San Juan 1:19 - Alacatlatzala Mixtec New Testament

¹⁹ Ñii ki̱vi̱ yóo ta̱Juan sánáꞌa ra ni̱vi, ta nanáꞌno no̱o̱ najudío na táku̱ ñoo Jerusalén ti̱ꞌví na sava nasu̱tu̱ xíꞌin sava naLeví, na kúu na ndíso chiño xíꞌin veꞌe ño̱ꞌo káꞌno, kua̱ꞌa̱n na nda̱ka̱ to̱ꞌon na ta̱Juan. Ta ni̱xaa̱ na no̱o̱ ta̱yóꞌo, ta ni̱ka̱ꞌa̱n na xíꞌin ra, káchí na saá: ―¿Yu kúu yóꞌó? ―káchí na xíꞌin ra.

San Juan 1:19 Kruisverwysings

San Juan 1:7

Ta Ndios ti̱ꞌví ra ta̱yóꞌo ña ndakuii̱n ra xa̱ꞌa̱ ta̱a ta̱ yóo nda̱tán yóo ñoꞌo̱ ndinoꞌo ña yéꞌe. Ta ta̱Juan yóꞌo nda̱to̱ꞌon ra xíꞌin ni̱vi xa̱ꞌa̱ ta̱a yóꞌo xa̱ꞌa̱ ña kuchiño kandixa na ra.

San Juan 10:24

Ta nanáꞌno no̱o̱ najudío ki̱xi taꞌa na no̱o̱ ra, ta xi̱no nduu na ra, ta ni̱nda̱ka̱ to̱ꞌon na ra, káchí na saá xíꞌin ra: ―¿Ndasaá ka̱ ki̱vi̱ yaꞌa, ta saá kasa nda̱a̱ ún xa̱ꞌa̱ mi̱i ún ña kunda̱a̱ ini ndi̱ yu kúu ún? Tá yóꞌó kúu Cristo, ta̱a ta̱ ti̱ꞌví Ndios saka̱ku ra mi̱i ndi̱, ta va̱ꞌa ka̱ꞌa̱n káxín ún xíꞌin ndi̱ vitin ndí sivi kúu ún ―káchí na xíꞌin ra.

San Juan 10:31

Ta saá najudío yóꞌo tuku na̱tiin na yu̱u̱ ña koon na ra, chi kóni na kaꞌni na ra.

San Juan 11:19

Ta kua̱ꞌa̱ ní najudío xa ki̱xaa̱ na ñoo Betania yóꞌo, chi nayóꞌo kóni na chikaa̱ na ndee̱ ini ñáMaría xíꞌin ñáMarta, chi kúchuchú ní ini náyóꞌo xa̱ꞌa̱ ña ni̱xiꞌi̱ ta̱ki̱ꞌva̱ náñaꞌa̱ yóꞌo.

San Juan 2:18

Ta najudío na xi̱ni ña ke̱ꞌé ra saá ni̱nda̱ka̱ to̱ꞌon na ta̱Jesús, káchí na saá: ―¿Ndá milagro keꞌé ún koni ndi̱ ña sanáꞌa ún kunda̱a̱ ini ndi̱ ña ndixa kómí ún nda̱yí ke̱ꞌé ún saá xíꞌin veꞌe ño̱ꞌo yóꞌo? ―káchí na xíꞌin ra.

San Juan 2:20

Ta nda̱kuii̱n tuku najudío, ni̱ka̱ꞌa̱n na xíꞌin ra, káchí na saá: ―O̱vi̱ si̱ko̱ i̱ño̱ kui̱ya̱ xa ki̱sa chiño ni̱vi xa̱ꞌa̱ ña ki̱sa va̱ꞌa na veꞌe ño̱ꞌo káꞌno yóꞌo. Ta yóꞌó, ¿án xáni si̱ni̱ ún ndí kúchiño ún kasa va̱ꞌa ún veꞌe ño̱ꞌo yóꞌo ti̱xin ña u̱ni̱ kuiti ki̱vi̱?

San Juan 5:10

Tá nanáꞌno no̱o̱ najudío na̱kutáꞌan na xíꞌin ta̱a ta̱ nda̱ꞌa yóꞌo, ta ni̱ka̱ꞌa̱n na xíꞌin ra káchí na saá: ―Vitin kúu ki̱vi̱ yi̱i̱ ña nákindée yó, ta ni̱yaꞌa ndoso ún nda̱yí xa̱ꞌa̱ ki̱vi̱ yi̱i̱ yóꞌo, chi ñíso̱kó ún xi̱to ún xíka ún ―káchí na xíꞌin ra.

