Santiago 1:21 - Manobo Western Bukidnon

²¹ Engkezi niw en is minsan hengkey he meremerik he ulaula wey is kelelalung. Pesakup kew te Megbevayà; hemeni niw is lalag din he impesavut en keniyu su iyan ebpekelibri keniyu te silut.

Santiago 1:21 Kruisverwysings

Mateo 5:5

Utew zeyzey sikandan is kenà mepelevawen su egkezawat dan kes tuvad he impenaad te Megbevayà.

Juan 6:63

Iyan dà ebpekeveg̵ey te untung he wazà pidtemanan is Wag̵as he Mulin-ulin. Wazà egkehimu te lawa zà duen. Is menge lalag he migkag̵i ku keniyu, diyà ebpuun te Wag̵as he Mulin-ulin, ne ebpekeveg̵ey te untung he wazà pidtemanan.

Juan 6:68

Ne midtavak si Simon, sikan is migeraran ki Pedro, ke sikandin te, “Wazà duma he egkesundanan dey su iyan ke zà ebpenurù te paag̵i te kebpekeangken te untung he wazà pidtemanan.

Nengeulaula 10:33

Umba,” ke si Cornelio, “segugunè ku sikew impeveyai ne selamat utew su nekeuma ka kayi. Ne g̵untaan nengetig̵um key en dini te etuvangan te Megbevayà su ebpemineg̵en dey is minsan hengkey he insug̵ù din kenikew he ipesavut kenami.”

Nengeulaula 13:26

Ne menge suled,” ke si Pablo, “sikiyu is menge zuma ku he kevuwazan ni Israyil wey kevuwazan ni Abraham, wey sikiyu zaan is kenà Hudiyu he ed-azap daan te Megbevayà, iyan kiw kes mibpeuwitan te Megbevayà te Meupiya he Tudtulanen wey kiw melibri te kedsiluti kenitew.

Ruma 1:16

Utew zekelà is kedsarig ku te Meupiya he Tudtulanen su emun edtuuwan heini te minsan hentei, puun te menge Hudiyu pehendiyà te kenà menge Hudiyu, edlibriyen sikandin te silut pinaag̵i te zekelà he g̵ehem te Megbevayà.

Ruma 11:17

Is menge kevuwazan ni Israyil, ne iring sikandan te kayu he ulivu he ed-elimahan te Megbevayà. Ne zuen menge subpang dutun te kayu he midtamped te Megbevayà. Ne sikiyu is kenà menge Hudiyu, ne iring kew te menge subpang te wazà ipemula he ulivu he in-ilis te Megbevayà he impetuvù din dutun te midtempezan din te subpang. Ne iring ded daan guntaan utew meupiya is kedtuvazi keniyu te Megbevayà, iring te meupiya zaan is kedtuvazi zin dengan te menge Hudiyu.

Ruma 6:17

Dengan iring te nengeuripen kew te mezaat he kebayà, iyan, guntaan utew zekelà is kebpeselemati ku te Megbevayà su mibpurungan niw te edtuman is tutuu he tuluuwen he impenurù keniyu.

1 Kurintu 15:2

Ne pinaag̵i kayi te Meupiya he Tudtulanen he impenurù ku keniyu, egkelibri kew te silut te Megbevayà emun kenè niw ed-engkezan. Su emun ed-engkezan niw kenè bes hustu is kedtuu niw.

2 Kurintu 7:1

Ne g̵eina te iyan heini impenaad kenita te Megbevayà, ne edlumpiyuwen ta is menge ulaula ta su wey wazà minsan hengkey he meremerik he ulaula te lawa ta wey meremerik he isip ta. Ne ebpurungan ta is ulaula ta su wey meheg̵eti is kebmetazeng ta pinaag̵i te layun ta kedtehuza kandin.

Ipisu 1:13

Ne iring din ded daan diyan te keniyu su hein impesavut keniyu is tutuu he tuluuwen he iyan kes Meupiya he Tudtulanen mehitenged te kedlibriya kenitew te silut, nemeketuu kew ki Kristu, ne midhimu kew zaan te Megbevayà he menge sakup din pinaag̵i te kebeg̵aya zin keniyu te Wag̵as he Mulin-ulin he zaan he impenaad din.

Ipisu 4:22

Tenged kayi engkezi niw is menge isip te zaan he kegkeetew niw su nesakup heini te zaan he menge mezaat he ulaula niw. Ebpekezezaat keniyu heini pinaag̵i te ebpemekelimbung he kebayè din.

