Jems 1:27 - Gooti Toolluro Yogalokwono

²⁷ Lootuu pasudo kuunodo puru'gwowi nemi Nellunumiyago Gooti toolluro sumdo tovi kaiya'no mimo'nodowodokwono. Su tov arokwono. Nevu kwoloraiyo solkaiyo tobuurogai'aro abekanyo tobuurogai'aro tobuuro jul'nyo mo'movla'mdopure su tobuurai neya mollomwalmwalanonogano. Aki nevu kwako akavida'ai kaiya'no pasudo toorai manyu tomuu'aro neya irukuruwolo'mwalanonogano. Lootuu pasudo kuunodo tov su torokwono.

Jems 1:27 Kruisverwysings

Matyuu 12:32

Aki a'mwo pwol nuu A'mwo Kwolaiyo Kuunodo toonyuno kaiya'no yogalo abwolomonumwogapiyawo'ji tov gamoro ma'no ma'nodo su tovuro kirumwallo tovi Gooti tool nokwo modukwopiyonekono. Toro kuvi kuruv a'mwo pwol Gooti toolluro Kuullo toolluno kaiya'no yogalo abwolomorumwogapiyawo'ji to'gwowi a'mwo su toolluro ma'no ma'nodo tovuro kirumwallo tovi Gooti tool mamodukwopiyowo'ji yiunokuudo mujo'movla'mwalonokwono. Agake'aro yiuwi'nokai lukomgu nobai'mowono kugake'aro toga kirumwallo su tov yiunokuudo mujo'movla'mwalonokwono.

Matyuu 5:8

Aki a'mwo abolo pun kemi poowokalago me'no yal'mo'nodupudo su ton ilaiyo nokwo ipinogano. Su ton Gooti toollu yiuno'no noonpinogano.

Luuk 1:6

Toro teyaul Gooti toolluro sumdo tovi sugudo to'no kwimo'nyajuleyaukono. Aki Aguto toolluro yiuwi'nokai loowo tonyu pi'mwono kuumjungovlaiyajuleyaukono.

Room 12:2

Aki toro togaikul kwako akavida'ai a'mwo abolo punyuro mujumovla'mdopure tomgu'aro nuumjungovla'mwalpiyo. Toro kuvi kuruv Gooti tool kemoro poowokalago kuudo tonyu aiyo aiko te yokwollaikubweyodowo'jure tovi ilaiyo neya domollomarogaulo. Gooti tool kemoro poowokalago kuudo tonyu aiyo aiko te me'no sokwollaikubweyo'ji toga gamoro ilaiyo winodowodo tonyuno kuudo nokwo youroma'mwalpinogaikikono. Toro togaikul sugupasudo yo'mo togai'aro Gooti toollu ilaiyo igollo'moneyokwe togai'aro aki pasudo pun kaiya'no puru'monodo kuruv muumgu'mo'nodowodo togai'aro tonyuno nokwo youroma'mwalpinogaikikono.

Room 2:13

Su tov aro tovinokwono. A'mwo abolo pun Gooti toolluro loowo tovi wuu'nopi muu'nyubusuko supi tov Gooti toolluro sumdo tovi ilaiyo mwimo'nupinogano. Toro kuvi kuruv pun Gooti toolluro loowo tovi kuumjunpi tonyuno'gwowi Gooti tool, “Sugudogano,” dowo'ji gamoro sumdo tovi sugudo wimo'nupinogano.

Galesiya 1:4

Nemi Nellunumiyago Gooti tool agasuro nevu kirovanyuvanyu kuumwiyokwe kwako mwalodowado akalluda'ai nobomollurolovonekumokalokwiyo'moneyokwe ilaiyo kwinyajukekono. Toro winodowodo tovi Jisasol kuvinono uumjunyuno sumaiyokwe nemoro ma'no ma'nodo tonyu mobiyodukwopiyo'moneyokwe tov gavnokwe tool morubweno'no abolokaikono.

Galesiya 3:11

Yogalo su tov aro tovino kuu'maiyo toru'no aro abomollolupto'nanekubweyadopiyo. A'mwo pwolnodo kwol kuruv Moosesolluro loowo tovuro puuto tovi'aro kuumjuno'ji tov Gooti toolluro sumdo tovi sugudo mwimo'nonekono. Neya duu'nyulo. Gooti toolluro yogalo puruv aro sakwollungikokwono. “A'mwo pwol Gooti toolluno kuudo uubweyowo'ji Gooti toolluro sumdo tovi sugudo kwimo'no'ji tool aiyo kuvinono mujomwekovla'mwalonekono.” Sakwollungikokwono.

