Efesos 4:1 - Gooti Toolluro Yogalokwono

¹ Kevu mino kuudo nyanuu'mwakovo. Nuu Aguto toolluro womdo tovi wiyodumdo toonyuno tov wuulo killo'mo ago tovi aulomeranubweyoponyugono. Toro tovi kuule'na'dumdo kwonyu kuruv Aguto toolluro womdo tovino'gwowi kuuno wimovla'mdumdonyugono. Toro te kemoro nyomjomwekovla'mwalpino'moneyokwe tovino mi neya donuu'nyulo. Yiuwi'nokai kuuguudo me'no aikudumo tovino tov kemi guureji aro ikudumo'monyugono. Gooti tool gamoro a'mwo abolo kuunodo wimo'nyo'moneyokwe kemi me'no dekuma'dowodekono. Toro dekuma'dowodo toollu kevu ilaiyo to'no igollo'moneyokwe jomjomwekovlavogaulo.

Efesos 4:1 Kruisverwysings

Muuduko 17:1

To'no'gwowi Eburamol 99 kworomokwe tool mwaloduke toga Gooti Yawel bwiyalo'no'no aro aboduuwiyokaikono. “Nuu Gooti Jurogudo Kuunodo toonyugono. Guu moro sumdo tovi yiuno sugudo to'no mujumovlavo'bi mino to'no donumjunogawono.” Aboduuwiyokaikono.

Muuduko 5:24

Inookol kworomo su tobuullu Gooti tooke ibwoto'nyo kuunodo sumo'nyajukekono. Toro toollu Gooti tool gavuge mwallo'moneyokwe muunyu kai'muuno amokailokaikono. Toro amokailoka toollu a'mwo tooro aki aiko te mwonyajupekono. Gooti tool yiunokuudo amokailokaikono.

Kuurotokwe 9:31

Toro te yiuwi'nokai kwako Juudiyake'aro Galilike'aro Samariyake'aro tomuuda'ai Jisasolluro mollu'bwoto ton sumdomgu jul'nyo tonyu amjomwekelabiyajupogano. Toro kun kuruv su toro toga'no'gwowi jul'nyo wuulo pun mamaropogano. Yiuno paiko to'no ibwosunodupu ilaiyo amwallajupogano. Toro ton Aguto toollu dolago tomuu uumjunodopure tonyu Gooti toolluro Kuullo tool wiyo'mwojoduke tovida'ai jurogudo sumo'nyajupogano. Toro imo'nodupu aki a'mwo abolo muuduko pugai'aro abuuguro'mwonyajupogano. Toro buuguro'mwonyodopure toga kwolallo bwotonyo sumo'nyajupogano.

Room 11:29

Su tov aro tovinokwono. Gooti tool gamoro yasuwa'wino pullovo wiyo'moneyokwe a'mwo abolo punyu me'no adomaro'ji tonyuno kuudo muuduko miyaullokwekono. Aki toro tool gamoro me'no wiyodowodo tonyu mo'mweyado miyomaronekono. Toro tovino tov Gooti tool Isuraiyolda'ai gamiyo'mo me'no ajesungiko su tonyu kuvinono nomaronekono. Su toro tovinokwono.

Room 12:1

Miyobuuravoo, Gooti tool nemino kalo mamwonyodowodo tovino tov nuu kemi aro ikujo'mo anyunadopiyo. A'mwo abolo pun sipsiporodeyo tooravuro kulako togai Gooti toollu kwiroudapiyajupo to'busuko kubalno kevnokwe togaikul kemi kulako ton Gooti toollu duuwiyogaulo. Sipsiporodeyo kwiyajupo su toorai sumdomgu me'no romiyodupu abolpi toga kemoro kulako ton Gooti toollu kwiroudapiyajupogano. Toro kuvi kuruv kevno'gwowi yere mabolopi aiyo kuuno mwalodopure toga kemoro kulako ton Gooti toollu yere neya duuwiyogaulo. Kemi poowokalago kuunodo togai Gooti toollu ilomoropiyo'moneyokwe su toro tomgu'aro kwipi tov Gooti toollu ilaiyo igolpinogaikikono.

1 Koorin 4:16

Toro tovino tov nuu kemi tellunumiyago ikullumo'nodumdo toonyu guureji aro ikudumo'monyugono. Kevu nuvubusuko neya bilodukovimo'nogaulo.

