Pilipi 4:8 - Sura Malelaha

⁸ Kahopoana halalu, kuperapi bona nipailalu liliu hinangkana au maroa hai au hintoto ratoia. Apa au tou, apa au hintoto rabila, apa au manoto, apa au malelaha, apa au merae, hai apa au teadai, itimi au hangangaa nipailalu.

Pilipi 4:8 Kruisverwysings

Matiu 22:16

Ido hai rapohawaamohe bahangkia topegurunda hai bahangkia taunana Datu Herode lao i Yesu. Kahawenda, rauliangaa, “Guru, kiisami kaOiona tauna au manoto. MepaturoKo i katou-touana moula peundeana Pue Ala. Bara Nupeulai pampekirinda hema pea, lawi baraKo mampopontani tauna.

Markus 6:20

lawi Herode motuduhe surodadona mokampai Yohane i lalu tarunggu. Herode bara bai mopapate Yohane lawi naisa kaiana tauna au manoto laluna hai malelaha tuwona. Ane mohadi lolitana Yohane, wuli mpuu laluna, agaiana matana wori laluna mohadi.

Lukasi 16:15

Agaiana nauliangaahe Yesu, “Mampemanotokau i peitana tauna, agaiana Pue Ala moisa ihi lalumi. Lawi apa au nahaoki manusia, itimi au nakahihi Pue Ala.

Lukasi 2:25

I Yerusale, ara hadua tauna au rahanga Simeo. Simeo iti, iami tauna manoto au mengkoru i Pue Ala, hai ia mampoinalai kaina hawena tempona Pue Ala mokabaha to Isaraeli. Hai ia naporangai Inao Malelaha au mouliangaa kadana mani mate ane bara mani moita Datu Topehompo au nadandi Pue Ala.

Lukasi 23:50

I tempo iti, ara hadua tobalilo au rahanga Yusupu au hangko i boea Arimatea i tampo Yudea. Yusupu iti, iami tauna au maroa laluna hai manoto babehiana. Mahaemi mampegia kahawena poparentana Pue Ala. Ia wori hadua tadulako i Pogombo Topeparesa Mahile Agama Yahudi, agaiana bara napokana pobotusinda tadulako iti au manguli Yesu hangangaa rahuku mate.

Yohane 7:18

Tauna au mopahawe paturona haduduana, mohaoki pea bona ratoia. Agaiana tauna au mohaoki bona hema au motuduna ratoia, manotomi tauna iti bara modongko.

Suro 10:22

Rahanai, “Tua Kornelius, tadulako surodado Roma, motudungkai mai inde. Ia, tauna au manoto laluna hai mengkoru mpuu i Pue Ala, hai rabila wori ope-ope to Yahudi. Ia natudu hadua malaekana Pue lao mokakioko naanti i souna bona peisa mohadi apa au ina nuuliangaa.”

Suro 22:12

I Damsik, ara hadua tobalilo au rahanga Ananias. Tauna iti, manoto, hai maroho peulana i Aturana Musa. Ia rabila ope-ope to Yahudi au maida i Damsik.

Suro 6:3

Mewali, halalu-halalu, agina nipilei hangko i olomi pitu tauna au maroa babehianda, au nakuasai Inao Malelaha hai au mapande. Irihira au kiwei bago mokadipura pokira-kira paande iti.

Roma 13:13

Nibabehi babehia au hintoto i kabaakana. Ineekau mosusa-susa hai malangu-langu. I babehia tobalilo hai towawine, ineekau mobabehi babehia au sala ba au moula peundeana lalunta au kadake. Ineekau mobungka-bungka ba mahina.

Roma 13:3

Ane maroa babehianta, barake langa i topoparenta. Au langa, batenda pea tauna au kadake babehianda. Mewali, hangangaa mobabehike au maroa bona ratoiake hai datike langa i topoparenta.

Roma 14:18

Ane nodo peulanta i Kerisitu, ikita ina napokatana Pue Ala hai rabilake ranganta.

Roma 2:29

To Yahudi au nadokohe Pue Ala, iami tauna au moulahe Aturana Pue Ala hangko i lalunda hai tou-tou mpuuhe ratile i lalunda. Lempona, nadokohe Pue Ala anti pobagona Inao Malelaha i lalunda, bara anti peulanda i atura-atura au teuki. Tauna itimi au ina natoia Pue Ala. Kehapirihe bara ratoia tauna, agaiana batena napomahilehe Pue Ala.

