APOCALIPSIS 6:16 - Tepehua Pisaflores

¹⁶ Chi ixtajuniycha an laj'a'stitawk'a chi an laj'ay chiwx: ―Akila'a'lhtants'iwcha chi akilamats'ewicha, para li jantucha akintala'ts'ini an yu wilh tan ch'alhkatnan chi jantucha akla'ts'iwi ixtalh'amti an Jas'at'a Borrego.

APOCALIPSIS 6:16 Kruisverwysings

SAN MATEO 26:64

Pus an Jesús alhtaylh juniy: ―Uxint'ich'a naw, chi atumpaj klajunaw chaway ati'anta k'ala'ts'ina'itcha an isTs'alh Lapanak katawlanta tan oxi la ixpa'xti an Dios tan ch'alhkatnan, ch'i k'ala'ts'ina'it'iti akxni kaminanta lakt'iyan laka jataputs'i.

SAN MARCOS 3:5

Pus talh'amancha jala'ts'in an Jesús chi lhita'oxila'alhiycha li yu'uncha jantu talhakapu'ani li kataja'a'tayjunulh, juniy an lapanak: ―K'alats'awalat'icha amimaka'. Walh lats'awalalhcha, tamaj'oxilhcha.

SAN LUCAS 23:30

Akxni katajuna an laj'a'stitawk'a: “Akila'a'lhtants'iwcha”. Chi an tan laklakatitawk'a katajuna: “Akilamats'ewi”,

APOCALIPSIS 10:6

chi pujurarnalhcha an yu ixpujun'alhincha li t'ajun, an yu ilhtulh an lakt'iyan chi an lakaat'un chi an alamalh chi chux yu ancha lak'alin. Najun: ―Jantucha ali kati'alilhi panch'e'ex,

APOCALIPSIS 19:15

An la ixkilhni ixkilhtaxtuy makat'ikt'i yu kikxtuy espada, yu kajapumak'atsaniyacha ta kilhmakchux ta'alin an lapanakni, chi yuchacha kajach'alhkatnaniya laka ma'atam tsasnat. Chi yucha kapach'it'a la ixch'aja an uva para li kataxtunilhcha xaxkan yu nawputun ixtalh'amti Dios, Dios yu lay ilhtu'ojoy chux.

APOCALIPSIS 20:11

Ikla'ts'ilh la'atam ay sut'ut'u putawlan yu puch'alhkatnankan chi an yu ixpuwilh, la ix'ukxlakapu ta'osli an lakaat'un chi an lakt'iyan chi jantucha k'is inta jala'ts'incho'okalh.

APOCALIPSIS 4:2

Wa akxni la ixmakni an Takuwincha iktsukulh chi ikla'ts'ilhcha la'atam putawlan yu puch'alhkatnankan an lakt'iyan, chi ancha sa'cha ixpuwilh tichiyucha.

APOCALIPSIS 4:5

Chi an tan wilhcha an putawlan yu puch'alhkatnankan ixtaxtuyachilhcha jamakalipni chi ixt'asaycha xalapanak xkan chi ixchiwinkan. Chi lhilaxlakapu an tan wilh an yu puch'alhkatnankan ma'atujun k'iw yu lajkinkama'tajita ixtamapulhkuy, yu'uncha yucha an la'atujun ixTakuwin Dios.

APOCALIPSIS 4:9

Chi an la'at'at'i tuchichun yu tala'ajunta, a'tamin a'tamin ixtanajuni li ayi an yu sa' ixwilh la ixpuch'alhkatna an yu ixpujun'alhincha li t'ajun chi yu'uncha ixtalhiwilay chi ixtaxta'niy lhimala'puchajun.

APOCALIPSIS 5:1

Chi an yu sa'cha ixwilh laka putawlan yu puch'alhkatnankan ikma'la'ts'in an tan lhi'oxi ixmaka ixch'apata la'atam libro, ta'ukxput'uyi ts'o'kanta chi lakatujuni oxi ixch'axpach'ikanta an libro.

APOCALIPSIS 6:10

P'ascha ixtachiwiniy ixtanajun: ―Jamach'alhkat, yu stalan'a, chi yu sawalh, ¿sta tasu wanancha wa k'at'ip'akxaniya'a para li k'aja'uncha li oxi u jantu tani talaycha an yu tawilanalh an lakaat'un ch'i k'ajalhich'it'icha an kijak'alhnik'ani?

APOCALIPSIS 9:6

Chi anchunu panch'e'ex an lapanakni katapuxkawya an lhinin, pero jantu katitala'cha'alh, akxni katalakniputuna', pero an lhinin kajalaj'osa'.