Galatas 1:4 - Northern Tepehuan Bible

⁴ Suxi Kristo tudu ïgai dai ïïgi gï tïïgi sai gï muatudana ïmo daxdaragai dukai dai bhai duñagai gïr soimaaxkamiga sai ka kïï biïna aatïmï Diuxi ïmadï. Podukai idui ïgai dai kïïgakïrï gïr bubaitu bïïxi go soimaaxkamiañdïrï ix makïdï oidaga tami idi oidigi daama. Podukai ipïrhi Diuxi gïr Oga sai ïïgi gï tïïgidana Suxi gïr bïïtarï tudu xi kaxkïdï gï tïïgi ïgai dai gï muatu.

Tepehuan Northern: Diuusi ñiooquidʌ utuducami oodamicʌdʌ

⁴ Suusi Cristo ʌʌgi gʌdagitu mʌsmuaagi dai poduucai gʌroigʌldi gʌrsoimaascamiga dai cʌʌgacʌrʌ gʌrvuvaitu sai camaiʌʌgidiña ʌDiaavora dai camaisoimaasi ivuaadana poduucai isduucai ivueeyi oodami sivi tanai oidigi daama. Vʌʌsi gomaasi ʌpʌdui poduucai isduucai Diuusi ipʌli.

Galatas 1:4 Kruisverwysings

Mataibo 13:22

—Dai go ïxtokai ix makïdï basoi sïïxidakami saagida surhi ïr ïpïan dukami go odami ix makïdï kaïkana Diuxi ñokidï dïï mos apia maaxi óídaga dai buaboidaradï mai kabakaturïiña. Kabami buamï gïn ïrhidi ïgai gaagaitai tuminxi dai gaagaitai bhai ïrhiaradï ixtumaxiïrï oidaga tami idi oidigi daama. Dai kaxkïdï ïgai bïïtarï ka maiti ibuayi soiñi go ñoki ïpï ix makïdï kaïkana ïgai—.

Mataibo 20:28

—Gï agai xi gin ïpïan buadagi aapimï tudu. Aanï dibia tami oidigi daama ïmo pioñi dukai dai ïïgi gin tïïgida iñagai saidi soi gin buidadagi daidi gin muagi gin buidïrï bïïtïkamiga. Mukimu aanï dai kïïgakïrï bubaidamu mui óídakami. Podukai dasamu aanï namïgadï ix makïdï buaturhi ïgai soimaaxi ibuadamikatai ïgai tudu. Ïmo pioñi dukai aanï óídakami bïïtarï tudu tomaxi aanï ïr go Diuxi otosadï ix makïdï ïmo kïïrhi busai dai kïïga bia aanï sïïrhikami ix kabami tïanïdagi óídakami— itïtïdai.

Mataibo 26:28

—Idi bino ïr gin ïra gï dukami ix makïdï gï aaxta agai mukukai aanï mui odami bïïtarï. Gin ïrakïdï gï namïatulda agai go ñoki ix makïdï bhai buayi Diuxi odami ïmadï. Gin ïrakïdï oigïrhixikami bii agai mui óídakami soimaaxkamigadï gï aaxtakai gobai tudu— itïtïdai.

Mataibo 26:42

Dai maigo jii Suxi ïpamu dai aataga agai Diuxi ïmadï. Daidi potïtïdai ïgai, —Gin Oga, ix gï agadagi xi soimaaxi taatagi aanï, bhai aagai aanï sai pogïduna ix dukatai aapi bhai ïrhidi— itïtïdai.

Mataibo 6:9

Daidi Suxi potïtïdai go mamaatïrdamigadï, —Xïxkadï gadaanïdagi aapimï adukai abïr aagada— itïtïdai. —Diuxi gïr Oga ix makïdï tïbagiana daja. Gï daanïi aatïmï sai aapi ibuada saidi óídakami kïïga gï xadutudaiña.

Markos 10:45

Daiñi aanï ïr Diuxi otosadï ix makïdï aagai Diuxi ïïki dai aanï mai tïanïda iñagai dai dibia. Bhaiyoma odami pioñigadï aanï. Gobai bïïtarï dibia aanï di. Aanï ïïgi gin tïïgida iñagai mïxi gin mua agai dai podukai kïïgakïrï bubaida iñagai muidutai oidigi daama óídakami xi bhodïrï ka mai gïpiïrï bïïtïkamikana ïgai— itïtïdai Suxi go mamaatïrdami.

