Sipolay 9:14 - Seysyo No Tao

¹⁴ Kakwakwan na rana no rala no kagling a kano baka a ipanci da makavoga so nikaratan da. Imanngo rana o oyowyat no rala ni Kizisto. Ta nioyatan no Seyzi a mapatanang so abo so karatan a kataotao na ji Ama ta do to. Jyabo kaji na haraharan pa makavonas so marahet do onowned ta a ombalinas so malas a icicirawat ta. No si manoyong o kakman ta sang am manoyong ta pahanhanen na ni Ama ta do to do vazay na.

Sipolay 9:14 Kruisverwysings

Matay 12:28

No si manoyong ko a mamozwaw no oyowyat ni Ama ta do to am yamanoyong rana si Ama ta do to a tomalamozong no omanoyong jya tao sicyaikwaya.

Matay 16:16

Maniring si Simong Pite am, “Imo rana am Misayya ka, Anak no yato meyyonong a mavyay a Tao do to.”

Matay 20:28

Akman so Nipamnekan na ni Ama ta do to a tao. Ta o na nyai am beken a ilamnain no tao. Ta mapeylamnay so aro a tao a kangay na mapasansan so kataotao na yagag na sira do peyraratenan da.”

Matay 7:11

Kakwakwan nyo a meyraraten a tao a yamakateneng do kapanta no anak nyo so pipya kanekanen a imanngo rana si Ama ta do to. Ta jyabo kaji na norwan nya jinyo no amin nyo o ikeykakza nyo a.

Locya 1:74

a kangay na mapahawa jyaten do kavosoyan ta tao. So ikabo no ikanyahey ta. Am ori o to ta ngavosi nya do karawan so kahap ta so apya nakenakem na, kahap ta so vazay na omraralay nya.

Locya 12:24

To nyo nita o meyyasasalap an. Ta sira ji hakaw, sira ji manlangi, yabo da panonokozan so kankan da. Ta na avyavyain sira ni Ama ta do to an. Jyabo nyo kajyakdekdengan pa kano meyyasasalap a.

Locya 12:28

O tamek rana am amyan pa sicyaraw eya. Am simaraw am mahayo rana a kapasleb rana sya do apoy. Tana akman sang o tamek a ji meyyonownay do tana am yana padketan ni Ama ta do to so na ikazway a savong na. Kakwakwan na rana no tamek am imanngo kamo na. Ta jyabo kaji na mantan ninyo so ayob nyo a. Am nyo kaji makanetan so nakenakem ji Ama ta do to.

Locya 4:18

“Yanimeygegcin jyaken o Seyzi na ni Ama ta do to. Ta yana nipamnekan yaken a mangay meylimwang no Mapasaray a Ciriciring na ni Ama ta do to do makasi a tao. Nitovoy na yaken a meylimwang no kasaway da rana no akmey kaneban a tao a kapakacita da rana no mavota tao a kasaliway da rana no peylamlamsoin da tao.

Yowani 3:34

O nitovoy ni Ama ta do to o mapatwaw so ciriciring na ni Ama ta do to. Ta oyatan no Seyzi.

Nimlivolivon 1:2

a mangay no kapeycyakavat na rana mangay do teyngato. Ikapat na ngarnan (40) no araraw no nipeyvangon na am ipiro na o kataotao na ipacita do nipamnekan na omlivolivon no ciriciring na. So ipakateneng da do kanoyong na rana nimavyay a kapanci na nya jira so italamozong na ni Ama ta do to. No kaji na pa meycyakavatan a mangay do teyngato am nioyatan no Seyzi si Yeso a omyokod no nipamnekan na omlivolivon no ciriciring na a vazay na jira.

Nimlivolivon 10:38

Nioyatan na no Seyzi si Yeso a tao do Nasale. So nilivolivon na mangiwakwak so meykeyngeyngen a tao a mamozwaw so kalamsoyan ni Satan a komovot do tao, do kapacikaop na jya ni Ama ta do to.

Nimlivolivon 14:15

“Ikongo nyo icyakman so sang so vazay jyamen. Namen akman jinyo saon a tao am. O namen nyai jya am namen ipeylimwang jinyo o Mapasaray a Ciriciring ni Yeso. Namen ikakza inyo a komaro do ji meyngongyod a iraralay nyo. Apyapya pa o kararalay nyo no manoyong a Tao do to. Iya rana am nimangamamaog so karawan a kano meycyamadadayan.

Nimlivolivon 15:9

pacittan na no kapeyyangangay na jyaten a patazadangen do teyngato. Na nivonas o raraten da no beken a tao do Yotay, do da kanoyong rana ji Yeso.

Loma 1:20

Yajyacita si Ama ta do to. Am nimakalapo no kamamaog na so karawan o kaji na ablisan no ka Tao do to na. Ta apo do nyamamaog na o ipakateneng jya Tao do to arako so oyowyat. So ikabo no tao a omalalas jya.

Loma 1:4

No hapen do ka Tao do to na am iya o nipeyvangon na ni Ama ta do to a nimapo do heseb na. So ikanoyong na Anak na ni Ama ta do to.

