San Juan 8:48 - Alacatlatzala Mixtec New Testament

⁴⁸ Ta nda̱kuii̱n sava najudío, ni̱ka̱ꞌa̱n na xíꞌin ta̱Jesús, káchí na saá: ―¿Án o̱n si̱ví ndixa yóꞌó kúu ún ta̱ñoo Samaria? ¿Án o̱n si̱ví ndixa kúu ún ta̱a ta̱ kómí ñii ñaníma̱ ndiva̱ꞌa ña sáka ní si̱ni̱ ún?

San Juan 8:48 Kruisverwysings

San Mateo 10:25

Ta ta̱ sákuáꞌá kúchiño nduu ra nda̱tán yóo ta̱maestro ra, ta ta̱mozo kúchiño nduu ra nda̱tán yóo ta̱ xáꞌnda chiño no̱o̱ ra. Ñii ki̱ꞌva saá kundoꞌo ndó xíꞌin i̱ chi ni̱vi ni̱ka̱ꞌa̱n na xa̱ꞌa̱ i̱, sa̱kunaní na yi̱ꞌi̱ Beelzebú, ta ñii ki̱ꞌva saá ka̱ꞌa̱n na xa̱ꞌa̱ ndó, chi ndíko̱n ndó yichi̱ i̱ ―káchí ta̱Jesús xíꞌin naxíka xíꞌin ra.

San Mateo 10:5

Ta ti̱ꞌví ta̱Jesús u̱xu̱ o̱vi̱ naapóstol ko̱ꞌo̱n na ka̱ꞌa̱n ndoso na to̱ꞌon ra, ta káchí ra xíꞌin na saá: ―O̱n ko̱ꞌo̱n ndó no̱o̱ inka̱ ni̱vi na o̱n si̱ví kúu najudío, o̱n ki̱ꞌvi ndó nda̱ ñii ñoo naSamaria.

San Mateo 11:18

Nda̱tán yóo naválí yóꞌo, saá yóo ndó, chi ta̱Juan o̱n vása ní‑xixi va̱ꞌa ra, ta nda̱ ñii ki̱vi̱ o̱n vása ní‑xiꞌi ra vino, ta káchí ndó xa̱ꞌa̱ ra: “Ta̱yóꞌo kómí ra níma̱ ndiva̱ꞌa.”

San Mateo 12:24

Ta xi̱ni̱ so̱ꞌo nafariseo ña ni̱ka̱ꞌa̱n ni̱vi yóꞌo, ta saá ni̱ka̱ꞌa̱n táꞌan na: ―Xíꞌin ndee̱ ñaBeelzebú, ña kúu ñakáꞌno no̱o̱ ndiꞌi níma̱ ndiva̱ꞌa, táva ta̱yóꞌo níma̱ ndiva̱ꞌa ―káchí na.

San Mateo 12:31

’Ta ndixa káꞌa̱n i̱ xíꞌin ndó, Ndios kúchiño kasa káꞌno ini ra xa̱ꞌa̱ ndiꞌi ña o̱n váꞌa kéꞌé ni̱vi, ta kúchiño kasa káꞌno ini ra xa̱ꞌa̱ ndiꞌi to̱ꞌon ña káꞌa̱n ndiva̱ꞌa na xíꞌin Ndios. Ta ndiꞌi ni̱vi na káꞌa̱n ndiva̱ꞌa xíꞌin Níma̱ Ndios, ta Ndios o̱n kasa káꞌno ini ra xa̱ꞌa̱ ni̱vi yóꞌo.

San Mateo 15:7

¡Na o̱vi̱ yuꞌu̱ kúu ndóꞌó! Ta ñanda̱a̱ kúu to̱ꞌon Ndios ña ni̱taa ta̱profeta Isaías xa̱ꞌa̱ ndó kui̱ya̱ xi̱na̱ꞌá, ña káchí saá:

San Juan 1:19

Ñii ki̱vi̱ yóo ta̱Juan sánáꞌa ra ni̱vi, ta nanáꞌno no̱o̱ najudío na táku̱ ñoo Jerusalén ti̱ꞌví na sava nasu̱tu̱ xíꞌin sava naLeví, na kúu na ndíso chiño xíꞌin veꞌe ño̱ꞌo káꞌno, kua̱ꞌa̱n na nda̱ka̱ to̱ꞌon na ta̱Juan. Ta ni̱xaa̱ na no̱o̱ ta̱yóꞌo, ta ni̱ka̱ꞌa̱n na xíꞌin ra, káchí na saá: ―¿Yu kúu yóꞌó? ―káchí na xíꞌin ra.

San Juan 10:20

Kua̱ꞌa̱ ní nayóꞌo káꞌa̱n na, káchí na saá: ―Ta̱Jesús yóꞌo kúu ta̱a ta̱ sána si̱ni̱, chi kómí ra ñii níma̱ ndiva̱ꞌa. Nda̱ ma̱ni̱ koni̱ so̱ꞌo yó ña káꞌa̱n ra ―káchí na.

