Efesios 1:4 - Northern Tepehuan Bible

⁴ Daiñi, ïïki, mai kia kïkibakai oidigi, Diuxi gïr darai sai aatïmï ïr ïko bubaidadïkana bïïna darakatai aatïmï Suxi Kristo. Aidïpïrï ïkiaxdïrï kaxi ïko gïr bubaitutadai Diuxi saidi aatïmï ïr ïko darasadïkana daidi sai mai tipukana soimaaxi gïr abhana ixtumaxi gïpiïrï gïr daitudagi ixtumaxi Diuxi buitapi.

Tepehuan Northern: Diuusi ñiooquidʌ utuducami oodamicʌdʌ

⁴ Diuusi ʌcovai gʌrvuvaitu maiquiaa iduucai oidigi abiaadʌrʌ. Daidʌ gʌrnʌidi ducami siCristo gʌrʌʌmadu daacagi. Suusi Cristo muuquia aagaitadai curusiaba tʌsai aatʌmʌ cʌʌgacʌrʌ vuvacʌna dai vuidʌrʌ guuquivana Diuusi maigʌpiʌr vʌʌtʌcatai gʌroigʌldacai Suusi Cristo gʌrsoimaascamiga. Dai poduucai casi ʌrducamicana istomali ʌmo imidagai maisoimaasi ivuaadamudai.

Efesios 1:4 Kruisverwysings

Mataibo 24:22

Xi dagitomudai Diuxi ix apia imïdagi go soi ïrhiaragai gobai, aidï gia bïïxi koimudai oidigi daama óídakami. Dïï gia Diuxi kïï oigïdai aaduñdï ix makïdï ïkobai bubaitu ïgai. Kaxkïdï ka podukai dáí ïgai sai otoma kugaidamu go soi ïrhiaragai gobai— itïtïdai Suxi.

Mataibo 24:24

—Dai dadimu jaa ïpï daidi potïimu saidi ïgai ïr go otosadï Diuxi ix makïdï nïnïraka go judidiu dai jaa potïimu ïpï saidi ïr ñokituldiadamigadï Diuxi. Naana maaxi buirumadaragai iduñimu ïgai ix makïdï odami ïïgi maiti ixtutuidiña xi ibuadagi dai podukai maaxituda agai xïï gupuka ïgai. Podukai bupuirumada agai ïgai mui odami. Dai asta ix makïdï Diuxi ka ïko bubaitu katoma buaboituda agai ïpï— itïtïdai.

Mataibo 24:31

Dai amaxi gï kaidatumu ïmo trompeta ix makïdï kabami ibada agai dai aidï otosamu aanï gin tïtïañikaruga bai ïgai ïmpaida agai bïïxi go odami ix makïdï ïkobai bubaitu Diuxi. Ïmpaida agai ix makïdï ïkobai bubaitu ïgai bïïxi oidigi daamaiñdïrï tudu— itïtïdai Suxi.

Mataibo 25:34

Dai bhodïrï aanï ix makïdï ïr go gïï Rey aagidamu ïmo ñoki go buaboitudadami gin sïïrhixapadïrï darakatai ïgai dai potïdamu aanï, —Gimibïrai aapimï ix makïdï Diuxi gin Oga ka maa ïmo gïdukami bhai ïrhiaragai. Aidï abhiadïrï xi mai kia kïkibatadai oidigi Diuxi ka bhai buayitadai ixdukatai gïn tïanïdagi tudu dai gobai ïr gïn bhai ïrhiaraga. Dai xibi ka ayi ix bhïiyagi aapimï gïn bhai ïrhiaraga urabakatai aapimï Diuxi aaduñdï ix makïdï gatïanïi ïgai.

VUAANA 10:16

Dai xibhïakoga bia aanï jaa odami ïpï ix makïdï maiti ïr judidiu. Xibhïadïrï óídakami kañiñiru gïn dukami ïgai dai gï agai ix buapa aanï dai bïïnaituda go judidiu ix makïdï kaxi gin urabaka. Aidï gia mosïkaxi aanï ïr paxturugadïka agai bïïxkatai dai ka mai biakamu ïgai paxtuturu omarhigakami dai ïxibugami. Aidï gia kïïga gin kaïkamu ïgai dai ïmo aadunumïkan dukai óídakamu ïmadï go judidiu ix makïdï kaxi gin urabaka.