Lukas 22:19

Dai bhodïrï bhïiyi ïgai ïmo pan dai ïpïpï aagidi ïmo Diuxi aatanamïidaragai Diuxi dai saasarai go pan dai oidi mamaatïrdamigadï. Daidi potïtïdai, —Aanï gatïïgida iñagai gin tukuga aapimï gïn bïïtarï dai idi pan ïr ïmo maaxidaragai duu gin tukuga bïïtarï. Podukai abïr gïn takoidada aapimï pan ix dukai ibuayi aanï xibi dai podukai abïr gin tïtïitoda— itïtïdai.

Lukas 22:42

Dai potïtïdai, —Gin Oga— itïtïdai. —Ix ipïrhiadagi aapi, maiti gin dagito xi soimaaxi taatagi aanï xibi. Dïï gia gï duna ix dukatai aapi ipïrhidi dai mai xu xi ixdukatai aanï ipïrhidi— itïtïdai.

VUAANA 10:11

—Aanï ïr ïmo paxturu kïï tuigakami gï dukami. Ïmo paxturu kïï tuigakami kïïga nunukadai sosoigadï tomaxi gï aagadagi ix gï muatuda ïgai nukadatai sai mai kodagi ïxibugami. Pomaaxi tuigakami aanï tudu. Kïïga nukadamu aanï ix makïdï gin buaboitudai tomaxi gin muatudagi aanï nukadatai sai mai kona ïgai.

VUAANA 12:31

—Xibi Diuxi daituda agai go gïgïbidaragai ix makïdï ajïga oidigi dama óídakami. Dai xibi ïpï gamaitï agai Diuxi gobai ix makïdï gatïanïi tanai oidigi daama, gamaitï agai ïgai go diabora tudu— itïtïdai.

VUAANA 5:30

Dai Suxi oi aatagidï dai potïtïdai ïgai go judidiu, —Aanï mai ïïgi gin tïgibudagakïdï aagai ix tumaxi dai tomarhi ïmo imidagai maiti ibuayi ïïgi ix tumaxi ipïrhiadagi aanï. Bïïxkïrï, bïïxkïrï ibuayi aanï dai aagai ix tumaxi ipïrhidi gin Oga. Kaxkïdï xuduku aagagi aanï xorai kïïga ibuayi dai xorai mai kïïga ibuayi kïï sïïrhi aagai aanï. Aagai aanï mosïkaxi ix tumaxi ipïrhidi gin Oga kaxkïdï— itïtïdai.

VUAANA 6:38

Daiñi, aanï dibia tami oidigi daama iduña iñagaitai ixtumaxi Diuxi ipïrhidi dai mai xu xi ïïgi ixtumaxi aanï ipïrhidi. Diuxi otosadï aanï tudu kaxkïdï iduña iñagai ixtumaxi ïgai ipïrhidi dai Diuxi gin Oga ipïrhidi ansai mai dagitoagi ix kuga imiagi tomarhi ïmadutai go buaboitudadami ix makïdï gin maa ïgai. Go maa bïïtarï gin otoi ïgai tudu an sai kïïga nukadakana go ix makïdï gin buaboitudai asta aïkai go kugatïrï tasïrï ukami. Dai ka aïkai go kugatïrï tasïrï aanï duduakarhida iñagai bïïxkatai ix makïdï gin nukaturhi Diuxi.

Romanos 1:7

Ïmo biatuldaragai bïïxkatai aapimï buaboitudadami Romïrï óídakami bïïtarï. Diuxi kïïgakïrï gïn oigïdai dai gïn báí mïsaidi ïr ïko bubaidadïkana. Aanï ipïrhidi saidi Diuxi ïmadï Suxi Kristo Gïr Nukadakami kïï tuigakana gïn bïïtarï bai kïïga ibhïxtakan taadakagi aapimï.

Romanos 12:2

Maiti abïr ïïgiada tïgibudadï oidigi daama óídakami bhaiyoma abïr bhïiyi tïgibudagai utudui Diuxiañdïrï. Aidï gia gïn utudutuldamu Diuxi gïn ïrabiadïrï dai maatïkamu aapimï ixtuma agai Diuxi gïn bïïtarï. Ix makïdï Diuxi aagai gïn bïïtarï mos ïr ïï kïkïïgadukami dai buapai bhai ïrhiaraga Diuxi bïïtarï. Mai tipu ïma maaxi bamioma kïïgadukami xi bhai ix makïdï Diuxi agai gïn bïïtarï.

