Sipolay 9:15 - Seysyo No Tao

¹⁵ So ikanoyong ni Kizisto a yatomalamozong no vayo a pangozayan a ciring na ni Ama ta do to a somidong so nipamnekan na tao a omahap so nakem na jira. So na ikanoyong ni Kizisto a niomagag sira do raraten da a ji ngonot do manmanma pangozayan a ciring a nitaid na ji Moyse ni Ama ta do to.

Sipolay 9:15 Kruisverwysings

Matay 19:29

O mahap so vazay ko a to rana ngaro do kavavahay da kano kakakteh da kano inyapwan da kano minapodpod jya kano nihakawan da am arwaro pa o makadpeh jira a kapakahap da so to meyyonong a ikavyay no pahad da.

Matay 22:3

So nipanovoy na so lamlamsoy na mangay a mapeykatokatoyo rana so nitaidan na tao a mai rana koman. Am ji sira key.

Matay 25:34

Karahan am maniring o panirsirngen do amyan do wanan na tao am, ‘Inyo rana yana nipanlanlag ni Ama am sijya kamo do italamozong na ni Ama ta do to, ta amoonen nyo o nakem na jinyo no kapangamaog na pa so karawan.

Matay 25:36

No kabo no ayob ko am nipanta nyo yaken so ayob. No keyngen ko am nipeyveyveken nyo yaken. No kapteng da jyaken am nimai kamo a meyminaminasi nyaken.’

Make 10:17

To rana jyangay si Yeso am to ngyan so asa ka tao a malayo a mangay a meylilitod do tangain na. Maniring jya am, “Mo Mangnanao a tey yapya so nakenakem. Makongo ko so wanjin a kapakahap ko so to meyyonong a ikavyay no pahad ko.”

Locya 18:18

Amyan so asa ka panirsirngen no tao do Yotay a mangay a mapacici si Yeso. Maniring am, “Ko imo katenngan a tey yapya a mangnanao a tao. Manngwa, makongo ko so wanjin a kapakahap ko so to meyyonong a ikavyay no pahad ko.”

Locya 22:20

Mateyka sira koman am akman so sang, ta ahapen na ni Yeso o kopo a yanan no potaw cyo. Maniring am, “Oya rana am rala ko a nimvoyog a omaing jinyo a yongkad no vayo a pangozayan a ciring na ni Ama ta do to.

Yowani 10:28

Ipanta ko sira so to meyyonong a ikavyay no pahad da. So ji rana meydednai jira no peyoyaoyyan na ni Ama ta do to. So ikabo no tao a makapehes sira do lima ko.

Nimlivolivon 20:32

“Sicyaikwaya am ko na to norwan inyo ji Ama ta do to. Ta ko ipeyhanhan o pangangarilawan na ni Ama ta do to a somidong jinyo a to ngotokot so nakem a meyhanhan nya. No si makman kamo sang am mahap nyo na o igeygeglaw na so omraralay nya tao.

Loma 5:10

No kakwa am abo o kasngesngenan ta ji Ama ta do to. Am mina kawakwak na nyaten no Anak na. Am ori o ta na ipacikaop ji Ama ta do to. No manoyong o akman sang am jyabo kaji na ngahapan jyaten a. Ta si Yeso Kizisto rana am yamyan do teyngato a yasomidong jyaten.

Loma 5:6

No kakwa pa am abo oyowyat ta a komaro do peyraratenan ta. Am kanimangozay na jya ni Kizisto do nipamnekan ni Ama ta do to a araraw a mangay mawakwak nyaten.

Loma 5:8

Am no kapeyraraten ta pa am nikawakwak na yaten ni Kizisto. Ori rana am yongkad na ori ni Ama ta do to, do na karilaw nyaten.

Loma 6:23

Ta o kapalit no raraten am mangay do makotokotod a lila no apoy a mangay no makwa. Am o yazaw na ni Ama ta do to so yamacibedbed ji Yeso Kizisto a Panirsirngen ta am ipanta na so to meyyonong a ikavyay no pahad da.