San Juan 5:15

Ta saá ta̱a ta̱ ndu̱va̱ꞌa yóꞌo ke̱e ra kua̱ꞌa̱n ra, ta ni̱xaa̱ ra nda̱to̱ꞌon ra xíꞌin nanáꞌno no̱o̱ najudío, káchí ra saá: ―Ta̱Jesús kúu ta̱a ta̱ sa̱ndúva̱ꞌa yi̱ꞌi̱ ―káchí ra xíꞌin na.

San Juan 5:16

Ta saá nanáꞌno no̱o̱ najudío ki̱xáꞌá na sáa̱ ní ini na, ta ndu̱kú na ndiꞌi no̱o̱ ña o̱n váꞌa ña kúchiño keꞌé na xíꞌin ta̱Jesús, ta̱nda̱ to̱nda̱a na ña kaꞌni na ra, kóni na. Saá chi ki̱vi̱ yi̱i̱ ña nákindée najudío kúu ki̱vi̱ ña ta̱Jesús sa̱ndúva̱ꞌa ra ta̱yóꞌo, ta káchí na ndí ta̱Jesús ni̱yaꞌa ndoso ra nda̱yí chi ki̱sa chiño ra ki̱vi̱ yi̱i̱, káchí na.

San Juan 5:18

Ta saá nanáꞌno no̱o̱ najudío ni̱saa̱ ka̱ na, ta ndeé ka̱ ndúkú na kaꞌni na ta̱Jesús, chi xáni si̱ni̱ na ndí ni̱ki̱ꞌvi ra o̱vi̱ kua̱chi ndeé ní. Xáni si̱ni̱ na ndí ni̱yaꞌa ndoso ra nda̱yí xa̱ꞌa̱ ki̱vi̱ yi̱i̱, ta inka̱ kua̱chi ra kúu ña káꞌa̱n ra ndí Ndios kúu Yivá ra, ña kóni kachí ñii kúu ra xíꞌin Ndios.

San Juan 6:41

Ta saá ki̱xáꞌá najudío káꞌa̱n o̱n váꞌa na xa̱ꞌa̱ ta̱Jesús, chi ni̱ka̱ꞌa̱n ra, káchí ra saá: “Yi̱ꞌi̱ kúu si̱ta̱ va̱ꞌa ndinoꞌo ña ki̱xi no̱o̱ Ndios”, káchí ra.

San Juan 6:52

Tá najudío na ndóo yóꞌo xi̱ni̱ so̱ꞌo na to̱ꞌon yóꞌo, ta saá ki̱xáꞌá na náa na xíꞌin táꞌan na, chi o̱n vása kúnda̱a̱ ini na to̱ꞌon ni̱ka̱ꞌa̱n ta̱Jesús. Ta ni̱ka̱ꞌa̱n na, káchí na saá: ―¿Ndasaá keꞌé ta̱yóꞌo ña taxi ra ko̱ñu ra kuxu yó? ―káchí na.

San Juan 7:1

Ta saá ta̱Jesús xíka ra kua̱ꞌa̱ ní ñoo ña ñóꞌo estado Galilea, chi o̱n xi̱in ra kaka ka̱ ra ñoo ña ñóꞌo estado Judea, chi nanáꞌno no̱o̱ najudío ndúkú na kaꞌni na ra.

San Juan 7:11

Ta najudío na ndóo viko̱ yóꞌo nándukú na ta̱Jesús, ta káꞌa̱n na xíꞌin táꞌan na, káchí na saá: ―¿Míkía̱ yóo ta̱Jesús? ―káchí na.

San Juan 7:15

Tá najudío xi̱ni̱ so̱ꞌo na ña káꞌa̱n ta̱Jesús sánáꞌa ra, ta na̱kaꞌnda ini na xa̱ꞌa̱ ña xi̱ni̱ so̱ꞌo na, ta ni̱ka̱ꞌa̱n na, káchí na saá: ―¿Nda̱chun va̱ꞌa ní xíni̱ ta̱yóꞌo?, ta o̱n vása ní‑kaꞌvi ra kua̱ꞌa̱ ní kui̱ya̱ veꞌe no̱o̱ káꞌvi na ―káchí na.

San Juan 8:22

Ta nanáꞌno no̱o̱ najudío káꞌa̱n na xíꞌin táꞌan na, káchí na saá: ―O̱n ki̱ví ko̱ꞌo̱n yó no̱o̱ ko̱ꞌo̱n ra, káchí ra. ¿Án xáni si̱ni̱ ra kaꞌni xíꞌin mi̱i ra, ña̱kán ni̱ka̱ꞌa̱n ra saá? ―káchí na káꞌa̱n na xíꞌin táꞌan na.

