1 Timotiu 1:10 - Sura Malelaha

¹⁰ tauna au mebualosi hai tauna au mobabehi babehia au merikai nodo au rababehi tobalilo hore tobalilo ba towawine hore towawine, tauna au motawani rangana bona rapohawi tauna au mosabi dongko, hai ope-ope tauna au mobabehi apa au bara hintoto hai paturo au tou.

1 Timotiu 1:10 Kruisverwysings

Yohane 8:44

Umami iami Datu Tokadake! Hai nipeinao moula liliu peundeana umami iti. Hangko i nguru-nguruna ia topepapatemi. Paturona bara tou, lawi bara ara au tou iria. Ane modongko, itimi poantina, lawi ia topodongko mpuu, hai ope-ope tauna au modongko moulahe peundeana.

Roma 1:26

Mewali, anti kadanda mau menomba i Pue Ala, ido hai Napogiangaamohe moula peundeana lalunda au mepakaea iti. Hawe-hawe i towawine, barapi tedii lalunda i tobalilo. Agaiana hadua-hadua towawine mampotambiarihe hangka towawinenda.

1 Timotiu 4:6

Ane ope-ope paturo ide nupaturoahe halalunta hampepepoinalai, ina mewaliko hawina Kerisitu Yesu au maroa. Hai ina maroho mpuu lalumu anti Ngkorana Pue Ala au tapoinalai hai paturo au maroa au nupeulaimi.

1 Timotiu 6:3

Ane arahe au moanti paturo au mosisala hai paturonta, barahe mampoinalai paturo au tou hangko i Amputa, Pue Yesu Kerisitu hai bara worihe mampoinalai lolita au mopaturoke bona mengkoruke i Pue Ala,

2 Timotiu 1:13

Timotiu! Kupopaingaako paturo au nuhadimi hangko iriko. Paturo au tou iti hangangaa nupeulai. Inee nukabaha pepoinalaimu i Kerisitu Yesu. Hangangaa maahiko i hangka rangamu anti pohintuwumu hai Yesu.

2 Timotiu 4:3

Lawi i alo-alo au ina mai, tauna barapi ina raunde mampehadingi paturo au tou. Ina mohaokihe guru-guru au mopaturoahe lolita au mopakatana pea lalunda bona peisahe mampeulai apa peundeana lalunda.

Titu 1:13

Tou mpuu apa au nauli tauna iti! Ido hai to Kreta au arahe inditi hangangaa nuwei mpuuhe lolita bona mepoinalai liliuhe i paturo au tou.

Titu 1:9

Hangangaa maroho pepoinalaina i paturo au tou, nodo au nadokomi bona naisa rara mopaguru tauna i paturo au tou iti hai mopakaroho lalunda, hai bona nabuku wori mopatongawa kamasalanda tauna au moewa paturo iti.

Ibarani 13:4

Ope-ope tauna hangangaa mampeulai ada posamboko. Ada iti inee nilingkai. Lawi tauna au mebualosi hai au mobabehi babehia merikai, batenda ina nahuku Pue Ala.

Yudasi 1:7

Nikatuinao wori wanua Sodomo hai Gomora hangkoia hai boea ntanina au hungku. Ampu boea iti mobabehihe nodo au rababehi malaeka au kupololita inona. Mebualosihe, mobabehihe sala hai ngkaia babehianda au merikai, alana boeanda rahuwe. Pehukuna Pue Ala i to Sodomo hai to Gomora iti mewali pandiri i ope-ope tauna, hai peisa rapandiri nodo api au bara ara kahopoana au mohuku ope-ope tauna au kadake babehianda.

Pampetudungia 18:13

Nodo wori kanino hai rampa-rampa ntanina, anu-anu au mawongi nodo dupa, mire hai kemenyan. Tepesua wori anggoro, lana, tapu hai pare Nodo wori japi, dimba, dara, roda, hawi hai tauna au ratawani. Ope-ope balu-balunda iti barapi ara au moholo, anti kamageronami wanua iti.

Pampetudungia 21:27

Agaiana apa au merikai bara mpuu peisa mesua i lalu. Mewali, tauna au mobabehi dake ba au modongko, barahe peisa mesua. Au peisa mesua, batena pea tauna au teuki hanganda i lalu Surana Ana Dimba, sura poukia hanganda tauna au molambi katuwo maroa au bara mokahopoa.

Pampetudungia 21:8

Agaiana tauna au langahe i hangka ranganda pane barahe meula Iriko, tauna au barahe mepoinalai Iriko, tauna au kadake babehianda, topepapate, topobabehi au merikai, topedoti, topenomba i anitu, hai topodongko, batenda rahuku i lalu tahi api au lolaa hai mawaa. Itimi au rahanga kapate karombelana.”

Pampetudungia 22:15

Agaiana tauna au kadake, topedoti, topobabehi au merikai, topepapate, topenomba i anitu, topodongko, hai tauna au mampokatana podongkonda, barahe rapaliu mesua i lalu wanua iti.