Toro wuudoganyuno sumaiyokwe aro kuudokaikono. “Guvu sugudo subi tookujuno nuu ilaiyo nokwo molloguma'monyugono. Toro kuvi kuruv guu sugudo mibi to'gwowi ma'no ma'nodo tov gumi kaiyako igolagumeyo'mo aduuwaso. Ma'no ma'nodo su tov kuullujuluko pwolbusuko gumi galodovagunyo'mo tov wobo toru nopuu'naso. Toro te ma'no ma'nodo su tov gumi mido mollogumwallo'mo yodowo'jure kuvi kuruv guu uuwolo'bino'moneyokwe guureji neya domollomwalnogawono.” Gooti Yawel Kenollu toro kuudokaikono.
3 Joon 1:6 - Gooti Toolluro Yogalokwono6 Toro te Jisasolluro a'mwo womdokwe su tooro bai'movo'mno akawaida'ai Jisasolluro a'mwo abolo mollu'bwoto tobuurai gumoro kalo buuropino pasudo tovino kuu'maiyo toru adodolubwemwa'juporogano. Toro te lukomgu kuga kuruv Jisasolluro a'mwo modomollokwe gabovo pworo gumi aboguru'mapi tov a'mwo su tooro nuugollu'meyo'mo yodopure toga guu guureji neya duuwiyo'mwojogawono. Gooti toolluro ilaiyo winodowo'jure tomgu'aro uumjuno'bi a'mwo su tooro novlaiyo'mo yodopure toorai puuto tomuu nokwo iwapimwalbinekugono. Guu su toro kwiyo'mwojubi tov ilaiyo to'no yomjomwekovla'mwalbinekugono. Sien die hoofstuk |
3 Joon 1:6
15 Kruisverwysings
Kevu wosamujuko pun kuunano gooti pworai me'no kwingiko su tonyuno kumako neya mwalmwalpinogaikikono. Aki allukuulolo boruko tovi'aro aromiyogubulosungiko toorai manmwalpinogaikikono. Aki mujako tov kuuno wo'dowo'jure toorai manmwalpinogaikikono. Aki kevu kwonyalo mimwalpinogaikikono. Adaikullumawono. Kevu su toro adaikullumawo tonyu kuvinono kuumjungovlapi tov ilaiyokwono. Mekonoo, nemoro kuuguudo tov aro'arokwono.” Pas tov toro sakwollopokwono.
Toro ajesopo su toorai Jisasolluro a'mwo abolo ton amorapiyopogano. Toro amorapiyopo tooro plaino sumaveyokwe kwako Foonisiyake Samariyake tomuu'aro avlavoporogano. Toro plaino sumaveyokwe Pooleke Banabaseke tooral Jisasolluro a'mwo abolo gomno gomno mwalodopure tobuurai wuuru'ma'dubul aro sodubwosomollolorakono. “Oo a'mwo abolo Juu tooravuro miyawosunodupudo ton Gooti toollomno kuudo youragunyumo'nodupu kuudo me'no kuubwemwakopogano.” Toro tovino yodubwosomollodole toga Jisasolluro a'mwo abolo gomno gomno mwalodupudo su ton wuu'no'mno kemoro poowokalago tov ilaiyo subwosunopogano.
Toro kuudopo kuvi kuruv nevu a'mwo su toorai kaduko mwiyowonogano. Toro te 7-pela iruko su tobuul me'no abawoka toga sip toolluro nuugollu'meyo'moneyokweyogakono. Toro toga a'mwo amwalowo toorogai'aro kemi julkwolaiyo togai'aro ton wagwolago tovida'ai kwa'mguno abomollubworonekumokalokwoponogano. Toro bomollubworonekumokalokwino sumaveyokwe soolwaravuro wolo toru ai'movowonogano. Toro ki'mo'mno sumawoneyokwe yiuwi'nokai tonol suduko inuguto'nowono subusu'nyogalo adowonogano.
