San Lucas 13:25 - Alacatlatzala Mixtec New Testament

²⁵ Ñii ki̱vi̱ ta̱káꞌno nakasi ra yéꞌé, ta o̱n kuchiño ka̱ ki̱ꞌvi ndó. Tá kindo̱o ndó ke̱ꞌe ki̱vi̱ kán, ta kani ní ndó yéꞌé, ta kuaku ndáꞌví ndó no̱o̱ ra ña nakuiná ra yéꞌé ki̱ꞌvi ndó, ta saá ndakuii̱n ra: “O̱n vása xíni̱ i̱ ndóꞌó, ni o̱n vása xíni̱ i̱ mí ki̱xi ndó”, kachí ra xíꞌin ndó.

San Lucas 13:25 Kruisverwysings

San Mateo 25:41

’Ta yi̱ꞌi̱, ta̱Rey, ka̱ꞌa̱n i̱ xíꞌin na ndóo no̱o̱ yóo ndaꞌa̱ yitin i̱: “Kutaꞌa ndó no̱o̱ i̱, ndóꞌó na ndíso chiꞌña. Kua̱ꞌa̱n ndó koꞌon ndó no̱o̱ xíxi̱ ñoꞌo̱ ña o̱n vása nda̱ꞌva̱ ndiꞌi saá ki̱vi̱, chi Ndios ki̱sa va̱ꞌa ra ñoꞌo̱ xíxi̱ yóꞌo ña xo̱ꞌvi̱ ní ñaníma̱ ndiva̱ꞌa káꞌno xíꞌin ndiꞌi inka̱ níma̱ ndiva̱ꞌa táꞌan mi̱i ña.

San Lucas 13:27

Ta ka̱ꞌa̱n ra xíꞌin ndó: “Xa ni̱ka̱ꞌa̱n i̱ xíꞌin ndó ña o̱n vása xíni̱ i̱ míchí ki̱xi ndó. O̱n si̱ví na ndíko̱n yi̱ꞌi̱ kúu ndó, kutaꞌa ndó no̱o̱ i̱, chi na ndiva̱ꞌa kúu ndóꞌó”, kachí ra xíꞌin ndó.

San Lucas 3:8

Tá ndixa na̱ndikó ini ndó ta kóni ndó ko̱ꞌo̱n ndó yichi̱ Ndios, ta xíni̱ ñóꞌó kasa ndivi ndó chiño va̱ꞌa nda̱tán kóni Ndios. Saá chi o̱n váꞌa kani si̱ni̱ ndó ndí xa̱ꞌa̱ ña kúu ndó sa̱ꞌya ñani síkuá ta̱Abraham, Ndios saka̱ku ra ndóꞌó. Ta káꞌa̱n i̱ xíꞌin ndó, Ndios kúchiño ra ndasa ra yu̱u̱ yóꞌo ni̱vi na nduu sa̱ꞌya ñani síkuá ta̱Abraham.

San Lucas 6:46

Ta saá ni̱ka̱ꞌa̱n ka̱ ra xíꞌin na: ―Ta ndóꞌó, ¿nda̱chun káꞌa̱n ndó yi̱ꞌi̱ kúu ta̱Káꞌno no̱o̱ ndó, ta o̱n xi̱in ndó kasa ndivi ndó ña káꞌa̱n i̱ xíꞌin ndó?

2 Corintios 6:2

Chi no̱o̱ to̱ꞌon Ndios ña ni̱taa na xi̱na̱ꞌá, Ndios ka̱chí ra saá: Ki̱vi̱ chi̱kaa̱ ini i̱ ña keꞌé i̱ ñava̱ꞌa xíꞌin ndó, chi̱kaa̱ so̱ꞌo i̱ ña ndu̱kú ndó no̱o̱ i̱; ta mi̱i ki̱vi̱ yóꞌo sa̱ka̱ku i̱ ndóꞌó, ta chi̱ndeé i̱ ndóꞌó, ka̱chí Ndios, káchí to̱ꞌon ra ña ni̱taa na xi̱na̱ꞌá. Ta vitin xa ku̱ndivi to̱ꞌon yóꞌo, chi xa ki̱xaa̱ ki̱vi̱ ña ni̱ka̱ꞌa̱n Ndios xa̱ꞌa̱. Saá chi ki̱vi̱ vitin kúu ki̱vi̱ ña Ndios kóni ra keꞌé ra ñava̱ꞌa xíꞌin ni̱vi, ña kúu ña saka̱ku ra na no̱o̱ ña o̱n váꞌa.

Hebreos 12:17

Ta ndóꞌó xa ku̱nda̱a̱ ini ndó ña ni̱ndoꞌo ra, saá chi ki̱vi̱ na̱ndikó ini ra ta ndu̱kú ra nakiꞌin ra ñava̱ꞌa ndaꞌa̱ yivá ra, ta saá ni̱‑kuchiño ka̱ yivá ra taxi ra ñava̱ꞌa yóꞌo ndaꞌa̱ ra. Vará ndeé ní ni̱xaku ra, ta saá ni, ni̱‑kuchiño ka̱ yivá ra nasama ra ña xa ke̱ꞌé ra.