Efesios 4:5 - Northern Tepehuan Bible

⁵ Ïmaduga Gïr Nukadakami dai ïmaduga gïr buaboidaraga dai ïmaduga gïr bakuanaraga ïpï.

Tepehuan Northern: Diuusi ñiooquidʌ utuducami oodamicʌdʌ

⁵ Mosaliʌ ʌmaduga gʌrtʌaanʌdamiga, vʌʌscatai aatʌmʌ vaavoitudadami ʌmadugan duucai vaavoitudai, dai mosʌmadugan duucai gʌrvapaconai aatʌmʌ,

Efesios 4:5 Kruisverwysings

Mataibo 28:19

Iimibïrai bïïxi oidigi daama tudu daidi abïr tïïgida gin ñoki bïïxi go naana maaxi ñokadami ix makïdï oidaga oidigi daama. Podukai abïr soikïda saidi ïr gin mamaatïrdamigakagi ïgai. Daidi bapakonadabïrai ïpï sai podukai maaxitudana ïgai saidi ïr oijadami ïgai Diuxi gin Oga dai saidi ïr aanï gin oijadamiga ïpï Maradïkatai aanï Diuxi. Dai go bapakonaragai ïr ïmo maaxidaragaika agai saidi ïr oijadami ïgai Diuxi Ibhïadï ïpï.

Hechos 10:36

—Daiñi— itïtïdai, —Aapimï kïïga maatï sai Diuxi maa ïmo bhai ïrhiaragai aatagi go judidiu. Aagidi ïgai sai mosïka Suxi Kristo gamaakai urabaragai Diuxi ïmadï. Dai Suxi Kristo ïgai dai bïïxi adama ïr gatïanïdami oidigi daama.

Hechos 2:36

Dai apia gamamaakai ñoki go Piduru daidi ikaiti, —Kaïkabïrai bïïxkatai aapimï judidiu. Gï aagai mïx kïï maatïkagi sai ï galbaaxi Suxi ix makïdï xixa aapimï kuruxiana ïr Diuxi Otosadï Gïr Bhaitï Kïakamiga. Ïgai tudu ïr gatïanïdamika agai oidigi daama— itïtïdai Piduru.

Romanos 3:30

Mos arhi ïmaduga Diuxi dai ïgai kïïgakïrï nïidi judidiu ïmadï ix makïdï maiti ïr judidiu mos buaboidaitai ïgai.

1 Korintios 1:13

Daiñi, aatïmï buaboitudadami ïr Suxi Kristo tukugadï gïr dukami dai Suxi Kristo tukugadï mai bhaiga ix ïjïkobai gï darasagi lïïlïchi. Kaxkïdï tudu maiti gï agai ix ïjïkobai iimia aapimï urabakatai aapimï kïkïïrhi ïjïkobai dai podukai gïn bupui bïïtïkagi aapimï. Daiñi, aanï Pabora ïr ïmoko go kïkïïrhi ix makïdï oidadan kaiti aapimï ¿Dai aanï ix tudu kuruxiana gin xixatu gïn bïïtarï? ¡Cho! ¿Dai aanï ix gin uraba agaitadai aapimï dai gïn bapakoi? ¡Xadïrï! ¡Daiñi! ¡Uraba aapimï Suxi Kristo bhaiyoma!

1 Korintios 1:2

Idi ojai ïr gïn bïitarï aapimï buaboitudadami Korintoïrï óídakami. Aapimï gïn bïïtarï tudu ix makïdï ka ïkobai gïn darai Diuxi bïïna darakatai aapimï Suxi Kristo. Ïko darasadï aapimï Diuxi gïn bapaidakai ïgai ïmadï bïïxi go gaa buaboitudadami ïpï ix makïdï bïïxi aipakoga daanïiña Suxi Kristo. Suxi Kristo tudu ïgai daidi ïr Tïanïdamigadï bïïxkatai aatïmï buaboitudadami.

1 Korintios 12:13

Aidïxi uraba gïr darai Diuxi Ibhïadï go buaboitudadami amaxi ïmo aadunumï bii aatïmï tudu tomaxi ïr judidiukagi aatïmï ix maiti ïr judidiukagi ïpï. Ïmo aadunumï bii aatïmï ix ïr soigaxikami dukai pipioñi aatïmï ix maiti ïr pipioñi ïpï. Tomax dukai bïïxkatai aatïmï bia Diuxi Ibhïadï dai kaxkïdï ïr ïmo aadunumï aatïmï.

