Apocalipsis 5:6 - Sharanahua: Diospan Tsain

⁶ Ascatan nannori chashoan cahuashara fustifia ahuun masho siete nantirifi ahuun furo un oian. Rutuafo ointsafia Diospan tsaoti ano nia ica. Nannorifi nan rafu non rafuri Diosin onihua yafi nan veinte cuatro icoinra huafo cushumisifoan tarati huayacunafo. Tsoa futsacai a cuscarama. Nanton ahuamamishti huatiro. Diosin Furun manifoti ano nichian ahuun Yoshin Sharahuunshon nantifi yorafo onancoinon.

Apocalipsis 5:6 Kruisverwysings

Lucas 1:69

Diosin nocon Numamisi nan ahuamamishti huamisi nocoqui nichian. Noco shunifoan aton niaifo David ipaoni. Nanton ahuun funa nocoqui nichian noco niaifocoin ipashanon.

Juan 1:29

Ascatan iyoconaino Juanpan Jesús aqui oaiton oinni. Ascanshon yorafo yoini isca huaquin, —¡Oincapon! Nan Diospan Chashoan Cahuashara cuscaracoin oi. Nanton nantifi yorafo nan icoinra huafotisi aton chaca soashonpacunaca.

Juan 1:36

Niafoanno Jesús ato finonfainaiton Juanpan oinquin ato yoini, —¡Oincapon! Nan Diospan Facu Chashoan Facu cuscara, —ishon ato yoini.

Hechos 8:32

Mapuinifoantan oinni Isaías cununi cuscan oinquin. Cunuquin isca huani, “Nan chashoan iyoshon rututirofo cuscan arifi iyonifo rutushcaquin. Chashoanun facu ahuun rani shatuainfoanno furoitiroma cuscarifiai arifi pusinima.

Apocalipsis 1:4

Ascan Asia mai ano man icati pushurasi siete nan Jesús icoinra huafo ichananmisifo un mato cunu fomai cuscan nicasharacahuun. Nocon Upa Diosin niyopaonishaquin natianrifi nicain nipanaca. Ahuun Yoshin Sharari afu ipamisi. Nan Upa Diosin yafi ahuun Yoshin Sharapan non Furun Jesucriston matohuun ramapaiyaino maton nomuran mato shinansharamapainonfo. Ahuaton maton nomuran fucash huanonma. Nocon Ifo Jesucriston Diospan tsain noco yoimisi cuscan non icoinra huatiro. Nan Diospan Facucoinfiacun rutunifo. Rutushon mai huafiafo Apa Diosin funimani afu ipashquin. Tsoa futsacai ascayomisima. Ascan Apafu ishon nantifi niaifofo maifoti anoafo ato iquishquin. Nanton noco noicoin. Ascashu ahuun imi focain noco nashoni ahuara chaca afanan nocon ifo inonma.

Apocalipsis 12:11

Ascacun nocon yorafoan fasi icoinra huacoinshon yoimisifo isca huaquin, ‘Nocon Ifo Jesús Diospan facu nan chashoan facu cuscara nocohuunoashu nani nocon chaca soashoshquin,’ ishon yoifoanfafaincani. Ascashon Jesushuunoa yoimisifo cuscan yafi ahuun imi focain ato nashonihuunshon Satanás finoncointirofo afanan ato ahuusca huanonma. Ascacun yoitirofo isca huaquin, ‘Nan icoinra huamafoan noco rututirofia noncai ratuyamacai nocon Ifo Jesús potapacunacamaran,’ ishon nan icoinra huafoan yomisifo.

Apocalipsis 13:8

Ascan nanfoan nantififain nan yoina pofu cuscara noishcani. Ascashon yoiquin isca huashcani, —Minfin nocon Diosiquin, —huashquicani. Ascaifoancai nocon Ifo Jesús aton anu ahuun libro muran cunuima afu nipanonfo. Mai oni huataima Jesús nantifi icoinra huanonpacoaifoan ato anufo ahuun libro muran iquisi cunuyoni afu ipanonfo. Ascashu nan chashoanun facu cuscarashu noco nashoni noco nimapacushquin.