1 Korintu 4:5

Ido hai kuuli, ineekau mosalai pobagonda hangka rangami. Nipegiami kahawena hule Pue. Iami au ina mobungkahi ope-ope au tewuniangi mani i lalu kamakaindi. Ia au ina mopatongawa ope-ope tunggaianda tauna au tewuniangi mani. I tempo itimi, hadua-hadua tauna ina molambi petoia hangko i Pue Ala moula kahintotoana.

2 Korintu 13:7

Mekakaengkai i Pue Ala bona Natulungikau datikau mobabehi sala. Barakau kipekakaea bona mampetudungiangkai kamapandeki mobago agaiana bona mobabehikau apa au hintoto hai peundeana Pue Ala. Nauri ara manihe tauna au mosapuaka kuasangki, bara moapa, asala ikamu mobabehi liliukau apa au maroa.

2 Korintu 6:8

Kehapiringkai rakakabosai ba ratoia, rasalai ba rabila, mampopolumao liliungkai bagona Pue Ala. Arahe au manguli modongkongkai, agaiana mampololitangkai apa au tou.

2 Korintu 8:18

Kitudu wori hadua halalunta lao irikamu hihimbela hai Titu. Ia ratoia i ope-ope jumaa anti pobagona mobambari Ngkora Marasa.

2 Korintu 8:21

Ido hai kitudo amimi hema au meula i polumaongki ide bona tongawa kamanotona babehiangki, bara pea i peitana Pue, agaiana i peitanda wori tauna.

Galatia 5:22

Agaiana ane naninike Inao Malelaha, ina tongawa wuana i lalu katuwonta, i lalu poantita: mombepokaahike, matana-tanake, tinda lalunta, sabarake, maalusu pololitanta, maroa babehianta; mopabukeike dandita,

Epesu 4:25

Mewali halalu, nitendemi dongko. Nipololitami apa au tou i hangka rangami, lawi ikita ope-ope hangkirake hangko i Watana Kerisitu.

Epesu 5:9

Lawi hangko i kamabaana lalumi, mesupa ope-ope babehia au maroa, au tou hai au manoto.

Epesu 6:14

Mewali, nipakaroho peangkami hai parewa pombeala au hangko i Pue Ala. Nipakaroho peulami i paturo au tou kana i Pue mewali nodo pampou i pekomi. Nipamanoto babehiami mewali nodo badu besi au motabungi watami.

Pilipi 3:1

Mewali halalu, hangangaa matanakau, lawi mohintuwumokau hai Pue. Bara kupomapari mohuleki apa au kuuki hangkoia, lawi kupeinao bona mepoinalai liliukau i paturo au tou.

Kolose 4:5

Ane mampogaloakau tauna au barake hampepepoinalai, hangangaa mapande-pandekau moanti watami bona peisakau mampopobundu katepakami mopahaweahe rara mepoinalai i Pue.

1 Tesalonika 4:12

Ane nodo nibabehi, barapokau ina merapi-rapi i rangami. Hai ina raadaikau tauna au barahe mepoinalai i Pue Yesu.

1 Timotiu 2:2

ope-ope datu hai ope-ope topoparenta. Hangangaa tapekakaeahe topoparenta bona maroa katuwonta hai bara ara tauna au mampopeahi-ahike bona peisake menomba i Pue Ala hai mobabehi liliuke babehia au hintoto rabila ranganta.

1 Timotiu 3:11

Nodo wori towawinenda, hangangaa manoto babehianda hai au hintotohe rabila. Barahe topoanti-anti lolita. Hangangaa raisa morempeki peundeana lalunda au kadake, hai hangangaa rapoinalaihe i paka-pakana.

1 Timotiu 3:4

Hangangaa naisa mokadipura maroa tauna au maida i lalu souna, hai anana hangangaa mengkoruhe i tosaenda hai mebilahe.

1 Timotiu 4:12

Nauri mangura maniko, hintotoko rabila tauna. Hangangaa mewaliko pandiri i halalunta hampepepoinalai i lalu pololitamu, babehiamu, kamaahimu i hangka rangamu, pepoinalaimu i Pue, hai i lalu katuwomu au malelaha.

1 Timotiu 5:10

Hangangaa au manoto babehianda, pandirina: hangkoia mokadipura maroamohe ananda, matanahe modoko torare i sounda, motulungihe halalunda hampepepoinalai, mokadipurahe tauna au i lalu kapari, hai mobabehihe hinangkana bago au maroa.