VUAANA 15:16

—Gin aaduñi, mai xu ipïldakai aapimï ïr gin mamaatïrdamiga aapimï. Aanï ïgai dai ïkobai gïn bubaitu bhaiyoma dai gïn darai sai aapimïkïdï ibuadagi Diuxi naana maaxi ix tumaxi ix makïdï bhai ïrhidi ïgai dai ix makïdï bïïxkïrï bïïtarï kabaka agai. Kaxkïdï gïn maakimu Diuxi bïïxi ix tumaxi tanïdagi aapimï gin mamaatïrdamikatai aapimï.

VUAANA 17:24

—Gin Oga— itïtïdai. —Ipïrhidi aanï ix gin mamaatïrdamiga ix makïdï gin maa aapi gin ïmadï darakana tïbagiana bai podukai nïidiña ïgai xïïxi ïr gïdukami aanï. Aapi gin Oga ïgai dai gin dáí saidi ïr ïmo gïdukamikana aanï gin oigïdaitadai aapi ïïki abhiadïrï aidïxi mai kia tipukatadai oidigi— itïtïdai.

Hechos 13:48

Daidi ix makïdï maiti ïr judidiu kïïga bhai gïn ïrhi kaïkatai aatagidï Pabora. —Gia kïïgadu Diuxi ñokidï— ikaitimi ïgai. Dai bïïxkatai buaboitu ix makïdï Diuxi ka ïkobai bubaitutadai sai biakana urabaragai ïgai ïmadï bïïxkïrï bïïtarï.

Hechos 15:18

Gïr Nukadakami ïgai dai pokaiti ïïki tudu dai ïgai podukai iduñimu.

Hechos 18:10

Aanï gï ïmadï daja aidï dai tomaxi odami gï bui surhiagi aanï mai dagitomu xi gï galdoadagi dai mui odami tami Korintoana ïr gin oijadami ka agai— itïtïdai Gïr Nukadakami tïïtïkiïrï dukai.

Romanos 8:33

Daiñi, Diuxi kïïgakïrï gïr nïidi xibi. ¡Aatïmï ïr ïko bubaidadï di! ¡Kaxkïdï xibi mai tipu xorai gïpiïrï gïr bupadagi!

1 Korintios 1:8

Ïgai tudu gïn soiñamu xibi ix kabakan dukai gukibana aapimï gïn buaboidaragïrï asta go kugatïrï tasïrï ukami bai podukai xïïxkadï dibiagi Suxi Kristo Gïr Nukadakami mai tipukagi tomarhi ïmo ixtumaxi ixtukïdï gïpiïrï gïn bupadagi jaa.

Galatas 5:13

Daiñi gin aaduñi, Diuxi gïn báí mïsai kïïgakïrï óídakana aapimï. Gïn báí ïgai sai ka mai biakagi aapimï xi pipioñi dukai ïïgiadagi ïmo sïïrhikami tudu kabami gïn tïanïitai gobai. Ka kïïgakïrï gïn bubaitu ïgai tudu. Kaxkïdï kabami soi gin ïrhidiña aanï gïn aagiditai jaa sai bia aapimï xi ïïgiadagi go sïïrhikami. Maiti ïr podukai di. Daiñi, kïïga ïr buaboi tudu sai mai gubuakïdï bia aapimï xi ïïgiadagi go sïïrhikami sai podukai kïï biïna Diuxi ïmadï. Dïï gia maiti abïr po gïn ïrhiada ïpï sai bhaiga aapimï xi ibuadagi ïïgi ixtumaxi iduña ïrhiada aapimï oiditai ïïgi gïn tïgibudaga. Gï agai bhaiyoma xi aipakoga gïn soikïdagi aapimï gïn oigïdatai aipakoga.

Galatas 5:22

Dïï gia xïïxkadï ïïgiadagi aatïmï Diuxi Ibhïadï gïr ïrana aatabuayi ïgai dai bhai buayi naana maaxi kïïgadukami gïr ïrañdïrï. Ïïgiditai aatïmï Diuxi Ibhïadï oigïdaiña aatïmï jaa dai bhai gïr ïrhidiña dai gïr ibhïxtakan taadakana aatïmï gïr ibhïdagïrï. Kïïga gïr kabakadaiña aatïmï ïpï xïxkadï soimaaxi taatamadagi. Kïï tutiakana aatïmï jaa bïïtarï dai ibuadana ixtumaxi ïr kïïga. Bïïxkïrï ibuadana aatïmï ix tumaxi aagagi aatïmï ïpï.

