Joon 14:6 - Gooti Toolluro Yogalokwono

⁶ Toro kuudoka tovi Jisasol aro kuudokaikono. “Nuvnokwe toonyu puutonyugono. Aki nuu yogalo nebal'nodonyugono. Aki nuu aiyo yiunokuudo mujomwekovlaiyo'moneyokwenyugono. Toro te a'mwo pwolnodo kwol kuruv moro Nyunumiyago toollomno biyo'mo kwino'ji tool puuto pumgu'aro abwo'ji tov ku'nono mabai'mowonekono. Toro kwol kuruv yiuno numi'aro abwo'ji toolno'gwowi nokwo bai'mowonekono.

Joon 14:6 Kruisverwysings

Matyuu 11:27

Aki Jisasol a'mwo abolo tonyu aro kuudokaikono. “Nuu yiuwi'nokai tonyu mido mollomwallo'moneyokwe tov mi Nyunumiyago tool me'no anubweyokanyugono. Yiuno mi Nyunumiyago su toolno mino kuudo kuunodo yanuu'dowodekono. Aki yiuno nuvnokwe toonyu mi Nyunumiyago su toolluno kuudo kuunodo youroma'dumdekono. Aki yiuno gamoro Kwolaiyo nuvnokwe toonyuno aro kuudo yau'dumdonyugono. Oo a'mwo abolo punyu mi Nyunumiyago su toolluno neya bomollolupto'nubwemonyugono. Nuu a'mwo abolo tonyu kuu'maiyo toru'no kuvinono bomollolupto'nubweyodo'mure tovida'ai mi Nyunumiyago su toolluno kuudo nokwo youromapinogano.” Kuudokaikono.

Joon 1:14

Aki Yogalo su tool a'mwo kulakokwe sumo'nokaikono. Toro imo'nyuno sumaiyokwe nemi akuuto toru abwolomwalokaikono. Toro toollu Gooti toolluro yasuwa'wino sugumaluko tokwe'aro nebaikuuguudo tokwe'aro toval aiyowomno kuullo'mowopiyodowodekono. Aki toro tool Gooti Ganumiyago toolluro Kwolaiyo pwolnodo tookono. Toro toolluro jurogudo kuunodo tovi nevu me'no kwonowekono.

Joon 1:17

Neya duu'nyulo. Gooti tool Moosesolluro ato tovi'aro loowo tov kwiyokaikono. Toro kuvi kuruv gamoro yasuwa'wino sugumaluko tokwe'aro gamoro nebaikuuguudo tokwe'aro tovalno'gwowi Jisas Kraisolluro ato tovi'aro abolovakono.

Joon 1:4

Aki aiyo mujomwekovlaiyo'moneyokwe tov Yogalo su toollu kuuluuwo'dowodokwono. Aki aiyo kuuluuwo'dowodo su tool yiuwi'nokai a'mwo abolo tonyu bako wimo'nodowodekono.

Joon 10:28

Nuvu su toro tonyu aiyo yiunokuudo mujomwekovlaiyo'moneyokwe tov wiyodumdonyugono. Moro aiyo wiyodumdo su tov yiunokuudo mamjobolmovla'mwalpinogano. Aki a'mwo abolo moro ato tovi me'no mwora'dumdo su tonyu a'mwo pwolnodo kwol kuruv ku'nono mipolonumokavlawonekono.

Joon 10:7

Jisasol toro wuujuno sumaiyokwe aki aiko te aro kuudokaikono. “Nuvu nebal'no kuunodo ikudumo'mokwono. Sipsip tooravuro kuulabiyo'moneyokwe noullo tov, nuu kwonyugono.

Joon 10:9

Nuvu sipsip noullo kuunodonyugono. Toro te a'mwo pwol mi'aro aulabwo'ji su toollu Gooti tool nuuwiyo'mwojonekono. Toro tool kuulno lokabino yowo'ji yiuwi'nokai toga wosamujuko ton yo'mgonoma'mwalonekono.

Joon 14:19

A'mwo abolo kwako akavi mwalodupudo ton wobo toga mi manuwonmwalpinogano. Toro kuvi kuruv kevno'gwowi numi kuuno nonuwonmwalpinorekikono. Nuu aiyo mujomwekovla'mdumdo tovino tov kev kworekul kuruv aiyo nomjomwekovla'mwalpinorekikono.

