San Lucas 7:13 - Alacatlatzala Mixtec New Testament

¹³ Ta xi̱ni ta̱Jesús ñáyóꞌo, ta na̱taꞌví ní ini ra xi̱ni ñaꞌá ra, ta ni̱ka̱ꞌa̱n ra xíꞌin ñá: ―O̱n kuaku ún ―káchí ra xíꞌin ñá.

San Lucas 7:13 Kruisverwysings

San Marcos 8:2

―Kúndáꞌví ní ini i̱ xíni i̱ ni̱vi, chi xa u̱ni̱ ki̱vi̱ ndóo na yóꞌo ta o̱n ko̱ó ña kuxu na.

San Lucas 10:1

Ta ndi̱ꞌi ñayóꞌo, ta ta̱Jesús na̱ka̱xin ra u̱ni̱ si̱ko̱ u̱xu̱ ta̱a, ta ti̱ꞌví ra na, o̱vi̱ o̱vi̱ na kua̱ꞌa̱n siꞌna na ndiꞌi saá ñoo, ta saá xaa̱ mi̱i ta̱Jesús.

San Lucas 11:1

Ñii ki̱vi̱ ni̱ka̱ꞌa̱n ta̱Jesús xíꞌin Ndios, ta ñii ta̱xíka xíꞌin ra ki̱xaa̱ ra no̱o̱ ra, ta ni̱ka̱ꞌa̱n ra xíꞌin ra: ―Tata, kóni ndi̱ ña sanáꞌa ún ndi̱ꞌi̱ ndasaá ka̱ꞌa̱n ndi̱ xíꞌin Ndios, saá chi ta̱Juan ta̱ sa̱kuchu ni̱vi sa̱náꞌa ra naxíka xíꞌin ra ndasaá koo ka̱ꞌa̱n na xíꞌin Ndios.

San Lucas 11:39

Ta ta̱Jesús ni̱ka̱ꞌa̱n ra xíꞌin ra: ―Ndóꞌó nafariseo nákata ndó sa̱ta̱ vaso xíꞌin sa̱ta̱ ko̱ꞌo̱. Ta ini mi̱i ndó chútú ní ñakuíꞌná xíꞌin ña o̱n váꞌa.

San Lucas 12:42

Ta nda̱kuii̱n ta̱Jesús, ni̱ka̱ꞌa̱n ra: ―¿Ndasaá keꞌé ñii ta̱káꞌno xíꞌin ñii ta̱a ta̱ kísa chiño xíꞌin ndinoꞌo ini no̱o̱ ra? Ta ta̱káꞌno yóꞌo sakuiso chiño ra ta̱yóꞌo ña taxi ta̱yóꞌo kuxu ni̱vi na yóo veꞌe ta kasa kuenda ra xíꞌin veꞌe yóꞌo.

San Lucas 13:15

Ta saá nda̱kuii̱n ta̱Jesús, ni̱ka̱ꞌa̱n ra xíꞌin na: ―¡Na o̱vi̱ yuꞌu̱ kúu ndó!, chi káꞌa̱n ndó o̱n váꞌa sandaꞌa i̱ ni̱vi ki̱vi̱ yi̱i̱ ña nákindée yó. Ta mi̱i ndó, vará ki̱vi̱ yi̱i̱ nákindée yó kúu ña, ta ma̱ni̱ ní ndó kiti̱ sa̱na̱ ndó. Chi tá yóo si̱ndi̱ki̱ án burro sa̱na̱ ndó ta yíchi̱ ní rí takuií, ta saá ndaxin ndó rí ko̱ꞌo̱n rí koꞌo rí takuií.

San Lucas 17:5

Ta saá ni̱ka̱ꞌa̱n naxíka xíꞌin ta̱Jesús xíꞌin ra, káchí na saá: ―Tata, chindeé ún ndi̱ꞌi̱ ña kandixa va̱ꞌa ní ka̱ ndi̱ Ndios ―káchí na.