1 Timotiu 5:2

towawine au matinuwu nuimbahe inamu, hai towawine au mangura nuimbahe adimu; nupamaroa mpuu ope-ope babehiamu irihira.

Titu 1:8

Tauna au nuangka mewali penatua, hangangaa tauna au naisa modoko torare, maroa liliu babehiana, matopa, manoto laluna, malelaha katuwona, hai au nabuku morempeki peundeana laluna au kadake.

Titu 2:14

Yesu mokirami wataNa rapapate mohuru dosanta bona Nakabahake hangko i ope-ope babehianta au kadake, hai Napopewalike taunaNa au malelaha hai au madota mobabehi au maroa.

Titu 2:2

Ane tobalilo au saemohe, hangangaa nupaturohe bona rabuku morempeki peundeana lalunda, bona manoto lalunda hai hintotohe mewali tosae au rabila. Pepoinalainda i Pue Yesu hangangaa maroho mpuu. Hangangaa maahihe i ranganda hangko i lalunda, hai hangangaa mantahahe i lalu kapari.

Titu 2:7

Hai oio, Titu, ope-ope babehiamu hangangaa mewali pandiri. Ane mepaturoko, mepaturoko hangko i lalumu mpuu, hai hangangaa manoto babehiamu.

Titu 3:14

Halalunta hampepepoinalai hangangaa mampopolumao liliuhe bago au maroa bona molambihe apa au raparaluu alo-alona, hai bona tuwonda bara mbero-mbero.

Ibarani 11:2

Anti pepoinalainda, tauna hangkoia napokatanahe Pue Ala.

Ibarani 13:18

Kiperapi bona nipekakaea liliungkai. Kiisa kabulana lalungki, lawi i paka-pakana kipeinao mobabehi liliu au manoto.

Yakobu 1:27

Ane mampeinaoke mewali tauna au maroa posaraninta hai au bara ara kamakuranta ba kamasalanta i peitana Pue Ala Umanta, idemi au hangangaa tababehi: motulungike anangkoi au ilu hai tobemba au meahi-ahi tuwonda, hai ineeke moula babehianda tauna au barahe moisa Pue Ala.

Yakobu 3:17

Agaiana tauna au molambihe kanoto lalu hangko i Pue Ala, node babehianda: malelaha lalunda, raunde mohintuwu hai ranganda, maalusu poantinda, matunduhe hai motulungi peamohe tauna. Maroa babehianda, barahe mampopontani tauna hai poantinda moula kabulana lalunda.

1 Peturu 1:22

Ide-ide, malelahamokau anti pampeulaimi paturo au tou, ido hai niisami mampokaahi halalumi hampepepoinalai i katou-touana. Mewali kuweikau lolita bona mombepokaahikau hadua hai hadua hangko i lalumi mpuu.

1 Peturu 2:12

Arahe tauna au bara moisa Pue Ala au mopapakoikau hai mopakadakekau. Ido hai hangangaa nipamaroa-roa babehiami bona kamaroana babehiami ina tongawa irihira. Kahopoana, ina rapangaku kamaroana babehiami, alana motoiahe Pue Ala i alo kahaweNa.

1 Peturu 4:8

Au melumbu hangko i hinangkana, iami pombepokaahimi hadua hai hadua. Hangangaa mombepokaahikau hangko i lalumi mpuu, lawi ane nibabehi nodo, ina nibuku wori moampungi salanda rangami.

2 Peturu 3:1

Halalungku au kupokaahi! Idemi surangku au karombelana irikamu. I lalu surangku au nguru-nguruna hai au karombelana ide, kuhuweki lalumi hai kupopaingaakau paturo au tou bona malelaha pekirimi.

1 Yohane 3:18

Anangku, inee peake maahi hai lolitanta. Agaiana hangangaa tapatongawa kamaahinta i lalu babehianta, lawi itimi ahi au tou.

1 Yohane 3:3

Hai ope-ope tauna au moharungahe iti hangko i Kerisitu, ina mopakaraohe hinangka dosa hangko i watanda bona malelaha tuwonda nodo kamalelahana Kerisitu.

1 Yohane 4:1

Halalu au kupokaahi! Ineehe hampai nipoinalai ope-ope tauna au mouli kaarana Inaona Pue Ala irihira. Nipeita maroahe, ba tou-tou mpuuhe hangko i Pue Ala ba bara. Lawi iumba-umba pea, arahe nabi au mepawuli.