Ipisu 4:25

Umba, menge suled, engkezi niw is kedtarùtarù. Kinahanglan he tutuu is egkeg̵iyen niw ziyà te menge zuma niw. Su nesevaha kiw he pudu parti te lawa ni Kristu.

Ipisu 5:4

Kenè niw g̵emita is menge meremerik, mahawag, wey wazè din pulus he menge lalag, kekenà, layun dekelà is kebpeselemati niw te Megbevayà.

1 Tiselunika 1:5

su impesavut dey keniyu is Meupiya he Tudtulanen, kenà pinaag̵i te lalag dey zà, kekenà, pinaag̵i te g̵ehem te Wag̵as he Mulin-ulin. Midheg̵et te Megbevayà dutun is kedsevuta zey kayi. Ne netuenan niw zaan ke hengkey is menge ulaula zey he meupiya wey kew mezeyzey hein diyan key te keniyu.

1 Tiselunika 2:13

Ne elin daan layun dey ibpeselemati te Megbevayà is: hein impesavut dey keniyu is Lalag te Megbevayà, midawat niw su nesavut niw he Lalag te Megbevayà ne kenà lalag te etew zà duen. Su pinaag̵i te lalag din egkelig-enan is kedtuu tew te nemeketuu kandin.

Tito 2:11

Impeg̵awag̵awa en guntaan is gag̵ew te Megbevayà su wey mehimu he melibri te silut is tivuuk he menusiyà.

Hibriyuhanen 12:1

Ne sikitew zaan, menge suled, kayi te kedtuu tew te Megbevayà, ne iring kiw te ebpelumlumbeey. Ne g̵eina te utew mezakel is menge tumutuu zengan he nekepaahà kenitew he metinumanen is Megbevayà, kinahanglan he ed-engkezan tew en is minsan hengkey he ebpekesanggen kenitew te edlumbà wey is kenà hustu he ulaula he henduen be te layun tew egkeulaula, ne ebpekezesen kiw te ebpelelag̵uy taman te ebpekeuma kiw ziyà te edungguan tew.

Hibriyuhanen 2:3

Ne iring din ded daan, sikitew is menusiyà, kenè kiw zaan ebpekelikey te silut te Megbevayà emun ebey-anan tew, ne kenè tew edtumanen is impenurù kenitew mehitenged te mekeg̵eg̵ehem he kedlibriya zin kenitew te silut. Is nehuna he nekepenudtul kayi, ne iyan en is Nengazen tew he si Jesus. Ne is menge etew he nemekezineg kandin, edtistig̵usan dan dini te kenitew he tutuu heini.

Hibriyuhanen 4:2

Su sikitew, nezineg tew zaan is kebpenudtula te Meupiya he Tudtulanen iring te menge g̵in-epuan tew zengan. Iyan, minsan te nezineg dan is impesavut kandan te Megbevayà, wazà pulus kayi ziyà te kandan su zutun te kegkezineg̵a zan kayi, wazè dan tuuwi.

Santiago 4:8

Aput kew ziyà te Megbevayà ne ed-uvayan kew zin. Sikiyu is mekesesalà, engkezi niw is menge ulaula niw he mezaat. Sikiyu is uvag dà is kedtuu zan, pelumpiyuwi niw te Megbevayà is isip niw wey g̵ehinawa niw.

Santiago 5:20

tentenuzi niw he is neketavang kandin, nehimu en he paag̵i wey melibri sikandin te silut. Ne pinaag̵i zutun egkepesaylu is utew mezakel he menge salà dutun he etew.

1 Pedro 1:22

Ne g̵eina te nemeketuu kew en te tutuu he tuluuwen nengelumpiyuwan kew en te mezaat he ulaula ne kenà tarù is kebmahala niw te menge zuma niw he tumutuu. Minsan pa zutun, heg̵eta niw pa is kebmahala niw ziyan te g̵ehinawa niw te kada sevaha te menge zuma niw.

1 Pedro 1:9

su egkezawat niw en guntaan is kedlibriya keniyu te silut he iyan ebperetengan niw tenged te midtuu kew kandin.

1 Pedro 2:1

Ne g̵eina te veg̵u ki en he etew, ed-iniyug̵an te en is minsan hengkey he kebpesipala wey is kedtarùtarù. Kinahanglan he kenà tarù is kedsundan ta te Megbevayà; kenè ki egkesina ne kenè ki ebpemenulà.

1 Pedro 2:11

Menge minahal ku he suled, kenè en hustu he inged tew heini is kelibutan su menge humuhulevungà kiw zà dini. Ne tenged dutun edhengyuan ku sikiyu he kenè niw pezumdumahi is menge mezaat he kebayè niw su ebpekesanggen heini te kedsundan niw te Megbevayà.