Apocalipsis 14:1

Ascatan uhuun namapan ointsa ua oinmana cuscan afanan mato tapimai. Chashoan facu cuscara nan Jesús machi ahuun anu Sión ano nia un oian. Nanno 144,000 ahuun yorafo afu nia. Ahuun anu yafi Apa Diosin ahuun anuri aton fumananqui cunua.

Apocalipsis 17:14

Ascacashon nan nocofunun yoina pofu cuscara futan nan mucu rafuti niaifofoan nocon Ifo Jesús ahuun yorafoya noicasmacani. Jesús ahuun yorafo cunani ahuun tanamisifo inonfo. Ascashon ato catoan. Nanfo ahuuscarafiaino nocon Ifon cachiquiri huamisima. A tanacoinmisifo. Nan yoina pofu cuscara nan mucu rafuti niaifofo futan Jesús chashoan facu cahuan sharashta cuscara nan nocon Ifo yafi ahuun yorafo rutumapaishcani. Rutupaiyaifoan atorocofin Jesús ato namashquin. Nantianri ahuun tanamisifo afu iishquicani. Nocon Ifon nantifi niaifofo uhuapafo non niaifofo patashariri aton niaifocoinshon ato iquitiro. Nocon Ifon Jesús aton Ifocoinshon ato iquitiro. Nantifi niaifofo yafi ifoafori manifoti anoafo ato iquitiro. Ascan tsoancai nocon Ifon Jesús shuhuintiroma ahuun tanamisifocai ato tsoan cuyotiroma, —ishon nan Diosin oinmati afu nai muran imisiton ua yoia.

Apocalipsis 21:22

Ascan nanno Dios fu tsainti pushu yamai. Upa Dios nan ahuamamishti huatiro yafi nocon Ifo Jesús nan chashoan facu cahuan sharashta cuscara Jerusalén funa muran imisifo. Ascacufin yorafo atofu tsainpai pushu yopacanima.

Apocalipsis 21:23

Nanscarifiai nanno fari yafi oshu yopacanima. Upan Dios yafi Jesús nan chashoan facu cahuan sharashta cuscara atofu ica. Upan Dios nanno ishon ato chashashona. Jesusrifi aton lamparina cuscara ato otashona cayacafi oinsharanonfo.

Apocalipsis 22:1

Ascan uhuun namapan ointsa Diosin ahuun oinmati afu ica futsan Dios icanomain ahuu cuscaraquin ua isma. Upa Dios yafi Jesús nan chashoan facu cahuan sharashta cuscara tsaoa anoashu unu tsosi cristal shafacaficoin ointsa afain. Icafo nushmancayan unu afain. Nanno icafoan nan unu tsosi shara ayapaiyaitian ayatiro. Nannoashu nipanaca. Nannori fai nushmancayan ica. Unu ocama rafu nii shocoa. Nan nii ahuun fimi piipaiyaitian pitiro. Nanscarifiai Dios no fu ipacoiainno non ahuunoashu nipasharashquin. Nan nii oshutifi fimimisi. Ahuun pui tsasipacunacama ahuun shachoco funa shara ipanaca. Ahuunoashu manifoti non Dioshuunoashu muma funa shara ipanaca.

Apocalipsis 22:3

Nanno Jerusalén funa Upa Diosin yafi Jesús no fu iishquin. Non aton yoracoinshon non ato noicoinshquin. Non aton oinmati cuscara iishquin. Ato fanainsharashocun ato yoisharapacunaca. Ascan nocon mai shuni ano chaca futsa futsatapafo ipaoni cuscacai nan Jerusalén funa ascarama. Ahuashta chaca amuran itiroma.

