Jems 1:21 - Gooti Toolluro Yogalokwono

²¹ Toro te kevu yiuwi'nokai kaiyako igolamo'nyo'moneyokwe pasudo toorogai'aro ma'no ma'no kiroungovlaiyo'moneyokwe pasudo toorogai'aro toorai neya domodukwopiyogaulo. Toro kugaikul kuruv kemoro poowokalago tonyu Gooti toolluro yogalo puluko to'busuko amomguropingiko su tovino'gwowi ilaiyo neya domollomarogaulo. Aki yogalo su tovi kevu kwako tomuu'aro neya duuwiyogaulo. Yogalo su tov kemi kuullo tobuurai ma'no ma'nodo tovuro kirumwallo tovida'ai nokwo bomollurolovekumokalokwonokwono.

Jems 1:21 Kruisverwysings

Matyuu 5:5

Aki a'mwo abolo kevnokwe ton bwolomoropinodapudo su ton ilaiyo nokwo ipinogano. Su ton nemi Nellunumiyago toolluro yiuwi'nokai kwako tov nomapinogano.

Joon 6:63

Neya duu'nyulo. Yiuno Gooti toolluro Kuullo judo toolno a'mwo abolo tonyu aiyo yiunokuudo mujomwekovlaiyo'moneyokwe tov wiyodowodekono. Toro te a'mwo abolo ton kevnokwenyuro jurogudo tokwe somjomwekovlapi tov ku'nono mwiyo'mwoju'nupinogano. Toro kuvi kuruv yiuno moro yogalo aikudadokwo su tovi'aro to'gwowi Gooti toolluro Kuullo tooke'aro aiyo yiunokuudo mujomwekovlaiyo'moneyokwe tokwe'aro toval nomapinogano.

Joon 6:68

Toro kuudoganoka tovi Saimoon Pital aro kuudokaikono. “Agutoloo, nevu agugollu'mowa'ji tov ala'mwollomno plawanonoldeyo? Guu tookuno'gwowi aiyo yiunokuudo mujomwekovlaiyo'moneyokwe yogalo tov mwora'dumdekugono.

Kuurotokwe 10:33

Toro anyudumwa'juko tovino nuu a'mwo pworai yere yo'mgonomarono gumiyomno kwolomogwopiyamwa'jonyugono. Toro kwolomogwopiyamwa'jo toorai guu kisuvolo mwimadekugono. Toro kweku kuruv nemiyomno yere sulamado tov ilaiyo bwotonyokwono. Toro te aga nevu yiuwi'nokai tonol Gooti toolluro sumdo tovi akawai i'bwo'nomwalodowa gumino sogwollo ainmwakuuwono. Toro te guu Aguto toolluro kuuguudo me'no agubweyungiko tokwe yodonekubwasubinekugono. Toro tovino wuu'nyo'moneyokwe su'bwo'numwakuuwono.” Kooniliyosol Pitallu toro kuudokaikono.

Kuurotokwe 13:26

Poolol toro wuujuno sumaiyokwe aki aro kuudokaikono. “Nevugeravoo, nemi kirumwallo tovida'ai bomollurolovonekumokalokwiyo'moneyokwe amonekwopiyaboka Jisasolluno kuuguudo tov Gooti tool nemi me'no anekullabokakwono. Kuuguudo sugudo su tov nevu Eburaiyamolluda'ai bodowado tonogai'aro a'mwo abolo Juu toonolluro miyawosunodupudo pugaikul Gooti toollu dolago tomuu mwalodupudo kugaikike'aro tonollu anekullabokakwono.

Room 1:16

Krais Jisasolluno kuuguudo sugudo su tov jurogudokwono. Toro tovi'aro Gooti tool nemi ma'no ma'nodo tovuro kirumwallo tovida'ai bomollurolovonekumokalokwodowodekono. Toro te a'mwoldeyo oo abolo'mdeyo kuuguudo sugudo su tovino kuudo kuubwepi tonyu Gooti tool kuvinono wiyo'mwojodowodekono. Nevu Juu kuudo uubweyodowa'jure tonolluda'ai sumdomgu nekullo'mwojodowo lukomgu a'mwo abolo Juu tonolluro miyawosunodowado kunyu kuruv wiyo'mwojodowodekono. Toro te nuu kuuguudo sugudo su tovino wogulo mibwosunodumdonyugono. Aki toro tokwe moruujo'moneyokwe luko miyokwenyugono.