Romanos 4:25

Diuxi otoi Suxi sai ïgai aa namïidana gïr soimaaxkamiga mukukai. Dai bhodïrï duakaturhi Diuxi go Suxi bai podukai kïïgakïrï gïr nïijadana ïgai.

Romanos 8:27

Diuxi kïï maatï ix tïtïitoi odami dai kïi maatï ïpï ix tïiya ïrhidi Diuxi Ibhïadï daanïitai gïr bïïtarï. Diuxi Ibhïadï daanïi ixtumaxi Diuxi ipïrhidi gïr bïïtarï tudu.

Romanos 8:3

Go sïïrhikami ojixikami maiti ixtui ix kïïgakïrï gïr bubaidagi. Mai bia gobai gubukarhigai ixtukïdï gïr soiñagi. Ïïgi sobhikïiña aatïmï adaimïitai gïr ïkidadï tïgibudagai kaxkïdï. Dïï Diuxi gia kïïgakïrï gïr bubaitu. Ïgai otoi maradï sai biakana ïmo tukugai ïpïamaaxkami ix makïdï bia aatïmï soimaaxi ibuadami. Dai gï muatu ïgai gïr soimaaxkamiga bïïtarï. Podukai Suxi tukugadïkïdï Diuxi gamaitï go soimaaxkami bui.

Romanos 8:32

Daiñi, Diuxi mai tudayitai gatïïgi ïïgi maradï sai mukuna gïr bïïtarï. Kaxkïdï kïïga maatï aatïmï sai gïr maakimu ïgai bïïxi aïkatai go gaa ixtumaxi ix makïdï bia ïgai gïr bïïtarï ïpï.

1 Korintios 15:3

Daiñi, gïn aagidi aanï go bamioma namïakïdï ñoki ix makïdï gin maatïturhi Suxi Kristo. Gïn aagidi aanï tudu sai Suxi Kristo muu ix dukai ojixi Diuxi ñokidïrï. Dai sai podukai bhai dui ïgai sai oigïrhikan biïna aatïmï gïr soimaaxkamigakïdï.

2 Korintios 4:4

Go diabora ïgai dai gatïanïi tami idi oidigi daama tudu. Dai maatiga maaxi sai buirumadai ïgai go óídakami ix makïdï mai maatï kaïkagi gïr aatagi mai buaboitudaitai ïgai ixtumaxi ïr buaboi. Maiti ipïrhidi go diabora ix óídakami maatï kaïkagi go bhai ïrhiaragai aatagi aagaitai Suxi Kristo tudu. Maiti ipïrhidi ïgai ix maatïkagi óídakami xïï kïï tuiga dai xïï gubuka Suxi Kristo Gïr Nukadakami. Suxi ïmadï Diuxi kïïga ïmadugan maaxi dai ïmadugan tutuiga tudu.

Galatas 2:20

—Aanï in bïïtarï pomaaxi gin oidakaragai xibi— antïtïdai. —Daiñi, ïkioma aanï ïr ïmo soimaaxi kïïrhikatadai. Dïï gia aidïxi muu Suxi Kristo gïr bïïtarï kuruxiana aidï muu go kïïrhi soimaaxkïdï ïgai ïmadï ïpï dai xibi ka utudui bii aanï. Dai kaxkïdï ka mai xu xi go kïïrhi ïkidadï oidaga gin tukugïrï dai bhaiyoma Suxi Kristo ïgai dai gin ïrana oidaga. Xibi oidaga aanï buaboitudaitai Suxi Kristo ix makïdï kïïgakïrï gïr oigïdai. Kïïga gïr oigïdai ïgai tudu dai kaxkïdï gï dagito sai gï muatudana dai kïïgakïrï gïr bubaitu— antïtïdai aanï go Piduru.