Galatas 5:6

Ka bïïna daraka aatïmï Suxi Kristo tudu xi kaxkïdï mai xudu xi circuncidadugakagi ïmoko xiïpï xi mai circuncidadugakagi ïpï. Maiti ïr ixtumaxi gobai. Xibi mosïkaxi namïga xi buaboitudagi aatïmï Suxi Kristo dai xi gïr oigïdadagi aipakoga. Podukai tudu gïr oigïdaitai aipakoga maaxitudai aatïmï sai kïïgakïrï buaboitudai aatïmï.

Efesios 2:10

Bhaiyoma Diuxi ïgai dai gïr utuduturhi bïïnakai aatïmï Suxi Kristo. Ïgai ipïrhidi xi aatïmï ibuadagi ixtumaxi ïr kïïga, kaxkïdï pomaaxi bïïtarï gïr utuduturhi ïgai. Dai ipïrhidi ïgai xi óídakagi aatïmï xibi ibuadatai go kïïgadukami aaduindagai ix makïdï ïgai ïkiaxdïrï bhai dui xi buadagi aatïmï.

Efesios 3:17

Daanïi aanï sai Suxi Kristo kïïga biakagi oidagakaradï gïn iibhïdagïrï kïïga buaboitudaitai aapimï. Dai sai kïï kabakami dukai gukibana aapimï maatïkatai xïï kïïga gïn oigïdai Diuxi.

Efesios 4:2

Maiti abïr gïgïrdukïdï gïn ïrhiada ïïgi aapimï toma lachi dai kïïga abïr tutiaka jaa bïïtarï. Gupurtudabїrai gïn iibhïdaga daidi abïr mai ojodada go gaa buaboitudadami. Bhaiyoma abïr gïn oigïada aipakoga tomax dukai.

Efesios 5:2

Kïïga abïr oigïada jaa aidï. Daiñi, Suxi Kristo gïr oigïdai kaxkïdï ïïgi gï dagito ïgai sai gï muatudana ïmo daxdaragai dukai. Podukai bhai dui ïgai gïr bïïtarï soimaaxi idunakai aatïmï. Dai Diuxi kïï bhai ïlda tïï Suxi Kristo daxdaradï. Kïï xigian dukai ubagi ïgai.

Efesios 5:27

Suxi Kristo buanai go buaboitudadami xi podukai kïïga xigiamaaxkagi aatïmï xïxkadï buitapi gïr baan tutusagi ïgai. Bai kïïga xigiamaaxkagi aatïmï aidï mai biakatai toma lachi tukuragai xi podukai mai biakagi aatïmï toma lachi soimaaxi gïr abhana.

Filipenses 2:15

Podukai mai tïigimu jaa ixtukïdï gïpiïrï gïn bupadagi. Kïïga abïr buañixikami dukai óídaka tudu Diuxi maamaradïkatai aapimï. Abïr mai dagitokatai oijada go aatagi ixtukïdï kïïgakïrï óídakana odami sai podukai ïr kudagi dukaikana aapimï óídakatai aapimï saagida go soimaaxi ibuadami dai pupuirugami ix makïdï oidaga tami oidigi daama. Podukai abïr óídaka tudu sai biakana aanï ixtukïdï bhai gin ïrhiadagi xïxkadï dibiagi Suxi Kristo. Sai maatïkana aanï aidï sai mai mos ïïgikïdï aatadui aanï.

Kolosenses 1:22

Buidïrï bïïtïkamikatadai aapimï Diuxi tudu. Dïï gia Suxi Kristo bhai dui gïn bïïtarï sai podukai ka mai buidïrï bïïtïkana aapimï. Dibia ïgai tami oidigi daama dai bhïiyi ïmo tukugai ïpïan dukai ix makïdï bia aatïmï dai muu ïgai kuruxiana dai ami bhai dui gïn bïïtarï. Dai xibi ka buitapi gïn tutui ïgai Diuxi. Xibi kaxi ïr ïko bubaidadï aapimï Diuxi tudu dai ami Diuxi buitapi guka aapimï mai biakatai ixtukïdï gïpiïrï gïn bupadagi ixtumaxi.

Kolosenses 2:2

Kabami ipïrhidi aanï tudu sai aapimï ïmadï bïïxkatai ïgai kïïga abïnakian taadakagi dai sai kïïga gïn urabakagi gïn oigïdaitai aipakoga. Kabami ipïrhidi aanï sai biakana aapimï ïmo ixtumaxi kïïga namïakami. Ipïrhidi aanï sai gïn ibhïxtakan taadakagi aapimï kïïga maatïkatai aapimï Suxi Kristo tudu. Daiñi, go óídakami ïïki mai maatïkatadai sai oidaka agai ïmo kïïgakïrï bubiadami ix makïdï odami ïrana oidaka agai. Diuxi mai maaxiturhi ïgai kaxkïdï. Dïï gia ipïrhidi aanï sai aapimï gia kïïga maatïkana.