Aga kuga kuruv nuu kantri Spen'no puuto tovi avla'mi toga kemi ikuru'mallo'mo anyunadopiyo. Toro toonyu aro kuudo sau'mwakono. Nuu puuto tovi plavo'mi kemi bekuru'ma'monyugono. Kevuge iruko pwekwo me'no mwalo'mi lukomgu kantri Spen'no pla'monyugono. Su toro toga kevu nyo'mwojopi novla'mdo'mure toonyu yonuwapipinogaikikono. Su toro kuudo sau'mwakono.
Aki toro toonyu aro kuudo saullajonyugono. Nuu kwako Masedooniya tomuu pla'monyugono. Toro toonyu puuto tomuu kuuno plavo'mi kemi nobekuru'ma'monyugono. Toro bekuru'maro'mi lukomgu Masedooniya tomuuno pla'monyugono. Toro plavo'mi Masedooniya tomuu ki'movamonyugono. Toro toonyu lukomgu Masedooniya tomuu wuugollu'movo'mi aki aiko te nobekuru'ma'monyugono. Toro abekuru'ma'mi toga iru'mato me'no mwalowa'ji nuu kwako Juudiya tomuuno pla'monyugono. Toro avla'mi toga kevu puuto tomuu nokwo yonuwopiyapinogaikikono.
Toro ikullabodowo'jure togai kevu aro tomgu'aro nokwo yomjomwekovla'mwalpinogaikikono. Yiuwi'nokai toga kevu Aguto toolluro sumdo tovi po'dogalo mujumovlavopi ilaiyo to'no igolmwalpinogaikikono. Aki kemoro yiuwi'nokai sugupasudo judo'no judo'no amjumovlapi su ton sulo ilaiyo tollovobusuko nokwo ki'numwalpinogano. Aki Gooti toolluno kuudo pugai'aro youromo'movlavopi aguto nokwo yogullumelamwalpinogaikikono.
Kemi jurogudo dekumworaso'moneyokwe kuuguudo togai'aro nodaikumul'mwojo'moneyokwe kuuguudo togai'aro kemoro poowokalago tonyu jurogudo daikullumwojo'moneyokwe kuuguudo togai'aro su togai kemi yodekubwasodowa sodogullumwojekwapiyajuwonogano. Su tov kevu Gooti toolluro ilaiyo winodowo'jure tomgu'aro neya yomjomwekovla'mwalpino'moneyokwe tovinokwono. Kuudo neya jaullulo. Aguto kig Gooti tool gamoro mido mollomwalodowodo tovi kuulomwallo'moneyokwe kemi me'no dekuma'dowodekono. Aki gamoro bako bwotonyo tovi anakuuto tomuu kuulomwallo'moneyokwe kuruv me'no dekuma'dowodekono.
Aki a'mwo pworal guuge mwalodubulorakono. Toro tooralluro pwol loowo tovino pi'mwo kuudokwekono. Toro toolluno yovo tov Senasolekono. Aki pwolluno yovo tov Apoolosolekono. A'mwo su tooral puuto tovi novlaiyo'mo toga noonyumwonyu punyuno supto nyubullokwe tov guu kaveno nuuwiyo'mwojubiyo. Toro kweku kuruv guureji neya duuwiyo'mwojono. Toro me'no wiyo'mwojo'bi toga a'mwo su toorallu puuto tovi nokwo iwapibinekugono.
Toro kuvi kuruv a'mwo gabovo pwolluno yovo tov Demitriyosolekono. A'mwo su toolluno yiuwi'nokai a'mwo abolo ton dodupudogano. “Yiuno sugudo to'nodekono.” Dodupudogano. Aki a'mwo su tool nebal'no yogalo tovi uumjunodowodo toolluno tov ilaiyo to'no youroonodowadekono. Aki nev kwonol kuruv a'mwo su toolluno kuu'maiyo toru aval'no adodoluwosumwakuuwono. “Oo a'mwo su tool sugupasudo to'no mujumovla'mdowodekono.” Adodoluwosumwakuuwono. Aki guu kweku kuruv nemoro dodoluwosodowado tovino aro kuudo youronekuma'dumdekugono. “Oo kemoro kuuguudo dodoluwosodupudo tov yiuno nebal'nodo'mdeyo.” Youronekuma'dumdekugono.
Advertensies