Loma 8:28

Tamo katenngan na kasidong ni Ama ta do to so yamraralay nya a tao a nipamnekan na mangozay do nakenakem na a tao. So na ikamimin no vazay da na ipeypalanginan ni Ama ta do to. So ikanoyong da meypapya nya.

Loma 8:30

Ta o tao a nipamnekan na ni Ama ta do to a amraralay nya am nipanop na sira a omanoyong jya, kabnek na sira abo so raraten do tangain na. So ikanoyong da macikazway jya do teyngato no makwa.

Loma 9:24

So yata ikanoyong a na nipamnekan do tao do Yotay a kado beken a tao do Yotay.

2 Kedinto 3:6

Iya o yanamen ipakahap so vayo a pangozayan a ciring na ni Ama ta do to a yanamen ipeylimwang. Oya rana am beken a nivatvatkan. Ta pangozayan a ciring no Seyzi. O nivatvatkan a iwawalam am ikawakwak no tao. Am o Seyzi am itoro na jyaten o to meyyonong a ikavyay no pahad ta.

Cyalatay 3:20

Am si Ama ta do to o nimacisirsiring ji Apolahan.

Ivoso 1:7

Si Kizisto yanimawakwak nyaten. Am ori o yana nikavonas no raraten ta. Tey rako o pangangarilawan na ni Ama ta do to a yana nitoro jyaten.

2 Tesalonicya 2:14

O Mapasaray a Ciriciring na ni Ama ta do to a nipamizing namen jinyo am ori o yanimrara jinyo a macikasaray do azwazway na ni Yeso Kizisto a Panirsirngen ta.

1 Timotay 2:5

O manoyong rana a nanao am asa si Ama ta do to. Asa o yamapanop jyaten ji Ama ta do to. Iya rana am si Yeso Kizisto do mina katazak na tao do teyrahem.

2 Timotay 2:10

Am ori o ko to liliwi so yamakakaday a da peyrarehtan jyaken, do ko kasidong so nipamnekan na ni Ama ta do to a tao a omanoyong ji Yeso Kizisto. So ikanoyong da makahap so to meyyonong a pangangarilawan na kano azwazway.

Tito 1:2

O peypeypangayan na rana no nanao eya am ipakahap ta so to meyyonong a ikavyay no pahad ta. Manoyong o nipanci na a itoro na jyaten no kaji na pa mangamaogan so karawan. Ta si Ama ta do to rana am abo kalalasan na.

Tito 3:7

O pangangarilawan na ni Ama ta do to am ori o ikapya ta na so nakenakem jya, ta abwata rana o raraten ta do tangain na. So ikanoyong ta mapananala so kapakahap ta rana so to meyyonong a ikavyay no pahad ta.

Sipolay 10:34

Akma kamoy to macizanod so alalaw do paneban da tao. No katakaw da so kangangay nyo a nyahap no tao am mina to nyo peykabobwa do onowned nyo. Ta katenngan nyo o kapakahap nyo so apyapya pa a peymeymasaodan nyo do teyngato.

Sipolay 10:36

Ji kamo macimazikna do vazay na ni Ama ta do to. Ta ori o ipakahap nyo so mina ciring na jinyo ni Ama ta do to no makwa.

Sipolay 11:13

Sira rana ori am to da noiban do karawan o kapeyhanhan da ni Ama ta do to. Tana abo nimahap da do nipanci na ni Ama ta do to am da ji macimangsahi o da kapananala so akman sang a nakem na sira ni Ama ta do to. Da anoyngan o da kakmey mangilili a tao a yato ngiseysan do karawan.

Sipolay 12:24

Inyo rana am kamo rana nimakaranes do tangain ni Yeso a yanimanta ninyo so vayo a pangozayan a ciring na ni Ama ta do to a na rana nitaktakan no rala na. Ta o rala na ni Yeso o mapanop jyaten ji Ama ta do to a omagaz do kapyapyan. Ta o rala na ni Yapo am omagaz do kararatan.

Sipolay 13:20

Si Ama ta do to rana a yamanta nyaten so ikapiya no onowned ta am nipeyvangon na si Yeso a Panirsirngen ta do heseb na. Na rana nipangononongan ni Ama ta do to no rala ni Yeso o to meyyonong a pangozayan a ciring na. So na ikanoyong a tomalamozong nyaten aro a tao.