Joon 15:1

Aki Jisasol gami uumjunyokwe toorai aro kuudokaikono. “Nuu iko wain kuunodo toonyugono. Aki moro Nyunumiyago tool wain womdo tovi mollomwalokwe tookono.

Joon 18:37

Jisasol toro wuujuno sumaiyokwe toga Pailatol aro kuudokaikono. “Guu a'mwo aguto kig pwekudukono?” Toro kuudoka tovi Jisasol aro kuudokaikono. “Mino tov, a'mwo aguto kig pwekono, anyudadokuudo su tov guvnokwe tooku kuvi anyudadokuuno. Nuvno'gwowi kwako akavi sonumaropo tov womdo yiuno puru'mono yo'moneyokwe tovino kwolabonyugono. Womdo su tov arokwono. Nuu nebaikuuguudo tokwe kuu'maiyo toru'no moruudomollo'moneyokwe kwako akavi kwolabonyugono. Toro te yiuwi'nokai a'mwo abolo nebaikuuguudo tokwe molluulnoda'mdupudo ton mi kaduko nyabodupudogano.” Kuudokaikono.

Joon 5:21

Su tov aro tovinokwono. Nyunumiyago tool a'mwo abolo me'no bolodupudo tonyu aiyo aiko te mwalpino'moneyokwe moduka'mdowodekono. Su toro to'busuko kubalno gamoro Kwolaiyo kwonyu kuruv yiuwi'nokai a'mwo abolo nomodukaiyo'mo anyuno'ji su tonyu aiyo mwalpino'moneyokwe nomoduka'monyugono.

Joon 6:33

Toro wuujuno sumaiyokwe aki aro kuudokaikono. “Gooti toolluro muunyu kai'muuda'ai bret tool wolabodowo yiuwi'nokai a'mwo abolo kwako akavi mwalodupudo tonyu aiyo yiunokuudo mujomwekovlaiyo'mo wiyodowodekono. Su tool Gooti toolluro bret kuunodo tookono.” Kuudokaikono.

Joon 6:51

Gooti toolluro ago muunyu kai'muuda'ai bret kwolaboka su tov nuu kwonyugono. Toro te yiuwi'nokai a'mwo abolo ton bret su tovi amanpi tov aiyo yiunokuudo mujomwekovla'mwalpinogano. Bret nonyo'mo su tov moro kulako tovino'busukokwono. Toro te moro kulako kwimi su tov a'mwo abolo kwako akavi mwalodupudo ton aiyo mujomwekovla'mwalpino'moneyokweyokwono.”

Joon 6:57

Moro Nyunumiyago amonuwopiyaboka tool yiuwi'nokai tonyu aiyo wiyokwekono. Toro te nuvu aiyo mwallo'moneyokwe jurogudo tov mi Nyunumiyago su to kwolluda'ai aiyo mwalodumdonyugono. Su toro to'busuko kubalno yiuwi'nokai a'mwo abolo moro kulako tovi anpi ton moro aiyo mwallo'mo jurogudo uubweyodo'mure tovida'ai aiyo yiunokuudo mujomwekovla'mwalpinogano.

Joon 6:68

Toro kuudoganoka tovi Saimoon Pital aro kuudokaikono. “Agutoloo, nevu agugollu'mowa'ji tov ala'mwollomno plawanonoldeyo? Guu tookuno'gwowi aiyo yiunokuudo mujomwekovlaiyo'moneyokwe yogalo tov mwora'dumdekugono.

Joon 8:32

Aki toro toorekul nebaikuuguudo tovino kuudo nyouromapinorekikono. Nebaikuuguudo su tov kemi nobomollurolovekumokalokwonokwono.” Kuudokaikono.

Joon 8:51

Toro te nuu nebal'no kuunodo ikudumo'mokwono. A'mwo pwol moro yogalo tovi kuumjuno'ji su tool yiunokuudo mabolonekono.” Kuudokaikono.

Kuurotokwe 3:15

Kevu toro wuudo'mno aromiyosopekono. Toro aromiyosopo su tool nemi aiyo nekullabodowodo Jisasol kwekono. Toro tool me'no aboloka kwollu kuruv Gooti tool aiyo aiko te amodukavokaikono. Toro te navu yiuwi'nokai Jisasollu kwimo'nyajuko su ton me'no kwonowolonakono. Toro me'no kwonowolo toonal kuu'maiyo toru'no adodoluwosumwakuuwolo.” Kuudolorakono.

