Toro sumo'noka su tov yiuno Gooti Yawelluro yoduke tovida'ai sumo'nokakwono. Gooti Yawel gamoro me'no adomduukuurosoka tovi kuvinono imo'nyo'moneyokwe a'mwo su tekwoji danyu'nyuwuulo tov kuubweyokaikono. Toro kuubweyoka tekwo Gooti Yawelluro ilaiyo winodowodo tovi uumjuno'no yiuno'no sopiyokaikono. Toro tekwo a'mwo abolo tonyuro ma'no ma'nodo tovi modukwopiyo'moneyokwe gamoro aiyo mwalodowodo tov Gooti Yawellu me'no kwiyokaikono. Aro to'busukokwono. Gooti Yawellu wiyo'moneyokwe dukwagupto tovi aromiroudapiyajupo pworobusuko kubalno a'mwo su tekwojuro aiyo mwallo'moneyokwe tov Gooti Yawellu wiyo'no abolokaikono. Toro aboloka kwol kuruv lukomgu aiyo yiunokuudo mujomwekovla'mwalonekono. Toro mujomwekovlavowo'ji gamoro kwoloraiyo wimo'nodopure tonyu nokwo wonmwalonekono.
Joon 1:29 - Gooti Toolluro Yogalokwono29 Iruko aikomguda'ai tollugwoji Jisasol abokaikono. Toro noboduke toollu Joonol wonyuno sumaiyokwe aro adokaikono. “Akaigwollu doonyuloo! Gooti toolluro sipsip muugunyo tookono. Kwako akavida'ai yiuwi'nokai a'mwo abolo tonolluro ma'no ma'nodo tonyu modukwopiyo'moneyokwe tookono. Sien die hoofstuk |
Joon 1:29
65 Kruisverwysings
Toro tekwo a'mwo abolo bwotonyago ton sugudo imo'nupino'moneyokwe kemoro ma'no ma'nodo tonyuro jul'nyo tov maro'no danyu'nyuwuulo tov subwosunokaikono. Toro ibwosunoduke toollu Gooti Yawel wono'no adokaikono. “Moro a'mwo womdokwe su tekwojuno ilaiyo yodum a'mwo abolo ma'no ma'nodokwe tonyuno surodo nuunodowodo tov dugoga anyulmaiyo.” Adokaikono. Toro te a'mwo womdokwe yiuno sugudo to'nodo su tekwo a'mwo abolo tonyu sugudo wimo'nodowo'jure tovi wonowo'ji kuudo youromaronekono. Oo moro danyu'nyuwuulo amaro tov yasuwa'nodo'maiyo. Kuudo youromarowo'ji ilaiyo nokwo yomjomwekovla'mwalonekono.
Toro tekwoji kaiyako igolodopure toga dado ibwosuno'no yogalo puru'monodo kuruv maravokaikono. Toro tool sipsip deko madodowodo pwolbusuko sumo'nokaikono. Sipsip pwol noromiyoso'moga'deyo oo ato kuurupiyomallo'moga'deyo toga deko madonekono. Toro toolbusuko kubalno a'mwo su tekwoji noromiyoso'mo yodopure toga yogalo puru'monodo kuruv maravokaikono.
Toro kuudoka tovi Moosesol wuu'nyuno sumaiyokwe aiyon sallukwa'jo tovida'ai gabakuto toolbusuko pwollu yakwollo'no iko tovi muunyu toru kuuruubidapiyokaikono. Toro te a'mwo abolo pwolno puru'monodo ton gabakuto tooro tuko do'mdopure toga aiyon sallukwa'jo gabakuto su toollu bwonodopure tov mabolodupu aiyo to'no amwallajupogano.
Gooti tool yiuwi'nokai a'mwo abolo kwako akavi mwalodupudo tonyuno kalo buuropino winodowodekono. Toro tovino tov gami Kwolaiyo pwolnodo toonyu amonuwopiyabokanyugono. Toro amonuwopiyaboka su toonyuno yiuwi'nokai a'mwo abolo kuudo anubwepi ton yiunokuudo mabolopipinogano. Toro kun kuruv aiyo yiunokuudo mujomwekovlaiyo'moneyokwe tov nomapinogano.