Kolosenses 3:12

Daiñi, xibi aapimï buaboitudadami kaxi ïr ïko bubaidadï Diuxi. Ïkobai darasaka aapimï Diuxi bïïtarï tudu dai gïn oigïdai ïgai. Kaxkïdï abïr soi gïn ïrhiada nïiditai jaa ix makïdï soimaaxi taatamadagi daidi abïr kïï tutiaka buidïrï jaa odami ïpï. Maiti abïr gïgïrdukïdï gïn ïrhiada daidi abïr kïï bhai maaxkami buidadagi jaa mai omarhigakatai buidïrï. Maiti abïr otoma ojodada go jaa xïïxkadï mai kïï ibuadagi ïgai.

1Tesalonicenses 3:12

Daanïiña aatïmï ïpï sai gïn soiñana Suxi Kristo sai apia kïïgioma gïn oigïdada aapimï aipakoga dai sai kïïgioma oigïdada aapimï jaa ïpï. Sai ix xïïxi gïn oigïdai aatïmï sai pokaxi oigïdada aapimï jaa.

1Tesalonicenses 4:7

Diuxi gïr báí mai xu sai soimaaxi ibuadagi aatïmï tudu dai bhaiyoma gïr báí sai ïgai bïïtarïkana aatïmï.

2 Timoteo 1:9

Daiñi, Diuxi kïïgakïrï gïr bubaitu dai gïr báí saidi ïr ïko darasadïkana aatïmï. Dai mai xu ix kïïga idui aatïmï xi kaxkïdï ïkobai gïr bubaitu ïgai dai bhaiyoma kïï tuiga dai ïgai podukai gï tïgito ïïki mai kia tipukatai oidigi. Kaxkïdï kïïgakïrï gïr bubaitu ïgai.

2 Timoteo 2:10

Dai kaxkïdï bhai aagaiña aanï xi soiñagi go odami ix makïdï Diuxi ïko bubaitu tomaxi naana dukai soimaaxi taatamaiña aanï soikïitai. Soiña in ïrhidi buaboitudadami tudu sai bïïxkïrï bïïtarï biakana ïgai gïïpi bhai ïrhiaragai bïïna darakatai ïgai Suxi Kristo.

2 Timoteo 2:19

Dïï gia tomaxi oidaga odami ix makïdï aatagai ixtumaxi maiti ïr soiñi bïïxkïrï Diuxi ñokidï gia ïr buaboi dai mai ïmapïbuayi. Ïmo simiento dukai kïï kabakami Diuxi ñokidï gïr buaboidaraga bïïtarï. Diuxi ñokidïkïdï tudu kïï kabakami kïïka go buaboidaragai ix makïdï gïr maa Diuxi. Dai ami Diuxi ñokidïrï ikaiti sai, —Diuxi maatï xorai ïr maamaradï— Dai, —Odami ix makïdï pokaitadagi sai buaboitudai Diuxi gï agai ix gajiadïrï biagi go soimaaxkami— ikaiti Diuxi ñokidï.

Santiago 2:5

Gin aaduñi, kïïga gïn oigïdai aanï. Kïïga abïr gïn tïgito kaïka ixtumaxi gïn aagidamu aanï. Gïn maakimu aanï ñoki tudu. Daiñi, Diuxi ka podukai dáí sai mui soititigami ïr buaboitudadamika agai dai podukai gïn bipidakami dukai bii agai iibhïadïrï buaboitudaitai ïgai tomaxi tami oidigi daama bhaitoma mai bia ïgai ixtumaxi. Biakamu ïgai oigaragai xi Diuxi tïanïdagi tudu. Gobai tudu ïr go bhai ïrhiaragai ix makïdï maaki agai Diuxi go odami ix makïdï oigïdai Diuxi. Ka podukai aagai ïgai tudu.

1 Pedro 1:2

Diuxi gïr oga ka ïkiaxdïrï maatï bïïxi aïkatai ixtumaxi daibuña agai dai kaxkïdï podukai gï tïgito ïgai dai ïïki abhiadïrï ka ïkobai gïn bubaitutadai ïgai saidi ïr aaduñdïkana aapimï. Ka ïkobai gïn buaboitu Diuxi Ibhïadï tudu saidi Suxi Kristo ïradï ix makïdï aaxi ïgai namïakana gïn bïïtarï saidi oigïldana Diuxi gïn soimaaxkamiga dai sai kïïga ïïgidiña aapimï ïgai. Gin aaduñi, ipïrhidi aanï ix Diuxi bamioma gïn tïïgidana xïï kïï tuiga ïgai gïn bïïtarï dai sai gïn maakana ibhïxtaragai gïn ibhïdagïrï.

