Apocalipsis 15:4 - Sharanahua: Diospan Tsain

⁴ Ifon, nantififain miqui musucaquin mia nicasharapainonfo. Min ahuamamishti tsoan oinyomisima min atiroquin. Nantifi yorafoti anori yoipacunonfo. Mirus fusticai min chaca huamisima. Nantifi manfoti miqui funonfo. Min shara fustisi huamisi. Nantififain oinquin isca huashquin, ‘Min sharacoin. Min nocon Ifocoinran,’ ” ishon mia yoishcani.

Apocalipsis 15:4 Kruisverwysings

Salmos 86:9

Tsoa futsacai mia cuscarama. Min ahuamamishti huatiro. Minfin yorafo ashotiro cuscan fasi sharacoin. Mirus fustifin Min Diosiquin. Min nantifi yora manifoti ato oni huani. Ascan nanfo miqui futirofo mia cufinshcaquin. Mihuunoa nantifi yoisharashcaquin.

Romanos 15:9

Mani futsafoanri icoinra huashon yoishcani isca huaquin, —¡Aicho! Upa Diosin nocohuun ramapaiquin ahuun Furun nocoqui nichini. Noco numanon. Upa Dios shararan, —ishon mani futsanfoan yoishcani. Nannori Diosin tsain cununi isca huaquin, “ ‘Ascan un mani futsafo mihuunoa un yoisharashquin. ¡Aicho Dios shararan!’ ishon un mihuunoa ato yoishquin. ‘Un mihuunoashu fanainsharashquiran,’ ” ishon cununi.

1 Pedro 1:16

Diospan tsain cununi isca huaquin, —Unfi isharamisiquin. Ascan marifi isharacahuun, —ishon Diosin yoini cuscan cununi.

Apocalipsis 11:15

Ascaino Diosin oinmati afu ica futsan ahuun manuti chaan chaan acaino nai muran Upa Dios icarishon oi ashcafinin yoiafo isca huaquin, “Natian nocon Ifo Diospan Facu nantonfin nantifi yora manifoti ato iquina. Ascashu arusu fusti aton niaifo unupacunacamaran,” ishon yoiafo.

Apocalipsis 14:7

Oi ashcafinin ato yoia isca huaquin, —Diosquiri shinancahuun. Mato yonoa cuscan man ayamashu aqui ratucoincahuun. Nicacoinsharacahuun. “Min sharacoin min ahuamamishti min atiroran,” huacahuun. Natian Diosin nantifi chacamisifo onaintimai. Nanton nai onihuafain mai onihuafain unuhuan saoya onihuafain unu tsosi sharari onihuani. Ascan a noicahuun. A yoihuu isca huaquin, “Min sharacoin min ahuamamishti atiro. Min nocon Ifon Dios shararan,” huacahuun, —ato huaa.

Apocalipsis 16:5

Nantianri oinmati futsan Dios fu tsaincaiton un nica. Nan unu cushumisiton isca huaquin yoia, “Upa Diosin tsoa min oni huataima min iyopaoni. Min ipaoni cuscan natianri min nipanaca. Min shara fustisi imisi. ¡Aicho! Nantianri mia nicacasmamisifo min ato onaintimai cuscan iconcoin. Aton chaca shatucanashu min Furun Jesús Ifocoianfo non min tsain aton yoimisifori nan icoinmaran huafoan ato rutuafo. Ascacufin min icoinra huafoma namai cuscafin iconquin. Min yorafo fasi omitsiscamamisifo ascan min nan icoinmaran huafo onaintimai omitsiscanonfo. Min cayacafi iconcoin ato onaintimaran,” ishon Diospan oinmatinin yoia.

Apocalipsis 16:7

Asca huashon Dios icanoa nai muran nan cufiti ano fustishosi Upa Diosin cufinmisifo anoa un futsanfo nica yoiquin isca huaifoan, —Nocon Ifon Diosin, min nai oinmati yoia cuscan iconcoin. Mia nicayosma shunifo min ato icon cayacafi ato onaintimairan, —ishon yoiafo.

Apocalipsis 3:7

Ascatan afanan Jesús ua yoiqui isca huaa, —Ua icoinra huafo Filadelfia anoa aton Diosin tsain yoimisi un yoipaiyai cuscan ua cunushoquin isca huai. “Unquian un maton Ifo Jesús, un mato yoisharapai man tapinon. Unfin ishara fustimisiquin. Uhuun tsainrifi iconcoin. Pushu ifo shafiya arus fusti pushu fuputiro yorafo iquimai iyamarai fupotiro futsafo iquinonfoma. Nanscarifiai maton niaifo David shafi cuscara ipaoni. Tsoa ahuun mai ano imapai iyamarai ato nitun huapaoni iquinonma. Nanscarifiai unfi David funaquin. Urus fusti un yoitiro upa Dios icano tsoa iquitiro iyamaraimain iquitiroma. Ascacun un mia yoi isca huaquin.

Apocalipsis 4:8

Nan cuatro putao ya seis putao ya. Nan ato putao ocuma rafu furo ichapayari. Shafatisho yafi yamutishori nan rafu non rafuri fanainquin isca fafaincani, “Nocon Ifo Dios fasi sharacoin. Shara fustisi huapanaca. Nantofin ahuamamishti huatiroquin. Iyopaonishaqui natianri ipamisi. Ascashuri ipanacaran,” icashu nan rafu non rafuri fanainriacani. Ascashon yoiafori isca huaquin, “Nocon Ifon Diosin mirus fusti min nocon Ifocoin. Tsoa futsacai mia cuscara sharama. Min isharapacunaca. Ascacufin non mia fasi noiquin aicho huai. Min noco shara huafafaini,” ishon nan rafu non rafuriton yoiriaifoanno nan icoinra huafo cushumisifo veinte cuatrofain nocon Ifo Diosin ahuun tsaoti camaqui tsaoa naman fuoshopacufoan aton maiti oro ointsa sharashtacoin nocon Ifo tsaoa afofori nannosi huacashon yoiafo isca huaquin, “Nocon Ifo Diosin min noco maiti inan cuscan non mia afanan nasoin. Man min noco inanfiacun non mia fasi noicoinquin noco maitifo non mia afanan nasoin. Ascan mirus fustifin min noco iquitiroquin. Min nocon Numamisi. Ascashu mirus fusti min nocon Ifocoin.

1 Samuel 2:2

Tsoa futsacai mia cuscara sharacoinma. Mirus fusti min noco Numamisi. Mirus fusti min ahuamamishti huatiro. Toquirininhuancai tsoan shucatiroma. Nanscarifi ai min nocon Diosi min acai cuscacai tsoan mia nitu huatiroma.