Loma 11:12

Yada nipeypapya no tao do karawan o da kajya niomanoyngan ji Ama ta do to no tao do Yotay. Am no si mamlis rana sira o tao do Yotay a kavyay na sira ni Ama ta do to am jyabo kaji na rakorakwan pa no peypapyan na so tao do karawan a.

Loma 11:24

Inyo rana beken a tao do Yotay am yakamo akmey yangaw no yajya nipamowa a kayo do kahasan a nimapolcing a yada kapatolang sya do nimowa kayo. Am sira akmey nipamowa kayo o tao do Yotay. Kakwakwan nyo a na patolangen a yamacitarek a yangaw no kayo am imanngo sira o tao do Yotay. Jyabo kaji na patolangan pa sira do kayo ori a.

Loma 6:13

Ji nyo mamyapyan o peyvongvongwan nyo a peylamlamsoin no raraten. Ta itoro nyo o kataotao nyo ji Ama ta do to a mahap so vazay na. O torwan nyo no kataotao nyo ji Ama ta do to am ahapen nyo o apya vazay na. Ta iya o na yapwan no vayo a inawan ta.

Loma 6:22

Am inyo rana sicyaikwaya am ji na rana peylamlamsoya inyo no raraten. Ta yanyo rana kakzeben si Ama ta do to a mapeylamlamsoy jinyo. So yanyo rana ipeyngongyod a yaomonot rana ji Ama ta do to. So ikanoyong nyo a makahap so to meyyonong a ikavyay no pahad nyo.

1 Kedinto 15:45

Ta maniring do Seysyo am, “Si Adam am tao kamamaogan na.” Am o ipanci a manowji a Adam am si Kizisto a manta nyaten so to meyyonong a ikavyay no pahad ta.

2 Kedinto 5:21

Na nikarilaw yaten ni Ama ta do to. So na nitovoyan si Kizisto abo so raraten a nimalit so raraten ta. Am ori o tanyo ipacikaop ji Kizisto a abwata rana so raraten do tangain na ni Ama ta do to.

2 Kedinto 6:16

Ji nyo peyzavoza o raralayan nyo ni Ama ta do to a kano malas a iraralay da no tao. Ta yaten o na yanan no to meyyonong a Tao do to. Akman so ipanci na do Seysyo. Ta maniring am, “Macikaop ko do omanoyong jyaken a tao a keyyan ko do onowned da. So abnekan da jyaken a Tao do to da. So ikanoyong da italamozong ko a tao.

Cyalatay 2:19

Yaken rana am ko katenngan o kaji makahapan so to meyyonong a ikavyay no pahad ko no si pangozayan ko o iwawalam ni Moyse. Am ori o ko na ji ngapi so iwawalam ni Moyse. Ta ko na hapen o vazay na ni Ama ta do to. Ko akmey to macizasing so kataotao ji Kizisto a nimawakwak do jyojika.

Ivoso 5:2

Patwawen nyo do icicirawat nyo o pangangasyan na ni Ama ta do to, akman si Yeso Kizisto a yamarilaw nyaten a yajingbeywan do inawan na nisomidong jyaten. Ta o akman rana sang a vazay na am isaray na ni Ama ta do to.

1 Tesalonicya 1:9

Ta yaro o tao a yamanci nya jyamen so kapiya no nitaotawwan nyo jyamen no kangay namen jinyo do dang a kano yanyo mina kakaro rana do yamalas a niraralay nyo a yarana omanod ji Ama ta do to a yaomraralay nya a yamanoyong a yamavyay a Tao do to.

1 Timotay 1:17

Inaoy no to ta meyyonong a omazwazway si Ama ta do to a Panirsirngen ta. Ta iya rana am jyawakwak a jyacita a meyngongyod a Tao do to. Amin.

1 Timotay 3:15

Am no si kahahay ko am cyaha, ta to ko na mancyan jinyo do teygami ko o iwawalam ta. Ta yaten rana amraralay ni Ama ta do to am akma tey asa ka vahay rana, do yana katketken jyaten ni Ama ta do to no ciriciring na no to meyyonong a mavyay a Tao do to.

Tito 2:14

Na nipalit ni Yeso Kizisto no kataotao na o raraten ta. So ikaro ta rana do makakaday a ta pineyraratenan. So icyakma tamoy matnaw a ranom so onowned a omanod jya, mowyat a meyvazay so apya vazay.

Sipolay 1:3

Yatomwaw jya o azwazway ni Ama ta do to. Iya rana am akma ney kataotao ni Ama ta do to. Na kalopkopen no oyowyat no ciring na o makakaday do karawan. Nikawakwak na o raraten no tao a kangay na rana do teyngato amlisna do wanan ni Ama ta do to a meypanirsirngen.

Sipolay 10:10

Na nipangononongan ni Yeso o nakenakem ni Ama ta do to a yamahap so vazay na a yamapasansan so kataotao na do jyojika. Am yaipisaha na kato miminan so raraten ta yanivonas.

Sipolay 10:12

Am o nipatanang na ni Kizisto a kataotao na am ipisaha. Am tey rako oyowyat na amvonas so raraten ta mangay do kaidan no karawan. So yana ilisna do wanan ni Ama ta do to.

