1 Joon 4:7 - Gooti Toolluro Yogalokwono

⁷ Mi ibwoto'nyobuuravoo, nevu Jisasolluro a'mwo abolo pubuuraino imgu amgu kalo buuropino neya amollogawano. Su tov aro tovinokwono. Kalo buuropino winyo'moneyokwe pasudo su tov Gooti toolluda'ai bodowodokwono. Aki yiuwi'nokai a'mwo abolo kalo buuropino winodupudo ton Gooti toolluro kwoloraiyo me'no wimo'nodupudogano. Aki toro ton Gooti toolluno kuudo me'no youroma'dupudogano.

1 Joon 4:7 Kruisverwysings

Joon 13:34

Toro te aga moro loowo muuduko tov kemi aro aikullamono. Kevu kemida'ai yiuwi'nokai pwolno pwolnodo tooraino kalo buuropino neya domollogaulo. Nuu kemino kalo buuropino nyunodowodo to'busuko kubalno kev kworekul kuruv kemida'ai yiuwi'nokai pwolno pwolnodo tooraino kalo buuropino neya domollogaulo.

Joon 17:3

Aiyo yiunokuudo mujomwekovlaiyo'moneyokwe su tov aro tovinokwono. A'mwo abolo ton guu Gooti nebal'no pwolnodo tookuge'aro gumoro amonuwopiyabodo Jisas Kraisonyuge'aro toonalluno kuudo souronakumapi tov aiyo yiunokuudo mujomwekovla'mwalpinogano. Su toro tovinokwono.

1 Koorin 8:3

Toro kuvi kuruv a'mwo pwol Gooti toolluno kalo buuropino winodowodo su toolluno'gwowi Gooti tool me'no wonoma'dowodekono.

2 Koorin 4:6

Kuudo neya jaullulo. Gooti tool aro me'no adokaikono. “Dugumwuulo tomuuda'ai bako tov imo'nono.” Toro adoka Gooti su tool nemoro poowokalago tonyu Jisas Kraisolluro bako tov me'no anekuuwokaikono. Gooti toolluro bako bwotonyo su tov Jisas Kraisolluro sumdomago tovi'aro nevu me'no wonoma'dowadonogano. Toro te bako su tov nemoro poowokalago tonyu anakuuto tomuu me'no pwopiyodowodokwono.

Galesiya 4:9

Toro kuvi kuruv aga'no'gwowi kevu Gooti kuunodo toolluno kuudo me'no youroma'dupudogaikikono. Toro te aro neya dumonyugono. Gooti toolno'gwowi kemino kuudo me'no yaikuu'dowodekono. Toro tovino tov kevu kwako akavida'ai kuudo maluko'nyo su tooraiyomno aki aiko te nyouragunyumo'numwalpiyo. Kwako akavida'ai kuudo maluko'nyo su tooro wollainyorogano. Aki su tooro kemi ku'nono maikullo'mwojupinorogano. Toro tovino tov kevu su toro toorai aki aiko te ki'nato womdo nuuwimwalpiyo.

Galesiya 5:22

Toro kuvi kuruv a'mwo pwol Gooti toolluro Kuullo toollu kuumjungovlawo'ji toolluro sulo ki'nono tono'gwowi arogano. A'mwo abolo tonyuno kalo buuropino winyo'mo pasudo tokwe'aro poowokalago kuunodo tovida'ai ilaiyo yo'mo pasudo tokwe'aro sumwoluko kavo wosunyo'mo pasudo tokwe'aro jul'nyo bwi'mo'mdowo'jure kuga kuruv muugollu'meyo'mo pasudo tokwe'aro a'mwo abolo tonyuno ilaiyo mollo'mo pasudo tokwe'aro yanyago wimo'nyo'mo pasudo tokwe'aro sugupasudo tovi gudupolallo'mo pasudo tokwe'aro

2 Timooti 1:7

Kuudo neya jaurono. Gooti tool gamoro Kuullo toollu nekullabodowodo tov nevu luko imwalano'moneyokwe nekullabodowodolmaiyo. Toro kuvi kuruv nevu jurogudo imo'nyo'mo tokwe'aro kalo buuropino mollo'mo tokwe'aro nevnokwenolluro pasudo tonyu pi'mwono mollomwallunyo'mo tokwe'aro su tonyuno'gwowi neya mujumovla'mwalano'moneyokwe Gooti tool gamoro Kuullo toollu nekullabodowodekono.