1 Pedro 1:20

Ka ïki abhiadïrï ka podukai gï tïgitokatadai Diuxi sai Suxi Kristo ïgaika agai dai kïïgakïrï gïn bubaida agai. Ka podukai dáítadai ïgai mai kia idunakai oidigi tudu. Dïï gia asta utudami xibiapioma dibia go Suxi karhioga ugiti agaitai oidigi. Dibia ïgai kïïgakïrï gïn bubaida agaitai tudu.

1 Pedro 2:9

Dïï aapimï gia mai taata agai gïgïbidaragai podukai. Aapimï ïr ïko bubaidadï Diuxi tudu dai ïr ix makïdï maa ïgai sïïrhikami saidi ïr dadaxdadamigadïkana aapimï. Ïmo aadunumï aapimï xibi ïkobai darasadïkatai aapimï Diuxi dai ïgai tuidadï aapimï. Kaxkïdï xibi bhaiga aapimï xi maaxitudagi jaa bïïtarï xïï kïï tuiga Diuxi. Kaxi gïn busaitu ïgai abhiadïrï xako tukapi dukai óídakatadai aapimï mai maatïkatai ixtumaxi ïr buaboi tudu. Dai xibi gia kaxi gïn daibuñtu ïgai xako xigiamaaxi gïn oidakaraga kïïga tonoraka maaxkatai gobai.

2 Pedro 3:14

Gobai nïnïraka aapimï tudu gin aaduñi. Dai kaxkïdï abïr kabami gïn aga dai buañixikami dukai óídaka sai mai tipukagi ixtukïdï gïpiïrï gïn bupadagi jaa. Podukai abïr ibuada saidi kïïga xioma uraban dukai óídakana aapimï buitapi Diuxi.

1 Juan 4:16

Gin aaduñi, kïïga maatï taatamai aatïmï ix gïr oigïdai Diuxi. Dai kïïga iibhïxtakan taadakana aatïmï kïïga buaboitudaitai ix gïr oigïdai ïgai. Daiñi, mosïkaxi Diuxi ïgai ix makïdï buaboikïdï oigïdai odami dai ïgai gïr mamaakai gubukarhigai ix aatïmï oigïadagi jaa ïpï. Kaxkïdï gï maatï sai odami ix makïdï mai ugutai oigïadagi jaa, kïïga gï maatï ix urabaka ïgai Diuxi. Dai podukai gï maatï ïpï ix Diuxi ïgai ïmadï daja.

Apokalipsis 13:8

Dai bhaitoma bïïxi oidigi daama óídakami xadutuada agai go kïixi Diuxi dukai. Dïï gia go odami ix makïdï ojixi go libroïrï ix makïdï bia go Arhi Kañiru ïgai gia mai xadutuada agai go gïï kïixi. Go Arhi Kañiru ïgai makïdï gï muatu dai bia ïmo libro xako ojixi odami ix makïdï bïïxkïrï bïïtarï óídaka agai. Aidï abhiadïrï xi mai kia kïkibatadai oidigi biakana ïgai go libro tudu. Dai odami ix makïdï ojixi ami libroïrï gia mai xadutuada agai go gïï kïixi.

Apokalipsis 17:8

—Daiñi— in tïtïdai. —Go kïixi ïr ïgai ix makïdï oidakatadai ïkioma dai xibi ka mai oidaga. Dïï gia xibi bhai otoma duakatumu ïgai ïpamu dai busaimu abhiadïrï xako bii ïgai mukukai. Busaimu ïgai go gïï tukabakami dïgaiñdïrï tudu. Dai busaikai ïgai go odami mai buaboitudadami mai tïïgimu ixtumaxi gïn tïtïgitoagi nïiditai ix duakatu go kïixi ïpamu. Go odami tudu ix makïdï mai ojixi go Arhi Kañiru librogadïrï. Mai ojixikana ïgai ïïki abhiadïrï aidïxi abhiadïrï xi kïkiba oidigi tudu. Dai busaimu go kïixi abhiadïrï go gïï dïgaiñdïrï dïï xibi gia imimu ïgai xako Diuxi gïgïbitulda agai bïïxkïrï bïïtarï— in tïtïdai go Diuxi tïañikarudï.