Yohane 10:16 - Sura Malelaha

¹⁶ Ara manihe dimbaKu au ntanina, agaiana barahe hangko i gimpu ide. Ihira, hangangaa Kunini worihe mai. Ina raisa mpuu wotuNgku, ina mewali peahe hantobu, hai hadua pea au mamporewuhe.

Yohane 10:16 Kruisverwysings

Matiu 17:5

Tangana mani Peturu mololita, unga pea hawe gawu au mewangka mobalungkuhihe, hai hangko i lalu gawu iti mohadihe hambua wotu au manguli, “Idemi AnaNgku au Kupokakaia hai au Kupokatana. Nipehadingi lolitaNa!”

Lukasi 15:8

Napaliliu Yesu lolitaNa hai ngkora pandiri ide, Nauli, “Pandirina ara hadua towawine au mowoli hampulo pekana doi pera. Ane matanta hampeka, apa au nababehi? Ia lao mohuwe hulo hai mokawohi souna. Batena nahaoki duuna nalambi.

Yohane 10:11

Ikomi toporewu au maroa. Toporewu au maroa mokira tuwoNa i dimbaNahe.

Yohane 10:2

Hema au mesua moliu i babaka, ia toporewu.

Yohane 10:27

Dimbaku mohadi wotungku. Kuisa mpuuhe, hai raulana.

Yohane 10:3

Topokampai gimpu mobungkahia babaka, hai dimbana, raisa mampekatandai wotuna. Toporewu iti mokakio hanganda hambaa-hambaa hai naerihe lao i raoa.

Yohane 10:4

Ane opemohe dimbana i raoa, molumaomi iorunda, hai dimbana meulahe iria, lawi raisa mampekatandai wotuna.

Yohane 10:5

Barahe moula tauna ntanina. Ane ara tauna au bara toporewunda au mokakiohe, tauna iti rapelangkaha, lawi bara raisa wotuna.”

Yohane 11:52

Hai bara pea to Yahudi. Anti kapatena Yesu iti, ope-ope anana Pue Ala au mahawu-hawu i humalele dunia ina ragulu hai rapahintuwuhe.

Yohane 17:20

Bara peahe topeguruNgku au Kupekakaea. Agaiana mampekakaea worina tauna au ina mepoinalai Iriko hangko i posabinda.

Yohane 6:37

Ope-ope tauna au naweimoNa UmaNgku, batenda mai Iriko. Hai hema pea au mai Iriko, batena Kudoko hai bara Kusapuaka.

Suro 15:14

Napahaweamoke Simo Peturu noumba Pue Ala nguru-nguruna motudungiahe ahiNa i tauna au barahe to Yahudi. Napilei worihe bona mewali taunaNa.

Suro 18:10

lawi Kuporangaiko, hai Kukakiomohe bosa tauna i wanua ide au ina mewali taunaNgku. Bara ara hadua au ina mopatoa taiena irio ba mampopeahi-ahiko.”

Suro 22:14

Roo indo, nauliangaa mbulina, ‘Pue Ala au rapenombai toiorunta hangkoia mopileimoko bona nuisa apa peundeaNa. Napileiko bona moitako Yesu, Hawina Pue Ala au manoto, hai bona nuhadi lolitaNa.

Roma 11:25

Halalungku hampepepoinalai! Kupeinao mouliangaakau apa tunggaiana Pue Ala au bara raisa tauna hangkoia. Kuuliangaakau ide bona ineekau mampemahile. Bona niisa: ide-ide hanggaa to Yahudi matua lalunda agaiana iti bara mahae, duuna handa kabosanda tauna au barahe to Yahudi au mepoinalai i Yesu hintoto hai tunggaiana Pue Ala.

2 Tesalonika 2:13

Halalu-halalu au napokaahi Pue, hintoto mpuungkai manguli liliu ngkaia kamaroana i Pue Ala anti kaikamuna. Lawi Pue Ala mopileikau hangko i nguru-nguruna bona tehoremakau hangko i huku dosami anti pepoinalaimi i bambari au tou. Napileimokau bona Nahoremakau anti kuasana Inao Malelaha au mampopewalikau taunana Pue Ala au malelaha.

Ibarani 13:20

Mekakaena i Pue Ala, pongka roa ngkatuwo au mopakaroho podandiNa au mopahintuwuke hai Ia hawe i hae-haena, melempo i wahena Amputa Yesu au rapapate hai au Napatuwo hule hangko i kapate, hai Naangka mewali Toporewu au meliu kamaroana irikita dimbaNa.

1 Peturu 2:10

Hangkoia, barakau taunaNa, agaiana ide-ide mewalimokau taunaNa. Hangkoia, barakau Napokaahi, agaiana ide-ide molambimokau pepokaahiNa.

1 Peturu 2:25

Hangkoia nodokau dimba au puha. Agaiana ide-ide mesulemokau i hadua Toporewu au mokadipura tuwomi hai pepoinalaimi.

1 Peturu 5:4

bona ane hawe Toporewunta au meawa tuwoNa, ina Naweikau hambua songko datu au mengkila-ngkila liliu hawe i hae-haena.

Pampetudungia 3:20

Peita! MeangkaNa i baba hai Kutidongko. Ane ara au mohadi wotuNgku hai nabungkahiaNa, ina mesuaNa i lalu hai maidaNa indo hihimbela hai ia. Ina maandeNa hihimbela hai ia, hai ia wori ina maande hihimbela hai Iko.