Galatas 6:14

Dïï aanï gia xadïrï gïdukïdï gin ïrhidiña ibuadatai aanï ïmo aaduindagai ïïgi gin gubukarhigakïdï podukai. Mosïkaxi ïmo ixtumaxi gia pokaitada antaada aanï sai gia namïga dai gobai ïr go aaduindagai ix makïdï idui Suxi Kristo kuruxiana. Ami tudu kuruxiana bhai dui Suxi Kristo sai ka mai biakagi aanï xi ïïgiadagi go tïgibudagai ix makïdï oidaga tami oidigi daama. Ïmo mukiadï dukai gin bia ïgai bïïtarï go tïgibudagai gobai tudu. Dai xibi ïpïan dukai xi ïmo mukiadï ka maiti ïr soiñi podukai ka maiti ïr soiñi gin bïïtarï go tïgibudagai ix makïdï oidaga tami oidigi daama ïpï. Bïïxi gobai bhai dui Suxi kuruxiana gin bïïtarï.

Efesios 1:11

Ïkobai gïr bubaitu Diuxi bïïnakai aatïmï Suxi Kristo tudu. Tukamidïrï abhiadïrï ïïgi podukai gï tïgitokatadai Diuxi xi aatïmï ix makïdï bïïna daraja Suxi Kristo ïr ïko bubaidadïkana. Podukai dáí ïgai saidi ïpï gï duna ixdukatai ïgai ipïrhidi. Bïïxkïrï ibuayi ïgai ixdukatai gï tïgitokagi kaxkïdï.

Efesios 2:2

Aidïpïrï adaimïiña aapimï go odami tïgibudadï dai ïïgidiña aapimï go diabora pobuadatai. Go diabora ïgai dai tïanïi go soimaaxi iibïdagami ix makïdï mos ïbïltapi ajiopai. Dai xibi aatabuayi ïgai iibhïadïrï odami ix makïdï mai ïïgidi Diuxi ïpï.

Efesios 5:16

Kabami abïr gïn aga ibuadatai ixtumaxi ïr kïïga. Arhiïxi ïr soimaaxi buadami xibi óídakami kaxkïdï.

Efesios 5:2

Kïïga abïr oigïada jaa aidï. Daiñi, Suxi Kristo gïr oigïdai kaxkïdï ïïgi gï dagito ïgai sai gï muatudana ïmo daxdaragai dukai. Podukai bhai dui ïgai gïr bïïtarï soimaaxi idunakai aatïmï. Dai Diuxi kïï bhai ïlda tïï Suxi Kristo daxdaradï. Kïï xigian dukai ubagi ïgai.

Efesios 6:12

Daiñi, gïr buidïrï bïïtïkami maiti ïr odami. Aatïmï kokodai jaa ix makïdï ïr diabora tïtïañikarudï soimaaxi iibhïdagami dai ix makïdï mai nïidi aatïmï. Ïgai ïr gupudagai bipiakami dai tïtïanïdami tami oidigi daama dai maigobai tïbagiana ïpï. Gupuka ïgai dai tïanïi ïgai tanai oidigi daama óídakami. Kaxkïdï tukamugan dukai kaatï oidigi xibi gatïanïitai ïgai.

Filipenses 4:20

Agia gï agai xi bïïxkïrï bïïtarï mai ugutai aagaiña aatïmï xïïxi ïr gïdukami Diuxi. Sai pogïduna gobai tudu.

1Tesalonicenses 3:11

Daanïiña aatïmï Diuxi ïmadï Suxi Kristo sai gïr maakana ïgai ixdukatai gïn dibidagi otoma.

1Tesalonicenses 3:13

Aidï gia Suxi Kristo gïn maakimu gubukarhigai gïn ibhïdagïrï. Dai podukai gokiïrï xïxkadï dibiagi Suxi Kristo ïmadï bïïxkatai ix makïdï urabaka ïgai kïïga mai duadimukatai gukakamu aapimï ïgai buitapi dai Diuxi gïr Oga buitapi ïpï. Mai tipukamu tudu ixtukïdï gïpiïrï gïn bupadagi ixtumaxi aidï. Mosïkaxi Diuxi bïïtarï óídakamu aapimï tudu kïïga oigïdaitai aapimï jaa.

2 Tesalonicenses 2:16

Gïr susukurhi, gïn daanturhiña aatïmï sai gïn abïnakidiña Diuxi dai sai gupurtudana ïgai gïn buaboidaraga. Dai kïï gubuakatai gïn buaboidaraga aidï gia bïïxi ixtumaxi aagidagi aapimï jaa kïïga ibuadamu soiñi dai bïïxi ixtumaxi ibuadagi aapimï jaa bïïtarï kïïga ibuadamu soiñi ïpï. Suxi Kristo Gïr Nukadakami ïmadï Diuxi gïr Oga ïgai dai kïï tutuiga gïr bïïtarï tudu dai gïr oigïdai dai gïr maakai ibhïxtaragai ix makïdï mai ugiatïkïi dai gïr maakai ïmo nïnïraragai kïïgadukami ïpï.