San Lucas 17:6

Ta nda̱kuii̱n ta̱Jesús, káchí ra saá: ―Ñii ndiki̱n mostaza, loꞌo ní ña. Ta ndóꞌó, tá kandixa ndó Ndios, vará nda̱ loꞌo kuiti, nda̱tán yóo ndiki̱n mostaza, ta xa̱ꞌa̱ ña loꞌo kuiti kandixa ndó, ñayóꞌo taxi ña kukomí ndó ndee̱ kaꞌnda chiño ndó no̱o̱ yito̱n káꞌno tón sicómoro yóꞌo, ta kasa ndivi nó to̱ꞌon ndó. Tá ka̱ꞌa̱n ndó xíꞌin yito̱n yóꞌo: “Kutaꞌa ún, ta kua̱ꞌa̱n ún kunakaa̱ ún ini takuií”, ta kasa ndivi yito̱n yóꞌo ña ka̱ꞌa̱n ndó ―káchí ta̱Jesús xíꞌin na.

San Lucas 18:6

Ta ni̱ka̱ꞌa̱n ka̱ ra xíꞌin na: ―Koni̱ so̱ꞌo va̱ꞌa ndó to̱ꞌon ni̱ka̱ꞌa̱n ta̱juez. Vará ta̱ o̱n váꞌa kúu ra, ta ki̱sa ndivi ra ñanda̱a̱ xíꞌin ñáñaꞌa̱ yóꞌo, chi ndiꞌi saá ki̱vi̱ xáku ndáꞌví ñá no̱o̱ ra.

San Lucas 19:8

Ta ta̱Zaqueo na̱kundichi ra ni̱ka̱ꞌa̱n ra xíꞌin ta̱Jesús: ―Koto ví, Tata, vitin taꞌví i̱ ndiꞌi ñakuíká kómí i̱, ta taxi i̱ ñii sava ñayóꞌo ndaꞌa̱ nandáꞌví. Tá yóo ni̱vi na sa̱ndáꞌví i̱ ki̱ndaa i̱ ña xi̱komí na, ta vitin taxi i̱ ndaꞌa̱ na ko̱mi̱ yichi̱ ka̱ ñayóꞌo ―káchí ra xíꞌin ta̱Jesús.

San Lucas 22:61

Ta saá ndi̱kó koo ta̱Jesús xi̱to káxín ra no̱o̱ ta̱Pedro. Ta na̱káꞌán ta̱Pedro to̱ꞌon ña ni̱ka̱ꞌa̱n ta̱Jesús xíꞌin ra: “Ta̱ꞌán ka̱ kana ñii nduxú chée ta xa u̱ni̱ yichi̱ ni̱ka̱ꞌa̱n ún xíꞌin ni̱vi ndí o̱n vása xíni̱ ún yi̱ꞌi̱.”

San Lucas 24:3

Ta ni̱ki̱ꞌvi ná ini kavua̱, ta o̱n ko̱ó ka̱ yi̱kí ko̱ñu ta̱Jesús ní‑xini ná.

San Lucas 24:34

Ta nayóꞌo ni̱ka̱ꞌa̱n na xíꞌin na o̱vi̱ ki̱xaa̱ yóꞌo: ―¡Ñanda̱a̱ kía̱ na̱taku̱ ta̱Jesús ta̱Káꞌno no̱o̱ yó! Ta̱Simón Pedro xa xi̱ni ñaꞌá ra ―káchí na.

San Lucas 7:12

Ta ni̱xaa̱ na yatin no̱o̱ ñoo, ta na̱kutáꞌan na xíꞌin ni̱vi ñíso̱kó na xa̱to̱n no̱o̱ nákaa̱ ñii ta̱ ni̱xiꞌi̱ kua̱ꞌa̱n na sandúxu̱n na ra. Ta̱ ni̱xiꞌi̱ yóꞌo kúu ta̱loꞌo, ñii la̱á ra saá kúu sa̱ꞌya siꞌí ra, ta ni̱xiꞌi̱ ra, ta ni̱ndo̱o matóꞌón siꞌí ra, chi ñá xa ni̱xiꞌi̱ yii̱ kúu ñá. Ta kua̱ꞌa̱ ní natáꞌan ñá kua̱ꞌa̱n na xíꞌin ñá.

San Lucas 7:14

Ta ni̱xaa̱ yatin ra, ta ni̱to̱nda̱a ndaꞌa̱ ra xa̱to̱n no̱o̱ nákaa̱ ta̱loꞌo ni̱xiꞌi̱. Ta ni̱vi na ñíso̱kó xa̱to̱n, xi̱kuita na, ta ta̱Jesús ni̱ka̱ꞌa̱n ra xíꞌin ta̱loꞌo ni̱xiꞌi̱, káchí ra saá: ―Ta̱loꞌo, káꞌa̱n i̱ xíꞌin ún, ¡ndakoo ún! ―káchí ta̱Jesús xíꞌin ra.