Kuurotokwe 4:12

Nemi ma'no ma'nodo tovuro kirumwallo tovida'ai bomollurolovonekumokalokwiyo'moneyokwe a'mwo yasuwa'nodo pwol ku'nono mabomollurolovonekumokalokwononogano. Yiuwi'nokai kwako akavida'ai a'mwo pwolnodo kwol kuruv nekullo'mwojo'moneyokwe jurogudo nonagutorogano. Toro kuvi kuruv nemi nonekullo'mwojo'mo toolno'gwowi nomwallo. Su toolluno yovo tov Jisasolekono.” Pital toro kuudokaikono.

Kuurotokwe 9:2

Toro ilabino sumaiyokwe pris aguto tool pas pun yonyakwolloneyokweyo'mo kuudoganokaikono. Pas su tonyu kwonpi toga aro tovino kuudo youromapinogano. “Oo Soolol a'mwo abolo pun Jisasolluro puuto tovi uumjunodopure tonyu so'mgonomaro'ji tov nokwo galomworaronekono. Yowo'ji wagwolago Jeruusalem'no nokwo meromokavlawonekono.” Pas su ton toro tovi youromapino'moneyokweyogano. Toro te Soolol pris aguto toolluro pas sokwolluwiyoka su togai momwora'no sumaiyokwe wagwolago Damaskosda'ai Juu tooravuro i'bwo'nyago tonyomno amokwolokaikono.

Room 15:16

Gooti tool gavnokweyolluro sugudo tov mi me'no anubweyoka toonyuno tov nuu Krais Jisasolluro womdokwe wimo'nodumdonyugono. Toro toonyu Gooti toolluro kuuguudo sugudo tokwe a'mwo abolo Juu tooravuro miyawosunodupudo tonyu moruudomollodumdonyugono. Moro womdo yodumdo su tov pris tooravuro womdo sajupo to'busukokwono. Pris tooro Gooti toollu wiyo'moneyokwe sipsiporodeyo toorogai kwiroudapiyajuporogano. Toro kwiroudapiyajupo toga Gooti tool kemoro wiyodopure toorai ilaiyo amollomallajukekono. Su toro to'busuko kubalno nuu Jisasolluro kuuguudo tokwe a'mwo abolo Juu tooravuro miyawosunodupudo tobuurai moruudomollodumdonyugono. Su toro moruudomollodore tovi'aro a'mwo abolo pun kuudo uubweyodupudogano. Toro uubweyodopure tonyu Gooti tool ilaiyo molloma'dowodekono. Aki Gooti toolluro Kuullo tool a'mwo abolo su tobuurai ma'dowo Gooti toolluro kwoloraiyo kuunodo wimo'numwalpino'moneyokwe morumwallodowodogano.

Room 5:2

Aki Gooti toollomno biyo'moneyokwe puuto tov Krais Jisasol me'no soulonekubweyokakwono. Nevu kwolluno kuudo kuubweya'ji tovi'aro puuto su tovi bodowadonogano. Toro tonol Gooti toolluro yasuwa'wino sugumaluko nekubweyodowodo tollovai anakuuto tomuu me'no kuulai'mo'mdowadonogano. Toro kuulai'mo'mdowado tonol aga kuga kuruv guureji amjodo'movlavogawano. Toro mujodo'movlavowa'ji lukomgu Gooti tooke gamoro bako bwotonyo pwopiyodowodo tovi anakuuto tomuu ilomwallo'moneyokwe sogwollo to'no kinyokwenogano. Aki toro tovino ilaiyo ibwosunowa'ji ilomodomoropiyokwenogano.

Room 5:21

Kevu kuudo neya jaullulo. Muudu'nodo toga ma'no ma'nodo tovi dolago tomuu mwalodowa abollajuwonogano. Toro kuvi kuruv aga'no'gwowi nevu Gooti toolluro yasuwa'wino sugumaluko tovi dolago tomuu mwalodowadonogano. Nemi su toro kuulomonekumwallo'moneyokwe Aguto Jisas Kraisol womdo me'no sopiyokaikono. Toro tovino tov nevu Gooti toolluro sumdo tovi sugudo wimo'nodowa aiyo yiunokuudo mujomwekovlaiyo'moneyokwe tovi ma'dowadonogano.