1 Korintios 12:5

Aatïmï buaboitudadami naana dukai ibuayi aaduindadï Diuxi dïï mos arhi ïmo Gïr Nukadakami bïïtarï aatabuayi aatïmï.

1 Korintios 8:6

Dïï aatïmï kïï maatï sai mos arhi ïmaduga Diuxi gïr Oga ix makïdï idui bïïxi aïkatai. Ïgai bïïtarï tudu óídaga aatïmï. Dai mos arhi ïmaduga Gïr Nukadakami ïpï dai ïgai ïr Suxi Kristo. Ïgaikïdï idui Diuxi go oidigi dai ïgai gubukarhigadïkïdï óídaga aatïmï.

2 Korintios 11:4

Daiñi, kïï maatï aanï sai mai kïïga gïn nukadai aapimï dai asta bhai ïrhiarakïdï miadïgidiña aapimï tomax makïdï tïtïïgiadami ñoki ix makïdï gïn dibidagi. Kaïkana aapimï jaa ix makïdï ïma maaxi gïn tïtïïgidiña ñoki. Kaïkana aapimï ix makïdï ïma dukai aagaiña go Suxi Kristo tudu. Kaïkana aapimï tomaxi maiti ïr ïgalbaaxi aatagikagi ix makïdï gïn tïtïïgidiña aatïmï. Daiñi, ka bia aapimï Diuxi Ibhïadï gïn ïmadï dai ka buaboitu aapimï go bhai ïrhiaragai aatagi. Dïï gia bïïxkïrï kaïkana aapimï gamaakadami aatagi ix makïdï ïma dukai aagaiña Diuxi Ibhïadï dai ix makïdï ïma dukai aagaiña go bhai ïrhiaragai aatagi ïpï. Gatïtïïgidiña ïgai ïma maaxi ñoki tudu dai aapimï bïïxkïrï daadagitoiña ix gïn maakadagi ïgai ñoki dai bhai ïrhiarakïdï kaïkana aapimï. Mai kïï ibuayi aapimï pobuadatai.

Galatas 5:6

Ka bïïna daraka aatïmï Suxi Kristo tudu xi kaxkïdï mai xudu xi circuncidadugakagi ïmoko xiïpï xi mai circuncidadugakagi ïpï. Maiti ïr ixtumaxi gobai. Xibi mosïkaxi namïga xi buaboitudagi aatïmï Suxi Kristo dai xi gïr oigïdadagi aipakoga. Podukai tudu gïr oigïdaitai aipakoga maaxitudai aatïmï sai kïïgakïrï buaboitudai aatïmï.

Efesios 4:13

Suxi Kristo darai odami podukai gïr saagida saidi gïr soiñana xi aatïmï gïr abïnakiadagi aipakoga. Dai apia gïr abïnakiadamu aatïmï aipakoga aidï asta xïïxkadï kïïga ïmo tïgibudagai bipiatu aatïmï. Biakamu aatïmï ïmo tïgibudagai aidï oiditai gïr buaboidaraga ix makïdï ïmaduga dai kïïga ïïmadatai aatïmï Diuxi Maradï ïpï. Podukai gïïrhimu aatïmï asta xïïxkadï kïïga odan tutiakagi aatïmï ïpïan dukai Suxi Kristo.

Filipenses 2:11

dai biakamu xi aagadagi sai Suxi Kristo adaama ïr Tïanïdami. Podukai aagadamu ïgai bïïxi óídakami buitapi tudu dai podukai maaxitudamu ïgai xïïxi ïr gïdukami Diuxi gïr Oga.