Toro te a'mwo abolo su ton Samariyada'ai abolo tovi aro kuudopogano. “Nevu Jisasolluno kuudo kuubwemwakuuwo tov yiuno gumoro anekudumwa'judo tovida'aiyo'maiyo. Toro kuvi kuruv nevnokwe tonol gamoro yogalo tovi kuu'numwa'juuwo tovino aro kuudo kuubwemwakuuwono. Oo nebalo'mdeyo. Su tool yiuwi'nokai kwako akavi mwalodowado tonollu ma'no ma'nodo tovuro kirumwallo tovida'ai nobomollurolovonekumokalokwonoldeyo, kuudo kuubwemwakuuwono.” Kuudopogano.
Gooti toolluro ago muunyu kai'muuda'ai bret kwolaboka su tov nuu kwonyugono. Toro te yiuwi'nokai a'mwo abolo ton bret su tovi amanpi tov aiyo yiunokuudo mujomwekovla'mwalpinogano. Bret nonyo'mo su tov moro kulako tovino'busukokwono. Toro te moro kulako kwimi su tov a'mwo abolo kwako akavi mwalodupudo ton aiyo mujomwekovla'mwalpino'moneyokweyokwono.”
Aki kevu neya duu'nyulo. Moosesolluro loowo ton kemoro ma'no ma'nodo tovida'ai ku'nono mirolovekwapiyonokwono. Toro kuvi kuruv yiuno Jisasolno'gwowi kemoro ma'no ma'nodo tonyuda'ai nokwo irolovekwapiyonekono. Toro te yiuwi'nokai a'mwo abolo Jisasolluno kuudo kuubwepi tonyuno Gooti tool, Sugudogano, dumwalonekono.”
Toro ilomwalno sumaiyokwe a'mwo Afrikada'ai tool Gooti toolluro kuuguudo amomjojogilmovlaiyajuko tov arokwono. “Oo toro tekwoji kaiyako igolodopure toga dado ibwosuno'no gamoro yogalo puru'monodo kuruv maravokaikono. Toro tekwo aro to'busuko sumo'nokaikono. Sipsip pwol gamoro ato tov dovoruupiyomallo'mo toga deko madonekono. Aki sipsip muugunyo pwol noromiyoso'mo meromokavla'mdopure toga deko madonekono. Toro to'busuko kubalno a'mwo su tekwoji noromiyoso'mo yodopure toga gamoro yogaimaguurai puru'monodo kuruv maravokaikono.
Kuudo neya jaullulo. Krais tool ma'no ma'no puru'monodo kuruv miyajukekono. Toro kuvi kuruv Gooti tool nemi nekullo'mwojo'moneyokwe tov nemoro ma'no ma'nodo ton Krais toollu muunyu toru sulloullubweyokaikono. Toro te aga nevu Krais ma'no ma'no miyajuko su toollu me'no uuguro'mwonyodowadonogano. Toro tovino tov Gooti toolluro sumdo tovi sugudo me'no wimo'nodowadonogano.
Nemi Nellunumiyago Gooti tool agasuro nevu kirovanyuvanyu kuumwiyokwe kwako mwalodowado akalluda'ai nobomollurolovonekumokalokwiyo'moneyokwe ilaiyo kwinyajukekono. Toro winodowodo tovi Jisasol kuvinono uumjunyuno sumaiyokwe nemoro ma'no ma'nodo tonyu mobiyodukwopiyo'moneyokwe tov gavnokwe tool morubweno'no abolokaikono.
Toro te nevu Moosesolluro loowo su tovi kisuvolo me'no yodowore tonollu Gooti tool kaiyako sanekullugolowo'jujukekono. Toro kuvi kuruv nemino tov kaiyako nomapiyokwe Krais tool aro abiyonekumorabokaikono. Krais su tool nemoro aiko toru malluno sumaiyokwe i'noguropte tovi ilejuku'na'duke toollu Gooti tool kaiyako sugolokaikono. Su toro tovino Gooti toolluro yogalo puruv aro sakwollungikokwono. “Yiuwi'nokai a'mwo iko te sulejuku'napi toorai Gooti tool kaiyako igolodowodorogano.” Sakwollungikokwono.
Jisas Kraisol a'mwo noromiyoso'mo tooravuro ato tovi gavnokwe tool morubwenyuno sumaiyokwe yiuno'no abolokaikono. Gamoro aboloka su tov nevu yiuwi'nokai ma'no ma'nodo tonyuro womdo tovi ki'na'dowore tonollu amollurolovonekwapiyokaikono. Aki gamoro a'mwo abolo kuunodo wimo'nowa'ji sugupasudo to'no guureji yomjomwekovla'mwalano'moneyokwe amollol'movonekumarokanogano.