1 Koorin 15:45

Gooti toolluro yogalo puruv aro sakwollungikokwono. “A'mwo muudu'nodo tool Adamolekono. Toro tool a'mwo aiyokwe sumo'nokaikono.” Toro sakwollungiko kuvi kuruv aiyowo'mo Adamolbusuko gabovo pwolno'gwowi a'mwo abolo tonollu aiyo nekubwemovlaiyo'moneyokwe Kuullo sumo'nokaikono.

Efesos 2:18

Toro te nemi nonekullo'mwojo'moneyokwe Krais toolluro womdo me'no sopiyoka tovino tov nevu Juu tonogai'aro kevu Juu miyaikuuwosunodowado togaikike'aro yiuwi'nokai tonol Gooti toolluro Kuullo toollu aval'no ma'dowadonogano. Gooti toolluro Kuullo pwolnodo su tool nevu yiuwi'nokai tonollu Nellunumiyago Gooti toollomno wobo toru'no kuullo'moneyokwe puuto tovi kuusanekubweyodowodekono.

Kooloosi 2:17

Yiuwi'nokai su ton a'mwo lukomgu nyumo'nono pwolluro wakuunonabolo to'busukogano. Toro kuvi kuruv kuunodo toolno'gwowi me'no abai'movokaikono. Kuunodo su tool Krais tookono.

Kooloosi 2:9

Kuudo neya jaullulo. Gooti gavnokwe tool Krais su toolluro kulako tovi yiunokuudo kuullo'mowopiyodowodekono.

Kooloosi 3:4

Kemoro aiyo nyomjomwekovla'mwalpino su tov Krais toolluda'ai alokabokakwono. Toro te lukomgu Krais tool kuu'maiyo toru'no abiyalo'no'ji toga kevu Krais toollu me'no uuguro'mwonyodupudo kugaikul kuruv Krais su tooke gamoro bako bwotonyo tovi anakuuto tomuu kuu'maiyo toru'no nobiyalo'nupinogaikikono.

Hibruu 7:25

Toro tovino tov yiuwi'nokai a'mwo abolo Jisasollu'aro Gooti toollu wobo toru kuulluru'mallo'mo kwinpi tonyu kuvinono nuuwiyo'mwojumwalonekono. Toro kwiyo'mwojo'ji tonyu Jisasol kemoro ma'no ma'nodo tovuro kirumwallo tovida'ai yiunokuudo nobomollurolovomokalokwonekono. Aki aiyo yiunokuudo mujomwekovla'mdowodekono. Toro toolluno tov a'mwo abolo su tonyu wiyo'mwojumovla'mwalono'moneyokwe tovino yiuwi'nokai toga Gooti toollu subusu'nyogalo wuudodowodekono.

Hibruu 9:8

Pris aguto toolluro sumdomguda'ai sel ago tovi womdo amjumovlaiyajuko su tovino Gooti toolluro Kuullo tool aro nekuduuwallodowodekono. Sumdomguda'ai sel ago su tov kuuno da'mduke toga Gooti toolluro ago muunyu kai'muuda'ai pwekwapto kuunodo toru'no kuullo'moneyokwe puuto tov yere mausu'nyajukokwono.

1 Pita 1:21

Toro te kevu Krais su toollu'aro Gooti toollu kuudo me'no kuubwemwakopogaikikono. Aki Gooti su tool Krais toollu aiyo aiko te moduka'mno sumaiyokwe gamoro bako bwotonyo toru me'no amorumwallokaikono. Toro tovino tov kevu Gooti su toolluno kuudo uubweyodupudogaikikono. Aki Gooti su toolluno sogwollo to'no kinodupudogaikikono.

1 Pita 2:4

Kevu Aguto Jisasollomno me'no abumwakopogaikikono. Su tool sulo aiyokwe pwolbusukekono. Sulo su toollu kwako akavida'ai a'mwo abolo ton biyolsumdo uu'mwojodupudogano. Toro kuvi kuruv Gooti toolno'gwowi sulo su toollu senyubworomarokaikono. Toro te sulo su tool Gooti toolluro sumdo tovi nuugwiyo bwotonyo togai biyoma'dupudo pwolbusuko sugumaluko kuunodo wimo'nyokwekono.

1 Pita 3:18

Kuudo neya jaullulo. Krais kwol kuruv a'mwo abolo tonyuro ma'no ma'nodo tovi modukwopiyo'moneyokwe danyu'nyuwuulo ton yiuno puru'monodo toga'no amarokaikono. Krais su tool yiuno sugudo to'no imo'nodowodo kwol kuruv nevu sugudo mimo'nodowado tonolluro aiko toru maro'no abolokaikono. Aki nemi Gooti toollu wobo toru nekumokabiyo'moneyokwe abolokaikono. Krais toolluro kulako tov me'no aboloka kuvi kuruv aiyo aiko te adukavoka toga'no'gwowi Kuullo sumo'nokaikono.

