Genesis 2:8 - Northern Tepehuan Bible

^8-9 Dai bhodïrï xarhi utamajako bhai dui Diuxi Gïr Nukadakami xako oidaka agai go kïïrhi. Eden tïgidu xarhiapako oidigi ïgai xako bhai dui ïgai. Dai ami dáí ïgai go kïïrhi ix makïdï idui ïgai. Bhodïrï ami Edenïrï tutu Diuxi kïïga mui uxi dai kïï bïïñiakami ibhiadï dai kïï titiodikami. Dai ami ïxikami ïrana ïxi tutu ïgai goka uxi ix makïdï mai ïpïamaaxi go gaa uxi. Ïmoko xi odami ugiagi ibhiadï ka mai mukiagi tomaxi xïï kïrhimuagi ïgai. Dai go gïmai uxi ïgaikïdï bïïxi aajïi tïgibudagai modukai kïïgadukami dai ix makïdï mai kïïgadu.

Genesis 2:8 Kruisverwysings

Genesis 13:10

Dai bhodïrï aipako nïnïaba go Lot dai ojoida tïï ïgai dïdïjoi ix makïdï sonoana kaatï go gïï aki Jordan tïgidukïdï. Ïmo gïï ïxikami maaxi tïdogi go dïdïjoi ïgai dai gïïpiga sudagi bïïxi asta mïï ukami xako guka bhaabhaki Soarana. Bhaiton ïpïan maaxi tiodi Ejipituana oidigi. (Ami dïdïjoana gukatadai goka kiiki Sodomïrï dai Gomorïrï tïtïgidukïdï. Aidïpïrï Gïr Nukadakami mai kia xia dodai oidigi ami xako gukatadai bhaabhaki ïgai. Kaxkïdï kia kïïgadukatadai ami oidigi.)

Genesis 3:23

Dai mos potïkai Diuxi Gïr Nukadakami sai bhodïrï busaitu ïgai go kïïrhi ïxikamiañdïrï sai mai ugiagi ïgai go uxi ibhiadï ixtukïdï tomax tuigako oidakagi ïgai. Dai no xibhïako aaduinturhi ïgai go kïïrhi sai ï gïbaaxi dïbïrai xajadïrï duñixikami ïgai sai ï gïbaaxi dïbïraikïdï aatabuadagi ïgai.

Genesis 3:24

Bhodïrï ka busaidakai go kïïrhi ïxikamiañdïrï sai bhobai xarhi apako tutu Diuxi goka nunukadakami. Tïtïañikarudï Diuxi go Nukadakami ïgai dai ajana ïgai bïï gokatai. Dai ami tïï Diuxi ïmo maxtai táí ïpï xi no xikorhi aimïrada ïgai bai mai bapakiagi tomarhi ïmadutai ami xako kïïka go uxi ixtukïdï tomax tuigako oidakagi odami.

Genesis 4:16

Dai daibuno jii go Kain abhiadïrï xako aatagaitadai Gïr Nukadakami dai maigo xibhïako oidatu xako Nod tïgidu oidigi. Edenañdïrï xarhiapakoga kaatï oidigi ïgai.