ mùŋ dè màŋ gɛ̀ɛ̀nìum màŋ dììnaŋ è weèim! Mìŋ yaà nɔŋ wo ɓɔìjɔ̀à mààŋ muàŋ bi e kpùlìà aŋ wùìya gbànaŋ nyàŋ, aŋ wɛ̀ijì nyaŋ yaà aŋ yè nyaŋ gbiŋ jɔɔlɔ̀ maŋ mìè gboa màŋ dìì wɔŋ fɛi wɛɛ̀ŋ sùà nyaŋ. Zòòloò nɔŋ wo Dayà wuŋ guùŋ.”