1 Joon 1:8

Nevu aro noda'jo. “Oo ma'no ma'no pasudo maiyonogano.” Punol su toro ada'ji tov kuunano tomuu'aro bwolodukwopiyowanonogano. Aki su toro ada'ji tonolluro poowokalago tovi nebal'no yogalo tov maulanekwo'dowodokwono.

1 Joon 2:23

Yiuwi'nokai a'mwo abolo Gooti toolluro Kwolaiyo toollu buulo uuguunyumopiyodupudo su ton gami Ganumiyago Gooti kwollu kuruv buulo me'no uugunyumopiyodupudogano. Toro kuvi kuruv a'mwo abolo puno'gwowi Gooti toolluro Kwolaiyo toolluno kuu'maiyo toru'no aro dodowiyoku'bworosupinogano. “Oo Jisasol Gooti toolluro Kwolaiyo tool kwoldeyo.” Yiuwi'nokai toro adodowiyoku'bworosupi su ton Ganumiyago Gooti kwolluno kuruv kuu'maiyo toru'no dodowiyoku'bworosupinogano.

1 Joon 5:20

Aki nevu aro tovino kuudo me'no youroma'dowadonogano. Gooti toolluro Kwolaiyo tool kwako akavi me'no abwolomwalokaikono. Toro bwolomwalno sumaiyokwe Gooti kuunodo su tool gavnokweyolluno kuudo youromallo'moneyokwe tov nemi me'no anekullabokaikono. Toro te nevu Gooti kuunodo su toolluro Kwolaiyo Jisas Kraisollu uuguro'mwonyodowadonogano. Jisas Krais su tool Gooti kuunodekono. Aki yiuno Jisas Kraisollu'aro nevu aiyo yiunokuudo mujomwekovla'mwalanonogano.

1 Joon 5:6

Jisas Kraisol kwako akavi me'no abiyalo'nokaikono. Toro abiyalo'noka su tov yiuno gamoro wonyo kuuvollunoka to'no anekuduuwallokalmaiyo. Toro kwol kuruv pasudo puruval tovake anekuduuwallokaikono. Pasudo puruv Jisas Kraisolluro wonyo kuuvollunoka tokwono. Aki puruv gamoro mujako abwoloka tokwono. Pasudo su tovalluno Gooti toolluro Kuullo tool kuu'maiyo toru'no adodoluwosokaikono. Gooti toolluro Kuullo su tool yiuno nebal'no yogalo to'no jokwekono. Toro toolluro yogalo adodoluwosoka tov Jisasolluro pasudo su tovalluno kuu'maiyo toru'no nekuduuwallodowodokwono.

2 Joon 1:9

A'mwo pwol Krais toolluno kuuguudo sodekubwasajuuwo tovi ku'nono magudupolaro'ji tov Gooti tool a'mwo su tooke mamwalodowodekono. Toro kuvi kuruv a'mwo pwol Krais toolluno kuuguudo sodekubwasajuuwo tovi kuvinono agudupolaro'ji toolno'gwowi Gooti Ganumiyago tooke'aro gamoro Kwolaiyo tooke'aro yiuwi'nokai tooral a'mwo su tooke mwalodubulorakono.

Adodolukuu'nosungiko 1:5

Aki Jisas Krais kwol kuruv gamoro yasuwa'wino sugumaluko tokwe'aro sumwoluko kavo wosunyo'mo tokwe'aro toval kemi nokwo ikubwemwalonekono. Jisas Kraisol Gooti toolluno kuu'maiyo toru'no pi'mwono dodoluwosodowodekono. Aki Jisas Kraisol yiuwi'nokai me'no bolodupudo tooravuro aiyo aiko te dukaiyo'moneyokwe tov kwolda'ai amollubworosokaikono. Toro tool yiuwi'nokai kwako akavida'ai a'mwo aguto kig mido mollomwalokwe tooravuro Agutekono. Jisas Kraisol nemino kalo buuropino winyuno sumaiyokwe gamoro mujako abwoloka tokwe nemi ma'no ma'no pasudo tonyuda'ai me'no abomollurolovonekumokalokwokaikono.