2 Koorin 10:1

Aga kemida'ai a'mwo pworekul mino aro bwolomodonumwogapiyodapudorekikono. “Oo Poolol nemoro sumdomago tovi anekwono'ji toga nemi kwako tomuu'aro nekullodowodekono. Toro kwol kuruv manyu tomuu amwalo'ji toga'no'gwowi nemi yogalo modanekurugollo'moneyokwe yogalo jurogudo tooro monekwopiyabodowodekono.” Su toro bwolomodonumwogapiyodapudorekikono. Toro kuvi kuruv nuvnokwe Poolonyu Krais toolluro pasudo kavo molludo'movla'mdowodo tokwe'aro kavo bemwojodowodo tokwe'aro pasudo su tovalluno'gwowi uumjunodum kemi guureji adaikujugonumwakono. Toro adaikujugonumwako tov arokwono.

2 Koorin 5:20

Toro tovino tov nevu Krais toolluro mago to'busuko molloda'mdowadonogano. Toro toonol gamoro yogalo ma'dowado tokwe aro moruudodowadonogano. “Oo nevu Krais toolluro yovo tovida'ai guureji ikudoganano'monogano. Gooti tool kemi gavuge momgurovaikubweyo'moneyokwe Krais toolluno kuuguudo tovi kevu kuudo neya duubweyogaulo.” Moruudodowadonogano.

2 Koorin 6:1

Gooti tool a'mwo abolo tonyu wiyo'mwojo'moneyokwe womdo yodowodekono. Toro te nevu kweke womdo yodowado toonol kemi guureji aro ikudano'mokwono. “Kevu Gooti toolluro yasuwa'wino sugumaluko me'no ma'dupudo tovi nyuu'dapimwalpiyo.” Ikudano'mokwono.

Galesiya 4:12

Mi avalobuuravoo, nuu guureji aro ikudumo'mokwono. Kevu Juu toonolluro miyaikuuwosunodowado togaikul nuvubusuko neya jumo'nogaulo. Su tov aro tovinokwono. Nuu kev kugaikulbusuko loowo tonyuda'ai me'no abirolo'nugolokwonyugono. Toro toonyubusuko kubalno kev kugaikul kuruv aval'no neya jumo'nogaulo. Nuu sumdomgu kemi kuuguudo sugudo tokwe amodekumollajo toga kevu kaiyako puru'monodo kuruv miyanyugollajupogaikikono. Toro kugaikul kuruv yiuno ilaiyo to'no sanyugollajupogaikikono.

Efesos 2:10

Toro te neya duu'nyulo. Nevu yiuwi'nokai toga sugupasudo tonyu mujumovlaiyo'moneyokwe Gooti tool aiyogada'ai me'no sovrovanekubweyajukekono. Sugupasudo su tonyu kuvinono uumjungovlaiyo'moneyokwe Gooti tool nevu Krais Jisasollu uuguro'mwonyodowado tonollu aiyo aiko te me'no yokwollanekubweyodowodonogano.

Efesos 3:1

Nuu Poolonyu Krais Jisasolluro womdo tovi momjumovla'mdum kevu a'mwo abolo Juu toonolluro miyaikuuwosunodowado togaikullu modekumollodumdonyugono. Krais Jisasolluro womdo yodumdo tovino tov aga nuu wuulo killo'mo ago tovi aule'na'mwakono.

Efesos 4:17

Nuu nemi Aguto toolluro yovo tovida'ai kemi guureji aro dodoluvaikubwemo'monyugono. Kevu a'mwo abolo kwa'mguda'ai tonbusuko nomjumovla'mwalpiyo. A'mwo abolo su ton Aguto toolluno kuudo maiyokwe imo'nugelabodupudogano. Toro tonyuro kuudo kworo kuruv yiuno noo'nookwo to'no yopiyodupudorogano. Su toro yopiyodupudo tovida'ai kevnokwe ton ku'nono mwiyo'mwoju'nupinogano.

Efesos 4:4

Nevu yiuwi'nokai tonol kulako judo'no judo'nodokwe kunollu kuruv Krais toolluro kulako puru'monodo to'busuko me'no imo'nodowadonogano. Toro tonol Gooti toolluro Kuullo pwolnodo toollu aval'no amarowonogano. Aki toro tonol lukomgu Gooti tooke nyulomwalano tovino sogwollo aval'no kingovla'mdowadonogano. Toro kingovlaiyo'moneyokwe Gooti tool yiuwi'nokai tonollu me'no donekuma'dowodekono.