Gooti toolluro Kwolaiyo su tool Gooti jurogudo kuunodo toolluro bako pwopiyodowodo tov nekuduuwallodowodekono. Aki toro tool gami Ganumiyago Gooti toolbusuko irol'mowosunodekono. Toro tool kwako tokwe'aro sulugumdo tokwe'aro tovalluda'ai yiuwi'nokai wo'dupudo tonyu gamoro yogalo jurogudo tokwe kuuno mollomwalodowodekono. Kwolaiyo su tool nemoro ma'no ma'nodo tovuro kirumwallo tovi me'no amollol'movonekudukwopiyokaikono. Toro mollol'movonekudukwopino sumaiyokwe toga muunyu kai'muu mwalodowodo Aguto Kuunodo toolluro anato toru sulomwalokaikono.
Toro tovino tov Jisasol gami gagwai'yago jo'mwo tonyu wiyo'mwojo'moneyokwe su tonbusuko aval'no neya imo'nonekono. Toro tool su tonbusuko kuvinono me'no sumo'nokaikono. Su tov aro tovinokwono. Jisasol pris aguto nonekullumo'numwalono tovinokwono. Pris aguto su tool nemino kalo manekumwonyodowodo tovida'ai Gooti toolluro womdo tovi pi'mwono yomjumovla'mwalonekono. Pris aguto su tool womdo aro tovi imwalonekono. A'mwo abolo tonyuro ma'no ma'nodo tovuro kirumwallo tovi modukwopimwalonekono.
Toro to'busuko kubalno Krais tool yiuno puru'monodo toga'no abolokaikono. Toro aboloka su tov noonyumwonyu kwiroudapiyajupo pwolbusuko imo'no'no gavnokwe tool a'mwo abolo ma'no ma'nodokwe bwotonyago tonyuro aiko toru maro'no abolokaikono. Lukomgu Krais su tool kwako akavi aki aiko te noolabwonekono. Su toro kwolabwo'ji toga'no'gwowi nemoro ma'no ma'nodo tonyu yovo'dogallo'moneyokwe wolabwonolmaiyo. Toro kuvi kuruv yiuwi'nokai a'mwo abolo gavuge mwallo'moneyokwe tovino sogwollo winodupudo su tobuurai gamoro ago muunyu kai'muuno nomollurolovomokailawonekono.
Krais su tool nemoro ma'no ma'nodo ton gavnokweyolluro kulako tovi ilomolloulloso'no amokavlavokaikono. Toro mokavla'mno sumaiyokwe i'noguropte tovi muunyu toru sulejuku'narokaikono. Nemoro ma'no ma'nodo ton gamoro kulako tovi sulomolloullosoka su tov aro'mokwono. Nemoro ma'no ma'no yo'moneyokwe kuudo tooro yiunokuudo neya bolopipinorogano. Aki nevu aiyo sumo'na'ji tovi'aro gamoro sugupasudo tonyuno'gwowi neya mujumovla'mwalano tovino'mokwono. Kuudo neya jaullulo. Krais toollu iwago aromiyopo tovida'ai imuulo amaroka su tovi'aro kevu ikulnodupu ilaiyo aiko te imo'nodupudogaikikono.
Kuudo neya jaullulo. Krais kwol kuruv a'mwo abolo tonyuro ma'no ma'nodo tovi modukwopiyo'moneyokwe danyu'nyuwuulo ton yiuno puru'monodo toga'no amarokaikono. Krais su tool yiuno sugudo to'no imo'nodowodo kwol kuruv nevu sugudo mimo'nodowado tonolluro aiko toru maro'no abolokaikono. Aki nemi Gooti toollu wobo toru nekumokabiyo'moneyokwe abolokaikono. Krais toolluro kulako tov me'no aboloka kuvi kuruv aiyo aiko te adukavoka toga'no'gwowi Kuullo sumo'nokaikono.