1 Pita 1:22

Kevu Gooti toolluro nebal'no yogalo tovi kuumjunopo tovino tov kemi ma'no ma'no pasudo tooraida'ai me'no yal'mo'no'mno sugudo kwimo'nopogaikikono. Toro te kevu Jisasolluro a'mwo abolo tobuurekul kevuge avalo tellugwai'yago tello'mwo kuunodo tonbusuko ikullumo'nodupudo pubuuraino kalo buuropino mollodupudogaikikono. Toro te kemida'ai avalo su tobuuraino kemi poowokalago kuunodo tokwe kalo buuropino pasudo su tokwe imgu amgu guureji muunyu toru'aro neya domollogaulo.

1 Joon 2:10

Toro kuvi kuruv a'mwo pwol Jisasolluro a'mwo abolo gami gadai'yagorovobusuko jo'mwovobusuko wimo'nodupudo pubuuraino kalo buuropino amollo'ji su toolno'gwowi bako tovi anakuuto tomuu me'no kuullomollodowodekono. Aki toro toolluro pasudo molludo'mdowo'jure tovi a'mwo abolo pubuuro muugonaropi toga yello miye'namo'mdupudobuurogano.

1 Joon 2:29

Kevu aro kuudo souromapi tov, Oo Krais tool pasudo idopto'nodo to'no yokweyoldeyo, kuudo souromapi tov yiuwi'nokai a'mwo abolo pasudo idopto'nodo mujumovla'mdupudo tonyuno aro kuudo nokwo youroma'mwalpinogaikikono. Oo a'mwo abolo su tobuuro Gooti toolluro kwoloraiyo me'no wimo'nodupudodeyo. Su toro kuudo nokwo youroma'mwalpinogaikikono.

1 Joon 2:3

Nevu Gooti toolluro yogalo adanekulloka tonyu kuvinono kuumjuna'ji tov nevnokwenolluno aro kuudo nokwo youromaranonogano. Oo nevu Gooti toolluno kuudo jouroma'mwakuuwono. Kuudo nokwo youromaranonogano.

1 Joon 2:4

Toro kuvi kuruv a'mwo pwolno'gwowi aro donekono. “Nuu Gooti toolluno kuudo souroma'mwakono.” Toro dowo'ji Gooti toolluro yogalo adanekulloka tonyu ku'nono muumjunonekono. A'mwo su tool kuunano yogalo to'no youkuu'najunonekono. Aki a'mwo su toolluro poowokalago tovi nebal'no yogalo tov mauluuwollokweyokwono.

1 Joon 2:7

Miyobuuravoo, kevu kalo buuropino mollumwalpino'moneyokwe tovino loowo sokwollekwopiyamwako akav muuduko'maiyo. Toro kuvi kuruv loowo su tov uumdokwono. Muudu'nodo togada'ai loowo su tovino kevu me'no kuu'nugelabiyajupogaikikono. Toro te loowo uumdo su tov muudu'no kuu'nopo togada'ai maro'mno me'no mwora'dupudogaikikono.

1 Joon 3:9

Yiuwi'nokai a'mwo abolo Gooti toolluro kwoloraiyo me'no wimo'nodupudo ton ma'no ma'no pasudo mamjumovla'mdupudogano. Su toro tovino kavlo tov arokwono. A'mwo pwol ikulwiyo kuudosodowodo to'busuko kubalno Gooti tool gami kwoloraiyo tobuuravuro poowokalago tonyu gavnokweyolluro aiyokwe Kuullo tool me'no kuulumwallodowodekono. Toro kuulumwallodowodo tovino tov a'mwo abolo su ton ma'no ma'no pasudo mairoungovlaiyokwerogano. Aki a'mwo abolo Gooti toolluro kwoloraiyo me'no wimo'nodupudo tovino tov ma'no ma'no pasudo tooro ku'nono mamjumovla'mwalpinogano.