Efesos 5:2

Aki Krais tool nevu yiuwi'nokai tonolluno kalo buuropino winodowodekono. Toro toolluno tov nemi nonekullo'mwojo'moneyokwe Gooti toollu sipsip pwolbusuko wiroudapino'no Gooti toollu wobeya sudo kuunyokwe to'busuko kwimo'nokaikono. Krais tool nemino kalo buuropino wino'no toro sokaikono. Su toro to'busuko kubalno kev kugaikul kuruv yiuwi'nokai a'mwo abolo tonyuno kalo buuropino neya domollogaulo.

Filipai 1:27

Kevu aro neya jogaulo. Krais toolluro kuuguudo sugudo tovino wuuduuwallo'moneyokwe kemoro pasudo tov pi'mwono to'no neya domjumovlavogaulo. Kemoro pasudo toro amjumovlapi tov nuu nobaikwonmonyudukono oo mabaikwonmonyudukoneyokwe tovino kuudo miyau'mwakono. Toro kuvi kuruv kemino kuuguudo pun kuu'numi toga aro kuudo nokwo yaikuu'mwalmonyugono. Oo a'mwo abolo judo'no judo'nodo su ton jurogudo da'mdupudodeyo. Aki yiuwi'nokai su ton kuudo puru'mono to'no yau'dupudodeyo. Toro ton kuuguudo sugudo tokwe moruujo'moneyokwe avaiwomdo yodupu imgu amgu sobanyo molluulnoda'mdupudodeyo. Toro yodopure tovida'ai a'mwo abolo pun kuuguudo sugudo su tovino kuudo nokwo uubwepinogano. Toro tovino'mo womdo su tovi guureji yodupudodeyo.

Filipai 3:14

A'mwo pwol resis tovi kano kano plavowo'ji aiyowo'mo tomuu ai'mowo'ji toga gami kuuwolovowo'ji tovino mubiyo tov ma'dowodekono. Su toro to'busuko kubalno nuu muunyu kai'muuda'ai mubiyo tovi yere mallo'moneyokwe womdo guureji yomjumovla'mwalmonyugono. Muunyu kai'muuda'ai mubiyo su tov arokwono. Nevu gavuge ilomwallo'moneyokwe tov Gooti tool Krais Jisasollu'aro nemi donekuma'dowodekono. Mubiyo su tovi yere mallo'moneyokwe nuu guurejuno movomjai'numwalmonyugono.

Kooloosi 1:10

Toro ikullabodowo'jure togai kevu aro tomgu'aro nokwo yomjomwekovla'mwalpinogaikikono. Yiuwi'nokai toga kevu Aguto toolluro sumdo tovi po'dogalo mujumovlavopi ilaiyo to'no igolmwalpinogaikikono. Aki kemoro yiuwi'nokai sugupasudo judo'no judo'no amjumovlapi su ton sulo ilaiyo tollovobusuko nokwo ki'numwalpinogano. Aki Gooti toolluno kuudo pugai'aro youromo'movlavopi aguto nokwo yogullumelamwalpinogaikikono.

Kooloosi 2:6

Toro te kevu muudu'nodo toga Aguto Krais Jisasollu me'no amaropo tomgu'aro aval'no neya duumjungovlavogaulo.

Kooloosi 4:12

Aki kemida'ai a'mwo pwolluno yovo tov Epafrosolekono. A'mwo su tool nuuge akawai mwalodowo Krais Jisasolluro ki'nato womdo wiyodowodekono. Toro tool kemi, “Ilaiyokwono,” adekwopiyamaiyo. Aki a'mwo su tool kemiyo'mo Gooti toollu subusu'nyogalo guurejuno aro wuudodowodekono. “Kooloosida'ai Jisasolluro a'mwo abolo ton a'mwono tonbusuko jurogudo neya imo'nopi kevnokwe ton kuudo neya yaurogapuro. Oo nevu yiuwi'nokai Gooti toolluro ilaiyo winodowo'jure tonyu yiuno ilaiyo to'no duumjunmwakuuwono. Kuudo yaurogapuro.” Gooti tool kemi jurogudo adaikullumwojoneyokwe tovino'mo a'mwo su tool subusu'nyogalo wuudodowodekono.