Galesiya 5:6

Kuudo neya jaullulo. A'mwo pwol Krais Jisasollu me'no uuguro'mwonyodowodo tool gami lakulkulako tov ado'no'jo'mdeyo oo mado'no'jo'mdeyo kuruv su toval aguto mimo'nodubulovakono. Toro kuvi kuruv aguto to'gwowi arokwono. A'mwo pwol Krais Jisasolluno kuudo uubweyodowodo su tovi'aro a'mwo abolo punyuno kalo buuropino winmwalono to'gwowi agutokwono.

Galesiya 6:14

Nuvnokwe toonyuno'gwowi ilomodomoropunyu miyamonyugono. Toro kwonyu kuruv yiuno nemi Aguto Jisas Kraisol i'noguropte tovi aboloka su toolluno to'no ilomodomoropiyamonyugono. Krais su toolluro i'noguropte tovi aboloka tov noonyumwonyu kwako akavida'ai pasudo tooro me'no amovoromiyoguroptowosungopo toorobusuko nonyumo'nodupudorogano. Aki nuu kwonyu kuruv i'noguropte tovi me'no amovoromiyoguroptovanubwengiko toonyubusuko kwako akavida'ai pasudo su toorai aval'no wimo'nodumdonyugono.

Efesos 2:2

Toro togaikul kwako akavida'ai a'mwo abolo punbusuko ma'no ma'no pasudo toorai amjeroungovlaiyajupogaikikono. Su toro amjeroungovlaiyajupo toga Satanyollu kuumjunyajupogaikikono. Satanyol kuullo ma'no ma'nodo pworo dolo tovi muunyu toru yomollodupudo toorai mido mollomwalodowodekono. Aki Satanyol kwol kuruv kuullo pwekono. Toro tool yiuwi'nokai a'mwo abolo Gooti toolluro yogalo tovi kisuvolo wiyodupudo su tonyuro poowokalago tonyu womdo wiyodowodekono.

1 Timooti 1:5

Guu a'mwo kuunano ibwasodopure toorai duumjukullo'moneyokwe aro neya jodubwasogawono. Yiuwi'nokai Jisasolluro a'mwo abolo ton a'mwo abolo pubuuraino kalo buuropino neya winogapuro. Kalo buuropino winyo'moneyokwe pasudo su tov puruvapuruv tonyuda'ai lokabodowodokwono. Muudu'nodo tov kemoro poowokalago me'no sal'mo'nyungiko tovida'ai lokabodowodokwono. Aki puruv kemi poowokalago tovida'ai kuudo sugudo me'no kuuluuwo'dowodo tovi kuvinono uumjunodowo'jure tovida'ai lokabodowodokwono. Aki puruv Gooti toolluno kuudo kuvinono uubweyodopure tovida'ai lokabodowodokwono.

1 Timooti 5:4

Toro kuvi kuruv abekanyo pubuul gami kwoloraiyodeyo oo kwikweyagodeyo pun kurukweyo'mdeyokwe su ton yere nuuwiyo'mwojubiyo. Aro tovinokwono. Nomollomwallo'moneyokwe womdo su tov Gooti tool kemi kwoloraiyodeyo oo kwikweyagodeyo tonyu me'no kuubwengikokwono. Sumdomgu kanyo su tobuulluro womdo bwotonyo me'no kwimelabiyajuko tonyuno aki aiko te uubiyo'moneyokwe kwoloraiyo su ton kemi kanyo su tobuullu neya wiyo'mwojumwalpinogano. Kanyo su tobuullu toro amollomwalpi tov Gooti kwolluda'ai ilaiyo igolpinogano.

Taitos 2:12

Gooti toolluro yasuwa'wino sugumaluko abiyanekulo'noka su tovuro yodonekubwasodowodo tov arokwono. Nevu Gooti toollu kisuvolo nuuwimwala'jo. Aki noonyumwonyu kwako akavida'ai kulako tovuro ilaiyo igollunyo'mo pasudo punyuno nonekullunumwalo'jo. Aki nevnokwenolluro pasudo tonyu po'dogalo neya amollomwalnogawano. Toro tonol kwako akavida'ai a'mwo abolo tonyuro akuuto tomuu mwalowa'ji toga Gooti toolluro ilaiyo winodowo'jure tovino to'no amolludo'movlavogawano. Pasudo su tonyu pi'mwono neya kinamjowa'ji sugudo tomgu'aro yomjomwekovla'mwalanonogano.

Jems 3:17

Toro kuvi kuruv a'mwo pwol muunyu kai'muuda'ai Gooti toolluro pi'mwo kuudo tollovai amaro'ji su toolno'gwowi pasudo aro tollovai molludo'movla'mwalonekono. Muudu'nodo tov a'mwo su tool ma'no ma'nodo tovi manyu tomuu'aro mwalmwalonekono. Aki sumwoluko kavo to'no wosunmwalonekono. Aki a'mwo gabovo tobuurai kavo uubemwojumwalonekono. Aki a'mwo pworavuro yogalo dodopure tonyu kaduko yere wimwalonekono. Aki a'mwo abolo punyuno kalo mamwonyomwalonekono. Aki toro tool iko pwol ikulsulo ki'nodowodo toolbusuko kubalno sugupasudo tollovai molludo'movla'mwalonekono. Aki yiuwi'nokai a'mwo abolo avalo punyuno kuu'dello muubweyowo'ji yiuwi'nokai tonyu yiuno aval'no igolmwalonekono. Aki toro tool yiuwi'nokai toga nebal'no pasudo to'no mujumovla'mwalonekono.