San Juan 13:13

Chi ndóꞌó káchí ndó yi̱ꞌi̱ kúu ta̱Káꞌno no̱o̱ ndó, ta káchí ndó xíꞌin i̱ kúu i̱ ta̱Maestro ndó, ta ñanda̱a̱ kúu ña káchí ndó saá.

San Juan 4:9

Ta nda̱kuii̱n ñáñaꞌa̱, ni̱ka̱ꞌa̱n ñá saá xíꞌin ta̱Jesús: ―Yóꞌó kúu ta̱judío ta yi̱ꞌi̱ kúu ñii ñaꞌa̱ ñáñoo Samaria. ¿Nda̱chun ndúkú ún no̱o̱ yi̱ꞌi̱ taxi i̱ takuií koꞌo ún? ―káchí ñá. (Saá chi najudío o̱n vása nátaꞌan va̱ꞌa na xíꞌin nañoo Samaria.)

San Juan 7:20

Ta nda̱kuii̱n na, ni̱ka̱ꞌa̱n na xíꞌin ra, káchí na saá: ―Yóꞌó, ¡ndixa nákaa̱ níma̱ ndiva̱ꞌa ini ún, ta sáka ní ña si̱ni̱ ún! ¿Yu kúu ni̱vi kóni kaꞌni yóꞌó? ―káchí na xíꞌin ra.

San Juan 8:22

Ta nanáꞌno no̱o̱ najudío káꞌa̱n na xíꞌin táꞌan na, káchí na saá: ―O̱n ki̱ví ko̱ꞌo̱n yó no̱o̱ ko̱ꞌo̱n ra, káchí ra. ¿Án xáni si̱ni̱ ra kaꞌni xíꞌin mi̱i ra, ña̱kán ni̱ka̱ꞌa̱n ra saá? ―káchí na káꞌa̱n na xíꞌin táꞌan na.

San Juan 8:52

Ta saá najudío ni̱ka̱ꞌa̱n na xíꞌin ra, káchí na saá: ―Vitin xíni̱ va̱ꞌa ndi̱ ndí ndixa kómí ún níma̱ ndiva̱ꞌa, chi nina to̱ꞌon sána káꞌa̱n ún. Saá chi mi̱i ta̱xi̱i̱ síkuá yó ta̱Abraham xíꞌin ndiꞌi inka̱ naprofeta na ni̱ka̱ꞌa̱n to̱ꞌon Ndios xi̱na̱ꞌá, nayóꞌo ni̱xiꞌi̱ ndiꞌi na. Ta yóꞌó, káchí ún ña táná chikaa̱ so̱ꞌo ni̱vi to̱ꞌon ña sánáꞌa ún, ta nda̱ ñii ki̱vi̱ o̱n kivi̱ na.

Romanos 15:3

Saá chi ni mi̱i Jesucristo, nda̱ loꞌo o̱n vása ní‑ndukú ra ndasaá kuiti sakusii̱ ra ini mi̱i ra. Ta to̱ꞌon Ndios ña ni̱taa na xi̱na̱ꞌá, káꞌa̱n ña xa̱ꞌa̱ ña ndo̱ꞌo ra, ta káchí ña saá: “Mi̱i to̱ꞌon ña o̱n váꞌa ña káꞌa̱n ni̱vi kándiva̱ꞌa na xíꞌin Ndios kúu to̱ꞌon ña kándiva̱ꞌa na xíꞌin i̱”, káchí to̱ꞌon Ndios xa̱ꞌa̱ Jesucristo.

Hebreos 13:13

Ña̱kán va̱ꞌa kee yó ñoo no̱o̱ táku̱ ni̱vi na o̱n xi̱in kandixa Jesucristo, ta ko̱ꞌo̱n yó nakutáꞌan yó xíꞌin ra ñii xiiña ña xíká loꞌo no̱o̱ ñoo yóꞌo. Ta saá ñii káchí xo̱ꞌvi̱ yó xíꞌin ña sakukaꞌan ni̱vi no̱o̱ yó, nda̱tán ni̱xo̱ꞌvi̱ mi̱i ra.

Santiago 2:19

Tá yóo inka̱ ndó káꞌa̱n, káchí ndó: “Kándixa i̱ yóo ñii la̱á Ndios.” Ta ndóꞌó káꞌa̱n saá, vará va̱ꞌa kándixa ndó, ta xíni̱ ñóꞌó kunda̱a̱ ini ndó ndí ñii ki̱ꞌva saá ndiꞌi ñaníma̱ ndiva̱ꞌa kándixa ña yóo ñii la̱á Ndios, ta̱nda̱ kísin ña chi yíꞌví ña xa̱ꞌa̱ ñayóꞌo.