Adodolukuu'nosungiko 19:11

Toruda'ai nuu aro tovi kwononyugono. Gooti toolluro ago muunyu kai'muu kuusoda'mno sumaiyokwe hoos wiya'jo pwol da'mduke toollu kwononyugono. A'mwo hoos su toollu ilomwalodowodo toolluno yovo puruv arokwono. Gooti Toolluro Womdo Tonyu Pi'mwono Mollomwallokweyolekono. Aki a'mwo hoos toollu ilomwalodowodo su toolluno yovo puruv arokwono. Nebal'no Yogalo To'no Jokweyolekono. Toro tool kooti yogalo kwiyo'ji toga yiuno idopto'nodo to'no jainyubwollokwekono. Aki gami ikomago toorai molo kwiyo'ji kuga kuruv yiuno idopto'nodo to'no wiyokwekono.

Adodolukuu'nosungiko 20:15

Aki yiuwi'nokai a'mwo abolo ton kemino yovo tov Aiyo Yiunokuudo Mujomwekovlaiyo'moneyokwe Buukiyo tovi miyokwollosungiko su tonyu du'muudo sovomwollosungiko tovi kwolomogalowopiyapogano.

Adodolukuu'nosungiko 22:1

Toruda'ai ensel tool wonyo bwotonyo puvi anyuduuwallokaikono. Wonyo su tovi a'mwo abolo anpi tonyu aiyo yiunokuudo mujomwekovlaiyo'moneyokwe wiyodowodokwono. Aki toro tov gles to'busuko lekuropiyodowodokwono. Wonyo su tov Gooti tooke'aro Sipsip Muugunyo tooke'aro tooralluro sia kig mwalodubulo tomuuda'ai lokabodowodokwono.

Adodolukuu'nosungiko 22:17

Gooti toolluro Kuullo tooke'aro aki Sipsip Muugunyo toolluro abolo nomallo'mo tokwe'aro toval aro dodubulovakono. “Oo kevu Krais toollomno dobogaulo.” Dodubulovakono. Aki yiuwi'nokai a'mwo abolo kuuguudo akavi kaduko kwipi kun kuruv aval'no aro neya adupuro. “Oo Krais toollomno dobogaulo.” Adupuro. Aki a'mwo kuuleyaluko kwino'ji tool Krais toollomno nokwo abwono. Aki yiuwi'nokai a'mwo abolo ton wonyo aiyo yiunokuudo mujomwekovlaiyo'moneyokwe lokabodowo'jure tovida'ai nonyo'mo kwinpi su ton wonyo su tovida'ai yasuwa'no nokwo abanupuro.

Adodolukuu'nosungiko 3:14

“Aki guu pas akavi wagwolago Leyadisiyada'ai Jisasolluro mollu'bwoto tovuro ensel moduvomwallokwe toollu aro jokwollapiyono. Nuu Gooti toolluro subuu'yamju tonyu suuwiyo imwojodumdonyugono. Subuu'yamju su tonyuno, “Nebal'nodogano,” dodumdonyugono. Toro toonyu Gooti toolluro yogalo tovino kuu'maiyo toru bomollolupto'noso'moneyokwe nebal'no yogalo togai pi'mwono dodoluwosokwenyugono. Gooti tool yiuwi'nokai kwako tokwe sulugumdo tokwe toval sokwollosoka su tov yiuno mi'aro to'no sokwollosokagano. Su toro toonyu kuuguudo tov aro agudumono.

Adodolukuu'nosungiko 3:7

“Aki guu pas akavi wagwolago Filadelfiyada'ai Jisasolluro mollu'bwoto tovuro ensel moduvomwallokwe toollu aro jokwollapiyono. Nuu yiuno sugudo to'no yodumdonyugono. Aki nebal'no yogalo to'no dodumdonyugono. Toro toonyu aiyoga a'mwo aguto kig Devitol gamoro mido mollomwalo tomuu kuulomwallo'moneyokwe ki tovi amworallajuko to'busuko kubalno nuu aguto kig toonyuro mido mollomwalo tomuu kuulomwallo'moneyokwe ki tovi mwora'dumdonyugono. Toro toonyu kudo'aiko ausosumi tovi a'mwo pwolnodo kwol kuruv ku'nono mamallukuronekono. Aki toro toonyu kudo'aiko me'no amollukurosumi su tovi a'mwo pwolnodo kwol kuruv ku'nono mausonekono.