San Juan 8:48

Ta nda̱kuii̱n sava najudío, ni̱ka̱ꞌa̱n na xíꞌin ta̱Jesús, káchí na saá: ―¿Án o̱n si̱ví ndixa yóꞌó kúu ún ta̱ñoo Samaria? ¿Án o̱n si̱ví ndixa kúu ún ta̱a ta̱ kómí ñii ñaníma̱ ndiva̱ꞌa ña sáka ní si̱ni̱ ún?

San Juan 8:52

Ta saá najudío ni̱ka̱ꞌa̱n na xíꞌin ra, káchí na saá: ―Vitin xíni̱ va̱ꞌa ndi̱ ndí ndixa kómí ún níma̱ ndiva̱ꞌa, chi nina to̱ꞌon sána káꞌa̱n ún. Saá chi mi̱i ta̱xi̱i̱ síkuá yó ta̱Abraham xíꞌin ndiꞌi inka̱ naprofeta na ni̱ka̱ꞌa̱n to̱ꞌon Ndios xi̱na̱ꞌá, nayóꞌo ni̱xiꞌi̱ ndiꞌi na. Ta yóꞌó, káchí ún ña táná chikaa̱ so̱ꞌo ni̱vi to̱ꞌon ña sánáꞌa ún, ta nda̱ ñii ki̱vi̱ o̱n kivi̱ na.

San Juan 8:57

Ta ni̱ka̱ꞌa̱n najudío xíꞌin ta̱Jesús, káchí na saá: ―Ni o̱n ta̱ꞌán kukomí ún o̱vi̱ si̱ko̱ u̱xu̱ kui̱ya̱, ta káꞌa̱n ún xa xi̱ni ún ta̱Abraham. ¿Ndasaá kuchiño kandixa ndi̱ ña káꞌa̱n ún? ―káchí na xíꞌin ra.

Hechos 13:25

Tá xa yatin ni̱to̱nda̱a ki̱vi̱ ña ndi̱ꞌi chiño ta̱Juan, ta saá ni̱nda̱ka̱ to̱ꞌon ra ni̱vi, ka̱chí ra saá xíꞌin na: “¿Yukía̱ xáni si̱ni̱ ndó xa̱ꞌa̱ i̱? ¿Yu kúu i̱, káchí ndó? Chi o̱n si̱ví yi̱ꞌi̱ kúu ta̱a ta̱ ti̱ꞌví Ndios va̱xi saka̱ku ni̱vi ñoyívi yóꞌo. Saá chi ta̱a ta̱ ti̱ꞌví Ndios va̱xi saka̱ku mi̱i yó va̱xi ra sa̱ta̱ i̱. Ta̱a ta̱ káꞌno ní ka̱ no̱o̱ i̱ kúu ra, ta yi̱ꞌi̱ kúu ta̱a ta̱ ni̱no̱ ní ka̱ no̱o̱ ra. Yi̱ꞌi̱ kúu ta̱a ta̱ kísa chiño kuiti no̱o̱ ra”, ka̱chí ta̱Juan xíꞌin na.

Hechos 19:4

Ta ni̱ka̱ꞌa̱n ta̱Pablo xíꞌin na, káchí ra saá: ―Ndixa ta̱Juan sa̱kuchu ra ni̱vi xa̱ꞌa̱ ña na̱ndikó ini na ta sa̱ndakoo na ña o̱n váꞌa kéꞌé na. Ta saá ni, ta̱Juan nda̱to̱ꞌon ra ndí ndiꞌi ni̱vi xíni̱ ñóꞌó kandixa na ñii ta̱a ta̱ va̱xi sa̱ta̱ ra. Ta ta̱a ta̱ káꞌa̱n ta̱Juan xa̱ꞌa̱ kúu ta̱Jesús, chi ta̱yóꞌo kúu Cristo, ta̱a ta̱ ti̱ꞌví Ndios saka̱ku ni̱vi.

1 Juan 1:5

Ñayóꞌo kúu to̱ꞌon ña ni̱ka̱ꞌa̱n Jesucristo xi̱ni̱ so̱ꞌo ndi̱, ta vitin ndáto̱ꞌon ndi̱ to̱ꞌon yóꞌo xíꞌin ndó, ña káchí saá: Nda̱tán yóo ñoꞌo̱ ña yéꞌe, saá yóo Ndios, ta nda̱ loꞌo o̱n ko̱ó ñanaa yóo xíꞌin ra.