Apocalipsis 4:8

Nan cuatro putao ya seis putao ya. Nan ato putao ocuma rafu furo ichapayari. Shafatisho yafi yamutishori nan rafu non rafuri fanainquin isca fafaincani, “Nocon Ifo Dios fasi sharacoin. Shara fustisi huapanaca. Nantofin ahuamamishti huatiroquin. Iyopaonishaqui natianri ipamisi. Ascashuri ipanacaran,” icashu nan rafu non rafuri fanainriacani. Ascashon yoiafori isca huaquin, “Nocon Ifon Diosin mirus fusti min nocon Ifocoin. Tsoa futsacai mia cuscara sharama. Min isharapacunaca. Ascacufin non mia fasi noiquin aicho huai. Min noco shara huafafaini,” ishon nan rafu non rafuriton yoiriaifoanno nan icoinra huafo cushumisifo veinte cuatrofain nocon Ifo Diosin ahuun tsaoti camaqui tsaoa naman fuoshopacufoan aton maiti oro ointsa sharashtacoin nocon Ifo tsaoa afofori nannosi huacashon yoiafo isca huaquin, “Nocon Ifo Diosin min noco maiti inan cuscan non mia afanan nasoin. Man min noco inanfiacun non mia fasi noicoinquin noco maitifo non mia afanan nasoin. Ascan mirus fustifin min noco iquitiroquin. Min nocon Numamisi. Ascashu mirus fusti min nocon Ifocoin.

Apocalipsis 5:11

Ascatan un oianri Diosin oinmatifo afu nai muran icafo ichaparasicoin tsoancai ato tanan huatiroma. Nanfo fanaincaifoan oinfain un ato nica. Diosin tsaoti ano tarati huayacunafo nan Diosin onihuani rafu non rafuri non nan Jesús icoinra huafo cushumisifo veinte cuatro naqui huayacunafo. Ascashu nanfo ya osiashu Diosin oinmatifo fu fanaincaifoan un nica.

Apocalipsis 5:12

Fasi oi ashcafinin fanaincani iscafo, “Diospan facu Jesús chashoan cahuashara cuscara sharashtacoin man rutunifo. Ascafia natian nantifi manifoti ato iquifain nantifi nai murannoafoti yafi mai anoafori ahuuna iquin. Naantofin nantifi tapicoianquin ahuun curushhuunshon ahuamamishti huatiro. Ascacun nantifiton min sharacoinran mia huapanonfo. Mirus fustifin min nocon Ifo iquicain. Ascacun ¡Aicho! Min nocon Ifo ishara fustipacunacaran,” icashu fanaincani.

Apocalipsis 5:13

Ascatafin un nica nantifi nai murannoafo fanaincaino mai anoafori fanaincaino unuhuan anoafori fanaincani iscafo, “Upa Diosin ahuun tsaoti ano tsaoa. Furun Jesús chashoan facu cuscara sharashta nan rafu nocon Ifo isharafustipacumisifo. Ascacun nantifiton man sharacoinran ato huafain man fusti nocon Ifocoin ahuamamishti man huatiroran, ishon yoipacunonfo,” icashu fanaincani.

Apocalipsis 5:14

Ascatan nan rafu non rafuri Diosin onihuanifoan yoiquin isca huafo, —¡Aicho! Nanscasi ipanon. Amen, —icaifoanno nan veinte cuatro Jesús icoinra huafo cushumisifo nan Dios yafi Furun nanman fuopacufoannafo. Nanfoanrifi Upa Dios yafi Jesushuunoa yoisharafo.

Apocalipsis 6:16

Ascatan fasi fiisiyanan yoiafo isca huaquin, —¡Ohuashta! Upa Diosin nai murannoaton ahuun Furun Jesús nan chashoan facu cuscara natian nocoqui sinacoin. Ascacun non ahuuscatiromun omitsiscashquima. Tsoashtacain Diosin numatiroma noco onaintimanonma. Ascacun na machi cuyafo yafi toquirininhuan noco camaqui pacupainon Diosin noco fuchishon noco omitsisca huanonma, —ishon nan nicacasmamisifoan yoiafo.

1 Samuel 2:10

Tsoan nocon Ifo Diosi noicasmaquin aqui chaca huaiton Diosin ato omitsiscamacoin. Diosin nan icanoshon ahuun tsain curush turuica nicatsa ato shatumashquin. Nocon Ifo Diosin nantifi manifoti anoafo ato yoipacushquin isharamisifo iyamarai chaca huamisifo. Nan Diosin catoan fusti ato niaifocoin iishquin. Diosin ahuun curush nan niaifo inain. “Nanfin mato niaifocoin. Uhuunshon mato iquiniran,” ishon nocon Ifo Diosi nan niaifohuunoa nantifi yorafo yoishquiran, —ishon Anapan cufini.