Filipenses 3:8

Daiñi, aanï in bïïtarï gïïpi bamioma namïga sai urabaka aanï Suxi Kristo gin Tïanïdamiga dai bïïxi gobai ix tumaxi ibuadana aanï ïkioma ka mai namïga in bïïtarï. Ïmo boixibharu dukai nïidi aanï bïïxi gobai ix makïdï ibuadana aanï tudu. Bïïxi gobai ka dagito aanï tudu sai podukai biakana aanï urabaragai Suxi Kristo ïmadï

Tito 1:1

Bhaiga Tito. Aanï ïr Pabora ix makïdï gï otoxdi idi ojai. Pioñigadï aanï Diuxi ix makïdï gin maa ïmo sïïrhikami saidi ïr otosadïkana aanï Suxi Kristo. Aatabuayi aanï soiña iñïrhiditai buaboitudadami, kaxkïdï tudu Diuxi ïko bubaidadï ïgai. Soiña in ïrhidi sai kïïga buaboitudana ïgai. Kaxkïdï tïtïïgidiña aanï ixtumaxi ïr buaboi sai buaboitudaiña dai Diuxi maaxi tutiakana ïgai.

Tito 1:4

Gin maara dukai gï nïidi aanï Diuxi amadïrï aapi Tito, kaxkïdï tudu gin ïpïan dukai buaboitu aapi buaboidakai go ñoki ix makïdï gï tïtïïgidi aanï. Kaxkïdï gï ojidi aanï idi ojai. Dai ipïrhidi aanï sai Diuxi gïr Oga dai Suxi Kristo Gïr Nukadakami kïï tuigakagi gï bïïtarï dai sai gï ibhïxtakan taadakagi aapi gï ibhïdagïrï.

Hebreos 13:7

Gin aaduñi, gïn tïgitodabïrai xïï kïïga óídakaiña gïn bhaitï gukakamiga Diuxi amadïrï. Gïn tïgitobïrai xïï sïïrhi óídakana ïgai ix makïdï gïn tïtïgidi Diuxi ñokidï tudu dai ïpïan dukai abïr buaboitudada dai óídaka.

Hebreos 6:6

Daiñi, xi ïmo odami bïïxi ka taatagi gobai dai bïïxkïrï ïpamu aa gïxiagi, ix ka ïmo mukiadï dukai biiyagi ibhïadï ka dagitokai buaboidaradï, ïgai xadïrï ixtutuidiña ïmai xi ïma dukai gï tïgituldagi ïpamu. Xadïrï gï bhaigakana gobai. Daiñi, xïïxkadï dagitoagi ïgai Suxi Kristo ka ïpïan buayi ïgai go odami ix makïdï Suxi kuruxigadï buidïrï gukatadai dai gaparunaitadai aidïxi muu ïgai. Ïpïan dukami gobai xi kuruxiana xixamudai ïgai ïpamu Suxi Kristo. Ïmo gïdukami parunaragai gobai Suxi buidïrï tudu dai jaa odami gïn tïgito nïijadamu dai parunadamu ïpï. Agia maiti gï agai gobai.

Santiago 2:18

Daiñi, kïï bhaiga ïïmo odami ix pokaitadagi sai, kïïgakïrï bubuaki agaiña ibuadatai naana maaxi kïkïïgadukami aaduindagai. Dai jaa ikaitiña sai kïïgakïrï bubuaki agaiña mos kïïga buaboitudaitai. ¿Dai dukatai gï maatïkana ix bhai buaboikïdï buaboitudai ïgai ix maiti ibuadagi ïgai ixtumaxi kïkïïgadukami? Dïï gia aanï ikaiti sai aanï gia ibuayi ixtumaxi ïr kïïga dai podukai maaxitudai aanï jaa buidïrï sai kïïga buaboitudai aanï. Pobuayi aanï tudu.

1 Pedro 3:21

Kaxi gï duakaturhi Suxi Kristo ïpamu tudu dai kaxkïdï bia aatïmï kïïgakïrï bubaidaragai. Daiñi, aidïxi sudagiïrï dupi oidigi dai kïïgakïrï bubuaka go Noé ïmadï aaduñdï go barkoïrï iimïitai ïgai, gobai ïr ïmo maaxidaragai dukai gïr kïïgakïrï bubaidaraga bïïtarï ix makïdï bia aatïmï xibi. Aatïmï kïïgakïrï bubuakïi xibi buabotudakai aatïmï sai gï duakatu Suxi Kristo ïpamu tudu dai gïr bakuanai aatïmï sudagikïdï. Sudaïrï daibusai go Noé ïïki tudu dai xibi aatïmï ïpï sudaïrï dïgabuskïi gïr bakuanaitai aatïmï. Dai maiti gï agai sai po gïn ïrhiada aapimï sai go bakuanaragai ix makïdï ibuayi aatïmï mosïkaxi ïr ïmo buanaragai gïr tukuga bïïtarï. Gobai ïr ïmo xadutudaragai bhaiyoma ix makïdï ibuayi aatïmï Diuxi bïïtarï, ka maatïkatai aatïmï sai Suxi Kristo ka bhai dui gïr bïïtarï dai ka mai tipu soimaaxkami gïr abhana.