Gooti tool nemino tov sumwoluko noullo wosunyo'moneyokwe Krais Jisasol gavnokwe su toolluro kulako tov amorubwenokaikono. Toro morubwenyuno sumaiyokwe nemoro ma'no ma'nodo tovuro kirumwallo tovi amonekudukwopiyokaikono. Aki yiuno nemoro ma'no ma'nodo tovuro kirumwallo tonyuno to'no modukwopiyo'mo'maiyo. Toro kuvi kuruv yiuwi'nokai a'mwo abolo kwako akavi mwalodupudo tonyuro kirumwallo kugai'aro modukwopiyo'mokwono.
Kuudo neya jaullulo. Nevu Gooti toollu kalo buuropino yere mwinodowore toga Gooti toolno'gwowi sumdomgu nemino kalo buuropino me'no kwinyajukekono. Toro te Gooti su tool kalo buuropino pasudo tovino kuu'maiyo toru me'no anekuduuwallokaikono. Toro tool nemoro ma'no ma'nodo tovuro kirumwallo tovi monekudukwopiyo'moneyokwe gamoro Kwolaiyo toollu kwolomonekwopiyabokaikono.
Aki Jisas Krais kwol kuruv gamoro yasuwa'wino sugumaluko tokwe'aro sumwoluko kavo wosunyo'mo tokwe'aro toval kemi nokwo ikubwemwalonekono. Jisas Kraisol Gooti toolluno kuu'maiyo toru'no pi'mwono dodoluwosodowodekono. Aki Jisas Kraisol yiuwi'nokai me'no bolodupudo tooravuro aiyo aiko te dukaiyo'moneyokwe tov kwolda'ai amollubworosokaikono. Toro tool yiuwi'nokai kwako akavida'ai a'mwo aguto kig mido mollomwalokwe tooravuro Agutekono. Jisas Kraisol nemino kalo buuropino winyuno sumaiyokwe gamoro mujako abwoloka tokwe nemi ma'no ma'no pasudo tonyuda'ai me'no abomollurolovonekumokalokwokaikono.
Aki toro toollu Jisasolluro a'mwo abolo tobuuro me'no kuuwolovopogano. A'mwo abolo su tobuuro kwako akavida'ai mujomwekovla'mdupudo tovino biyolsumdo sajupogano. Toro yodupudo tobuuro kemoro bollo'mo kuvino kuruv me'no sovrowosunyajupogano. A'mwo abolo su tobuuro Sipsip Muugunyo toolluro mujako abwoloka tokwe'aro aki Krais Jisasolluno kuu'maiyo toru dodoluwosodupudo tokwe'aro tovalluro jurogudo tokwe Satanyollu me'no kuuwolovopogano.
Toro te yiuwi'nokai a'mwo abolo kwako akavi mwalodupudo ton ibesa'aiyo kaiya'no kuumwiyo su toollu sulomoropiyajupogano. Toro sulomoropiyajupo su ton aiyoga kwako akav yere mimo'nyoduke togada'ai kemino yovo ton Buukiyo Aiyo Yiunokuudo Mujomwekovlaiyo'moneyokwe tovi miyakwollungikogano. Buukiyo su tov Sipsip Muugunyo me'no aromiyosopo toollurokwono.
Toruda'ai nuu Sipsip Muugunyo tool muumuudo Saiyoon toollu muunyu toru da'mduke kwononyugono. Aki 144,000 a'mwo tooro kweke avalo toru da'mdopure toorai kwononyugono. A'mwo su tooravuro yomo tonyu Sipsip Muugunyo toolluro yovo tokwe'aro gami Ganumiyago toolluro yovo tokwe'aro toval me'no sokwollubwengikorogano.
Gooti toolluro suroulo tov kapwo tovida'ai wain wonyo nodupudo to'busuko kubalno nomapinogano. Suroulo su tov pwekwonodo'maiyo. Toro kuvi kuruv Gooti toolluro yiuwi'nokai surodo wuunodowodo tov mapinogano. Suroulo su tov duko tokwe'aro dukworokakwe salfa sulo tokwe'aro toval monosodowo'jure tovida'ai a'mwo abolo su tobuuro danyu'nyuwuulo nyubwosungovla'mwalpinobuurogano. Su tov Gooti gavnokwe toolluro ensel toorogai'aro Sipsip Muugunyo tooke'aro tooravuro sumdo muugona'dopure toru nuuwimo'nonogano.