Sipolay 2:14

Yaten rana akma ney anak ni Ama ta do to am tao ta do karawan. So nicyakman na jyaten ni Yeso a yamyan so kataotao. Am mawakwak rana o kataotao na ni Yeso am haragen na o oyowyat ni Satan a omwakwak so tao.

Sipolay 3:1

Inyo rana akma koy kakteh do cinai a yana rana nipamnekan ni Ama ta do to a omanop jya am naknakmen nyo si Yeso a yana nitovoy ni Ama ta do to do teyrahem. Iya rana am ney manhama na mapatanatanang so nakem ta ji Ama ta do to a yata pangozayan a yamraralay ni Ama ta do to.

Sipolay 6:13

Nipanci na ni Ama ta do to ji Apolahan o keyyan no nakem na jya. Am to na mangozai o ngaran na a manci no keyyan no nakem na ji Apolahan, do kabo no makahad si Ama ta do to do karawan.

Sipolay 6:15

Ji na macimangsahi ni Apolahan a pananalahen. Makarahan am mahap na rana o nakem na sya ni Ama ta do to.

Sipolay 7:22

So ikanoyong na ni Yeso Kizisto a yongkad ni Ama ta do to a mangononong do vayo a pangozayan a ciring na jyaten. So ikapyapya na pa no vayo a pangozayan a ciring na ni Ama ta do to a kano adan a ciring na a nitaid na ji Moyse.

Sipolay 8:13

Yarana nimangamaog si Ama ta do to so vayo a pangozayan a ciring a nyalit na do adan a pangozayan a ciring. So to na rana tastasi no adan a pangozayan a ciring, ta abo rana o oyowyat na.

Sipolay 9:12

Si Yeso Kizisto am ji rana mapalolo so rala no kagling a kano baka. Ta mina to na rana patananga o rala na ipatazadang na jyaten do teyngato. Am o akman rana sang a vazay am ipisa mapatanang nyaten a kakavos na rana a mangay do kaidan no karawan.

Sipolay 9:16

O nitaid no toda jyawakwak a tao a ciring na am pangozayan da ori a ciring na no mawakwak rana.

Sipolay 9:28

Yakman sang si Kizisto a ipisa mapatanang so kataotao na a ivonas na so raraten no aro a tao. So ikeypisa na pa mai do teyrahem. Am beken a raraten o vazay na. Ta mangay na hapen sira o mapanala sya tao.

Yake 1:12

No amyan so alalaw a kajyablisan so nakenakem ji Ama ta do to am tey masaray o akman sang a tao. Ta no jyablis o nakem na am mahap na o to meyyonong a ikavyay no pahad na a nakem na sira ni Ama ta do to so amraralay nya tao.

1 Pite 3:18

Ta ipisa si Yeso Kizisto a nimawakwak no raraten ta, kapakavos na rana so vazay na a mapatazadang jyaten do teyngato. So ikanoyong na abo so raraten a nisomabway no raraten no tao, do na kapanop jyaten ji Ama ta do to. Tana niwakwak da o kataotao na am jya nimawakwak o pahad na.

1 Pite 5:10

Si Ama ta do to am yana yapwan no rako a pangangarilawan, do na kapazanod jinyo do azwazway na. Ta inyo rana am kamo rana macikaop ji Kizisto. Am ori an, no si mavitos rana o yaji meyyonownay a alalaw nyo am manoyong kamo na oyatan ni Ama ta do to, kahadpet nyo na so nakem.

1 Yowani 2:25

Ta o ipanci na jyaten a mahap ta ni Kizisto am to meyyonong a ikavyay no pahad ta.

Ipaziman 5:9

a kapeyyanwanood da so vayo a anood. O kanwanoodan na am, “Imo o makahap so vakong a mapakaro so nipadketan a vakong. Ta imo rana am niwakwak da imo. O nimvoyog a rala mo am nimapatastas so tao do peycyeylilyan na kano meykataretarek so ciring a kano meytaretarek a tao do sinokob no hanit a yaitoro ji Ama ta do to a yaponged na.