Exodo 32:13 - Northern Tepehuan Bible

¹³ —Gï tïgitoñi gï ñoki ix makïdï ïki aagidi aapi gï soikïdami Abraam ïmadï Isaak dai go Israel. Aidïpïrï gï báí aapi sai ix xïïxi oidaga xixabugai po kakiduka as agai piipixaradï ïgai. Bïïxi gï gubukadakïdï namïatudai aapi gï ñoki ix makïdï aagidi aapi go Abraam ïmadï Isaak dai Israel. Aagidi aapi ïpï sai ix makïdï maa aapi oidagadï piipixaradï ïr tuidadï ka agai tomaxi tuigako. Dai idi Israelitas xibi ïr go piipixaradï ix makïdï agaitadai aapi ïïki. Kaxkïdï gï daanïi aanï pïxi oigïdagi dai mai kodagi ïgai— itïtïdai Moises Gïr Nukadakami.

Exodo 32:13 Kruisverwysings

Genesis 12:2

Aanï kïï muidatulda iñagai gï piipixara— itïtïdai. —Kabami muidamu ïgai dai bïïxkïrï mos ïr ïmo odamikamu ïgai tomaxi apia bamioma muidamu ïgai. Dai aapi ïr ogadï ka agai ïgai. Aanï gï maakimu ïmo bhai ïrhiaragai gï abhana xi gï aatagadamu óídakami aipakoga dai aapi ïr soikïdakami ka agai mui odami— itïtïdai.

Genesis 12:7

Dai Gïr Nukadakami kïkiba Abram buitapi daidi potïtïdai, —Idi ïr go dïbïrai ix makïdï maakimu aanï gï maamara ïmadï gï piipixara maigobai— itïtïdai. Dai bhodïrï amaxi kïi Abram ïmo daxdakarui dai mua ïmo buxtaki dai daaxi Gïr Nukadakami. Ami gï maaxitu Gïr Nukadakami Abram buitapi xi kaxkïdï ami kïi ïgai go daxdakarui.

Genesis 15:5

Ïmo imidagai Gïr Nukadakami kidigamu busaitu go Abram daidi potïtïdai, —Nïidañi go tïbagi— itïtïdai. —Daidi nïida go xixabugai dai ïkalda pïx bhai ixtuidana ix naato ïkaldagi. Po kakidu ka agai gï piipixara tudu ix xïïxi oidaga xixabugai— itïtïdai.

Genesis 22:16

—Kïï ïïgidi aapi dai bhai aa xi gin maakiagi gï maara. Dai xibi an aagai sai gï abhana maakimu aanï ïmo gïdukami bhai ïrhiaragai. Bïïxi gin gubukadakïdï namïatudai aanï idi ñoki— itïtïdai. —Xïïxi oidaga xixabugai tïbagiana ïmadï orai go gïï sudagi ugidana po kaki gï maakimu aanï gï piipixaraga ïpï. Dai gï piipixara maitïmu buidïrï ix makïdï buidïrï bïïtïkagi— itïtïdai.

Hebreos 6:13

Diuxi bïïxkïrï ibuayi ixtumaxi aagadagi ïgai tudu. Kaxkïdï ïïgi gï báí Diuxi daidi aagidi ïgai go Abraam saidi buaboikïdï iduñi agai ïmo bhai ïrhiaragai abhana. Aagidi ïgai ïmo xadutudikami ñoki ïïgi gï bapasaitai aidï daidi potïtïdai, Ïïgi aanï ïr nïijadami saidi buaboikïdï iduñimu aanï bïïxi ixtumaxi gï aagidi aanï, itïtïdai. Dai kïïga gï maatï sai xïïxkadï ïmo odami gï baasagi saidi buaboikïdï iduña agai ixtumaxi aagaiña ïgai ïmo xadutudikami ñoki aagaitai ïmo ixtumaxi kabami namïakami. Dukami aagaiña ïgai sai Diuxi ïr nïijadami saidi iduñi agai. Dïï gia Diuxi bïïtarï mai tipu ïmo gïdukamioma xi ïgai dai kaxkïdï ïïgi gï aa ïgai. Daidi potïtïdai ïgai go Abraam,