San Lucas 7:19

ta ti̱ꞌví ra na kua̱ꞌa̱n na no̱o̱ ta̱Jesús, ña nda̱ka̱ to̱ꞌon na ra siꞌa: ―¿Án yóꞌó kúu ta̱a ta̱ ndáti ndi̱ tiꞌví Ndios saka̱ku ra na ñoyívi yóꞌo, án kundati ka̱ ndi̱ inka̱ ra?

San Lucas 8:52

Ta ndóo kua̱ꞌa̱ ní ni̱vi xáku ní na chi kúchuchú ní ini na xa̱ꞌa̱ ñáloꞌo ñá ni̱xiꞌi̱. Ta ni̱ka̱ꞌa̱n ta̱Jesús xíꞌin na: ―O̱n kuaku ndó, chi ñáloꞌo yóꞌo o̱n vása ní‑xiꞌi̱ ñá, ñá kísi̱n kuiti kúu ñá ―káchí ra.

San Juan 11:2

Ta ñáMaría ñá kúu ki̱ꞌva̱ ta̱Lázaro yóꞌo kúu ñaꞌa̱ ñá chi̱kaa̱ nduta̱ tá xáꞌan támi ní xa̱ꞌa̱ ta̱Jesús, ta na̱yakón ñá xa̱ꞌa̱ ra xíꞌin yisi̱ si̱ni̱ ñá.

San Juan 11:3

Ta xa̱ꞌa̱ ña ndeé ndóꞌo ta̱Lázaro, náki̱ꞌva̱ ra ñáMaría xíꞌin ñáMarta ti̱ꞌví ná ñii ta̱ xíka chiño no̱o̱ ná, kua̱ꞌa̱n ra no̱o̱ ta̱Jesús, ña ka̱ꞌa̱n ra xíꞌin ra. Ta ni̱xaa̱ ra, ta káchí ra saá: ―Tata, vitin ndeé ní ndóꞌo ta̱a ta̱ kúu ta̱ kíꞌvi ini mi̱i ún xíni ún ―káchí ta̱yóꞌo xíꞌin ta̱Jesús.

San Juan 20:13

Ta ni̱ka̱ꞌa̱n naángel xíꞌin ñáMaría Magdalena, káchí na saá: ―Nana, ¿nda̱chun xáku ún? ―káchí na xíꞌin ñá. Ta nda̱kuii̱n ñá, ni̱ka̱ꞌa̱n ñá: ―Ni̱vi na̱kiꞌin na yi̱kí ko̱ñu Ta̱a ta̱Káꞌno no̱o̱ i̱, ta o̱n vása xíni̱ i̱ míchí ni̱xa̱ꞌa̱n na chi̱nóo na ña ―káchí ñá.

San Juan 20:15

Ta ni̱ka̱ꞌa̱n ra xíꞌin ñá, káchí ra saá: ―Nana, ¿nda̱chun xáku ún? ¿Yu kúu na nándukú ún? ―káchí ra xíꞌin ñá. Ta xáni si̱ni̱ ñá ta̱yóꞌo kúu ta̱a ta̱ ndáa jardín, ta ni̱ka̱ꞌa̱n ñá xíꞌin ra: ―Tata, ¿án yóꞌó kúu ta̱a ta̱ na̱kiꞌin yi̱kí ko̱ñu ta̱ ni̱ndu̱xu̱n yóꞌo?, ta ka̱ꞌa̱n ún xíꞌin i̱ míchí ni̱xa̱ꞌa̱n ún chi̱nóo ún ña, ta ko̱ꞌo̱n i̱ nakiꞌin i̱ ña ta sandúxu̱n i̱ ña ―káchí ñá xíꞌin ra.

San Juan 4:1

Nafariseo xi̱ni̱ so̱ꞌo na ndí kua̱ꞌa̱ ní ka̱ ni̱vi ndíko̱n sa̱ta̱ ta̱Jesús vitin no̱o̱ ni̱vi na ndíko̱n sa̱ta̱ ta̱Juan, ta ta̱Jesús sákuchu ra kua̱ꞌa̱ ní ka̱ ni̱vi no̱o̱ ta̱Juan káchí na, káꞌa̱n na.