Sipolay 10:2

No manoyong o kato na rana vonasan no raraten da no rala no kagling a kano baka am manoyong o kaji da rana makanakman so raraten da. So to na rana zavaci no kapatanatanang so kagling a kano baka.

Sipolay 10:22

Am ori o ikanoyong ta jyablis so onowned a akmey nioyasan so onowned a kano kataotao a omanop ji Ama ta do to.

Sipolay 11:21

No katod na rana jyawakwakan ni Yakebo am nipanlanlag na o rarwa ka anak ni Yoseyvo. So to na meysikoji a omraralay ni Ama ta do to, do kapeyhanhan na ni Ama ta do to.

Sipolay 13:12

Akman sang si Yeso a niwakwak da do siri no ili. O peypeypangayan no kaniomvoyog no rala ni Yeso am ivonas na so raraten no tao.

Sipolay 3:12

Inyo rana akma koy kakteh do cinai am meypepzat kamo an. Ta kalittan o onowned no tatasa jinyo a meyparai do to meyyonong a Tao do to ta a ji manganoyong.

Sipolay 6:1

Yaten rana am meypahagnat tamo rana so nakem ji Ama ta do to. Taosya o kato ta oliolyan sya amizngen so ta na katenngan a nanao ni Ama ta do to do kapamlis a manganoyong,

Sipolay 7:27

Iya am yamacitarek a kano aro a panipanirsirngen no mapatanatanang so nakem, do yana kaji mangdayan so araraw a yamapatanang so nakem da a ivonas so raraten da no tao. Iya rana am ipisa mapatanang so nakem na kato na rana ngavosan. O na nipatanang am kataotao na.

Sipolay 9:12

Si Yeso Kizisto am ji rana mapalolo so rala no kagling a kano baka. Ta mina to na rana patananga o rala na ipatazadang na jyaten do teyngato. Am o akman rana sang a vazay am ipisa mapatanang nyaten a kakavos na rana a mangay do kaidan no karawan.

Sipolay 9:26

O na icyakman sang ni Yeso a yarana ji vangovangon so iwawalam no tao do Yotay a mapatanang so rala am na rana nipatanang o kataotao na abo so raraten a ivoga na so raraten no tao. So na ikeypisa ni Yeso a mangay mawakwak nyaten a kato na rana meyyonongan a mavonas rana no raraten ta.

Sipolay 9:7

Am o Panirsirngen no mapatanatanang so nakem am no somdep do katangked na vahay am abo ikararwa na. Ipisa do kasa kawan a somdep. No somdep am mangap so rala no kagling a kano baka a patanangen na a ivonas na so monganay jya raraten na kano ji da ningongyod a raraten da no macikeylyan a tao.

Sipolay 9:9

O peypeypangayan no yanimalavat ta makakaday a vazay ori am ipakateneng ta do kaji na makanetan no patanangen da kagling a kano baka ji Ama ta do to a ivonas so raraten no tao.

1 Pite 1:19

Ta o na nitbos jinyo ni Ama ta do to do nyo peyraratenan am rala na ni Yeso Kizisto, akman so icicirawat da no mapatanatanang so nakem ji Ama ta do to a mapatanang so rala no ney yapya na kagling da.

1 Pite 2:22

Abo o raraten na. Abo o malas a ciring na.

1 Pite 2:24

Nisabway na ni Kizisto o raraten ta do jyojika. Ori o karwan ta na do peyraratenan ta a somazap so isaray na vazay ni Ama ta do to. O kataotao na ni Yeso a yanimanngannga nyaten am yata nipakahap so to meyyonong a ikavyay no pahad ta.

1 Pite 3:18

Ta ipisa si Yeso Kizisto a nimawakwak no raraten ta, kapakavos na rana so vazay na a mapatazadang jyaten do teyngato. So ikanoyong na abo so raraten a nisomabway no raraten no tao, do na kapanop jyaten ji Ama ta do to. Tana niwakwak da o kataotao na am jya nimawakwak o pahad na.

1 Pite 4:2

Pamindahen nyo rana sicyaikwaya o kaji nyo rana mangozayan do malas a monganay jinyo a onowned nyo. Ta o apyahen na ni Ama ta do to o ahapen nyo, do ipeyigegen nyo pa do karawan.

1 Yowani 1:7

Am no si amyan ta do kazngangan a akman si Ama ta do to am macikaop ta do akma tey kakteh do cinai a omraralay ni Ama ta do to. Ta o rala na ni Yeso Kizisto a Anak na ni Ama ta do to o amvonas so makakaday a raraten ta.

1 Yowani 3:5

O peypeypangayan no na kai ni Kizisto am na vonasen o raraten no tao, do na kabo no raraten na.

Ipaziman 1:5

a kani Yeso Kizisto a ta ipeyhanhan so ciring. Iya rana am ney manma na nimirwa a mavyay. Si Yeso Kizisto rana am yatomalamozong no panipanirsirngen do karawan. Na ikarilaw yaten. Na nipahawa yaten no rala na do yata peyraratenan.