1 Tesaloonaika 2:12

Kemi jurogudo dekumworaso'moneyokwe kuuguudo togai'aro nodaikumul'mwojo'moneyokwe kuuguudo togai'aro kemoro poowokalago tonyu jurogudo daikullumwojo'moneyokwe kuuguudo togai'aro su togai kemi yodekubwasodowa sodogullumwojekwapiyajuwonogano. Su tov kevu Gooti toolluro ilaiyo winodowo'jure tomgu'aro neya yomjomwekovla'mwalpino'moneyokwe tovinokwono. Kuudo neya jaullulo. Aguto kig Gooti tool gamoro mido mollomwalodowodo tovi kuulomwallo'moneyokwe kemi me'no dekuma'dowodekono. Aki gamoro bako bwotonyo tovi anakuuto tomuu kuulomwallo'moneyokwe kuruv me'no dekuma'dowodekono.

2 Tesaloonaika 1:11

Toro te Gooti tool kemi aikullo'mwojoneyokwe nevu subusu'nyogalo aro wuudoganodowadonogano. “Oo nemi Gootoloo, guu a'mwo abolo Tesaloonaikada'ai ton guvnokwekujuro tomgu'aro neya yomjomwekovlapino'moneyokwe me'no adomarodogano. Toro ton kuvinono bilodukovimo'nyo'moneyokwe guu jurogudo neya doduuwimwojogawono. Aki a'mwo abolo su ton sugupasudo yo'mo winodopure tonyu kuvinono uumjunpino'moneyokwe neya duuwiyo'mwojogawono. Aki a'mwo abolo su tobuuravuro kuudo gubweyodupudo tovida'ai yiuwi'nokai womdo tonyu kuvinono yo'moneyokwe guu jurogudo duubweyogawono.” Nevu Gooti toollu kemino subusu'nyogalo su toro wuudoganodowadonogano.

2 Timooti 1:9

Kuudo neya jaurono. Gooti tool nemi ma'no ma'nodo tovuro kirumwallo tovida'ai me'no abomollurolovonekumokalokwokanogano. Aki nevu gamoro pasudo idopto'nodo tonyu uumjungovla'mwalano'moneyokwe adonekumarokanogano. Gooti toolluro su toro adonekumaroka tov nevnokwenolluro womdo yodowore tovida'aiyo'maiyo. Toro kuvi kuruv Gooti gavnokwe toolluro ilaiyo winodowodo tokwe'aro gamoro yasuwa'wino sugumaluko tokwe'aro toval nekullabodowodo tovida'aiyokwono. Gooti toolluro yasuwa'wino sugumaluko su tov aiyoga yiuwi'nokai ton yere mimo'nyodopure togada'ai Krais Jisasollu'aro nonekullabiyo'moneyokwe me'no sovrovanekubweyajukokwono.

Taitos 2:10

Aki toro ton kuuko mipinono. Toro kun kuruv kemi jukwo tooravuro yogalo wuudodopure tonyu kaduko to'no ilaiyo neya wimwalpinogano. Ki'nato womdokwe su ton kaduko ilaiyo kwipi toga nemi mollurolovonekumokalokwiyokwe Gooti toolluno nebaikuuguudo tokwe ilaiyo mollovaisu'nupinogano. Su toro yovaisu'nodopure tovi kemi mido mollomwalokwe tooro wonopi aro nokwo ilomodomoropiyapinorogano. “Oo Gooti toolluno kuuguudo ibwasodupudo tov ilaiyo'mdeyo.” Nokwo ilomodomoropiyapinorogano.

Hibruu 13:21

Toro te kevu Gooti toolluro ilaiyo winodowo'jure tovi uumjunmwalpino'moneyokwe yiuwi'nokai supto supi ton Gooti su tool kemi nomollovrovaikubwemwalonekono. Aki Gooti tool Jisas Kraisollu'aro nemoro poowokalago tovi anakuuto tomuu womdo jurogudo noulanekullonekono. Womdo jurogudo nekullodowo'jure su tov nevu Gooti toolluro pasudo ilaiyo winodowodo tonyu yomjomwekovlaiyo'moneyokwe nomollerovonekudapiyonekono. Toro te nevu Gooti su toolluno yovo tovi yiunokuudo ilomoropino ilomoropino neya imwolowanonogano. Nebal'nodokwono.