Room 11:17

Toro te iko pwolluno yovo tov oolipolekono. Oolip iko su toolluro kavlo tovida'ai wonyo ma'dowodo tov gamoro yiuwi'nokai pilato kun kuruv ma'dupudokwono. Toro kuvi kuruv puga Gooti tool oolip iko su toolluro pilato pun modovodukwopino sumaiyokwe ipilato yasuwa'nodo pun dovomokabo'no oolip ikavlo su toollu abomomunyutowosokaikono. Toro abomomunyutowosoka toga oolip ikavlo su toolluro wonyo ma'dowodo tov ipilo yasuwa'nodo kunyu kuruv kwiyo'mwojajukokwono. Toro wiyo'mwojoduke tovida'ai jurogudo sumo'nyajupogano. Yovekurajo su tovuro kavlo tov arokwono. Gooti tool Juu a'mwo abolo punyu molleru'mdeyomwalluno sumaiyokwe amodukwopiyokaikono. Toro modukwopiyo'no kevu Juu tooravuro miyaikuuwosunodupudo togaikul ipilato yasuwa'nodo togaikullubusuko ikumokabo'no ikavlo kuunodo toollu abomomunyutovaikubweyokaikono. Toro tovino tov kevu Juu tooravuro miyaikuuwosunodupudo kugaikul kuruv Juu tooravuro ikavlo kuunodo toolluro jurogudo tov ikubwemovla'mdowodekono.

Room 6:17

Toro te aga nevu Gooti toollu, “Nenoloo,” neya wuudogawano. Su tov aro tovinokwono. Muudu'nodo toga kevu ma'no ma'nodo tovuro ki'nato womdokwe kwimo'nyajupo kugaikul kuruv Gooti toolluro nebaikuuguudo tovi wuu'no'mno kemi poowokalago kuunodo tokwe kuudo me'no kuubweyopogaikikono. Toro kuubweyopo toga'no'gwowi me'no birolo'nugolokwo'mno nebaikuuguudo su tovi uumjunodupudogaikikono. Toro togaikul sugupasudo yo'moneyokwe tovuro ki'nato womdokwe me'no wimo'nodupudogaikikono.

1 Koorin 15:2

Aki kuuguudo sugudo amodekumollajo su tovi'aro Gooti tool kemi ma'no ma'nodo tovuro kirumwallo tovida'ai mollurolovekuma'dowodekono. Kuuguudo sugudo su tovino kevu kuudo uubweyodupudo tov yasuwa'nodo'maiyo. Toro kuvi kuruv sulo kuvinono ne'nonokwono. Toro tovi guureji avorugwo'mo'napi togaikullu Gooti tool kuvinono nomollurolovekumaronekono.

2 Koorin 7:1

Miyobuuravoo, Gooti toolluro subuu'yamju su ton me'no adanekubweyokaikono. Toro tovino tov nevu nemi kulako tokwe'aro kuudo tokwe'aro tovallu yiuwi'nokai kaiyako mollugolanekumo'mdupudo pasudo toorai neya amollol'movodukwopinogawano. Aki toro tonol kaiya'no nyumwala'jokwe tovino Gooti toollu kwako tomuu'aro neya amwalogawano. Toro tonollu Gooti gavnokwe toolluro sugupasudo tollovo yiunokuudo neya aullo'movanekwopiyogapuro.

Efesos 1:13

Aki kevu a'mwo abolo Juu toonolluro miyaikuuwosunodowado kugaikul kuruv nebaikuuguudo tovi me'no wuu'nodupudogaikikono. Toro togaikulluno tov Gooti toolluro a'mwo abolo kuunodo me'no wimo'nodupudogaikikono. Nebaikuuguudo su tov Gooti tool kemi ma'no ma'nodo tovuro kirumwallo tovida'ai bomollurolovekumokalokwiyo'moneyokwe kuuguudo sugudo tokwono. Aki aiyoga Gooti tool gamoro Kuullo toollu ikullabiyo'moneyokwe subuu'yamju me'no sajukekono. Toro te kevu Krais toolluno kuudo kuubweyopo toga Gooti tool gamoro subuu'yamju tovi kuvinono uumjuno'no Kuullo tool aikullabokaikono. Toro aikullaboka su tov gamoro a'mwo abolo kuunodo wimo'nyo'moneyokwe ajaikubweyokagaikikono.

Efesos 4:22

Sumdomgu kevu kuudo uumdo su toorai kuumjungovlaiyajupo toga kemi kaiyako bwotonyo sugolaikumeyajuporogano. Aki kemi kaiyako igolaikumeyo'moneyokwe youkuu'naikudodopure toorai uumjungovlaiyo'mo tov ilaiyo aikullunyajukogaikikono. Toro kuvi kuruv aga'no'gwowi kevu kuudo uumdo su toorai yiunokuudo neya duugollu'movogaulo.