2 Pedro 1:1

Bhaiga gin aaduñi Diuxi amadïrï. Aanï ïr Ximuñi Piduru dai ïmo pioñigadï aanï Suxi Kristo otosadïkatai aanï ïgai. Gïn ojidi aanï aapimï ix makïdï buaboitudai ïpïandukai aatïmï ix makïdï ïr ojotosadï Suxi Kristo. Suxi Kristo ïr gïr Diuxiga dai gïr kïïgakïrï bubiadamiga. Kïïga buañixikami dukai dai kïïga sïïrhi aatadui ïgai dai podukai aatadunakai ïgai gïn ayi aapimï oigaragai ix kïïgakïrï bubuakiagi aapimï.

Udaxi 1:20

Gïn ïjïkobalda ïrhidi ïgai tudu. Dïï gia maiti abïr gïn dagitoda. Daiñi, kïïga maatï aapimï sai gïn oigïdai aanï gin aaduñi dai aanï aagai sai gï agai bhaiyoma ix gïn gupurtudagi aapimï aipakoga dai gïn soikïdagi aipakoga saidi bamioma gubuakami dukai buaboitudadagi aapimï. Sai kïïgioma oijadagi aapimï go buaboidaragai ix makïdï gïr maa Diuxi tudu. Dai daanïdabïrai Diuxi ïpï. Dai xïxkadï daanïdagi aapimï abïr ïïgiada Diuxi Ibhïadï saidi podukai ïgai gïn tïïgidana ix dukatai daanïdagi aapimï.

Udaxi 1:3

Kïïga gïn oigïdai aanï aapimï gin aaduñi. Dai kaxkïdï sïïrhikïdï ipïrhidiña aanï xi gïn ojidagi aagaitai go utudui oidakaragai ix makïdï bia aatïmï kïïgakïrï gïr bubaidakai Suxi Kristo. Gobai gïn ojida in ïrhidiña aanï tudu. Dïï gia xibi ka máí aanï sai oidaga tïtïïgiadami yaatagi gïn saagida ix makïdï ïr buidïrï bïïtïkami gïr buaboidaraga. Diuxi gïr tïïgi go buaboikïdï buaboidaragai aatïmï ix makïdï ïr ïko bubaidadï tudu dai bïïxkïrï bïïtarïka agai gobai. Kaxkïdï gï agai sai kïï sïïrhi gïn ojidagi aanï idi ojiïrï dai gïn abïnakiadagi saidi kabami gïn aajagïdagi aapimï dai kïïga nukatika go buaboidaragai ix makïdï gïn tïïgi Suxi Kristo. Maiti abïr gïn dagito ix gïn maitiagi go buidïrï bïïtïkamigadï go buaboikïdï buaboidaragai. Daiñi, oidaga tïtïïgiadami yaatagi ix makïdï mai ïïgidi Diuxi tudu dai gïn saagida daraka. Gïn bupuirumagi ïgai dai podukai bapai gïn saagida tudu. Pokaitiña ïgai sai odami bia oigaragai xi ïïgi gïn tïanïdagi daidi iduñagi ïïgi ixtumaxi iduña ïrhiadagi dai asta soimaaxi ibuadagi. Pokaitiña ïgai sai mai tipu buamï ïrhiaragai gokïdï mos ïï kïï tuigakatai Diuxi gïr bïïtarï. Maiti ipïrhidi ïgai xi ïïgiadagi Suxi Kristo Gïr Nukadakami kaxkïdï. Dïï gia ka ïki abhiadïrï ka podukai aagai Diuxi saidi toma xorai ix makïdï podukai gatïtïïgiadagi ñoki sai ïgai ïr gïpiïrï bïïtïkami dai taata agai gïgïbidaragai. Mai tipu ïmai xorai ïr Gïr Nukadakamikagi mosïkaxi Suxi Kristo tudu.