1 Tomoteo 2:6

Ïïgi gï tïïgitu Suxi Kristo tudu sai muana jaa ïmo daxdaragai dukai. Podukai bhai dui ïgai bïïxi óídakami bïïtarï sai ïgaikïdï kïïgakïrï bubuakïna óídakami. Ïgai dibia tami oidigi daama ixtuigako Diuxi ipïrhi xi dibiana dai gïr maaxiturhi sai Diuxi ipïrhidi ix kïïgakïrï bubuakïna bïïxkatai óídakami.

Tito 2:14

Suxi Kristo tudu ïgai dai gï dagito ix gï muatudagi kïïgakïrï gïr bubaiditai gïr soimaaxkamiañdïrï. Podukai bhai dui ïgai saidi ïr aaduñdïkana aatïmï Diuxi kïïga buañixikami gïr biakai ïgai. Dai xibi ka kïïgakïrï buabuakïkai aatïmï ipïrhidi ïgai sai bïïxi gïr bhai ïrhiarakïdï ibuadagi aatïmï ixtumaxi ïr kïïga.

Hebreos 2:5

Dai gï agai xi maatïkagi aapimï ïpï sai Diuxi podukai aagai sai mai xu xi go tïtïañikarudï Diuxi ïr ïgai ix makïdï gatïanïda agai xïxkadï ka bhïiyagi aatïmï gïr utudui oidakaragai. Jaa ïgaikamu ix makïdï gatïanïda agai.

Hebreos 6:5

Kaxi kaïkana ïgai xïï yoobikan dukai ñokidiña Diuxi. Dai ka taata ïgai ix taadagaka agai gubukarhigadï Diuxi xïïxkadï kaxi kïïgakïrï gatïanïdagi ïgai ïpï.

Hebreos 9:14

Dïï gia xibi Diuxi Ibhïadï ix makïdï bïïxkïrï bïïtarï oidaga, maa gubukarhigai go Suxi Kristo sai ïïgi gï dasana ïgai ïmo daxdaragai dukai. Dai Suxi gia mai bia toma lïïchi soimaaxkami abhana dai muu ïgai ïmo daxdaragai dukai gïr bïïtarï sai podukai kïïga buanaiña ïgai gïr soimaaxkamiga. Ïgai gia mai xu xi mosïkaxi buanai gïr tutukuga ix dukai ibuadana go ïïkidadï dadaxdadami. Suxi Kristo gia asta gïr ibhïdaga bïïxi buañixikami biayi. Kïïga buanai ïgai bïïxi go naana maaxi ixtumaxi ix makïdï ibuadana aatïmï ix makïdï maiti ïr soiñikana. Buañixikami gïr biayi ïgai sai bhaigakana aatïmï xi ibuadagi xadutudaragai Diuxi bïïtarï tudu. Gïïpi bamioma kïïgadukami idui Suxi Kristo daaxdaragai xi bhai go ïïkidadï dadaxdadami. Suxi daxdaradï gia mai biïga toma lïïchi ixtukïdï kïïgakïrï gïr buanadagi tudu.

Santiago 4:4

Daiñi, Diuxi bïïtarï ïpïan dukami aapimï ïmo oki ix makïdï oidiña ïmai kïïrhi tomaxi maiti ïr kunadï. Oidiña aapimï go tami oidigi daama óídakami tïgibudadï soimaaxkïdï tudu. Pobuayi aapimï gaagaitai gïn bhai ïrhiaraga ixtumaxiïrï oidaga tami oidigi daama. Bamioma ïïmadai aapimï go soimaaxi tïgibudagai ix makïdï oidaga tami idi oidigi daama tudu dai mai ïïmadai aapimï Diuxi. Gï agai sai maatïkagi aapimï tudu sai odami ix makïdï adaimïi pomaaxkami tïgibudagai ïr buidïrï bïïtïkami Diuxi.