Efesos 4:25

Aki puruv kemoro kuunano yogalo pasudo toorai uugollu'movopi aki aiko te nyoukuu'nadumwalpiyo. Nevu yiuwi'nokai tonol Jisasolluro kulako puru'monodo tovida'ai suvlato tonbusuko imo'nodowadonogano. Toro te kemi kulako kuunodo ikullumo'nodupudo Jisasolluro a'mwo abolo togai yiuno nebal'no yogalo to'no neya jajunogaulo.

Efesos 5:4

Aki kwoda'mollunyogalo toorogai'aro junoru'yogalo toorogai'aro ipa'nyogalo kaiya'nodo toorogai'aro su to kworo kuruv kevu nodumwalpiyo. Kaiya'no yogalo su tooro kevu Jisasolluro a'mwo abolo togaikulluro mollajo'moneyokweyoromaiyo. Toro kuvi kuruv kemiyo'mo to'gwowi Gooti toollu, “Nenoloo,” to'no wuudumwalpinogaikikono.

1 Tesaloonaika 1:5

Gooti tool kemi me'no ajaikubweyokaldeyo kuudo yaikuu'dowado su tov aro tovinokwono. Nevu kuuguudo sugudo tokwe kemiyomno ikumokabowono amodekumollajuuwo su tov yiuno mago tovida'ai to'no abaiki'meyajuko'maiyo. Toro kuvi kuruv kuuguudo sugudo su tov jurogudo tokwe'aro Gooti toolluro Kuullo tooke'aro abaiki'meyajukokwono. Aki kuuguudo sugudo su tovino kuudo noullo maullo nonaguto toonol yiuwi'nokai kuullutago tokwe aikumokabowonogano. Aki nevu kevuge amwallajuuwo toga kemi ikullo'mwojo'moneyokwe womdo amjumovlaiyajuwonogano. Su toro toonolluno kevu kuudo nyau'mwakovo.

1 Tesaloonaika 2:13

Toro te nevu yiuwi'nokai toga aro tovino, “Nenoloo,” subusu'nyogalo wuudodowadonogano. Nemoro Gooti toolluro yogalo yodekubwasodowore tovi kevu wuu'no'mno ilaiyo amollomaropogaikikono. Su toro amollomaropo toga kuuguudo tovino, Oo a'mwo pworavuro'mdeyo, kuudo miyaullajupogaikikono. Toro kugaikul kuruv aro kuudo sauropogaikikono. Oo kuuguudo su tov Gooti toolluro mago tovida'ai dobadopiyo. Su toro kuudo yau'no sumaveyokwe kuudo kuubweyopogaikikono. Toro te Gooti toolluro kuuguudo su tov kevu kuudo me'no kuubweyopo togaikulluro poowokalago tonyu womdo bekullumoulodawodokwono.

Taitos 2:11

Kuudo neya jaullulo. Gooti tool yiuwi'nokai a'mwo abolo tonyu ma'no ma'nodo tovuro kirumwallo tovida'ai bomollurolovomokalokwiyo'moneyokwe Krais Jisasollu kwolomoropiyabokaikono. Toro wolomoropiyaboduke toga Gooti toolluro yasuwa'wino sugumaluko tov kuu'maiyo toru'no me'no abiyanekulo'nokakwono.

Hibruu 12:1

A'mwo abolo bwotonyago Gooti toollu kuudo kuubweyajupo su ton sulu'wo to'busuko nemi aiyowomno mwodovonekuma'dupudogano. Kemoro kuudo kuubweyajupo su tov nemi kuu'maiyo toru'no me'no nekuduuwallodupudo tovino tov nevu resis tovibusuko guureji neya yogawano. Nevu resis tovi yo'mo tonol noonyumwonyu pworo nemi nekumjukuto yodupudo toorogai'aro aki ma'no ma'no pasudo nemi nekumgu'mo'nodupudo toorogai'aro su toorai neya arobwotovodukwopiyogawano. Me'no robwotovodukwopiyowa'ji nevu resis tovi kano kano plaiyo'moneyokwe puuto tov nemi sumdollu toru wo'dowodo su tovi neya ainomjumovlavogawano. Puuto su tov Gooti toolluro anekuduuwalloka su tovi'aro guureji neya uumjungovlavogawano.

Hibruu 2:3

A'mwo abolo loowo tovi kisuvolo kwiyajupo ton kirumwallo tovi su toro amallajupogano. Loowo su tov jurogudo adaiyajuko kuvi kuruv Gooti tool nemi ma'no ma'nodo tovuro kirumwallo tovida'ai nobomollurolovonekumokalokwono tovino yogalo to'gwowi aguto kuunodokwono. Toro tovino tov yogalo su tovi nevu muu'nyubusuko to'no nyumwala'jo. Nevu yogalo su tovi muu'nyubusuko to'no sa'ji tov kirumwallo tovi mirukuruwolowanonogano. Kuuguudo su tovino muudu'no amoruudoka tool yiuno Aguto toolnodokwono. Aki lukomgu kuuguudo su tovi a'mwo pworo me'no kuu'nyajuporogano. Toro kuu'nyajupo su tooro aro anekujajuporogano. “Oo Aguto toolluro kuuguudo adoka tov yiuno nebal'nodokwono.” Anekujajuporogano.