A'mwo su tooro abolo puru'monodo kurukwe kuruv sumwonyo miyodupudorogano. Toro tooraino tov kaiyako migolamo'nodupudorogano. Aki toro tooro Sipsip Muugunyo tool buro'nyo buro'nyomdeyo tomuu yomolloduke toollu uumjunodupudorogano. Toro toorai Gooti tool yiuwi'nokai a'mwo abolo kwako akavi mwalodupudo tonyuro akuuto tomuuda'ai me'no abiyomarokarogano. Toro abiyomaroka su tov aro tovino'mokwono. Wosa kuto sumdomguda'ai mulodupudo to'busuko kubalno a'mwo su tooro Gooti tooke'aro Sipsip Muugunyo tooke'aro tooralluro sumdomguda'ai wimo'nupino tovino'mokwono.
Toro togai mwora'no sumaveyokwe dato puruv adopogano. Dato su tov aiyoga Gooti toolluro womdokwe Moosesolluro ajajupokwono. Aki dato su tov Sipsip Muugunyo toollunokwono. Toro te dato tov aro adopokwono. “Oo Gooti Aguto tooku guu Jurogudo Kuunodekugono. Gumoro yiuwi'nokai womdo yodumdo ton judo pumgu'aro aguto kuunodogano. Toro tonyuno kuudo kwolallo yourukwapiyodowadonogano. Oo Gooti Aguto tooku guu yiuwi'nokai kantri tomuuda'ai a'mwo abolo mwalodupudo tonyuro aguto kig wimo'nodumdekugono. Toro tooku yiuno pasudo sugudo tokwe'aro nebal'nodo tokwe'aro tovake yomjomwekovla'mdumdekugono.
A'mwo aguto kig atousal su tooro Sipsip Muugunyo toollu molo nuuwipinorogano. Toro kwipi kworai kuruv Sipsip Muugunyo su toolno'gwowi nuuwolowonekono. Su tov aro tovinokwono. Sipsip Muugunyo su tool yiuwi'nokai a'mwo aguto toorai kemi Aguto kuunodo wimo'nodowodekono. Aki yiuwi'nokai a'mwo aguto kig toorai kemi Aguto Kig kuunodo wimo'nodowodekono. Toro toolluno tov a'mwo aguto kig atousal molo kwipi su toorai nuuwolowonekono. Toro kuuwolowo'ji toga gamoro a'mwo abolo ton kweke mwalpinogano. A'mwo abolo su tonyu me'no doma'no sumaiyokwe gamiyo'moneyokwe ajesokagano. Aki a'mwo abolo su ton Sipsip Muugunyo su toollu pi'mwono uumjunodupudogano. Toro ton kweke nomwalpinogano.” Ensel tool toro anyudokaikono.
Nemi poowokalago togai ilaiyo bwotonyo yanoo! Aki ilaiyo ibwosunowa'ji gamino yovo aguto neya wimwalanekono. Su tov aro tovinokwono. Aga Sipsip Muugunyo tool gami abolo tovi yolokuromallo'moneyokwe lubullu doto tovi yanyo'mo tov me'no abai'mo'mokogakono. Aki gamoro abolo tov me'no yovraimwonyodowo gami nuuma'nyo'moneyokwe kuunodo toga'no sogwollo kinodowodokwono.
Aki ensel tool aro anyudokaikono. “Guu aro jakwollono. A'mwo abolo Gooti toolluro me'no doma'dowodo ton ilaiyo neya ipuro. Su tov aro tovinokwono. Sipsip Muugunyo tool gami abolo tovi yolokuromarowo'ji lubullu doto tov yonomwalonekono. Toro tooke yonomwallo'moneyokwe a'mwo abolo doma'dowodo su ton ilaiyo neya ipuro.” Ensel tool toro nyujuno sumaiyokwe aki aro anyudokaikono. “Yogalo akan Gooti toolluro yogalo nebal'nodogano.” Anyudokaikono.
Toro kuvi kuruv yiuwi'nokai kaiyako mollugolameyo'mo tooro wagwolago su tovi noulapiyokwe nuumjuku'mwalonorogano. Toro uumjuku'dowo'jure tovida'ai a'mwo kaiyako igolamo'nodowodo pwolnodo kwol kuruv ku'nono maulawonekono. Aki yiuwi'nokai kwoda'mollunyo pasudo yodupudo togai'aro kuunano youkuu'nuudodupudo togai'aro su to kun kuruv ku'nono maulapinogano. Toro kuvi kuruv yiuno a'mwo abolo kemino yovo tov Sipsip Muugunyo toolluro Aiyo Yiunokuudo Mujomwekovlaiyo'moneyokwe Buukiyo tovi me'no sokwollosungiko su tonyuno to'no wagwolago tovi nokwo kuulapinogano.