1 Pedro 2:24

Aatïmï gïr ajïakatadai gïgïbidaragai soimaaxi ibuadamikatai aatïmï tudu dïï gia Suxi taata go gïgïbidaragai gïr bïïtarï mukukai kuruxiana. Po dui ïgai saidi ka maiti gïr tïanïdagi go soimaaxkami. Ïpïan dukami gïr bia ïgai ïmo mukiadï ix makïdï ka mai bhaiga xi ïïgiadagi go soimaaxkami tudu. Ka mai bia aatïmï xi ïïgiadagi go soimaaxkami tudu ka koidadï dukai biïkai aatïmï go soimaaxkami bïïtarï. Po dui ïgai sai ka ïma dukai óídakagi aatïmï ibuadatai ixtumaxi ipïrhidi Diuxi. Gï muragitu ïgai saidi kïïgakïrï bubuakïna aatïmï tudu.

1 Pedro 3:18

Asta Suxi Kristo soimaaxi taata kïïga ibuadatai ïgai tudu. Muu ïgai bhai buadatai gïr soimaaxkamiga bïïtarï. Dai podukai bhai dui ïgai gïr bïïtarï bïïxkïrï bïïtarï dai ka mai biïga bamioma daxdaragai xibi. Kïïga buañixikami ïgai tudu dai muu ïgai aatïmï soimaaxi ibuadami gïr bïïtarï sai kïï biïna aatïmï Diuxi ïmadï. Gï muatu tukugadï tudu dïï gia gï duakaturhi ïpamu Ibhïadï.

1 Juan 2:2

Suxi Kristo muu gïr bïïtarï ïmo daxdaragai dukai dai bhai dui gïr bïïtarï Diuxi ïmadï soimaaxi ibuadamikatai aatïmï. Dai mai xu xi mosïkaxi aatïmï gïr soimaaxkamiga bïïtarï bhai dui ïgai. Bhai dui ïgai bïïxi go gaa oidigi daama óídakami soimaaxkamigadï bïïtarï ïpï.

1 Juan 3:16

Daiñi, Suxi Kristo ïïgi gï tïïgi saidi gï muatudana gïr bïïtarï dai pobuadatai gïr tïtïïgidi ïgai ixdukatai kïïgakïrï oigïada aatïmï jaa. Dai gokïdï gï maatï sai gï agai aatïmï xi gamaakadagi tomax tumaxi dai asta ïïgi gïr ibhïdaga soiña rïrhiditai gïr aaduñi.

Apokalipsis 1:5

Dai Suxi Kristo ïgai dai kïïga aagai ixtumaxi ïr buaboi dai ïgai ïr ïpïgadï ix makïdï muu dai ïpamu duakatu dai ka mai muki agai ïpamu. Dai ïgai ïr Tïanïdamigadï bïïxi gupudagai bipiakami oidigi daama óídakami. Suxi Kristo kïïga gïr oigïdai. Daiñi, aaxi ïgai ïradï mukukai dai podukai kïïgakïrï gïr bubaitu gïr soimaaxkamiañdïrï.

Apokalipsis 5:9

Dai ami ganïyi ïgai ïmo utudui nïidagai ix makïdï ikaiti, —Aapi Kañiru kïïga bia sïïrhikami xi bhïiyagi go libro dai upandagi seseyogadï ixtukïdï kuupidi gobai. Aapi tudu gï ïrakïdï dáí namïgadï bïïxi óídakami dai podukai sabïlturhi aapi Diuxi. Bïïxi go naana maaxi óídakami saagidañdïrï sabïrhi aapi ïïmoko, bïïxi go naana maaxi ñokadami saagidañdïrï tudu dai go naana maaxi gïgïr kiikiañdïrï óídakami.

Apokalipsis 7:9

Dai bhodïrï tïï aanï sïïrhikïdï mui naana maaxi odami bïïxi aipakoga oidigi daamaiñdïrï óídakami. Ami gukatadai ïgai go gïï daikarui buidïrï xako sonoana kïïka go Arhi Kañiru tïgidukïdï. Mai bhaigakatadai tomarhi ïmadutai xi ïkaldagi go odami mos ïï muidukatai ïgai. Gukatadai odami bïïxi gïgïrï kiikiañdïrï óídakami tudu dai bïïxi go naana maaxi ñokadami saagidañdïrï dai gïn aadati ïgai yukuxi totoakami dai dagï guka ïgai soubarhi aagadï.