Jems 3:9

Nemoro mago su tokwe nemi Nellunumiyago Aguto toolluno ilomodomoropiyodowadonogano. Aki mago avalo su tokwe a'mwo abolo punyu Gooti toolluro gavnokweyolbusuko sokwollosoka su tonyu kaiyako igollo'moneyokwe jul'nyogalo duubweyodowadonogano.

Jems 4:4

Kevu Gooti toollu wuugollu'mo'mdupudo su tov kwonyalabolo puruv gami kwolo toollu wuugollu'mo'mdowodo to'busuko yodupudogaikikono. Kevu aro tovino kuudo nyau'mwakovo. A'mwo pwol kwako akavida'ai pasudo toorai ibwoto'nyo kwimo'no'ji tov a'mwo su tool Gooti toollu ikomago wimo'nyokwekono. Toro tovino tov neya duu'nyulo. Buro'nyo buro'nyo a'mwo abolodeyo pun kwako akavida'ai pasudo toorai ibwoto'nyo'mo kwinpi su ton Gooti toollu ikomago wimo'nupinogano.

2 Pita 1:4

Aki gamoro jurogudo bwotonyo tokwe'aro pasudo sugumaluko tokwe'aro su tovallu'aro gamoro subuu'yamju kuuguudo ton me'no anekullabokaikono. Subuu'yamju kuuguudo su ton ilaiyo noo'nyonmaiyo. Aguto kuunodogano. Kuuguudo su tonyu'aro kemoro kwako akavida'ai kulako tobuuravuro kaiyako i'nyo'moneyokwe pasudo tooraida'ai me'no abirolo'nugolokwopogaikikono. Aki gamoro kuuguudo su tovi'aro Gooti gavnokwe toolluro pasudo idopto'nodo to'busuko kubalno kev kugaikul kuruv pasudo idopto'nodo aval'nodo tovi nokwo mujumovla'mwalpinogaikikono.

2 Pita 2:20

Toro te a'mwo abolo pun Aguto Jisas Kraisolluno kuudo me'no youroma'dupudogano. Su tool nemi ma'no ma'nodo tovuro kirumwallo tovida'ai bomollurolovonekumokalokwodowodekono. Toro toolluno kuudo youroma'dupudo tovi'aro kwako akavuro kaiyako mollugolameyo'mo pasudo tooraida'ai me'no birolo'nugolokwodupudogano. Toro kuvi kuruv lukomgu kaiya'no pasudo toorai wuulo to'busuko awapi tov kaiya'no pasudo su tooro a'mwo abolo tonyu aki aiko te nomollubworomokavlapiyo. A'mwo abolo su ton kaiya'no pasudo toorai aiko te awapi tov kirumwallo bwotonyo nomapinogano. Kirumwallo su tov kemoro sumdomguda'ai kirumwallo amaropujuko tovi nuuwolowonokwono.

2 Pita 3:14

Mi ibwoto'nyobuuravoo, kevu su toro ikullumo'nono tovino sogwollo to'no kinomwalodupudogaikikono. Toro tovino tov kevu Gooti toolluro sumdo tovi dosudosumaiyokweyo'mdeyo oo kaiya'nodomaiyokweyo'mdeyo wimo'nupino'mo womdo bwotonyo neya domjumovlavogaulo. Aki kevu yiuwi'nokai a'mwo abolo tobuurogai sumwoluko noullo wosungovlaiyo'moneyokwe kuruv womdo bwotonyo neya domjumovlavogaulo.

1 Joon 5:18

Nevu aro tovino kuudo me'no youroma'dowadonogano. Yiuwi'nokai a'mwo abolo aiyo imo'no'mno Gooti toolluro kwoloraiyo me'no wimo'nodupudo ton ma'no ma'no pasudo toorai kuuno miyomjomwekovla'mdupudogano. Toro kuvi kuruv yiuwi'nokai a'mwo abolo su ton Gooti toolluro kwoloraiyo me'no wimo'nodupudo tonyu Gooti tool yellukuromollomwalodowodekono. Aki Gooti toolluro a'mwo abolo yellukuromollomwalodowo'jure su tonyu kirovanyuvanyokwe Satanyol kaiyako mollugolameyo'mo ato puru'monodo kuruv ku'nono muubogai'nonekono.