Yakobu 4:1 - Sura Malelaha

¹ Halalu, moapari pane ara pobungka-bungka hai pombehahanai i olomi? Bara pae hangko i peundeami haduduami au mombeala liliu i lalumi?

Yakobu 4:1 Kruisverwysings

Matiu 15:19

Lawi hangko i lalunta mesupa hinangkana pekiri au kadake, alana ara au mepapate, mebualosi, metie, manangka, mosabi dongko hai mengkora-ngkora.

Yohane 8:44

Umami iami Datu Tokadake! Hai nipeinao moula liliu peundeana umami iti. Hangko i nguru-nguruna ia topepapatemi. Paturona bara tou, lawi bara ara au tou iria. Ane modongko, itimi poantina, lawi ia topodongko mpuu, hai ope-ope tauna au modongko moulahe peundeana.

Roma 7:23

Agaiana atura iti barari kupeulai, lawi ara kuasa ntanina i lalu katuwongku au monangina. I lalungku, kuunde mpuu moula Aturana Pue Ala, agaiana kuasa dosa au i lalu katuwongku moewa peundeaku iti, alana nanangina dosa hai kupeulai pearai peundeana lalungku au kadake.

Roma 7:5

Hangkoia, i kadanta mani mepoinalai i Yesu, tapeinao peami mobabehi au kadake. Hai apa au rakontoake i Aturana Musa, itiri au tapeinao tababehi. Lawi i lalu katuwonta hangkoia, watanta tapake mobabehi dosa, alana hintotoke rahuku mate hai ragaakike hangko i Pue Ala.

Roma 8:7

Tauna au moulahe peundeana lalunda au kadake, moewahe Pue Ala. Barahe mengkoru i hawana Pue Ala, lawi bara rabuku.

Galatia 5:17

Lawi peundeana lalunta au kadake moewa peundeana Inao Malelaha. Ane tapeulai peundeana lalunta au kadake, bara tababehi apa au maroa moula peundeana Inao Malelaha; hai ane tapeulai peundeana Inao Malelaha, bara tababehi apa au kadake au ara i lalunta.

Kolose 3:5

Mewali, anti kamatenta hihimbela hai Kerisitu, hangangaa takabaha babehianta hai katuwonta au hangkoia. Ineekau motambi-tambi dele, ineekau mobabehi babehia au merikai. Ineekau mohaoki au kadake, ineekau mampokaelu anu-anuna rangami. Lawi hema au mobabehi iti, himbela hai tauna au menomba i anitu.

2 Timotiu 2:23

Arahe tauna au mampombehanaingi liliu paturo au bara mobundu, agaiana bara mani manoto i lalunda paturo au tou. Inee nupesuaki pombehahanainda iti, lawi nuisa paturo iti mopaara pea posisala.

Titu 3:3

Lawi hangkoia, makaindi mani lalunta, bara taisa rara au manoto, taliungi AturaNa. I tempo iti, napohawi manike peundeana lalunta au kadake hai katana dunia au mepakanawo. Kadake lalunta, mahinake i ranganta, hai mombekahihi peake.

Titu 3:9

Agaiana ara worihe tauna au mombehehe hai mampombehanaingi atura agama Yahudi ba tuntukana pemuleanda. Nukaraohihe! Nupalehi peamohe i pombembehanainda au bara mobundu hai au bara moanti pewati i tauna.

Yakobu 1:14

Agaiana ope-ope tauna tekelo i temponda nadii peundeana lalunda au kadake.

Yakobu 4:3

Nauri pae niperapimi, agaiana bara ina nilambi, lawi tunggaiami bara maroa. Lawi apa au niperapi iti, ina nipake pea mopabukei peundeana lalumi haduduami.

1 Peturu 1:14

Napoanamokau Pue Ala, ido hai hangangaa nipeulai hawaNa. Ineekau moula peundeami haduduami nodo hangkoia i tempomi mani tuwo i lalu kamakaindi.

1 Peturu 2:11

Halalu au kupokaahi! Ikita i lalu dunia ide, nodoke torare ba topolilo, lawi maidake i olonda tauna au barahe mepoinalai i Pue Ala. Ido hai kuweikau lolita: ineekau moula peundeana lalumi au kadake, lawi iti moewa tunggaiami mengkoru i Pue Ala.

2 Peturu 2:18

Polololitanda mampemahile, hai bara mobundu. Modiihe lalunda tauna hai peundeanda au merikai alana tauna iti rapakanawohe, moleri tauna iti bara manihe mahae mopalehi babehianda au kadake.

2 Peturu 3:3

Ara au hangangaa nikatuinao ntepuu: i alo-alo au ina mai i kahopoa tempo ide, ina hawehe tauna au nakuasai peundeana lalunda au kadake. Tauna iti ina mokakabosaikau,