Toruda'ai 7-pela ensel tooraida'ai pwol miyomno abokaikono. 7-pela ensel su tooro Gooti toolluro aiyowo'mo 7-pela tabunyuwuulo surosungiko dis tonyu amworallajupo toorogano. Toro tooraida'ai ensel pwol miyomno bino sumaiyokwe aro anyudokaikono. “Guu dobono. Toro abubi tookuji nuu Sipsip Muugunyo toolluro abolo nomarono tovino guduuwallumonyugono.” Anyudokaikono.
Aki nuu Sipsip Muugunyo pwol me'no aromiyosungiko toolbusuko pwollu kwononyugono. Toro tool sia kig toruke'aro aiyokwe aral aral tooro mwalodupudo toruke'aro tonyu akuuto toru adavokaikono. Aki toro da'mduke toollu 24-pela a'mwono moduvomwallokwe tooro aiyowomno amomwodovomaropekono. Aki Sipsip Muugunyo su tool 7-pela koomwo toorogai'aro aki 7-pela sumdo toorogai'aro kurukwekono. 7-pela sumdo su tooro 7-pela kuullo toorobusuko imo'nyokwe Gooti toolluro Kuullo toolluno duuwallo'moneyokweyorogano. Gooti tool gami Kuullo su toollu yiuwi'nokai kwako akavuro go'no go'nodo tomuuno amorapiyokaikono.
Puukwollikwiyo aweyogunyugolowosungiko su tovi malluno sumaiyokwe aiyokwe aral aral toorogai'aro aki 24-pela a'mwono moduvomwallokwe toorogai'aro tooro Sipsip Muugunyo toollu ilomoropiyo'moneyokwe gamoro sumdollu tomuu kwolomuulo'naroporogano. Yiuwi'nokai pwolno pwolnodo su tooro gita pun, harpovo, dodupudo togai mworaro'mno aki gool tovida'ai dis sakwollungiko togai'aro amomworaroporogano. Dis su tonyu su'nallajupo ton duko tovi suroudapipi toga wobeya sudokwe juto tov muunyu kai'muuno mokailodawodokwono. Su tov Gooti toolluro a'mwo abolo tonyuro subusu'nyogalo ilodopiyodapudo tovino duuwallo'moneyokweyogano.
Toruda'ai nuu sumdo muugona'dore toga Sipsip Muugunyo tool puukwollikwiyo aweyogunyugolowosungiko tovuro 7-pela gwomalo amugutowopingiko su tonyuda'ai muudu'nodo tovi modogaipolodukwopiyo'no ausokaikono. Toro kuusuno sumaiyokwe aiyokwe aral aral tooraida'ai pwol guureji aro adokaikono. “Dobonoo!” Toro adoka su toolluro yogaimaguurai tov kuuloulo to'busuko ai'nokakwono.
Toro sanuumgojoka toollu nuu aro kuudonyugono. “Mi a'mwo agutoloo, guvnokwe tooku a'mwo abolo su tonyuno kuudo nyau'mwakuno.” Toro kuudo tool aro anyudokaikono. “A'mwo abolo su ton tabunyuwuulo bwotonyo boduke tovida'ai me'no abolopo ton kugano. Su ton kemi youro kumi'yago touso Sipsip Muugunyo toolluro mujako tokwe sal'movopo tovida'ai youro kumi'yago su touso wiya'jo sumo'nopogano.
Su tov aro tovinokwono. Sipsip Muugunyo tool sia kig tovi mwalodowodo su tool a'mwo abolo su tonyu nomoduvomwalmwalonekono. A'mwo sipsip moduvomwalokwe pwol yodowodo to'busuko kubalno a'mwo abolo su tonyu nomoduvomwalmwalonekono. Toro tool a'mwo abolo su tonyu wonyo sumdo tonyomno nomollubworomokavla'mwalonekono. Wonyo sumdo su tonyuda'ai wonyo ilowilovabodupudo ton aiyo yiunokuudo mujomwekovlaiyo'moneyokwe tov wiyodowodogano. Aki Gooti tool kemoro yiuwi'nokai sumdo tonyuda'ai kumdaluko bwolodapudo tonyu nomollouropiyonogano.”