San Juan 6:23

Ta saá xi̱to na sava barco tón ki̱xi ñoo Tiberias ki̱xaa̱ nó yuꞌu̱ takuií mi̱ni yóꞌo. Ta ndiꞌi tón barco yóꞌo ki̱xaa̱ nó mi̱i xiiña yatin no̱o̱ xi̱xi na si̱ta̱ va̱ꞌa ña ta̱xi ta̱Jesús ndaꞌa̱ na, ki̱vi̱ siꞌna ni̱ka̱ꞌa̱n ra ta̱xi ra ña táxaꞌvi ñaꞌá ndaꞌa̱ Ndios.

1 Corintios 7:30

Ta ndóꞌó ni̱vi na kúchuchú ní ini ta xáku ní ndó, ta o̱n váꞌa nataxi xíꞌin mi̱i ndó kutaku̱ ndó saá kuiti. Ta ndóꞌó ni̱vi na kúsii̱ ní ini, o̱n váꞌa chikaa̱ ini ndó ndí ndasaá kuiti ñasi̱i̱ kúu ndiꞌi ña. Ta ndóꞌó, ni̱vi na sáta kua̱ꞌa̱ ní ñakuíká, o̱n kani si̱ni̱ ndó ndí kukomí ndó ñakuíká yóꞌo ndiꞌi saá ki̱vi̱ va̱xi.

1 Tesalonicenses 4:13

Nañani yó xíꞌin náki̱ꞌva̱ yó, kóni ndi̱ ña kunda̱a̱ va̱ꞌa ini ndó ndí ni̱vi na kándixa Jesucristo ta ni̱xiꞌi̱ na, nayóꞌo ndixa nataku̱ na ki̱vi̱ va̱xi. Ta xa̱ꞌa̱ ña kúnda̱a̱ ini ndó ñayóꞌo, ta o̱n kuchuchú ní ini ndó, nda̱tán kúchuchú ní ini ni̱vi na o̱n vása ndáa ini ndí ki̱vi̱ va̱xi ndixa nataku̱ na ta kutaku̱ na xíꞌin Ndios ndiꞌi saá ki̱vi̱.

Hebreos 2:17

Saá chi xa̱ꞌa̱ ña kuchiño chindeé ra ni̱vi, Jesucristo xi̱ni̱ ñóꞌó xi̱kuu ra ñii ni̱vi nda̱tán yóo mi̱i yó, ni̱vi na kúu nañani ra xíꞌin náki̱ꞌva̱ ra. Xi̱kuu ra ni̱vi xa̱ꞌa̱ ña kuchiño kúu ra ta̱su̱tu̱ káꞌno no̱o̱ ni̱vi. Ta kúu ra ñii su̱tu̱ ta̱ kísa ndivi ñanda̱a̱ no̱o̱ Ndios, ta kúu ra ñii su̱tu̱ ta̱ kúndáꞌví ní ini xíni ni̱vi, ta ni̱so̱ko̱ xíꞌin mi̱i ra xa̱ꞌa̱ ña sandoo ra kua̱chi ni̱vi no̱o̱ Ndios.

Hebreos 4:15

Ta mi̱i Jesucristo ta̱su̱tu̱ káꞌno no̱o̱ yó, kúndáꞌví ini ra xíni ra mi̱i yó, chi kúu yó ni̱vi na vitá ní ini no̱o̱ ña o̱n váꞌa. Ta Jesucristo kúnda̱a̱ ini ra ndasaá ndóꞌo yó, chi ñii ki̱ꞌva nda̱tán kua̱ꞌa̱ ní ña o̱n váꞌa ta ña yo̱ꞌvi̱ ní xíto ndoso ña mi̱i yó vitin ña nakava yó keꞌé yó ña o̱n váꞌa, saá xi̱to ndoso ña mi̱i Jesucristo kui̱ya̱ xi̱na̱ꞌá. Ta saá ni, Jesucristo nda̱ ñii ki̱vi̱ o̱n vása ní‑nakava ra keꞌé ra ña o̱n váꞌa.