Hibruu 4:2

Neya duu'nyulo. Gooti toolluro kuuguudo sugudo tov aiyoga Isuraiyolda'ai a'mwo abolo tonyu kuu'maiyo toru amoruujajupokwono. Kuuguudo sugudo su tov Gooti toolluro iruko mujomwekovlaiyo'moneyokwe tov kurukwono. Aki kuuguudo sugudo avalo su tov nemi me'no amodonekumollopokwono. Toro kuvi kuruv aiyoga Isuraiyolda'ai a'mwo abolo ton kuuguudo sugudo su tovino Joosuuwaike Kelepeke tooral kuudo kuubweyajulo tooralbusuko kuudo muubweyajupogano. Toro tovino tov kuuguudo sugudo su tov a'mwo abolo tonyu ku'nono mwiyo'mwojajukokwono.

Jems 4:8

Kevu Gooti toollu wobo toru kuuru'mapi tov Gooti kwol kuruv kemi wobo toru nobekuru'ma'mwalonekono. Kevu ma'no ma'no amjumovlapi to'gwowi kemi ma'no ma'no pasudo su toorai kevnokwe togaikul neya domollol'movodukwopinogaulo. Aki kevu pugaikul Gooti toollu uumjunyo'mo tovino kuudo noullo maullo saupi kugaikul kuruv kemi poowokalago tovida'ai ma'no ma'no kuudo kuulaikwo'dupudo su tooro neya domodukwopiyogaulo.

Jems 5:20

Toro amollubworomokabwo'ji tov ilaiyokwono. Kevu kuudo neya jaurogaulo. A'mwo abwolodukwopiyawo'ji tool ma'no ma'no pasudo tovi kirounomollodowo'jure tekwoji gami gagwai'yagolbusuko pwol Gooti toolluro nebal'no yogalo tovi aikomgu mollubworomokabwonekono. Toro amollubworomokabwo'ji su tekwojuro kuullo toollu yiunokuudo bolnodo tomuuda'ai nobomollurolovomokalokwonekono. Aki Gooti tool a'mwo su tekwojuro ma'no ma'no pasudo bwotonyago tooravuro kirumwallo tovi nomodukwopiyonekono.

1 Pita 1:22

Kevu Gooti toolluro nebal'no yogalo tovi kuumjunopo tovino tov kemi ma'no ma'no pasudo tooraida'ai me'no yal'mo'no'mno sugudo kwimo'nopogaikikono. Toro te kevu Jisasolluro a'mwo abolo tobuurekul kevuge avalo tellugwai'yago tello'mwo kuunodo tonbusuko ikullumo'nodupudo pubuuraino kalo buuropino mollodupudogaikikono. Toro te kemida'ai avalo su tobuuraino kemi poowokalago kuunodo tokwe kalo buuropino pasudo su tokwe imgu amgu guureji muunyu toru'aro neya domollogaulo.

1 Pita 1:9

Kevu Krais toolluno kuudo kuubwemwakopo su tovino tov Gooti tool ma'no ma'nodo tovuro kirumwallo tovida'ai yiunokuudo bomollurolovekumokalokwonekono.

1 Pita 2:1

Kevu aiyo me'no sumo'nopo tovino tov kevnokweyogaikulluro yiuwi'nokai ma'no ma'no pasudo toorai neya domodukwopiyogaulo. Kemoro magu'nyo toorogai'aro kuunano yogalo toorogai'aro kuunano pasudo toorogai'aro kwekuullu kuudo toorogai'aro yiuwi'nokai bwolomorumwogapiyo'mo yogalo toorogai'aro pasudo su toro toorai neya domodukwopiyogaulo.

1 Pita 2:11

Mi ibwoto'nyobuuravoo, kevu kwako akavida'aiyogaikulmaiyo. Toro te kevu kwako akavi mwalopi toga yiuno kwako pumuuda'ai a'mwo bomwallo togaikulbusuko to'no imo'nugovla'mdupudogaikikono. Toro tovino tov nuu duudapi yogalo guureji aro ikudumo'mokwono. Kevu kemi kwako akavida'ai kulako tonyuro buro'nyo buro'nyo ilaiyo igollunyo'mo ikullunodowodo su toorai nuumjunmwalpiyo. Pasudo su tooro kemoro poowokalago tobuurai molo bwotonyo wiyodupudorogano.