1 Joon 4:11

Mi ibwoto'nyobuuravoo, Gooti tool nemino su toro tomgu'aro kalo buuropino winodowodekono. Toro tovino tov ne kunol kuruv yiuwi'nokai Jisasolluro a'mwo abolo tobuuraino imgu amgu kalo buuropino neya amollogawano.

1 Joon 4:12

A'mwo pwolnodo kwol kuruv Gooti toollu ku'nono mwonodowodekono. Toro kuvi kuruv nevu a'mwo abolo tobuuraino kalo buuropino anekulluno'ji to'gwowi Gooti tool nemi kuvinono nonekuguro'mwonyumwalonekono. Toro nekuguro'mwonyumwalodowo'jure tonollu'aro Gooti tool gamoro kalo buuropino pasudo tov a'mwo abolo tonyuro sumdo tovi kuu'maiyo toru'no bomollolupto'nubwemwalonokwono.

1 Joon 4:16

Toro te Gooti toolluro nemino kalo buuropino winodowodo su tovino nevu kuudo me'no youroma'dowadonogano. Aki su to kuvino kuudo uubweyodowadonogano. Kalo buuropino pasudo su tov Gooti toollu uuwo'dowodokwono. Toro te a'mwo pwol kalo buuropino winyo'moneyokwe pasudo su tovi amjumovlawo'ji tool Gooti toollu me'no uuguro'mwonyodowodekono. Aki Gooti tool a'mwo su to kwollu kuruv me'no uuguro'mwonyodowodekono.

1 Joon 4:20

Toro te Jisasolluro a'mwo pwol aro donekono. “Oo nuu Gooti toolluno kalo buuropino nyunodowodonyugono.” Toro dowo'ji kwol kuruv gami avalo Jisasolluro a'mwo abolo pubuuraino suroguudo sauro'ji to'gwowi a'mwo su tool yiuno kuunano yogalo to'no youkuu'nadonekono. Su tov aro tovinokwono. A'mwo su tool gami avalo Jisasolluro a'mwo abolo pubuurai me'no wonodowodekono. Toro wonodowodo kwol kuruv su tobuuraino kalo buuropino mwino'ji to'gwowi Gooti mwonodowodo kwolluno kuruv kalo buuropino ku'nono mwinonekono.

1 Joon 4:8

Kuudo neya jaullulo. Gooti tool yiuwi'nokai toga yiuno kalo buuropino to'no winyokwekono. Toro tovino tov yiuwi'nokai a'mwo abolo kalo buuropino mwinpi ton Gooti su toolluno kuudo ku'nono miyouroma'dupudogano.

1 Joon 5:1

A'mwo abolo pun aro kuudo uubweyodupudogano. “Oo Jisasol Gooti toolluro amonekwopiyaboka Krais tool kwekono.” Yiuwi'nokai su toro kuudo uubweyodupudo ton Gooti toolluro kwoloraiyo wimo'nodupudogano. Aki yiuwi'nokai a'mwo abolo su ton kemi Kuunumiyago toolluno kalo buuropino winodupudogano. Toro winodupudo su ton kemi Kuunumiyago toolluro kwoloraiyo kubuuraino kuruv kalo buuropino winodupudogano.

2 Joon 1:5

Toro te aga nuu abolo to'guuji nuumjunyo'mo yogalo akav aro agudoganmono. Nemida'ai yiuwi'nokai a'mwo abolo tobuuraino imgu amgu kalo buuropino neya domollogaulo. Yogalo agudoganmo su tov muuduko'maiyo. Toro kuvi kuruv pasudo su tovino Krais tool muudu'nodo togada'ai me'no sodonekubwosumelabiyajukekono. Toro yodonekubwosumelaboduke su tovi nevu me'no wuu'nugelabodowadokwono.