Hibruu 3:1

Krais toolluro mi a'mwo abolo avalobuuravoo, muunyu kai'muuda'ai mwalodowodo Gooti tool mi adonumaroka to'busuko kubalno kevu gavnokweyolluro a'mwo abolo kugaikullu kuruv aval'no me'no dekuma'dowodekono. Kevu Jisasolluno kuudo neya jaurogaulo. Su tool Gooti toolluro yogalo tokwe kuurotokwe imo'nodowodekono. Aki toro tool nemi pris aguto nonekullumo'nodowodekono. Aki toro toolluno kuudo uubweyodowado tonol gamino kuu'maiyo toru'no dodowiyoku'bworosodowadekono.

1 Pita 2:11

Mi ibwoto'nyobuuravoo, kevu kwako akavida'aiyogaikulmaiyo. Toro te kevu kwako akavi mwalopi toga yiuno kwako pumuuda'ai a'mwo bomwallo togaikulbusuko to'no imo'nugovla'mdupudogaikikono. Toro tovino tov nuu duudapi yogalo guureji aro ikudumo'mokwono. Kevu kemi kwako akavida'ai kulako tonyuro buro'nyo buro'nyo ilaiyo igollunyo'mo ikullunodowodo su toorai nuumjunmwalpiyo. Pasudo su tooro kemoro poowokalago tobuurai molo bwotonyo wiyodupudorogano.

1 Pita 3:9

A'mwo pworo kemi kaiyako saikullugolpi toga kevu su toorai aikomgu kaiyako nyugolmwalpiyo. Aki a'mwo abolo pun kemino kaiya'no yogalo abwolomekumwogapiyapi tov kevu su tonyuno kaiya'no yogalo nobwolomorumwogapimwolapiyo. Toro kuvi kuruv kevu a'mwo abolo kaiyako saikullugolpi su tonyuno Gooti tool ilaiyo igoloneyokwe yogalo sugudo puno'gwowi neya dodubweyogaulo. Gooti tool kemi adekumaroka tov kevu a'mwo abolo tonyu yogalo sugudo tokwe neya duubwemwalpino'moneyokwe adekomarokaikono. Toro te kevu yogalo sugudo adubwepi su tovi'aro kev kugaikul kuruv Gooti toolluro yogalo sugudo daikubweyodowo'jure pun kuvinono nomapinogaikikono.

1 Pita 5:10

Gooti tool yiuwi'nokai toga gamoro yasuwa'wino sugumaluko tov nekullabiyokwekono. Aki Gooti tool kevu Krais Jisasollu uuguro'mwonyodupudo su toollu'aro gamoro bako su tovi anakuuto tomuu yiunokuudo mujomwekovlaiyo'moneyokwe kemi me'no adekumarokaikono. Toro tovino tov kemoro tabunyuwuulo amo'movla'mwakopo su ton manyu toga guureji mamjo'movla'mwalpinogano. Yiuno kula'nyo toga'gwono mokavlavopi kevu sugudo imo'nupino'moneyokwe Gooti tool aki aiko te yere yekuvo'dogalmwalonekono. Toro yekuvo'dogalowo'ji kemi sobanyo mollekuda'mwalonekono. Toro mollekudavowo'ji aki jurogudo yogullumwojekwapimwalonekono. Aki kemi jurogudo nomekudapimwalonekono. Gooti tool kemi tono tono yaikullugolmwalonekono.

2 Pita 1:3

Krais Jisasol Gootekono. Gooti imo'nodowodo su toolluro jurogudo tov nekullabodowodekono. Jurogudo su tovi'aro gavnokweyolluro sugupasudo tokwe'aro aiyo mujomwekovlaiyo'moneyokwe tokwe'aro toval nemi me'no anekullabokaikono. Nemoro yiuwi'nokai supto yodowado su ton me'no anekullabokaikono. Nevu kwolluno kuudo me'no youroma'dowado tovino tov su toro anekullabokaikono. Aki toro tool gamoro jurogudo bwotonyo tokwe'aro gamoro pasudo sugumaluko tokwe'aro tovake gamiyomno adonekumarokaikono.

2 Joon 1:5

Toro te aga nuu abolo to'guuji nuumjunyo'mo yogalo akav aro agudoganmono. Nemida'ai yiuwi'nokai a'mwo abolo tobuuraino imgu amgu kalo buuropino neya domollogaulo. Yogalo agudoganmo su tov muuduko'maiyo. Toro kuvi kuruv pasudo su tovino Krais tool muudu'nodo togada'ai me'no sodonekubwosumelabiyajukekono. Toro yodonekubwosumelaboduke su tovi nevu me'no wuu'nugelabodowadokwono.